Ibali Lobomi

Ukuvuyiswa Kukuba Nenxaxheba Kumsebenzi Wokufundisa IBhayibhile Owenziwa Ehlabathini Lonke

KUBALISA UANNA MATHEAKIS

Inqanawa yayivutha. Ukuba yayinokuzika, le nqanawa iziimitha ezili-171 ubude yayiya kundingcwaba ngaphantsi kwamanzi. Ngokubhuduzela ndadadela kwindawo ekhuselekileyo, ndisilwa namaza amakhulu. Ekuphela kwento endandinokuyenza ukuze ndingatshoni kukubambelela nkqi kwibhatyi yokudada ukuze ungatshoni eyayinxitywe lelinye ibhinqa. Ndathandaza kuThixo ndicela amandla nenkalipho. Leyo kuphela kwento endandinokuyenza.

OKO kwenzeka ngowe-1971, xa ndandibuyela kwisabelo sam sesithathu sobuvangeli basemazweni, eItali. Kuloo ngozi yenqanawa, ndalahlekelwa phantse zizo zonke izinto zam. Kodwa andizange ndilahlekelwe zezona zinto zibalulekileyo—ubomi bam, uthando lwabazalwana abangamaKristu nelungelo lokukhonza uYehova. Loo nkonzo yayisele indise kumazwekazi amathathu, ibe le ngozi yenqanawa yenye kwizinto ezininzi eziye zandehlela ebomini.

Ndazalwa ngowe-1922. Intsapho yakowethu yayihlala eRām Allāh, malunga neekhilomitha ezili-16 kumantla eYerusalem. Abazali bam babesuka kwisiqithi saseKrete, kodwa utata wakhulela eNazarete. Sasingabantwana abahlanu, amakhwenkwe amathathu namantombazana amabini, mna ndilithunjana. Intsapho yakowethu yadandatheka gqitha xa kwafa umnakwethu oza emva kwenkulu, owatshona kuMlambo iYordan ngoxa wayekukhenketho lwesikolo. Emva kwale ntlekele umama akazange afune ukuhlala eRām Allāh, yaye safudukela eAthene, eGrisi, xa ndandineminyaka emithathu ubudala.

Intsapho Yakowethu Iva Inyaniso YeBhayibhile

Kungekudala sifikile eGrisi, umnakwethu, uNikos, owayeneminyaka engama-22 ngelo xesha, wadibana naBafundi beBhayibhile, njengoko amaNgqina kaYehova ayesaziwa njalo ngoko. Ukwazi iBhayibhile kwamvuyisa gqitha yaye kwamenza wanenzondelelo ngobulungiseleli bamaKristu. Oku kwamcaphukisa utata, waza wamgxotha. Noko ke, xa utata eye ePalestina, mna nomama nodadewethu, sasihamba noNikos ukuya kwiintlanganiso zamaKristu. Ndisayikhumbula indlela umama awayethetha ngemincili ngayo ngezinto awayeziva kwezo ntlanganiso. Kodwa kungekudala emva koko wabulawa ngumhlaza eneminyaka engama-42 ubudala. Ngelo xesha linzima, udadewethu, uAriadne, ngothando wanyamekela intsapho yakowethu. Nangona wayeselula, wayenjengomama kum kangangeminyaka.

Utata wayesoloko ehamba nam ukuya kwiCawa yamaOthodoki xa eseAthene, yaye emva kokufa kwakhe, ndandiqhubeka ndisiya ecaweni, nangona ndandingayi rhoqo. Ekubeni ndandibona ukuba abantu abaya ecaweni babengaphili ngendlela uThixo afuna ngayo, ekugqibeleni ndayeka.

Emva kokufa kukatata, ndafumana umsebenzi ozinzileyo kwisebe lezemali. Noko ke, umnakwethu wayezinikele kumsebenzi wokushumayela ngoBukumkani, ekwenza oku kangangeminyaka eGrisi. Ngowe-1934 wafudukela eSipro. Ngelo xesha, kwakungekho maNgqina kaYehova abhaptiziweyo kweso siqithi, ngoko waba nelungelo lokuhambisela phambili umsebenzi wokushumayela apho. Emva kokuba etshatile, inkosikazi yakhe uGalatia nayo yaba ngumlungiseleli wexesha elizeleyo kangangeminyaka.a UNikos wayesoloko esithumelela iincwadi namaphephancwadi asekelwe eBhayibhileni, kodwa sasingafane siwafunde. Wahlala eSipro de wafa.

