UYehova Akasayi Kuze Akushiye
AMAKRISTU akwaYuda ayejamelene nenkcaso engathethekiyo, yaye kwakufuneka alwe nesimo sengqondo sokuthanda izinto eziphathekayo sabantu awayephila phakathi kwabo. Ukuze awakhuthaze, umpostile uPawulos wacaphula amazwi athethwa nguYehova kumaSirayeli xa ayengena kwiLizwe Lesithembiso. UPawulos wathi: “Andiyi kuze ndikushiye, ndingayi kuze ndikutyeshele.” (Hebhere 13:5; Duteronomi 31:6) Esi sithembiso simele ukuba sawomeleza amaKristu angamaHebhere enkulungwane yokuqala.
Esi sithembiso sifanele someleze nathi sikwazi uhlangabezana namaxhala okuphila kula ‘maxesha amanqam ekunzima ukujamelana nawo.’ (2 Timoti 3:1) Ukuba sikholosa ngoYehova size senze ngokuvisisana nokuthanda kwakhe, uya kusilondoloza nakwezona meko zinzima. Ukuze sibone indlela uYehova anokusiphumeza ngayo esi sithembiso, makhe sixubushe ngomzekelo womntu oye waphulukana nezinto zakhe.
Ukuguquka Kwezinto
Inani labantu abangasebenziyo liyanda ehlabathini ngokubanzi. Ngokutsho kwelinye iphephancwadi lasePoland, ukungasebenzi kwabantu “yeyona ngxaki ingundoqo kwezoqoqosho.” Le ngxaki ithwaxa namazwe ahambele phambili kwezoqoqosho. Ngokomzekelo, nkqu nakumazwe angamalungu eOrganization for Economic Cooperation and Development, ngowama-2004 inani labantu abangasebenziyo “lantinga laya kutsho ngaphaya kwama-32 ezigidi, ladlula lee kwinani labantu ababengasebenzi ngamaxesha okuDodobala kweZoqoqosho kweye-1930.” NgoDisemba 2003, iCentral Statistical Office yasePoland yanikela ingxelo yokuba ngabantu abazizigidi ezithathu ababengasebenzi, “lowo ngumyinge we-18 ekhulwini wabantu ababefanele ukuba bayasebenza kwelo.” Enye ingxelo yathi, ngowama-2002 umlinganiselo wabantu abantsundu ababengasebenzi eMzantsi Afrika wafikelela kuma-47, 8 ekhulwini.
Ukuphelelwa ngumsebenzi nokudendwa ungalindelanga zizinto ezehlela bonke abantu, kuquka abakhonzi bakaYehova. ‘Ixesha nesihlo esingenakubonwa kwangaphambili’ sinokwehlela nabani na. (INtshumayeli 9:11) Sinokusuka siphinde amazwi omdumisi uDavide athi: “Ukubandezeleka kwentliziyo yam kwandile.” (INdumiso 25:17) Ngaba ungakwazi ukuhlangabezana neemeko ezinjalo? Ezi meko zinokukuchaphazela empilweni, ngokweemvakalelo nangokomoya. Ukuba uphelelwe ngumsebenzi ngaba ungazama ukuxomoloza kwakhona?
Ukuhlangabezana Nokudandatheka
Ingcali yengqondo uJanusz Wietrzyński ithi, “amadoda ngawona acinezeleka kakhulu akuphelelwa ngumsebenzi,” ibe oku kubangelwa kukuba ajongwa njengafanele ondle intsapho zawo. Yaphinda yathi ukuphelelwa ngumsebenzi kunokuyenza ‘indoda ivakalelwe ngeendlela ezahlukeneyo,’ maxa wambi ibe lugcalagcala ngumsindo okanye ifune ukunikezela kwimeko ekuyo. Utata ophelelwe ngumsebenzi usenokuziva engenasidima aze aqalise “ukusoloko esilwa nentsapho yakhe.”
UAdam utata wabantwana ababini ongumKristu, usichazela indlela awayevakalelwa ngayo xa wayephelelwe ngumsebenzi uthi: “Ndandicatshukiswa yiyo yonke into. Nokuba sele ndilele ndandiphupha ngomsebenzi nangendlela yokunyamekela abantwana nomfazi wam, owayephelelwe ngumsebenzi engalindelanga.” Xa uRyszard noMariola isibini esitshatileyo baye baphelelwa ngumsebenzi benomntwana netyala elikhulu ebhankini. Umfazi uthi: “Ndandisoloko ndikhathazekile, isazela sam sindixelela ukuba ndandingafanele ndenze tyala ebhankini. Ndandisoloko ndizigxeka.” Xa sikwimeko elolo hlobo, sinokucaphuka lula, sizive sinxunguphale, sibuhlungu size songanyelwe naziimvakalelo. Sinokuzilawula njani ezo mvakalelo?
