Ubungqina—Bokholo Lwawo

UNYAKA we-1995 ibingunyaka wama-50 wokukhululeka kwiinkampu zoxinaniso zamaNazi. Kulo lonke elaseYurophu, amaxhoba obuNazi enza isikhumbuzo sesi siganeko engamaqela amakhulu ekwakukho kuwo izinxiba-mxhaka zakwaRhulumente eAuschwitz, eBergen-Belsen, eBuchenwald, eDachau, eRavensbrück, eSachsenhausen nakwezinye iinkampu. Enye ingcamango eyayibalaseliswa ngokuphindaphindiweyo yeyokuba, “Kwanga asingekulibali okwenzekayo!”

Ngenxa yeso sizathu amaNgqina kaYehova enza imiboniso eYurophu ebudeni balo nyaka wesikhumbuzo. Uninzi lwala maNgqina lwaluvalelwe ngurhulumente kaHitler ngenxa yokwala kwawo ukukhahlela kuHitler nokuxhasa imfazwe. Ukususela ngowe-1933 ukusa phambili, amawaka awo avalelwa, yaye uninzi lwafa ngenxa yempatho awayeyifumana.

Noko ke, amava awo ngokuqhelekileyo akaziwa nguwonke wonke. Oku kube ngunozala webinzana elithi “amaxhoba alityelweyo kwimbali.” Iqela lamaNgqina awasindayo lavakalisa umnqweno wokulondoloza inkumbulo yeentsapho namaqabane awo awatshutshiswayo, avalelwa, athuthunjiswa, okanye abulawa ukuze enze ubungqina bokholo nenkalipho obashiywa zezi Bibelforscher, gama elo amaNgqina kaYehova awayesaziwa ngalo kwiinkampu zoxinaniso.

NgoSeptemba 29, 1994, iUnited States Holocaust Memorial Museum, eWashington, D.C., yaba nengqungquthela ephathelele amaNgqina kaYehova kwiinkampu zoxinaniso. Ababesinde kwezo nkampu bahlanganisana bengamaqela amabini amakhulu ukuze benze isikhumbuzo eFransi, ngoMatshi 28, 1995, bahlanganisana eStrasbourg yaye ngoMatshi 30, eParis. Kwakuchukumisa gqitha ukuva la madoda namabhinqa ngoku asele ekhulile, nasathembekileyo kuThixo kwiminyaka engama-50 kamva, ebalisa amava awo. NgoAprili 27, kwabakho enye intlanganiso kufutshane naseBerlin, eBrandenburg, eJamani, apho uninzi lwamaNgqina lwalubulawa ngokunqunyulwa iintloko. Ngosuku olulandelayo, uninzi lwabo basindayo kwezi nkampu lwaya kwizikhumbuzo ezazilungiselelwe nguRhulumente waseBrandenburg yaye batyelela iinkampu ezahlukeneyo.

Umboniso WaseFransi

Kwezi ndibano, kwaboniswa umboniso onomxholo othi “Mémoire de Témoins” (Ubungqina Obanikelwa NgamaNgqina). Ukususela ngoMeyi 1995 ukusa ngoAprili 1996, lo mboniso uye wajikeleza izixeko ezingama-42 eFransi nezixeko ezahlukeneyo eBelgium naseSwitzerland enabantu abathetha isiFrentshi. Ngaphezu koko, amadoda namabhinqa awayekulo mboniso angamaNgqina kaYehova uThixo. Kodwa akwangamangqina okubandezeleka athi wona nabanye akunyamezela kwiinkampu zoxinaniso. Abubungqina obucacileyo bentshutshiso eyabangela ukubandezeleka nokufa kwezigidi zabantu ngenxa yohlanga abalulo nonqulo lwabo. Ukongezelela, ubungqina obanikelwa ngala maNgqina, bubhenca indlela abo babizwa ngokuba ngamaKristu abaye bakhetha ngayo umesiya wobuxoki, uHitler, kunoYesu Kristu; indlela abakhethe ngayo intiyo kunokuthanda ummelwane; nogonyamelo kunoxolo.

