Imibuzo Evela Kubafundi
Yintoni esinokuyifunda kummiselo okwiEksodus 23:19 othi: “Uze ungalipheki itakane ngobisi lukanina”?
Lo mmiselo okuMthetho kaMoses, ovela izihlandlo ezithathu eBhayibhileni, unokusinceda siqonde imbono kaYehova ngoko kwamkelekileyo, imfesane anayo novelwano lwakhe. Kwakhona ubalaselisa indlela aluthiye ngayo unqulo lobuxoki.—Eksodus 34:26; Duteronomi 14:21.
Ukupheka itakane okanye naso nasiphi na isilwanyana ngobisi lukanina bekuya kungqubana nendlela azilungelelanise ngayo izinto uYehova. UThixo wenza ubisi ukuze londle itakane likhule. Ngokutsho komnye umphengululi ukupheka itakane ngobisi lukanina bekuya, “kubonisa ukungalisiso ulwalamano olungcwele olumiselwe nguThixo phakathi kwetakane nonina.”
Abanye, bacingela ukuba ukupheka itakane ngobisi lukanina isenokuba yayisisithethe sabahedeni esasisenziwa xa kubizwa imvula. Ukuba kwakunjalo, lo mmiselo wawuza kukhusela amaSirayeli kwizithethe zonqulo ezingekho ngqiqweni nezikhohlakeleyo ezazisenziwa ziintlanga ezaziwangqongile. UMthetho kaMoses wawalela ngokungqalileyo amaSirayeli ukuba angaphili njengezontlanga.—Levitikus 20:23.
Okokugqibela, lo mthetho ubonisa indlela anovelwano ngayo uYehova. Lo Mthetho, unentaphane yemithetho eyelelene kulo ethintela ukuphathwa kakubi kwezilwanyana nethintela ukungqubana kwendlela ezilungelelaniswe ngayo izinto. Ngokomzekelo, uMthetho wawuquka imiyalelo eyayikwalela ukwenza idini ngetakane ngaphandle kokuba belihleli nonina iintsuku ezisixhenxe, ukuxhela itakane nonina ngamininye, ukuthabatha intaka namaqanda ayo okanye namantshontsho ayo.—Levitikus 22:27, 28; Duteronomi 22:6, 7.
Kuselubala ke, ukuba uMthetho wawungelothotho nje lwemiyalelo nemimiselo entsonkothileyo. Phakathi kwezinye izinto, imigaqo yoMthetho iyasinceda sibe nemilinganiselo ephakamileyo yokuziphatha ebonisa iimpawu zikaYehova ezigqwesileyo.—INdumiso 19:7-11.
[Inkcazelo Ngomfanekiso okwiphepha 31]
© Timothy O’Keefe/Index Stock Imagery