Ukwenza Inyaniso YeBhayibhile Ibe Yinto Yokwenene Kum

Ngowe-1940, uGeorge Douras iNgqina elinenzondelelo laseAthene nelingumhlobo kaNikos, wasityelela waza wasimemela ekhayeni lakhe kwisifundo seBhayibhile seqela elincinane. Ngovuyo saya. Kungekudala saqalisa ukuxelela abanye oko sasikufunda. Emva kokufunda iBhayibhile mna nodadewethu sazahlulela kuYehova. UAriadne wabhaptizwa ngowe-1942, kwalandela mna ngowe-1943.

Ukuphela kweMfazwe Yehlabathi II, uNikos wasimemela eSipro, ngoko ngowe-1945 safudukela eNicosia. Ngokungafaniyo naseGrisi, eSipro wawungavalwanga umsebenzi wokushumayela. Sasingashumayeli kwindlu ngendlu kuphela kodwa sasinikela ubungqina nasesitratweni.

Kwiminyaka emibini kamva, uAriadne kwafuneka abuyele eGrisi. Apho wadibana nomnye umzalwana, umkhonzi kaYehova, ngoko wagqiba kwelokuba asale eAthene, yaye kamva batshata. Kungekudala udadewethu nomyeni wakhe bandikhuthaza ukuba ndibuyele eGrisi ndize ndibe ngumlungiseleli wexesha elizeleyo eAthene. Ekubeni ndandihleli ndifuna ukuba nguvulindlela, ndabuyela eAthene, apho kwakufuneka abavakalisi abangakumbi.

Ukuvulekelwa Yiminyango Emitsha

NgoNovemba 1, 1947, ndaba nguvulindlela, ndichitha iiyure ezili-150 ngenyanga kumsebenzi wokushumayela. Intsimi yebandla lethu yayinkulu, yaye kwakufuneka ndihambe imigama emide. Sekunjalo, ndafumana iintsikelelo ezininzi. Amapolisa ayedla ngokubamba naliphi na iNgqina abalifumana lishumayela okanye lisiya kwiintlanganiso zamaKristu, ngoko ke kungekudala ndabanjwa.

Ndabekw’ ityala lokuguqula abantu, ityala elinzulu ngelo xesha. Ndagwetywa iinyanga ezimbini kwiNtolongo Yamabhinqa IAverof eAthene. Kwakusele kukho elinye iNgqina elilibhinqa apho, yaye sakuvuyela ukuba kunye sisakhana njengamaKristu nangona sasingaphaya kwezitshixo. Emva kokugqiba isigwebo sam, ngovuyo ndaqhubeka nobuvulindlela. Abantu abaninzi endandifunda nabo iBhayibhile basakhonza uYehova ngokuthembeka, yaye oko kundivuyisa gqitha.

Ngowe-1949, ndafumana isimemo sokuya kwiklasi ye-16 yeSikolo seWatchtower saseGiliyadi eUnited States, apho abalungiseleli bexesha elizeleyo baqeqeshelwa umsebenzi wobuvangeli basemazweni. Mna nezalamane zam kwasivuyisa gqitha oku. Ndenza amalungiselelo okuya kwindibano yezizwe ngezizwe kwisiXeko saseNew York ngehlobo lowe-1950 ndize emva koko ndiye eGiliyadi.

Emva kokufika eUnited States, ndaba nelungelo lokusebenza kwicandelo lokucoca kangangeenyanga ezimbalwa kwikomkhulu lamaNgqina kaYehova kwisiXeko saseNew York. Apho kwakucocekile, kumnandi yaye ndandihleli nabazalwana noodade abakhuthazayo nabonwabileyo. Ndiya kusoloko ndizikhumbula iinyanga ezintandathu ezimnandi endazichithela apho. Landula ke lafika ixesha lokuya kwiSikolo saseGiliyadi, apho safundisisa ngenyameko kangangeenyanga ezintlanu yaye zadlula ngokukhawuleza. Njengabafundi saqonda indlela oluxabiseke noluhle ngayo ulwazi lweZibhalo, yaye oko kwasenza saba novuyo nomnqweno ongakumbi wokuxelela abanye ulwazi lwenyaniso olunik’ ubomi.

