Zuza Ngokuhlakulela Imilinganiselo Yokomoya

“Umthandi nje wesilivere akayi kwaneliswa yisilivere, nabani na othanda indyebo akaneliswa yingeniso.”—INtshumayeli 5:10.

UKUSEBENZA ngokugqithiseleyo kunokubangela uxinezeleko, yaye uxinezeleko lunokubangela iingxaki zempilo, nto leyo enokuphumela ekufeni. Kumazwe amaninzi, iintsapho ezininzi ziyaqhekeka ngenxa yoqhawulo-mtshato. Ngokuqhelekileyo owona nobangela woku kukuzixhalabela ngokugqithiseleyo izinto eziphathekayo. Kunokuba avuyele oko anako, umntu okumgibe wokuqokelela izinto eziphathekayo unokuzifumanisa esoloko efuna okungakumbi, enoba oko kuthetha ukuncama intlalo-ntle yakhe. Enye incwadi enamacebiso ithi: “Kuxhaphakile ukuba umntu afune izinto ezithengwa ngummelwane wakhe, nangona kusenokwenzeka ukuba loo mntu akhuphisana naye usebenza ngokugqithiseleyo kangangokuba unokuhlaselwa yintliziyo nanini na, nangona eselula gqitha.”

Ukufuna okungakumbi kusenokubangela ubani anganeliseki, nto leyo enokumbangela angonwabi. Ngenxa yobuthathaka bethu bokwenyama nto ithile isenokusibambisa kulo mbandela—izibhengezo! Iinkqubo zikamabonwakude zizele zizibhengezo ezikubongoza ukuba uthenge izinto ekusenokwenzeka ukuba aziyomfuneko yaye osenokungakwazi ukuzihlawula. Konke oku kunokukhokelela kwingozi enkulu.

Ukuphila ubomi bokuzifica kungaba nemiphumo engabonakali lula kodwa emibi, ngokwenyama nangokomoya. Ngokomzekelo, uKumkani osisilumko uSolomon wathi: “Intliziyo ezolileyo ibubomi kumzimba wenyama.” (IMizekeliso 14:30) Ngokwahlukileyo koko, ukuzibhokoxa ngokugqithiseleyo, ixhala neengcinezelo zokuqokelela izinto eziphathekayo kunokubangela impilo yethu ibe nkenenkene size singonwabi. Kwakhona asibi nalwalamano luhle nabanye xa usukelo lwezinto eziphathekayo luza kuqala ebomini bethu. Yaye xa ulwalamano lukabani nentsapho nabahlobo bakhe luphela, nomgangatho wobomi bakhe uyachaphazeleka.

Ukubaluleka Kwezinto Zokomoya

Umpostile uPawulos wathi kwiinkulungwane ngaphambili: “Musani ukumilisa okwale nkqubo yezinto.” (Roma 12:2) Ihlabathi liyabathanda abantu abalandela imilinganiselo yalo. (Yohane 15:19) Lidla ngokubangela abantu bafune izinto kuba bezibona, bekwazi ukuzibamba, bazingcamle, bazinukise bazive—ewe, baphile ubomi bokuthanda izinto eziphathekayo. Ligxininisa ‘kwinkanuko yamehlo’ ukuze wena nabanye nithande izinto eziphathekayo.—1 Yohane 2:15-17.

Kodwa zikho izinto ezibaluleke ngaphezu kwemali, udumo nobutyebi. Kwiinkulungwane ngaphambili, uKumkani uSolomon waqokelela zonke izinto eziphathekayo ezazinokufumaneka emhlabeni. Wakha izindlu yaye enezitiya, amabhoma, abakhonzi, imfuyo, iimvumi ezingamadoda namabhinqa, kwakunye negolide nesilivere eninzi. USolomon wabandisa ubutyebi bakhe ngaphezu kwaye nawuphi na umntu owayelawula ngaphambi kwakhe. Wayesisinhanha. USolomon wayenayo phantse yonke into enqwenelekayo. Sekunjalo, xa wayejonga izinto azifezileyo, wathi: “Yonk’ into yayingamampunge nokusukelana nomoya.”—INtshumayeli 2:1-11.

Ngenxa yobulumko obubalaseleyo awayenabo, uSolomon wayesazi ukuba umntu waneliseka kakhulu xa ehlakulela imilinganiselo yokomoya. Wabhala: “Ukuqosheliswa kombandela, emva kokuba yonk’ into iviwe, naku: Yoyika uThixo oyinyaniso uze ugcine imiyalelo yakhe. Kuba oku kuyimbopheleleko yomntu.”—INtshumayeli 12:13.

