Yiyiphi Imfundo Enokukunceda Uphumelele Ebomini?

NGABA wakha wathwaxwa ziingxaki de wavakalelwa kukuba zingaphezu kwamandla akho? Khawucinge nje indlela obuya kubandezeleka ngayo ukuba ubunokwenza impazamo ngoxa ucombulula ezinye zezo ngxaki. Akukho mntu ozalwa enobuchule bokucombulula zonke iingxaki, nowenza izigqibo zobulumko ngalo lonke ixesha. Seso sizathu esiyenza imfundo ibaluleke. Unokuyifumana phi imfundo enokukunceda ukwazi ukuhlangabezana neengxaki zobomi?

Abantu abaninzi, abaselula nabadala, bayakuvuma ukubaluleka kwemfundo. Ezinye iingcali ‘zikholelwa ukuba akunakuze ukwazi ukufumana umsebenzi [ofanelekileyo] ukuba akunaso isidanga.’ Sekunjalo, kukho izinto ezithile abantu abazisweleyo abangenakuzifumana nje ngokuba nemfundo. Ngokomzekelo, ngaba imfundo ephakamileyo inokukunceda ube ngumzali, iqabane okanye umhlobo olungileyo? Eneneni, abantu abaxatyiswayo ngenxa yezinto abaye bazenza kuba benemfundo ephakamileyo basenokuba neempawu ezingathandekiyo, ubomi babo bentsapho buzaliswe ziingxaki okanye bade bagqibele ngokuzibulala.

Bambi balujonga unqulo njengomthombo wemfundo abanokufumana ukhokelo kuyo, kodwa baye baphoxeke xa bengafumani nto enokubanceda bahlangabezane neengxaki zobomi. Echaza umzekelo woku, uEmiliaa waseMexico uthi: “Kwiminyaka eli-15 edluleyo ndandivakalelwa kukuba mna nomyeni wam asinako ukuqhubeka sihlala kunye. Sasixambulisana ngalo lonke ixesha. Ndandingakwazi ukumyekisa utywala. Kwakudla ngokufuneka ndishiye iintsana zethu zodwa xa ndiye kumkhangela. Ndandidandathekile. Ndaya ecaweni izihlandlo eziliqela ndifuna isicombululo. Nangona kwakukhe kufundwe iBhayibhile, andizange ndive siluleko singqalileyo esiphathelele imeko yam; kungekho nomntu oweza kum ukuze andixelele oko ndimele ndikwenze. Ukuba secaweni nokuphindaphinda imithandazo akuzange kundanelise.” Bambi basenokuphelelwa lithemba xa bebona iinkokeli zabo zonqulo zingengomzekelo. Ngenxa yoko, abaninzi baye baphelelwe yintembelo kunqulo bangalujongi njengomthombo woqeqesho nemfundo abayifunayo ukuze baphumelele ebomini.

Ngoko ke, usenokuzibuza, ‘Yiyiphi imfundo enokundinceda ndiphumelele ebomini?’ Ngaba ubuKristu bokwenyaniso bunayo impendulo kulo mbuzo ubalulekileyo? Oku kuza kuxutyushwa kwinqaku elilandelayo.

[Umbhalo osemazantsi]