Isabelo Sam Sokuqala Sobuvangeli Basemazweni

KwiSikolo saseGiliyadi, sasivunyelwa ukuba sizikhethele amaqabane esiza kusebenza nawo ngaphambi kokuba sifumane izabelo zethu zobuvangeli basemazweni. URuth Hemmig (ngoku onguBosshard), udade okhethekileyo, wayeliqabane lam. Mna noRuth savuyiswa gqitha kukufumana isabelo eIstanbul, eTurkey—ummandla ophakathi kweAsia neYurophu! Sasisazi ukuba umsebenzi wokushumayela wawungekamkelwa ngokusemthethweni kwelo lizwe, kodwa sasiqinisekile ukuba uYehova uya kusixhasa.

I-Istanbul sisixeko esihle esinabantu bezizwe ngezizwe. Apho kwakukho iivenkile ezininzi, iintlobo-ntlobo zokutya okuluncuthu okusehlabathini lonke, iimyuziyam ezibangel’ umdla, imizi emihle nezibuko elithi ndijonge. Okubaluleke ngakumbi, safumana abantu abafuna ukufunda ngoThixo ngokunyanisekileyo. Iqela elincinane lamaNgqina eIstanbul ngokuyintloko yayingama-Armenia, amaGrike namaYuda. Noko ke, kwakukho abantu abaninzi bezinye iintlanga, yaye kwakuluncedo ukufunda iilwimi ezahlukahlukeneyo, kuquka nolwimi lwabantu baseTurkey. Sasikuvuyela gqitha ukudibana nabantu beentlanga ezahlukahlukeneyo abanxanelwe inyaniso. Uninzi lwaba bantu lusaqhubeka lukhonza uYehova ngokuthembeka.

Okubuhlungu kukuba, uRuth akazange akwazi ukuhlaziya iphepha-mvume lakhe, yaye kwanyanzeleka ukuba alifulathele elo. Usaqhubeka nenkonzo yexesha elizeleyo eSwitzerland. Emva kwayo yonke le minyaka, ndisamkhumbula nangoku ekubeni kwakumnandi yaye kusakha ukuba kunye naye.

Ukufudukela Komnye Ummandla Womhlaba

Ngowe-1963 iphepha-mvume lam lokuhlala eTurkey alizange lihlaziywe. Kwakunzima ukushiya amaKristu endiye ndawabona esenza inkqubela ngokomoya ngoxa etsala nzima esoyisa iingxaki ezininzi. Zindithuthuzela, ngobubele izalamane zam zandihlawulela ukuya kwisiXeko saseNew York kwindibano eyayilapho. Ndandingekasifumani isabelo sam sesibini.

Emva kwendibano, ndathunyelwa eLima, ePeru. Ukusuka kwam eNew York ndaya ngqo kwisabelo sam esitsha kunye nodade oselula endandiza kusebenza naye. Ndafunda iSpanish yaye sasihlala kwikhaya labavangeli basemazweni elalingentla kweofisi yesebe lamaNgqina kaYehova. Kwakumnandi ukushumayela apho nokwazi abazalwana noodade basekuhlaleni.

Isabelo Esitsha, Nolwimi Olutsha

Ekuhambeni kwexesha, izalamane zam eGrisi zazisaluphala nempilo isiba nkenenkene. Azizange zindikhuthaze ukuba ndiyeke inkonzo yam yexesha elizeleyo ndize ndibuye ukuze ndiphile oko kubizwa ngokuba bubomi obuqhelekileyo ukuze ndizincede. Noko ke, emva kokucingisisa nzulu nokuthandaza, ndaqonda ukuba kuya kuba bhetele ndibe kufuphi nentsapho yakowethu. Abazalwana abaneembopheleleko ngothando bavuma baza bandinika isabelo eItali, izalamane zam zathi ziya kuzihlawula ezo ndleko. Kwabonakala ukuba, kufuneka abashumayeli abaninzi eItali.