IBhayibhile inecebiso elihle ngento esimele siyenze ukuze sihlale sinesimo sengqondo esifanelekileyo. Umpostile uPawulos wasibongoza esithi: “Musani ukuxhalela nantoni na, kodwa ezintweni zonke zaziseni izibongozo zenu kuThixo ngomthandazo nesikhungo nombulelo; yaye uxolo lukaThixo olungaphaya kokuqonda luya kuzilinda iintliziyo zenu namandla enu engqondo ngoKristu Yesu.” (Filipi 4:6, 7) Ukuphalaza imbilini yethu kuYehova kuya kusinika “uxolo lukaThixo,” uxolo lwengqondo olubangelwa kukuba nokholo kuye. Umfazi ka-Adam uIrena uthi: “Emithandazweni yethu, samxelela uYehova ngemeko yethu noko siceba ukukwenza ukuze sibenze lula ubomi bethu. Umyeni wam owayesoloko ekhathazeka ngokukhawuleza, waqonda ukuba icebo liya kuzakha ngokwalo.”
Ukuba uphelelwe ngumsebenzi ungalindelanga, oko kukunika ithuba lokuba uthobele isibongozo sikaYesu Kristu kwiNtshumayelo yaseNtabeni sokuba: “Musani ukuxhalela imiphefumlo yenu mayela noko niya kukudla okanye oko niya kukusela, okanye imizimba yenu mayela noko niya kukunxiba. . . . Qhubekani, ke ngoko, nifuna kuqala ubukumkani nobulungisa bakhe, yaye zonke ezinye izinto ziya kongezelelwa kuni.” (Mateyu 6:25, 33) URyszard noMariola basebenzisa esi siluleko ukuze bachache ngokweemvakalelo. UMariola uthi: “Umyeni wam wayesoloko endithuthuzela endiqinisekisa ukuba uYehova akasayi kuze asishiye.” Umyeni wakhe wongezelela athi: “Ekubeni sasisoloko sithandaza kunye, siye sasondela kuThixo saza nathi sasondelelana, yaye oko kuye kwasithuthuzela.”
Nomoya oyingcwele kaThixo uya kusinceda. Ukuzeyisa, okusisiqhamo somoya, kunokusinceda sihlale silungelelene. (Galati 5:22, 23) Kusenokungabi lula, kodwa sinako kuba uYesu wathembisa wathi ‘uYihlo osezulwini uya kubanika umoya oyingcwele abo bamcelayo.’—Luka 11:13; 1 Yohane 5:14, 15.
Musa Ukuzityeshela Iintswelo Zakho Zokomoya
Ukugxothwa emsebenzini kunokumdimaza kwanoyena mKristu ulungeleleneyo, kodwa asimele sizityeshele iintswelo zethu zokomoya. Ngokomzekelo khawucinge ngoMoses owayeneminyaka engama-40 ubudala, ubomi bakhe batshintsha xa waphulukana nelungelo lokuba lilungu lendlu yobukhosi baseYiputa waza waba ngumalusi, umsebenzi owawujongelwa phantsi ngamaYiputa. (Genesis 46:34) Kwafuneka ukuba uMoses aziqhelanise nezo meko zintsha. Kangangeminyaka engama-40 eyalandelayo, wavumela uYehova ukuba amxonxe amqeqeshele umsebenzi awayeza kuwenza. (Eksodus 2:11-22; IZenzo 7:29, 30; Hebhere 11:24-26) Phezu kwabo nje obo bunzima, uMoses watsolisa iliso lakhe kwizinto zokomoya, ekulungele ukuqeqeshwa nguYehova. Ngamana singangaze sivumele iimeko ezimbi ziphazamise imilinganiselo yethu yokomoya!
Nangona kunokuba buhlungu gqitha ukuphelelwa ngumsebenzi ungalindelanga, elo lixesha lokomeleza ulwalamano lwethu noYehova uThixo nabantu bakhe. UAdam okhankanywe ngaphambili, naye wayevakalelwa ngaloo ndlela. Uthi: “Xa saphelelwa ngumsebenzi nomkam, ayizange ithi qatha nokuthi qatha into yokuba singayi kwintlanganiso zamaKristu okanye sinciphise ixesha esasilichitha kumsebenzi wokushumayela. Oko kwasinceda asazixhalabisa ngokugqithiseleyo ngekamva.” URyszard naye utsho okufanayo athi: “Ukuba sasingayi kwiintlanganiso nakubulungiseleli, ngesasingazange sikwazi ukumelana nale meko; amaxhala ayeza kusongamela. Ukuncokola nabanye ngezinto zokomoya kuyasikhuthaza, kuba kusenza sicinge ngeengxaki zabanye singasoloko sicinga ngeziqu zethu.”—Filipi 2:4.
Ewe, kunokuba ube uzixakekisa ngokungasebenzi, sebenzisa elo xesha unalo kwizinto zokomoya, fundisisa, ubandakanyeke kumsebenzi webandla okanye wandise ubulungiseleli bakho. Kunokuphila njengabanye abantu abangasebenziyo, uya kuba ‘nokuninzi kokwenza emsebenzini weNkosi’—nto leyo eya kuvuyisa wena nabantu abanyanisekileyo abasabelayo kwisigidimi soBukumkani osishumayelayo.—1 Korinte 15:58.