Eyona nto ibaluleke ngaphezu kwegolide nesilivere bubutyebi obufumaneka kwiLizwi likaThixo, iBhayibhile. (IMizekeliso 16:16) Njengamatye anqabileyo, iinyaniso ezibalulekileyo zilindele wena ukuba uzifumane. Ngaba uza kumba ukuze uzifumane? (IMizekeliso 2:1-6) UMdali wethu, uMthombo wemilinganiselo yenyaniso, uyasibongoza ukuba senjenjalo, yaye uza kusinceda. Njani?

UYehova ulungiselele inyaniso exabisekileyo ngeLizwi lakhe, umoya wakhe oyingcwele nentlangano yakhe. (INdumiso 1:1-3; Isaya 48:17, 18; Mateyu 24:45-47; 1 Korinte 2:10) Ukuhlolisisa ezi nyaniso zixabiseke ngeyona ndlela kukunika ithuba lokukhetha ngobulumko eyona ndlela inomvuzo ebomini. Yaye oko akusayi kuba nzima kuba uYehova, uMdali, uyazi oko sikufunayo ukuze sonwabe ngokwenene.

IBhayibhile Ikhuthaza Eyona Milinganiselo Iphakamileyo

Isiluleko esihle esisifumana eBhayibhileni siluncedo yaye asinakuthelekiswa nanto. Imigaqo yokuziphatha ekhuthazwa yiyo ibalasele. Isiluleko sayo sisoloko siyinzuzo. Iye yabonakala inokuthenjwa ukutyhubela iminyaka. Eminye yemizekelo yeziluleko ezihle eziseBhayibhileni kukuzibhokoxa emsebenzini, ukunyaniseka, ukusebenzisa imali ngobulumko nokubuphepha ubuvila.—IMizekeliso 6:6-8; 20:23; 31:16.

Ngokuphathelele oko, uYesu wathi: “Musani ukuziqwebela ubuncwane emhlabeni, apho kudla khona inundu nomhlwa, nalapho amasela aqhekeza khona ebe. Kunoko, ziqwebeleni ubuncwane ezulwini, apho inundu nomhlwa zingadliyo khona, nalapho amasela angaqhekeziyo ebe.”—Mateyu 6:19, 20.

Eso siluleko sisasebenza nanamhlanje nanjengokuba kwakunjalo kwiminyaka engama-2 000 eyadlulayo. Kunokuba sibe kumgibe wokufuna ubutyebi, sinokuzuza ngoku ngokufuna eyona ndlela ifanelekileyo yokuphila. Undoqo kukuziqwebela ubutyebi bokomoya, nto leyo ekhokelela kubomi bokwenene nobonwabisayo nolwaneliseko. Sinokukwenza njani oku? Ngokufunda iLizwi likaThixo, iBhayibhile, nangokukusebenzisa oko likufundisayo.

Imilinganiselo Yokomoya Iyinzuzo

Xa isetyenziswa kakuhle, imilinganiselo yokomoya iyasizuzisa ngokwenyama, ngokweemvakalelo nangokomoya. Kanye njengokuba iozone layer phezu komhlaba ikhusela kwimitha yelanga eyingozi, imigaqo emihle yokuziphatha iyasikhusela ngokusenza sizibone iingozi zokuthanda izinto eziphathekayo. UmKristu ongumpostile uPawulos wabhala: “Abo bazimisele ukuba zizityebi beyela ekuhendweni nasemgibeni, nakwiminqweno emininzi engekho ngqiqweni neyenzakalisayo, ekhokelela entshabalalweni nasekonakaleni. Kuba ukuthanda imali yingcambu yazo zonke iintlobo zobubi, yaye ngenxa yokusukelana nolo thando bambi baye balahlekana nokholo, bezingxwelerha ngeentlungu ezininzi.”—1 Timoti 6:9, 10.

Ukuthanda ubutyebi kuhenda abantu ukuze bafune ubutyebi, isikhundla negunya elingakumbi. Ngokufuthi, abantu bazifumana ezi zinto ngokuqhatha nangokunganyaniseki. Ukuthand’ izinto eziphathekayo kuchitha ixesha, amandla nobuchule. Loo mntu usenokungalali ubuthongo obumnandi ebusuku. (INtshumayeli 5:12) Ngokuqinisekileyo ukufuna izinto ezingakumbi kuthintela inkqubela yokomoya. Oyena mntu ubalaseleyo wakha waphila, uYesu Kristu, ngokucacileyo wasibonisa indlela ebhetele xa wathi: “Banoyolo abo bayiphapheleyo intswelo yabo yokomoya.” (Mateyu 5:3) Wayesazi ukuba ubutyebi bokomoya bukhokelela kwiinzuzo ezihlala zihleli yaye bubaluleke kakhulu ngaphezu kwezinto eziphathekayo, zona ke ezidlulayo.—Luka 12:13-31.