Kwafuneka ndiphinde ndifunde ulwimi olutsha—isiTaliyane. Isabelo sam sokuqala sasikwisixeko saseFoggia. Kamva, ndathunyelwa eNaples, apho kwakufuneka abavakalisi abangakumbi. Ndandisebenza intsimi yasePosilipo, enye yezona ndawo zintle eNaples. Le ntsimi yayingummandla omkhulu, yaye kwakukho umvakalisi woBukumkani omnye kuphela. Ndandiwunandipha gqitha lo msebenzi, yaye uYehova wandinceda ndaqalisa izifundo zeBhayibhile ezininzi. Ekuhambeni kwexesha, kwabakho ibandla elikhulu kuloo ndawo.

Phakathi kwabantu bokuqala endafunda nabo iBhayibhile yayingumama nabantwana bakhe abane. Yena neentombi zakhe ezimbini basengamaNgqina kaYehova. Kwakhona ndafunda nesibini esitshatileyo esasinomntwana omncinane oyintombazana. Yonke loo ntsapho yenza inkqubela yaze yafuzisela ukuzahlulela kwayo ngokubhaptizwa emanzini. Ngoku loo ntombazana itshate nomkhonzi kaYehova othembekileyo, yaye bakhonza uThixo kunye ngenzondelelo. Ngoxa ndandifundisisa iBhayibhile nenye intsapho enkulu, ndachukunyiswa kukubona amandla eLizwi likaThixo. Xa safunda izibhalo eziliqela ezibonisa ukuba uThixo akakufuni ukunqulwa kwemifanekiso, umama walapho akazange alinde nokuba isifundo siphele. Ngoko nangoko wayishenxisa yonke imifanekiso endlwini yakhe!

Iingozi Elwandle

Xa ndisiya eGrisi ndisuka eItali, ndandisoloko ndihamba ngenqanawa. Ndandiqhele ukuhamba kamnandi gqitha. Kodwa olunye uhambo, ngehlobo lowe-1971, lwalahlukile. Ndandibuyela eItali ndihamba ngenqanawa uHeleanna. Ngentseni yangoAgasti 28, kwaqhambuka umlilo kwikhitshi lenqanawa. Umlilo wanwenwa yaye kwaya kukhula ukoyika ebantwini. Amabhinqa ayeyoba, abantwana bekhala amadoda esenza ingxolo. Abantu babalekela kumaphenyane okuhlangula akwicala ngalinye lenqanawa. Noko ke, zazimbalwa gqitha iibhatyi zokudada, yaye iintambo zokuhlisa amaphenyane okuhlangula zazingasebenzi kakuhle. Ndandingenayo ibhatyi yokuzikhusela, kodwa amadangatye ayekhula, ngoko ekuphela kwento endandinokuyenza yayikukutsibela elwandle.

Emva kokuba nditsibele emanzini, ndabona ibhinqa elalinxibe ibhatyi yokudada lidada kufuphi nam. Kwakubonakala ngathi alikwazi kudada, ngoko ndalitsala ngengalo ndalitsalela kude naloo nqanawa izikayo. Ulwandle lwaya lusilwa ngamandla, nam ndaya ndiphelelwa ngamandla. Le meko yayinganik’ ithemba, kodwa ndathandaza kuYehova ndimcela ukuba andinike inkalipho, yaye oko kwandinika amandla. Oku kwandikhumbuza ukophukelwa yinqanawa kukampostile uPawulos.—IZenzo, isahluko 27.

