Ividiyo Ethi “Faithful Under Trials”
EKUQALENI kuka-Aprili 1951, urhulumente waseSoviet wahlasela iqela elimsulwa lamaKristu kwintshona yaseSoviet Union—amaNgqina kaYehova. Amawakawaka eentsapho—kuquka nabantwana abancinane, amabhinqa akhulelweyo, nabakhulileyo—akhweliswa kwiikhareji zikaloliwe aza ahamba uhambo olude noluyindinisa lweentsuku ezingama-20 olusinge eSiberia. Aba bagxothelwa ngokusisigxina kule ndawo phantsi kweemeko ezibuhlungu nezinzima.
NgoAprili 2001, kwakubhiyozelwa ama-50 eminyaka emva kokuba esi siganeko sembali senzekile eMoscow kwaza kwakhululwa ividiyo echaza ngokucinezelwa kwamaNgqina kaYehova kangangeminyaka engama-50 kwindawo eyayisakuba yiSoviet Union. Kule vidiyo, ababhali-mbali nabantu ababekho ngelo xesha bachaza indlela amaNgqina asinda ngayo nawanda ngayo phezu kwako nje ukucinezelwa ngokugqithiseleyo.
Le vidiyo ethi, Faithful Under Trials—Jehovah’s Witnesses in the Soviet Union, ngoku iye yabukelwa zizigidi zabantu eRashiya nakwezinye iindawo yaye abantu nababhali-mbali baye bayincoma kakhulu. Nanga amagqabaza abaphengululi baseRashiya ababini abahlala kwindawo apho inkoliso yeentsapho zamaNgqina zazithunyelwa khona:
“Ndiyithande kakhulu le vidiyo. Bendisoloko ndibathanda abantu bonqulo lwenu, kodwa emva kokubukela le vidiyo, ndinithanda nakakhulu. Le vidiyo ingathi yenziwa ziingcali! Ndiyithande kakhulu indlela eniye nabonisa umntu ngamnye njengobalulekileyo. Nangona ndikwicawa yobuOthodoki yaye ndingazimiselanga ukutshintsha kunqulo lwam, ndiyawathanda amaNgqina. Ndingathanda ukuba ndibe nekopi yale vidiyo apho ndifundisa khona. Mna nabantu endisebenza nabo siye sagqiba kwelokuba siyibonise abafundi bethu size siyifake kwizifundo zabo.”—UNjingalwazi uSergei Nikolayevich Rubtsov, intsumpa kwizifundo zembali kwiState Pedagogical University, eIrkutsk, eRashiya.
“Ndiyakuvuyela ukufika kwale vidiyo. Xa umntu esenza ividiyo ethetha ngengcinezelo, kudla ngokuba nzima ukulandela elo bali ngendlela esengqiqweni. Kodwa niye nakwazi ukwenjenjalo. Ncedani nindiphathele nezinye iividiyo eninazo.”—UNjingalwazi uSergei Ilyich Kuznetsov, intsumpa kwizifundo zembali eIrkutsk State University, eRashiya.
AmaNgqina kaYehova ahlala eSiberia nawo aye ayithanda le vidiyo. Nantsi indlela aye avakalelwa ngayo:
“Ebudeni bexesha laxa ezi ziganeko zisenzeka ezivele kule vidiyo, abantu abaninzi baseRashiya bebenganikwa inkcazelo echanileyo ngomsebenzi wamaNgqina kaYehova. Kodwa emva kokubukela le vidiyo, bayabona ukuba intlangano yethu asilohlelo nje, njengokuba bebecinga njalo. Abanye abasandul’ ukuba ngamaNgqina bathi: ‘Besingacingi nokucinga ukuba siphila yaye sisebenza nabazalwana abangamaKristu abaye banyamezela ngale ndlela!’ Emva kokubukela le vidiyo, elinye iNgqina lathi lifuna ukuba nguvulindlela wexesha elizeleyo.”—UAnna Vovchuk, owagxothelwa eSiberia.
“Xa le vidiyo ibonisa abecuphi benkqonkqoza ekhayeni lelinye iNgqina, ndangcangcazela. Kwakungathi kunkqonkqozwa ekhayeni lethu, yaye ndikhumbula umama esithi: ‘Mhlawumbi kuyatsha ndaweni ithile.’ Kodwa le vidiyo indikhumbuza ukuba amaNgqina amaninzi abandezeleka kakhulu ngaphezu kwam. Yonke le nkcazelo isinika amandla nenzondelelo yokuba siqhubeke sikhonza uYehova.”—UStepan Vovchuk, owagxothelwa eSiberia.