Ngaba Kuyazuzisa?

UGreg uthi: “Abazali bam benza konke okusemandleni ukundenza ndicinge ukuba imilinganiselo yokomoya ayinanzuzo. Sekunjalo, ndiye ndafumana uxolo olukhulu lwengqondo ngokuzibekela usukelo lokomoya kuba andisosinxadanxada ndifunana nobutyebi.”

Imilinganiselo yokomoya inokunceda ubani abe nolwalamano oluhle nabanye. Abahlobo bokwenyaniso bayakuthanda ngenxa yobuntu bakho, kungekhona ngoko unako. IBhayibhile icebisa isithi: “Onxulumana nezilumko uya kuba sisilumko naye.” (IMizekeliso 13:20, Today’s English Version) Ngaphezu koko, intsapho ephumelelayo yakhiwa bubulumko nothando, kungekhona kukuba nezinto eziphathekayo.—Efese 5:22–6:4.

Asizalwa sinemilinganiselo. Sifanele siyifunde koontanga bethu okanye kwiLizwi likaThixo. Yiloo nto imfundiso esekelwe eBhayibhileni inokuguqula isimo sethu sengqondo ngokuphathelele izinto eziphathekayo. UDon owayesakuba ngumnini-bhanki uthi: “Ndancedwa ukuba ndicingisise kwakhona ngemilinganiselo yam, ndaza ndafunda ukwaneliseka zizinto eziyimfuneko.”

Hlakulela Ubutyebi Bokomoya Obuhlala Buhleli

Imilinganiselo yokomoya ibalaselisa imivuzo ehlala ihleli, kungekhona ukuzikholisa okwexeshana. UPawulos wabhala: “Izinto ezibonwayo [eziphathekayo] zezokwexeshana, kodwa izinto ezingabonwayo [ezokomoya] zingunaphakade.” (2 Korinte 4:18) Liyinyaniso elokuba ukufuna izinto eziphathekayo kunokwanelisa iminqweno yethu okwexeshana, kodwa ukunyoluka akuzuzisi. Imilinganiselo yokomoya ihlala ngonaphakade.—IMizekeliso 11:4; 1 Korinte 6:9, 10.

IBhayibhile iyakugxeka ukunikela ingqalelo kakhulu kwizinto eziphathekayo nto leyo exhaphakileyo ngoku. Isifundisa indlela yokuphepha ukuzingca ngokugcina iliso lingenakumbi sinikele ingqalelo kwizinto ezibaluleke ngakumbi, ubutyebi bokomoya. (Filipi 1:10) Ichaza oko ukunyoluka kukuko—ukuzinqula. Njengoko senza oko sikufunda kwiLizwi likaThixo, sizuza ulonwabo olungakumbi. Asisacingi ngokufumana izinto kodwa sicinga ngokupha. Oku kuyinto entle kakhulu ukuba siyeke ukuzifica ngezinto eziphathekayo kodwa sibe nemilinganiselo yokomoya!

Liyinyaniso elokuba, ngokomlinganiselo othile, imali iyasikhusela. (INtshumayeli 7:12) Kodwa iBhayibhile ithi nantsi eyona nyaniso: “Kaloku ubutyebi busuka buthi shwaka ngephanyazo; ungade ucinge ukuba busuke bantshula amaphiko bantinga njengokhozi.” (IMizekeliso 23:5, IBhayibhile yesiXhosa yowe-1996). Abantu baye baphulukana nezinto ezininzi ngenxa yokuthanda izinto eziphathekayo—impilo, iintsapho kwanesazela esicocekileyo—nto leyo eye yaphumela kwintlekele. Kwelinye icala, ukukhula ngokomoya kwanelisa iintswelo ezibaluleke kakhulu—ukufuna ukuthandwa, ukufuna ukuba nenjongo ebomini nokufuna ukukhonza uThixo oluthando, uYehova. Kwakhona kunokusinceda sifumane ubomi obungunaphakade nokufezeka kwabantu kwiparadesi esemhlabeni—oko uThixo asithembise kona.

Kungekudala umnqweno woluntu wokuphumelela uya kuzaliseka kwihlabathi likaThixo elitsha. (INdumiso 145:16) Ngelo xesha ihlabathi lonke liya “kuzaliswa kukwazi uYehova.” (Isaya 11:9) Bonke abantu baya kuba nemilinganiselo yokomoya. Ukuthanda izinto eziphathekayo nemiphumo yako kuya kuphela kuthi tu. (2 Petros 3:13) Yaye izinto ezenza ubomi banelise nangakumbi—impilo entle, umsebenzi owanelisayo, ukuzihlaziya ngokufanelekileyo, ukuba nolwalamano oluhle nentsapho nolwalamano oluhlala luhleli noThixo—ezo zinto ziya kubangela uluntu lonwabe ngokwenene nangonaphakade.

