Imibuzo Evela Kubafundi

IDuteronomi 14:21 ithi: “Nize ningayidli nayiphi na into ezifeleyo.” Ngaba oko kuyaphikisana namazwi akwiLevitikus 11:40, athi: “Lowo udlayo esidumbini saso [isilo] wozihlamba izambatho zakhe, aze abe ngongahlambulukanga kude kuhlwe”?

Ezi ndinyana zimbini aziphikisani. Le yokuqala iphinda umyalelo owalela ukutyiwa kwesilwanyana esizifeleyo, mhlawumbi esiye sabulawa ngamarhamncwa. (Eksodus 22:31; Levitikus 22:8) Eyesibini ichaza oko kwakunokwenziwa ngumSirayeli ukuba uye wophula loo myalelo, mhlawumbi ngempazamo.

Isibakala sokuba okuthile kwakusalelwa nguMthetho sasingathethi kuthi oko kwakungakhe kutyeshelwe. Ngokomzekelo, kwakukho imithetho eyalela ubusela, ukubulala, ukuba lingqina lobuxoki nezinye izinto. Kwangaxeshanye, kwakukho izohlwayo ezimiselweyo xa loo mithetho kaThixo isaphulwa. Ezo zohlwayo zazibonisa ukuba le mithetho ifanele ithotyelwe nendlela ebaluleke ngayo.

Umntu owaphula umthetho watya isilwanyana esizifeleyo uYehova wayemjonga njengongahlambulukanga yaye kwakufuneka enze ngokwendlela emiselweyo yokuhlambuluka. Kodwa ukuba akazihlambululanga ngendlela efanelekileyo, kwakuya kufuneka ‘aphendula ngesiphoso sakhe.’—Levitikus 17:15, 16.