Ngaba Uyakufuna Ukuphila Ngonaphakade?
“ANDIKOYIKI ukufa,” latsho njalo elinye ibhinqa elalupheleyo laseJapan. “Kodwa into endenza ndinxunguphale kukuba kuza kufuneka ndizishiye ezi ntyatyambo.” Umlungiseleli ongumKristu wayesiqonda isizathu sokuba eli bhinqa livakalelwe ngale ndlela, kuba lalinesitiya esihle. Abaninzi abathi abakoyiki ukufa bakuvuyela gqitha ukubona ukumangalisa kwendalo yaye eneneni basenokuba balangazelela ukuphila ngonaphakade.
Ngaba umntu unokuphila ngonaphakade? Abanye banokuyigatya ingcamango enjalo. Bambi basenokuthi abanamdla wokuphila ngonaphakade. Kutheni kusenokubakho ubani ovakalelwa ngaloo ndlela?
Ngaba Ubomi Obungunaphakade Buya Kukruqula?
Bambi bacinga ukuba kuya kukruqula ukuphila ngonaphakade. Basenokuthetha ngobomi obungabangeli mdla babantu abaninzi abadla umhlala-phantsi abangenanto ingako yokwenza abahlala phambi komabonwakude kuphela. Ukuba nawe uvakalelwa ngale ndlela, cinga ngoko kwathethwa sisazi ngeenkwenkwezi uRobert Jastrow xa wabuzwa ukuba ubomi obungunaphakade buya kuba yintsikelelo okanye isiqalekiso. Lo kaJastrow waphendula esithi: “Buya kuba yintsikelelo kwabo bafuna ukwazi nakwabo basoloko befuna ukufunda izinto ezintsha. Isibakala sokuba baza kungenisa ulwazi ngonaphakade siya kubathuthuzela gqitha. Kodwa kwabo bangafuni ukufunda izinto ezintsha nabangenangqondo ziphangaleleyo, buya kuba sisiqalekiso esoyikekayo. Abasayi kuyazi indlela amabalisebenzise ngayo ixesha labo.”
Enoba uya kubufumanisa ubomi obungunaphakade bukruqula okanye akunjalo kuya kuxhomekeka ubukhulu becala kwisimo sakho sengqondo. Ukuba ‘ufuna ukwazi nokufunda izinto ezintsha,’ cinga ngoko uya kukufunda kwizinto zobugcisa, umculo, ukuzoba iplani, ukutyala isitiya okanye nantoni na eyinzuzo onomdla kuyo. Ubomi obungunaphakade emhlabeni, buya kukunika ithuba lokuba wandise isakhono sakho kwimisebenzi emininzi eyahlukahlukeneyo, ingakumbi leyo unomdla kuyo.
Ukwazi ukubonakalisa uthando nokuphathwa ngalo ngonaphakade kuya kwenza ubomi obungunaphakade banelise ngokwenene. Sidalwe ngendlela yokuba sikwazi ukubonakalisa uthando, yaye xa sivakalelwa kukuba siyathandwa oko kuyasivuyisa. Ukuthandana kuzisa ulwaneliseko olungapheliyo njengokuba ixesha lihamba. Ukuphila ngonaphakade kuya kusinika ithuba elingenasiphelo lokuhlakulela ukuba nothando kungekhona kuphela kwabanye abantu kodwa ngokukhethekileyo kuThixo. Umpostile uPawulos wathi: “Ukuba nabani na uyamthanda uThixo, uyaziwa nguye.” (1 Korinte 8:3) Eli lithemba elimangalisayo—ukwazi nokwaziwa nguMongami wendalo iphela! Ngaphezu koko, ukufunda ngoMdali wethu onothando akunasiphelo. Ngoko ke, kunokwenzeka njani ukuba ubomi obungunaphakade bukruqule buze bungabi namvuzo?