Ndibambelele kweli bhinqa, kwafuneka ndilwe namaza kangangeeyure ezine, ndidade xa ndinamandla okwenjenjalo ndize ndicele uncedo kuYehova. Ekugqibeleni, ndabona kusiza iphenyane. Ndahlangulwa, kodwa lona eli bhinqa lalisele lifile. Ukufika kwethu kwidolophu iBari, eItali, ndasiwa esibhedlele, apho ndafumana unyango. Kwafuneka ndichithe iintsuku ezithile esibhedlele, yaye amaNgqina athontelana ukuza kundibona, ngobubele endinika konke endandikuswele. Uthando lobuKristu awalubonakalisayo lwabachukumisa gqitha abanye endandilele nabo esibhedlele.b

Emva kokuba ndiphilile, ndathunyelwa eRoma. Ndacelwa ukuba ndisebenze kwintsimi yamashishini kumbindi wesixeko, nto leyo endayenza kangangeminyaka emihlanu, ndincedwa nguYehova. Kangangeminyaka engama-20 ndiye ndakunandipha ukuba ngumlungiseleli eItali, yaye ndiye ndabathanda abantu balapho.

Ukubuyela Apho Ndandiqale Khona

Njengoko ixesha lihamba, impilo ka-Ariadne nomyeni wakhe yayisiba mandundu ngakumbi. Ndaqonda ukuba xa ndinokuhlala kufuphi nabo, ndandinokukwazi ukukubuyekeza oko bandenzela kona ngothando. Ndimele ndivume ukuba kwakubuhlungu ukushiya i-Itali. Noko ke, abazalwana abaneembopheleleko bandikhulula, yaye ukususela ngehlobo lowe-1985, bendinguvulindlela eAthene, apho ndaqala khona inkonzo yexesha elizeleyo ngowe-1947.

Ndashumayela kwintsimi yebandla lam, yaye ndacela kubazalwana kwiofisi yesebe ukuba ndishumayele kwintsimi yamashishini kumbindi wesixeko. Oku ndakwenza kangangeminyaka emithathu ndincediswa ngomnye uvulindlela. Sashumayela ngokucokisekileyo kubantu abangafane bafumaneke kumakhaya abo.

Noko ke, njengoko ixesha lihamba, umnqweno wam wenkonzo uya ukhula ngakumbi nangakumbi kodwa umzimba uyala. Ngoku umyeni kadadewethu akasaphili. UAriadne, obefana nomama kum, akasaboni. Mna impilo yam yayintle xa ndandikwinkonzo yexesha elizeleyo. Noko ke, mvanje, ndawa kwizinyuko ezenziwe ngelitye lenyengane ndaza ndaphuka ingalo yasekunene. Emva koko ndawa ndaphuka amarhorho. Kwafuneka ndityandwe ndaza ndalala ebhedini ixesha elide. Ngoku andisakwazi ukuhambahamba. Ndihamba ngentonga yaye ndiphuma kuphela xa kukho umntu oza kuhamba nam. Sekunjalo, ndenza konke okusemandleni, ndinethemba lokuba impilo yam iza kuba bhetele. Ukuba nenxaxheba, enoba yelinganiselweyo kumsebenzi wokufundisa iBhayibhile kuseyeyona nto indonwabisayo nendenza ndaneliseke.

Xa ndikhumbula iminyaka evuyisayo endayichitha kubulungiseleli bexesha elizeleyo, ndiye ndizaliswe ngumbulelo kuYehova. Yena nentlangano yakhe yasemhlabeni bebesoloko bendinika ulwalathiso lobulumko noncedo oluxabisekileyo, ukuze ndenze konke okusemandleni njengoko ndiye ndachitha ubomi bam ndimkhonza. Umnqweno wam osuka entliziyweni kukuba uYehova andomeleze ndiqhubeke ndisenkonzweni yakhe. Iyandivuyisa inxaxheba encinane endiye ndaba nayo kumsebenzi awalathisayo wokufundisa iBhayibhile.—Malaki 3:10.

[Imibhalo esemazantsi]

[Umfanekiso okwiphepha 9]

Ndikunye nodadewethu, uAriadne, nomyeni wakhe, uMichalis, xa ndandisiya eGiliyadi

[Umfanekiso okwiphepha 10]

Mna noRuth Hemmig sathunyelwa eIstanbul, eTurkey

[Umfanekiso okwiphepha 11]

EItali, ebutsheni beminyaka ye-1970

[Umfanekiso okwiphepha 12]

Ndikunye nodadewethu uAriadne, namhlanje