Ulonwabo—Luziinkwenkwezi

UMSINDO, ixhala nodandatheko, ezi zizinto ekudala kujikajikwana nazo kuphando lwezenzululwazi. Phofu ke, kwiminyaka yakutshanje, izazinzulu ezingoompondo zihlanjiwe beziphanda ngento entle nenqwenelwa ngabantu—ulonwabo.

Yintoni enokwenza abantu bonwabe ngakumbi? Ngaba bubutsha, kukuba zizityebi, kukuba sempilweni, kukusuk’ egadeni, okanye kukuncipha? Siyintoni isikhokelo sokufumana ulonwabo lokwenene? Inkoliso yabantu ikufumanisa kunzima ukuphendula loo mbuzo, ukuba ke phofu inayo kwaimpendulo yawo. Xa bekhangela imizamo yabantu ephelel’ emoyeni yokufumana ulonwabo, mhlawumbi abanye baya kukufumanisa kulula gqitha ukuxela oko kungesosikhokelo sokufumana ulonwabo.

Kangangexesha elide, izazi ngengqondo ezitshotsh’ entla bezincomela intanda-bulumko yokukhathalela isiqu sakho njengesikhokelo sokufumana ulonwabo. Ziye zakhuthaza abantu abangonwabanga ukuba bazixakekise kuphela ngokwanelisa iintswelo zobuqu. Ibinzana elithimb’ ingqalelo elinjengelithi “yiba ngulo mntu unguye,” “kwazi okusembilinini yakho,” nelithi “khawuzifune” liye lasetyenziswa kunyango lwengqondo. Kodwa, kwaezinye kwezi ngcali zibatha lo moya abantu ngoku ziyavuma ukuba isimo sengqondo sokuzingca esinjalo asibangeli lonwabo luhlala luhleli. Ukuzicingela kuzisa intlungu nokungonwabi nje kuphela. Ukuzingca akusosikhokelo sokufumana ulonwabo.

Isikhokelo Sokungonwabi

Abo bajonge ukufumana ulonwabo ngokusukelana noyolo basabeth’ ecaleni. Qwalasela nje umzekelo wesilumko esinguKumkani uSolomon woSirayeli wamandulo. Kwincwadi yeBhayibhile yeNtshumayeli, ucacisa athi: “Andiwabandezanga into yonke ayibizayo amehlo am; andiyivimbanga intliziyo yam namnye umvuyo; ngokuba intliziyo yam yayivuya emigudwini yam yonke, saba sesi ke isabelo sam emigudwini yam yonke.” (INtshumayeli 2:10) USolomon wazakhela izindlu, watyala izidiliya, waza wenza nemiyezo, iipaki namaqula amanzi. (INtshumayeli 2:4-6) Wakha wabuza oku: “Ngubani na otya nosela kamnandi njengam nje?” (INtshumayeli 2:25, NW) Imilonji kunye neemvumi zazimenza azive ekwesikaMlebese lulonwabo, yaye wayeyoliswa nalulwalamano lwezona nzwakazi zimanz’ andonga zelo lizwe.—INtshumayeli 2:8.

Ingongoma isekubeni, uSolomon wayengazibandezi ulonwabo. Sisiphi isigqibo awafikelela kuso emva kokuba nentaphane yezi zinto zimnandi ebomini? Wathi: “Ndabheka mna ezenzweni zam zonke, ezazenzayo izandla zam, nasemigudwini yam endaphuka yiyo ukuyenza; ndayibona ukuba yonke loo nto ingamampunge nokusukelana nomoya akukho lungelo phantsi kwelanga.”—INtshumayeli 2:11.

