Iphulo Lokufuna Ulonwabo
KWIMINYAKA embalwa eyadlulayo, abantu baseBritani, eFransi, eJamani, naseUnited States babuzwa umbuzo othi, “Yintoni efunekayo ukuze ubani onwabe?” Kwabo kwenziwa udliwano-ndlebe nabo, abangama-89 ekhulwini bathi kufuneka ubani abe sempilweni; abangama-79 ekhulwini bathetha ngokuba nomtshato okanye iqabane elanelisayo; abangama-62 ekhulwini bathetha ngomvuzo wokuba ngumzali; yaye abangama-51 ekhulwini bathi kufuneka ubani aneliseke kumsebenzi wakhe ukuze onwabe. Yaye nangona ngokuqhelekileyo abantu befundiswa ukuba imali ayisiso isiqinisekiso solonwabo, abangama-47 ekhulwini kwabaye babuzwa, bathi imali iyaluzisa ulonwabo. Izibakala zibonisa ntoni?
Okokuqala, qwalasela indlela imali enxulunyaniswa ngayo nolonwabo. Olunye uhlolisiso lwabona bantu abazizityebi abalikhulu eUnited States lwabonisa ukuba babengonwabanga ngaphezu kwabantu nje abaqhelekileyo. Ngaphezu koko, iingcali zengqondo zithi nangona abaninzi eUnited States baye baziphinda kabini izinto zabo eziphathekayo kwiminyaka engamashumi amathathu edluleyo, abonwabanga ngakumbi kunangaphambili. Enyanisweni, enye ingxelo ithi: “Kwixesha elifanayo, inani labantu abadandathekileyo liye lantinga. Inani labantu abakwishumi elivisayo abazibulalayo liye laphindwa kathathu. Inani lemitshato eqhawukayo liye laphindwa kabini.” Kumazwe ahlukahlukeneyo anokuba angama-50, abaphengululi abaye bahlolisisa unxulumano olukhoyo phakathi kwemali nolonwabo baye bagqiba ngelithi imali ayikwazi ukuthenga ulonwabo.
Okwesibini, ukuba sempilweni, umtshato owanelisayo nokuphumelela emsebenzini kubaluleke kangakanani kulonwabo? Kaloku, ukuba ezi zinto bezifuneka ngokuqinisekileyo ukuze ubani onwabe, kuthekani ngezigidi zabantu ezingekho mpilweni nabo bonke abanganelisekanga emtshatweni? Kuthekani ngezibini ezitshatileyo ezingenabantwana nawo onke amadoda namabhinqa angaphumeleliyo emsebenzini? Ngaba bonke abantu abanjalo baya kuhlala bengonwabanga? Yaye ngaba abo kuthiwa bonwabile kuba besempilweni yaye benomtshato owanelisayo luya kuphela olo lonwabo ukuba iimeko ziyatshintsha?
Ngaba Ulonwabo Silufuna Kwindawo Efanelekileyo?
Wonke umntu uyafuna ukonwaba. Oku akumangalisi kuba uMdali womntu uchazwa ‘njengoThixo onoyolo,’ yaye umntu wenziwe ngokomfanekiselo kaThixo. (1 Timoti 1:11; Genesis 1:26, 27) Ngoko ke, kuyinto nje eqhelekileyo ukuba abantu bafune ukonwaba. Kodwa, abaninzi bathi uyazikhohlisa xa ucinga ukuba uza kuhlala wonwabile—ulonwabo asinto ehlala ikho.
Noko ke, ngaba kunokwenzeka ukuba abanye bayazibaxa izinto xa befuna ulonwabo? Isithandi sobulumko kwezentlalo uEric Hoffer ucinga njalo. Wathi: “Xa ubani efuna ulonwabo kokukhona engonwabi.” Oko kuyinyaniso ukuba sifuna ulonwabo kwindawo engafanelekanga. Kwimeko enjalo, ngokuqinisekileyo siza kudimazeka size sidandatheke. Ukufuna ukuba sisityebi; ukufuna udumo okanye ukwaziwa; ukufuna ukuba nguthile kwezobupolitika, kwezentlalo okanye kwezoqoqosho; okanye ukuzingca nokufuna nje ukuzanelisa ngokukhawuleza akuzisi ulonwabo. Akumangalisi ke ngoko ukuba abanye baye baba nembono ebonakala iziphikisa efanayo neyomnye umbhali owathi: “Ukuba nje singayeka ukufuna ukonwaba singonwaba”!
Okuphawulekayo kukuba, uhlolisiso ekuthethwe ngalo ekuqaleni kweli nqaku nalo luye lwabonisa ukuba abantu aba-4 kwabali-10 bavakalelwa kukuba umntu uyonwaba xa esenza okuhle yaye enceda abanye. Yaye umntu omnye kwabane wathi ukholo nonqulo lubalulekile ukuze ubani onwabe. Kucacile ukuba, kufanele sazi ngoko kufunekayo ukuze ubani onwabe ngokwenene. Inqaku elilandelayo liza kusinceda ukuba senjenjalo.
[Imifanekiso ekwiphepha 3]
Abaninzi bacinga ukuba imali, ubomi bentsapho obanelisayo, okanye ukuphumelela emsebenzini kubangela ulonwabo. Ngaba nawe utsho?