Ubomi—Bufutshane Yaye Buxabisekile
Bambi bavakalelwa kukuba isibakala sokuba ubomi bubufutshane loo nto ibenza buxabiseke. Basenokuthelekisa ubomi negolide, efumaneka ngomlinganiselo othile. Bathi, ukuba igolide ibifumaneka naphi na, ibingayi kuba naxabiso. Sekunjalo, igolide ibiya kuhlala intle. Ngokuqinisekileyo kunjalo nangobomi.
Sinokuthelekisa ukunandipha ubomi obungunaphakade nokuba nomoya wokuphefumla omninzi. Oomatiloshe abakwinkwili eyaphukileyo baya kuwugqala umoya njengento exabisekileyo ngokwenene. Emva kokuba behlanguliwe, ngaba ucinga ukuba bebeya kukhalaza ngokungenaluxabiso ngomoya wokuphefumla omninzi abaphinda bawufumane? Ngokuqinisekileyo bekungayi kuba njalo!
Njengoomatiloshe abanjalo, sinokuhlangulwa kodwa sinethemba elibalaseleyo lokuphila ngonaphakade. Umpostile uPawulos wabhala: “Kuba umvuzo isono esiwuhlawulayo kukufa, kodwa isipho uThixo asinikayo bubomi obungunaphakade ngoKristu Yesu iNkosi yethu.” (Roma 6:23) Ngedini lentlawulelo likaYesu, uThixo uya kushenxisa ukungafezeki ebantwini nokufa aze anike abantu abathobelayo isipho sobomi obungunaphakade. Sifanele sibe nombulelo gqitha ngelungiselelo lothando elinjalo!
Kuthekani Ngezalamane Nabahlobo Bakho?
Bambi basenokucinga: ‘Kuthekani ngezalamane nabahlobo bam? Ukuphila ngonaphakade emhlabeni akuyi kuba nantsingiselo kum ukuba abakho.’ Mhlawumbi uye wanolwazi lweBhayibhile yaye uye wafunda ukuba unokuphila ngonaphakade kumhlaba oyiparadesi. (Luka 23:43; Yohane 3:16; 17:3) Ngokwemvelo, ufuna amalungu entsapho yakho, izalamane nabahlobo ukuba babe lapho, bafumane uvuyo onethemba lokulufumana kwihlabathi likaThixo elitsha elithenjisiweyo nelinobulungisa.—2 Petros 3:13.
Kodwa kuthekani ukuba abahlobo nezalamane zakho ababonakalisi mdla ekuphileni ngonaphakade kumhlaba oyiparadesi? Musa ukuvumela oko ukuba kukudimaze. Qhubeka uzuza ulwazi ngeZibhalo uze wenze ngokuvisisana nalo. Umpostile uPawulos wabhala: “Unokuqiniseka njani, mfazi ongumKristu, ukuba uya kuyisindisa indoda yakho? Okanye unokuqiniseka njani, ndoda engumKristu, ukuba uya kumsindisa umfazi wakho?” (1 Korinte 7:16, Today’s English Version) Abantu banokutshintsha. Ngokomzekelo, enye indoda eyayibuchasile ubuKristu yatshintsha yaza yaba ngumdala kwibandla lamaKristu. Ithi: “Ndinombulelo gqitha kuba intsapho yam endiyithandayo iye yabambelela ngokunyaniseka kwimigaqo yayo yeBhayibhile phezu kwayo nje indlela endandichase ngayo.”
UThixo ubuxhalabele gqitha ubomi bakho nobezalamane nabahlobo bakho. Eneneni, “uYehova . . . akanqweneli ukuba kutshabalale nabani na kodwa unqwenela ukuba bonke bafikelele enguqukweni.” (2 Petros 3:9) UYehova uThixo ufuna ukuba wena nezalamane nabahlobo bakho niphile ngonaphakade. Uthando lwakhe lukhulu kunolo lwabantu abangafezekanga. (Isaya 49:15) Ngoko ke kutheni ungahlakuleli ulwalamano oluhle noThixo? Unokwandula ke ukwazi ukunceda izalamane nabahlobo bakho benze okufanayo. Kwanokuba ngoku abanathemba lokuphila ngonaphakade, isimo sabo sengqondo sinokutshintsha xa bebona ukuba wenza ngokuvisisana nolwazi oluchanileyo lweBhayibhile.