[Ibhokisi/Umfanekiso okwiphepha 6]

Yisebenzise Ngobulumko Imali Yakho!

Zazi iimfuno zakho. UYesu wasifundisa ukuba sithandaze senjenje: “Siphe isonka sethu sale mini ngokwemfuneko yemini le.” (Luka 11:3) Ungavumeli izinto ozithandayo zibe zizinto eziyimfuneko kuwe. Khumbula ukuba umntu akonwatyiswa kukuba nezinto eziphathekayo.—Luka 12:16-21.

Zenzele uqingqo-mali. Musa ukuwola yonk’ into le kuba uyibona. IBhayibhile ithi: “Amacebo okhutheleyo ngokuqinisekileyo ayingenelo, kodwa wonk’ ubani ongxamayo ngokuqinisekileyo usingisa ekusweleni.” (IMizekeliso 21:5) UYesu wacebisa abo babemphulaphule ukuba babale iindleko ngaphambi kokuba benze nantoni na ngemali.—Luka 14:28-30.

Waphephe amatyala angeyomfuneko. Ukuba kunokwenzeka, londoloza imali ukuze uzithenge ngemali izinto kunokuba uzithenge ngetyala. Umzekeliso uthi: “Obolekayo ngumkhonzi kumntu obolekisayo.” (IMizekeliso 22:7) Ngokuzibamba uze uthenge izinto onokukwazi ukuzihlawula, unokukwazi nokuceba ukuthenga izinto ezinkulu ngokuphumelelayo.

Yiphephe inkcitho. Zinyamekele kakuhle izinto onazo ukuze zikwazi ukuhlala ixesha elide, ngaloo ndlela ungabi nenkcitho. UYesu wabonisa indlela efanelekileyo yokonga kwizinto awazisebenzisayo.—Yohane 6:10-13.

Izinto zokuqala mazize kuqala. Umntu onobulumko uya ‘kuzongela ixesha’ ukuze azibekele usukelo olubaluleke ngakumbi.—Efese 5:15, 16.

[Ibhokisi/Umfanekiso okwiphepha 7]

Ukufunda Kumava—Ikho Indlela Ebhetele

Amava obuqu—amahle namabi—anokusifundisa izifundo ezibalulekileyo. Ngaba kuyinyaniso ukuba sifunda kakuhle kumava ethu? Akunjalo, sinokufumana ukhokelo komnye umthombo ophakamileyo. Umdumisi wawuxela lo mthombo xa wathandaza wenjenje: “Ilizwi lakho lisisibane elunyaweni lwam, nokukhanya endleleni yam.”—INdumiso 119:105.

Kutheni ukufunda kulwalathiso oluvela kuThixo kubhetele lee kunokufunda kumava obuqu? Okokuqala, ukufunda kuphela kumava—kunokuba buhlungu kakhulu. Kwakhona oko akuyomfuneko. UThixo wathi kumaSirayeli amandulo: “Owu ukuba nje kuphela okunene ubunganikela ingqalelo kwimiyalelo yam! Ngoko uxolo lwakho beluya kuba njengomlambo, nobulungisa bakho njengamaza olwandle.”—Isaya 48:18.

Esinye isizathu sokuba iLizwi likaThixo ligqwesa njengomthombo wolwalathiso kukuba liqulethe ingxelo endala neyona ichanileyo yamava abantu. Kusenokwenzeka ukuba uyabona ukuba ukufunda kwimpumelelo nokungaphumeleli kwabanye kubhetele kunokuphinda iimpazamo zabo. (1 Korinte 10:6-11) Okubaluleke ngakumbi, eBhayibhileni, uThixo usinika imithetho ebalaseleyo nemigaqo esikhokelayo engenakuthelekiswa nanto nesinokuyithemba. “Umthetho kaYehova ugqibelele . . . Isikhumbuzo sikaYehova sikholosekile, simenza abe nobulumko ongenamava.” (INdumiso 19:7) Ngokuqinisekileyo, ukufunda kubulumko boMdali wethu onothando yeyona ndlela ibalaseleyo.

[Imifanekiso ekwiphepha 4]

Ihlabathi lifuna uphile ubomi balo bokuthanda izinto eziphathekayo

[Umfanekiso okwiphepha 5]

Eyona nto ixabisekileyo kunegolide okanye isilivere bubutyebi obufumaneka eBhayibhileni