Izinto ezafunyaniswa ngulo kumkani usisilumko zisenjalo unanamhla oku. Ngokomzekelo cinga ngelinye ilizwe elime kakuhle ngobutyebi iUnited States. Kule minyaka ingama-30 idluleyo, amaMerika ebenezinto eziphathekayo ngokuphindaphindiweyo, njengeenqwelo-mafutha noomabonwakude. Ukanti, ngokutsho kweengcali zengqondo, amaMerika akonwabanga kwaphela. Ngokutsho komnye umthombo, “kwakule minyaka, udandatheko belukhwela luzehlela kuwo. Ukuzibulala kwabakwishumi elivisayo kwande ngendlela eshiy’ amehlo. Uqhawulo-mtshato lona lwaphul’ izikeyi.” Kutshanje neengcaphephe zophando ziye zafikelela kwizigqibo ezifanayo emva kokuphonononga ukuhlobana kwemali nolonwabo kuluntu lwamazwe awahlukahlukeneyo anokuba ngama-50. Ngamafutshane, akunakuluthenga ulonwabo.

Ngokwahlukileyo koko, ukusukelana nobutyebi kunokubizwa ngokufanelekileyo ngokuthi sisikhokelo sokungonwabi. Umpostile uPawulos walumkisa wathi: “Abo bazimisele ukuba zizityebi bawela ekuhendweni nakumgibe nakwiminqweno emininzi yokungabi nangqiqo neyenzakalisayo, ephosela abantu entshabalalweni nasekonakaleni. Kuba ukuthanda imali yingcambu yazo zonke iintlobo zezinto ezimbi, yaye ngokuzabalazela olu thando bambi baye balahlekaniswa nokholo kwaye baye bazixhokroza kuyo yonke indawo ngeentlungu ezininzi.”—1 Timoti 6:9, 10.

Ubutyebi, impilo, ubutsha, ubuhle, amandla, nokuba ungazidibanisa ezi zinto azinakukuqinisekisa ngolonwabo oluhlala luhleli. Ngoba? Ngenxa yokuba asinawo amandla okuthintela izinto ezibuhlungu ukuba zingenzeki. UKumkani uSolomon wayehlab’ emxholweni xa wayesithi: “Ngokuba umntu akalazi nexesha lakhe; njengeentlanzi ezibanjiswe ngomnatha ombi, nanjengeentaka ezibanjiswe ngomgibe, banjalo ukurhintyelwa kwabo oonyana babantu ngexesha elibi, xa libawele ngesiquphe.”—INtshumayeli 9:12.

Usukelo Oluziinkwenkwezi

Akukho mzamo wophando lwenzululwazi olunokuthi gqi nesicombululo okanye iqhinga eliqulunqwe ngabantu lokufumana ulonwabo. Kwakhona uSolomon wathi: “Ndabuya ndabona phantsi kwelanga, ukuba ukugidima asikokwabanamendu, imfazwe asiyeyamagorha; kananjalo isonka asisesezilumko; kananjalo ubutyebi asibobabanengqiqo; kananjalo ubabalo asilolwabanokwazi; ngokuba bonke bephela bafikelwa lixesha nasisihlo.”—INtshumayeli 9:11.

Abaninzi abavumelana nala mazwi angasentla baye bagqiba kwelithi ukujong’ enkalweni ulindele ubomi obonwabisa ngokwenene kukujonga ukuza kukaNxele . Omnye umhlohli odumileyo wathi “ulonwabo luyintelekelelo.” Kanti abanye bakholelwa kwelokuba isikhokelo sokufumana ulonwabo yindaba yakwamkhozi, yaye ubuchule bokutyhila le ndaba bujizekwe nje ibathwana elinesakhono kwimilingo.

Sekunjalo, kwiphulo labo lokufuna ulonwabo, abantu bayaqhubeka belinga iindidi ngeendidi zokuphila. Phezu kwako nje ukubuya nemband’ esikhova kwabo babephambi kwayo, namhlanje inkungu nelanga yabantu isaleqana nobutyebi, igunya, impilo, okanye uyolo njengesicombululo sokungonwabi kwayo. Eli phulo lisaqhutywa kuba embilinini yayo, inkoliso yabantu ikholelwa ekubeni ulonwabo oluhlala luhleli aluyontelekelelo nje kuphela. Lunethemba lokuba ulonwabo aluzonkwenkwezi. Usenokuthi ke uzibuze, ‘Ndinokulufumana njani?’