“Ndingunyana wamaNgqina agxothelwa kwelinye ilizwe. Ngoko ke, bendicinga ukuba sendeva okwaneleyo ngaloo maxesha. Kodwa emva kokubukela le vidiyo, ndiye ndaqonda ukuba akukho nto ingako ndiyaziyo. Njengoko ndiphulaphule abantu ebekudliwana indlebe nabo, zehla iinyembezi. Ngoku la mava asingomabali nje kum kodwa yinto eyenzekayo ngokwenene. Le vidiyo iye yandenza ndaba nolwalamano olomeleleyo noThixo yaza yandinceda ukuba ndikulungele ukujamelana neengxaki eziza kubakho kwixesha elizayo.”—UVladimir Kovash, eIrkutsk.
“Le vidiyo iye yandichukumisa kakhulu kunengxelo ebhalwe phantsi. Xa bendibukele yaye ndiphulaphule udliwano-ndlebe naba bazalwana, ndiye ndavakalelwa ngokungathi bendiphila kunye nabo. Umzekelo walaa mzalwana owayezobela iintombi zakhe eziselula amakhadi abhalwe amazwi athile ngoxa wayesentolongweni undikhuthaza ukuba ndifikelele iintliziyo zabantwana bam ngeenyaniso zeBhayibhile. Ndiyabulela! Le vidiyo iye yabangela amaNgqina kaYehova eRashiya avakalelwe kukuba ayinxalenye yentlangano kaYehova yehlabathi lonke kunanini na ngaphambili.”—UTatyana Kalina, eIrkutsk.
“Intetho ethi, ‘Ukubona kanye kubhetele kunokuva amaxesha amaninzi’ ngokuqinisekileyo iyasebenza kule vidiyo. Icacile, ibonisa into eyenzekayo yaye isenzeka kubazalwana bethu! Emva kokuyibukela, ndiye ndafuna ixesha elininzi lokucinga. Le vidiyo iye yandenza ndazibona ndikwimeko efanayo naloo maNgqina ayegxothelwe kwelinye ilizwe. Ngoku xa ndithelekisa iimeko zam nezabo, ndiye ndancedakala ukuba ndizijonge ngenye indlela iingxaki zethu namhlanje.”—ULidia Beda, eIrkutsk.
Ngoko ke ividiyo ethi Faithful Under Trials iye yakhululwa ngeelwimi ezingama-25 yaye abantu bayithanda kakhulu ehlabathini lonke.a Yonke le vidiyo iye yaboniswa kwizikhululo zikamabonwakude eSt. Petersburg, eOmsk nakwezinye izixeko zaseRashiya, kwakunye nakwizixeko zaseUkraine, eVynnytsya, eKerch, eMelitopol naseLviv. Iye yagqalwa njengebalulekileyo phakathi kweevidiyo zamazwe ngamazwe.
Indlela esinamandla ngayo isigidimi esikule vidiyo ibonakala kwimizekelo yamawaka abantu abaqhelekileyo ababonakalisa inkalipho engaqhelekanga namandla okomoya ebudeni beminyaka emininzi betshutshiswa. Ngokwenene amaNgqina kaYehova eSoviet Union aye athembeka phantsi kwezilingo. Ukuba ungathanda ukuyibukela le vidiyo, amaNgqina kaYehova angakuvuyela ukukuphathela yona. Nceda qhagamshelana nomnye wawo kwindawo ohlala kuyo.
[Umbhalo osemazantsi]
a Le vidiyo ifumaneka ngezi lwimi zilandelayo: Bulgarian, Cantonese, Czech, Danish, Dutch, English, Finnish, French, German, Greek, Hungarian, Indonesian, Italian, Japanese, Korean, Lithuanian, Mandarin, Norwegian, Polish, Romanian, Russian, Slovak, Slovenian, Spanish, nesiSwedish.
[Inkcazelo Ngomfanekiso okwiphepha 8]
Stalin: U.S. Army photo
[Inkcazelo Ngomfanekiso okwiphepha 9]
Stalin: U.S. Army photo