Kuthekani ngezalamane nabahlobo bakho oye waphulukana nabo ngokufa? Kwizigidi eziye zafa, iBhayibhile inikela ithemba elimangalisayo lovuko—ukuvuka ekufeni nokuphila kwiParadesi esemhlabeni. UYesu Kristu wathembisa: “Kuba liyeza ilixa ekuya kuthi ngalo bonke abo bakumangcwaba enkumbulo . . . baphume.” (Yohane 5:28, 29) Kwanabo bafe bengamazi uThixo baya kubuyiselwa ebomini, kuba iBhayibhile ithi: “Kuza kubakho uvuko lwamalungisa nabangengomalungisa.” (IZenzo 24:15) Kuya kuchulumancisa ngokwenene ukwamkela abo bantu ebomini!
Ubomi Obungunaphakade—Ithemba Elivuyisayo
Ukuba unokonwaba uze ufumane ulwaneliseko ngoku phezu kwazo zonke iingxaki ezikweli hlabathi, ngokuqinisekileyo uya kukuvuyela ukuphila kumhlaba oyiparadesi. Noko ke xa omnye wamaNgqina kaYehova wachaza ngeentsikelelo eziya kuziswa bubomi obungunaphakade, elinye ibhinqa lathi: “Andifuni ukuphila ngonaphakade. Le minyaka engama-70 okanye engama-80 yanele.” Umdala ongumKristu owayekho walibuza: “Ngaba wakha wayicinga indlela abaya kuvakalelwa ngayo abantwana bakho ukuba uyafa?” Zathi waxa iinyembezi xa lacinga ngentlungu abaza kuba kuyo xa befelwa ngunina. Lavuma lisithi: “Okwesihlandlo sokuqala, ndiyaqonda ukuba bendisoloko ndizicingela, yaye ndiyabona ukuba ubomi obungunaphakade asilothemba lokuzingca kodwa bubandakanya ulwalamano lwethu nabanye.”
Abanye basenokuvakalelwa kukuba akukho mntu ukhathalayo enoba bayaphila okanye bayafa. Sekunjalo uMniki-bomi wethu uyakhathala, uthi: “Ndiphila nje, . . . andiyoliswa kukufa kongendawo, kodwa kukuba ongendawo abuye endleleni yakhe aze okunene ahlale ephila.” (Hezekile 33:11) Ekubeni uThixo ebuxhalabele kangaka kwanobomi bongendawo, ngokuqinisekileyo ubakhathalele gqitha abo bamthandayo.
UKumkani uDavide wakwaSirayeli wamandulo wayenentembelo kwinyameko kaYehova enothando. UDavide wakha wathi: “Nokuba ubawo noma bangandishiya, ke yena uYehova uya kundithabatha.” (INdumiso 27:10) Kusenokwenzeka ukuba uDavide wayeqinisekile ngendlela abamthanda ngayo abazali bakhe. Kodwa nokuba abazali bakhe—abona bantu awayesondelelene nabo—babenokumshiya, wayesazi ukuba uThixo akayi kumshiya. Ngenxa yothando lwakhe nenkxalabo, uYehova usinika ubomi obungunaphakade nolwalamano olungenasiphelo kunye naye. (Yakobi 2:23) Ngaba asifanelanga sizamkele ngombulelo ezi zipho zimangalisayo?
[Umfanekiso okwiphepha 7]
Ukuthanda uThixo nommelwane kuya kwenza ukuphila ngonaphakade kube yinzuzo