Abavakalisi BoBukumkani Bayabalisa
Ukukhunjulwa ‘Kwamaxhoba Alityelweyo’
EBUTSHENI bowama-2001, uHaykaz, iNgqina likaYehova elineminyaka eli-15 ubudala, waya kubona umboniso onomxholo othi “Amaxhoba Alityelweyo,” eBern, eSwitzerland, owawubonisa ngokutshutshiswa kwamaNgqina kaYehova ngamaNazi. Ekupheleni kotyelelo lwakhe, uHaykaz wathi: “Ndiye ndeva indlela amaNgqina kaYehova awaphathwa ngenkohlakalo ngayo ngumkhosi wamaNazi, kodwa bendiqala ukubona amaxwebhu neefoto zokwenene zaloo mihla. Imiboniso, iingxelo ezinikelwe ngamangqina akubonayo oku namagqabaza ababhali-mbali akuloo mboniso, konke oku kwandichukumisa ngokunzulu.”
Emva kwexesha elithile, xa uHaykaz wanikwa isabelo sokuba abhalele abo afunda nabo kwisikolo samabanga aphakamileyo ingxelo, wakhetha umxholo othi “Amangqina KaYehova—Amaxhoba Alityelweyo AmaNazi.” Utitshala wakhe wavuma ukuba abhale ngaloo mxholo kodwa waxelela uHaykaz ukuba kufuneka asebenzise nezinye iincwadi kwingxelo yakhe. Ngovuyo uHaykaz wavuma. “Ndabhala ushwankathelo lwezinye zeencwadi ezithetha ngamaNgqina kaYehova ebudeni bolawulo lwamaNazi endiye ndazifunda. Kwakhona ndachaza indlela endivakalelwa ngayo ngomboniso othi ‘Amaxhoba Alityelweyo.’ Le ngxelo yamaphepha angama-43 yayiquka imifanekiso neefoto.”
NgoNovemba 2002, uHaykaz wanikela ingxelo yakhe kwabo afunda nabo, kootitshala, kwintsapho yakowabo nakubahlobo bakhe. Emva koko, wavulela ithuba lemibuzo neempendulo, nto leyo eyamenza wakwazi ukucacisa iinkolelo zakhe ezisekelwe eBhayibhileni. Xa enye intombazana kwabo baphulaphuleyo yambuza isizathu sokuba akhethe lo mxholo, uHaykaz wachaza ukuba iincwadi ezininzi zembali azithethi ngamaNgqina kaYehova yaye wayefuna abantu bazi indlela amaNgqina awalumela ngenkalipho ngayo ukholo lwawo lobuKristu. Kwenzeka ntoni ngenxa yale ngxelo yakhe?
UHaykaz wathi: “Abo ndifunda nabo bamangaliswa. Babengazi ukuba amaNgqina kaYehova njengeqela atshutshiswa ngenkohlakalo. Kwakhona, abaninzi babengazi ukuba amaNgqina awayevalelwe kwiinkampu zoxinaniso zamaNazi ayenxiba umqondiso okhethekileyo—unxantathu omfusa.”
Emva kwale ngxelo yakhe, uHaykaz waba namathuba angakumbi okuthetha nabo afunda nabo ngeenkolelo zamaNgqina ezisekelwe eBhayibhileni ngotofelo-gazi, utywala nemigaqo yokuziphatha. UHaykaz uthi: “Akukho nomnye kwabo ndifunda nabo owandigculelayo.” Ngaphezu koko, ingxelo yakhe igcinwe kwithala leencwadi lesikolo. Oko kuya kuba luncedo ekuqinisekiseni ukuba inkalipho eyabonakaliswa ngamaNgqina kaYehova ayisayi kuze ilityalwe.