Lo mboniso wawunamacandelo angama-70, aqala ngocwangciso lwexesha ngokweziganeko—ukuvulwa kwenkampu yaseDachau neyaseOranienburg, ngoMatshi 1933; iMithetho yaseNuremberg “yokukhusela uhlanga lwamaJamani,” ngoSeptemba 1935; iAnschluss, okanye ukuthinjwa kweOstriya yiJamani, ngoMatshi 1938; iKristallnacht (Ubusuku Obuqaqambileyo), ngoNovemba waloo nyaka, ekwathi amawaka eevenkile zamaYuda agqogqwa yaye abantu abangaphezu kwama-30 000 babanjwa baza bagxothwa; ukuvalwa ngokuthe ngcembe komsebenzi wamaNgqina kaYehova; ukuhlaselwa kweSoviet Union, ngoJuni 1941; nokubulawa ngenxa yenceba kwabagula ngengqondo, ukususela ngowe-1939 ukusa kowe-1941.

La macandelo ahlukeneyo abalaselisa ukufakwa kwabaselula kuLutsha lukaHitler nehlombe elalibangelwa ziintlanganiso zamaNazi ezaziqhutyelwa izihlwele eNuremberg. Imifanekiso yakhumbuza abantu ukwala kwamaNgqina kaYehova ukwenza isifungo sokunyaniseka kwiführer nokukhahlela uHitler. Amanye amacandelo abonisa indlela ekwakuthethwa izinto ezingeyonyaniso ngayo ngamaNgqina kaYehova, nendlela awawasasaza ngayo amaphephancwadi namaphecana njengangowe-1935 ebhenca indlela amaNazi awayewaphatha kakubi ngayo.

Amava Obuqu

Amacandelo amalunga nama-40 abalisa ngamava amadoda nabafazi abasuka kulo lonke elaseYurophu nabatshutshiswayo bada babulawa ngenxa yokholo lwabo. Abasindayo bawuxhasa lo mboniso ngokubakho kuwo yaye iindwendwe zazibaphulaphule ngenyameko. Abantwana bachukumiseka njengoko uLouis Arzt wayebalisa ibali lakhe. Eyinzalelwane yaseMulhouse eFransi, wathatyathwa kubazali bakhe waza wasiwa eJamani ngenxa yokwala kwakhe ukuthi “Heil Hitler!” esikolweni. “Ijoni elili-SS landibetha ngenxa yokwala ukukhahlela uHitler. Landibetha imivumbo engama-30. Kwiintsuku ezimbini kamva landibamba egxalabeni lizama ukundicenga. ‘Khawucinge ngomama wakho. Uya kukuvuyela gqitha ukukubona. Ekuphela kwento omele uyenze kukuthi “Heil Hitler!” uze ukhwele kuloliwe ogodukayo.’ Kwakunzima ngomntwana oneminyaka eli-12 ubudala,” wongezelela. Abaninzi bachukunyiswa ngamava kaJoseph Hisiger owatshintshisa ngomxhesho wakhe weveki wesonka ngeBhayibhile yomProtestanti awayehlala naye esiseleni.

Udliwano-ndlebe olurekhodwe ngevidiyo nababegxothiwe basiwa kwiinkampu zoxinaniso lwaba yenye inkalo yalo mboniso. Olunye udliwano-ndlebe lwenziwa kwiindawo ezineenkampu—ngokomzekelo, e-Ebensee eOstriya naseBuchenwald naseSachsenhausen eJamani. Olunye udliwano-ndlebe lwabonisa iinkalo ezahlukeneyo zobomi basenkampini okanye iinkumbulo zamaNgqina awagxothwa aza asiwa ezinkampini esengabantwana.

