Imibuzo Evela Kubafundi
Kwakutheni ukuze uDavide noBhatshebha bangabulawa ngokukrexeza kwabo, kusuke kufe unyana wabo?
UMthetho kaMoses wawusithi: “Xa indoda ithe yafunyanwa ilele umkamntu, bamele bafe bobabini, loo ndoda ilele naloo mfazi, nomfazi lowo. Ubususe ke ububi bungabikho kwaSirayeli.” (Duteronomi 22:22) Ukuba uYehova uThixo wayevumele abantu basingathe elo tyala lesono sikaDavide noBhatshebha ngaphantsi koMthetho, ngebabulawa. Ekubeni abantu bengakwazi ukufunda iintliziyo, isigwebo sabo sasiya kusekelwa kwindlela abaziphethe ngayo. Ukukrexeza kwakufanelwe sisigwebo sokufa. Abagwebi bakwaSirayeli babengenalo igunya lokuxolela isono sokukrexeza.
Kwelinye icala, uThixo oyinyaniso uyakwazi ukufunda iintliziyo aze axolele izono ukuba ubona kukho izizathu zokwenjenjalo. Ekubeni kwelo tyala kwakubandakanyeke uDavide, awayenze naye umnqophiso woBukumkani, uYehova wakhetha ukulisingatha ngokwakhe elo tyala. (2 Samuweli 7:12-16) “UMgwebi womhlaba wonke” unalo ilungelo lokwenza izigqibo ezilolo hlobo.—Genesis 18:25.
Yintoni awayibonayo uYehova xa wayehlolisisa intliziyo kaDavide? INdumiso 51 ityhila iimvakalelo ezinzulu zikaDavide “xa uNatan umprofeti weza kuye emva kokuba ebe neentlobano zokwazana noBhatshebha.” INdumiso 51:1-4 ithi: “Ndibabale, Thixo, ngokobubele bakho obunothando. Ngokobuninzi beenceba zakho kususe ukunxaxha kwam. Ndihlambe ngokucokisekileyo kwisiphoso sam, undihlambulule nakwisono sam. Kuba ukunxaxha kwam ndiyakwazi, nesono sam siphambi kwam rhoqo. Ndone kuwe, kuwe wedwa, ndenze okubi emehlweni akho.” Umele ukuba uYehova wakubona ukuzisola okunzulu kukaDavide waza wakujonga njengobungqina benguquko enyanisekileyo waza waqonda ukuba kukho isizathu sokuba nenceba kulo menzi wobubi uguqukayo. Ukongezelela koko, uDavide ngokwakhe wayengumntu onenceba, kwaye uYehova unenceba kwabo banenceba. (1 Samuweli 24:4-7; Mateyu 5:7; Yakobi 2:13) Xa uDavide waye wasivuma isono sakhe, uNatan wathi kuye: “NoYehova uyasidlulisa isono sakho. Akuyi kufa.”—2 Samuweli 12:13.
UDavide noBatshebha babengazukusinda kuyo yonke imiphumo yesono sabo. UNatan wathi kuDavide: “Ngenxa yokuba ngokungathandabuzekiyo uye wamphatha ngokungenantlonelo uYehova ngale nto, kwanonyana lowo, osandul’ ukumzalelwa, ngokuqinisekileyo uya kufa.” Umntwana wabo wagula waza wafa nangona uDavide wazila ukutya iintsuku ezisixhenxe.—2 Samuweli 12:14-18.
Kwabanye kubanzima ukuqonda isizathu sokuba wafayo unyana wabo, kuba iDuteronomi 24:16 ithi: “Ooyise mabangabulawa ngenxa yabantwana, nabantwana mabangabulawa ngenxa yooyise.” Kodwa simele sikhumbule ukuba, ukuba eli tyala lalichotshelwe ngabantu, ngebabebulewe abazali nomntwana lowo ungekazalwa. Ukufa kwaloo mntwana kufanele ukuba kwamnceda uDavide wayiqonda kakuhle indlela asicekisa ngayo uYehova isono sakhe noBhatsheba. Sinokuqiniseka ukuba uYehova wawusingatha ngokusesikweni lo mbandela kuba “igqibelele indlela yakhe.”—2 Samuweli 22:31.
[Umfanekiso okwiphepha 31]
UDavide waguquka ngokunyanisekileyo