Isizathu Sokuba Abaninzi Bakuthandabuze Ukuba Unqulo Lunokulumanyanisa Uluntu
“UZE umthande ummelwane wakho.” (Mateyu 22:39) Iinkonzo ezininzi zithi zilandela lo mgaqo. Ukuba iinkonzo ezinjalo bezikwazi ukufundisa amarhamente azo ngokuphumelelayo ukuba athande abamelwane, bekufanele ukuba amanyene loo marhamente. Noko ke, ngaba leyo yinto oye wayiphawula? Ngaba unqulo lubangela umanyano? Kuhlolisiso lwakutshanje olwenziwe eJamani kuye kwabuzwa lo mbuzo: “Ngaba iinkonzo ziyabamanyanisa abantu, okanye kusenokwenzeka ukuba ziyabahlukanisa?” Kwabaphendulayo, abangama-22 ekhulwini baye bavakalelwa kukuba iinkonzo ziyamanyanisa, ngoxa abangama-52 ekhulwini baye bavakalelwa kukuba ziyahlukanisa. Mhlawumbi abantu abakwilizwe ohlala kulo bavakalelwa ngendlela efanayo.
Kutheni abaninzi bengenathemba lokuba unqulo lunokulumanyanisa uluntu? Mhlawumbi kungenxa yoko bakwaziyo okwenzeke ngaphambili. Kunokuba lubamanyanise abantu, ngokufuthi unqulo luye lwabahlukanisa. Kwezinye iimeko, unqulo luye lwaphembelela ezona zenzo zenkohlakalo zoyikekayo. Khawucinge nje ngeminye imizekelo kule minyaka nje ili-100 edluleyo.
Ziphenjelelwa Lunqulo
Ebudeni bemfazwe yesibini yehlabathi, amaRoma Katolika aseCrotia namaOthodoki aseSerbia eBalkans ayengquzulana. Omabini la maqela ayesithi alandela uYesu, owafundisa abalandeli bakhe ukuba bathande ummelwane wabo. Sekunjalo, omnye umphengululi uthi ingxabano yabo yaphumela “kweyona ndyikitya yokufa inkulu yabantu eyakha yakho embalini.” Abantu bothuswa kukuva ukuba kwafa amadoda, amabhinqa nabantwana abangaphezu kwama-500 000 apho.
Ngowe-1947 kwakuhlala abantu abanokuba zizigidi ezingama-400 kwilizwekazi laseIndiya—abantu abamalunga nama-20 ekhulwini ehlabathini lonke—ngokuyintloko ingamaHindu, amaSilamsi namaSikh. Xa i-Indiya yahlulahlulwa, kwaqalisa ukubakho amaSilamsi asePakistan. Ngelo xesha, amakhulu amawaka eembacu ezivela kuwo omabini loo mazwe zazitshiswa, zibethwa, zithuthunjiswa yaye zidutyulwa kwiindyikitya zokufa eziliqela ezibangelwa lunqulo.
Ngaphezu koko, ekuqaleni kwale nkulungwane kuye kwaqalisa ubunqolobi. Namhlanje, ubunqolobi buye bagrogrisa lonke ihlabathi, yaye amaqela amaninzi abanqolobi athi angamalungu onqulo oluthile. Unqulo alujongwa njengoluzisa umanyano. Kunoko, ludla ngokunxulunyaniswa nobundlobongela nokungamanyani. Ngoko ke, akumangalisi ukuba, iphephandaba laseJamani iFOCUS lafanisa iinkonzo eziphambili emhlabeni—ubuBhuda, iNgqobhoko, ubuConfucius, ubuHindu, ubuSilamsi, ubuYuda nobuTao—nerhuluwa.
Iingxwabangxwaba Zangaphakathi
Ngoxa iinkonzo ezithile zisilwa, abanye baphazanyiswa ziingxwabangxwaba ezingaphakathi. Ngokomzekelo, kutshanje iicawa zeNgqobhoko ziye zaphikisana ngeemfundiso ezithile. Abefundisi namarhamente ngokufanayo ayabuza: Ngaba uqingqo-nzala luvumelekile? Kuthekani ngokuqhomfa? Ngaba amabhinqa afanele amiselwe njengabefundisi? Icawa ifanele ibujonge njani ubufanasini? Ngaba unqulo lufanele lubandakanyeke kwimfazwe? Ngenxa yokungamanyani okunjalo, abaninzi bayazibuza, ‘Kunokwenzeka njani ukuba unqulo lumanyanise uluntu xa lungakwazi ukumanyanisa amalungu alo?’
Kucacile ukuba, ngokubanzi unqulo luye lwasilela ekumanyaniseni abantu. Kodwa ngaba zonke iinkonzo azimanyananga? Ngaba lukho unqulo olwahlukileyo—olunokumanyanisa uluntu?
[Umfanekiso okwiphepha 3]
Amapolisa onzakeleyo ebudeni bengxwabangxwaba eyayikho phakathi kwamaqela onqulo eIndiya ngowe-1947
[Inkcazelo]
Photo by Keystone/Getty Images