Ukunyamekela Intsapho Yakho Ngokwasenyameni
Noko ke, ukutya kokomoya akunakuze kukuhluthise xa ulambile. Sifanele sikhumbule umgaqo othi: “Ngokuqinisekileyo ukuba nabani na akabalungiseleli abo bangabakhe, ngokukodwa amalungu endlu yakhe, ngokuqinisekileyo ulukhanyele ukholo yaye mbi ngaphezu kongakholwayo.” (1 Timoti 5:8) UAdam uvuma athi: “Nangona abazalwana ebandleni bekulungele ukusinceda ngokwasenyameni, njengamaKristu sinembopheleleko yokufuna umsebenzi.” UYehova nabantu bakhe banokusixhasa, kodwa asimele kulibala ukuba kufuneka sizifunele umsebenzi.
Yintoni ke esinokuyenza xa sifuna umsebenzi? UAdam uthi: “Musa ukuhlala usonge izandla ulindele ukuba uThixo enze ummangaliso. Xa ukhangela umsebenzi, sukoyika ukuzichaza ukuba uliNgqina likaYehova. Abaqeshi badla ngokukuxabisa oko.” URyszard ucebisa oku: “Buzisa kuye nabani na omaziyo ngamathuba omsebenzi, qhubeka ukhangela kwiindawo zengqesho, funda izibhengezo, ezinjengezithi: ‘Sifuna ibhinqa eliza kunyamekela abantu abaneziphene’; okanye, ‘Isingxungxo: Somntu oza kusivunela amaqunube.’ Qhubeka uwufuna! Musa ukuba namabhongo, nokuba uza kwenza umsebenzi ongabalulekanga okanye ongawuthandiyo.”
Ewe, ‘uYehova ngumncedi wakho. Akasayi kuze akushiye engasayi kuze akutyeshele.’ (Hebhere 13:5, 6) Akuyomfuneko ukuzixhalabisa ngokugqithiseleyo. Umdumisi uDavide wabhala wathi: “Yiqengqele kuYehova indlela yakho, uze uthembele ngaye, kwaye yena uya kwenza.” (INdumiso 37:5) ‘Ukuqengqela indlela yethu kuYehova’ kuthetha ukuba sikholosa ngaye size senze izinto ngendlela yakhe, nokuba kubonakala kunzima.
UAdam noIrena bazixhasa ngokuhlamba iifestile nezinyuko bengasafazi nangemali. Babesiya rhoqo nakwiindawo zengqesho. UIrena uthi: “Uncedo sasilufumana kanye xa silufuna.” Umnyeni wakhe woleka esithi: “Kuye kwabonakala ukuba izinto esasizithandazela zazingabalulekanga kuThixo. Oku kuye kwasifundisa ukuba sikholose ngobulumko bakhe singenz’ izinto ngendlela yethu. Kuhle ukuyilinda ngomonde indlela kaThixo yokulungisa izinto.”—Yakobi 1:4.
URyszard noMariola benza imisebenzi emininzi engafaniyo kodwa kwangaxeshanye babeshumayela kwimihlaba enentswelo enkulu. URyszard uthi: “Sasifumana isingxungxo kanye xa kuphele yonke into esiwa phantsi kwempumlo. Sayala imisebenzi ehlawulayo eyayiza kuphazamisana neembopheleleko zethu zobuthixo. Sakhetha ukulindela kuYehova.” Bakholelwa ukuba uYehova wangenelela ukuze bakwazi ukuqesha igumbi elibiza imali ephantsi ekugqibeleni uRyszard wawufumana umsebenzi.
Ukuphelelwa ngumsebenzi kunokuba ngamava abuhlungu, kodwa kutheni ungakuthabathi njengethuba lokuba uzibonele ukuba uYehova akasayi kuze akushiye? UYehova uya kukunyamekela. (1 Petros 5:6, 7) Esebenzisa umprofeti uIsaya wathembisa wathi: “Musa ukubhekabheka, kuba ndinguThixo wakho. Ndiza kukuqinisa. Ndiza kukunceda ngokwenene.” (Isaya 41:10) Ungaze uvumele nantoni na, kuquka ukuphelelwa ngumsebenzi kukudimaze. Yenza konke okusemandleni akho, uze okunye ukuyekele ezandleni zikaYehova. Lindela kuYehova ‘uthe cwaka.’ (IZililo 3:26) Uya kufumana iintsikelelo.—Yeremiya 17:7.
[Umfanekiso okwiphepha 9]
Ixesha lisebenzisele izinto zokomoya
[Imifanekiso ekwiphepha 10]
Funda ukuba noqoqosho, kwaye musa ukuba namabhongo xa ukhangela umsebenzi