Ukuvulwa Kwayo

Mboniso ngamnye wavulwa ngomsitho omfutshane, apho ummeli wabo babegxothiwe basiwa ezinkampini wachaza ukuma kwamaNgqina kaYehova eqinile ngokomoya nxamnye nobuNazi. Ababegxothiwe abangengomaNgqina kwakunye nababhali-mbali nabasemagunyeni abaliqela, kuquka owayesakuba ngumphathiswa waseburhulumenteni eFransi, nabo bavuma ngokulula xa bacelwa ukuba bathethe.

Omnye owagxothwa wasiwa ezinkampini owayewazi amaNgqina kaYehova eBuchenwald wathi ngawo: “Andazi bantu bambi ababegxothiwe basiwa ezinkampini, ngaphandle kwamaYuda, abaphathwa ngokulihlazo njengabo: babethwa, bahlaziswa, banyeliswa, benikwa imisebenzi engcolisayo. Ngaphandle kokholo lwawo ayengenakumelana nempatho enjalo. Ndiwahlonela gqitha yaye ndiyawancoma.”

Indlela Abasabela Ngayo

Abantu abangaphezu kwe-100 000 beza kuwubona lo mboniso. Kwezinye iindawo abantu abangamakhulu, phakathi kwabo kukho abantwana abaninzi, babemi emigceni belungele ukungena kuloo holo yayinomboniso. Iindwendwe ezininzi zavakalisa ngamazwi ambalwa indlela ezivakalelwa ngayo kwincwadi yabatyeleli. Ngokomzekelo, omnye umntwana wabhala wathi: “Igama lam ndinguSabrina. Ndineminyaka elishumi ubudala yaye ndingathanda ukukhalipha njengoRuth ukuze ndikholise uYehova.”a

Kanti namajelo eendaba athetha ngalo mboniso. Ngokuqhelekileyo, kwidolophu nganye inqaku elinye okanye amabini ayevela kwiphephandaba lasekuhlaleni. Ukongezelela, amaziko kanomathotholo asekuhlaleni ngokufuthi awupapasha ngokubanzi lo mboniso yaye asasaza iinkqubo ezibalaselisa udliwano-ndlebe nabo babegxothiwe baza basiwa ezinkampini. Amaziko kamabonwakude asekuhlaleni anikela iingxelo ezimfutshane. Enye ingxelo yeendaba eyayikumabonwakude yathetha ngalo mboniso “njengebali elicacileyo kodwa elibuhlungu nelingena nzulu kokuthile okubuhlungu ngendlela engathethekiyo. Obu ‘Bungqina Banikelwa NgamaNgqina’ bunikela imbeko kwisidima sawo esingenakuze siphinde sohluthwe.”

Kwabo basindayo unyaka wama-50 wokukhululeka kwezi nkampu uya kubetheleleka ezingqondweni zabo. Nangona ukukhumbula iinkumbulo ezibuhlungu kwakungasoloko kulula, ukwabelana nabanye ngazo nokuzikhupha ezi nkumbulo ezingqondweni, kwawanceda la maNgqina ukuze omeleze ukholo lwabanye. Akugqala njengelungelo ukuba nenxaxheba kulo mboniso nokubhenca ikhethe nokungabi nalwazi okusaqhubeka kukho emva kweminyaka engama-50. Ngaphezu kwako konke, aneliswa kukwazi ukuba ubungqina awabunikelayo buzisa uzuko kuThixo wawo, uYehova, yaye buqinisekisa ukuba abanye abasayi kuze bakulibale oko amaNgqina akunyamezelayo.

[Umbhalo osemazantsi]

[Umfanekiso okwiphepha 24]

Amanqaku akwi-“The Golden Age” ayigxeka impatho embi ngokugqithiseleyo yobuNazi

[Imifanekiso ekwiphepha 24, 25]

Amacandelo angama-70 abalisa ibali lokutshutshisa kwamaNazi amadoda, amabhinqa nabantwana abakwalayo ukukhanyela ukholo lwabo

[Umfanekiso okwiphepha 16, 17]

Wambi amaNgqina kaYehova awagxothwayo aza avalelwa ngurhulumente kaHitler abalisa ibali lawo