Ibali Lobomi

Ndafumana ‘Izicelo Zentliziyo Yam’

KUBALISA UDOMINIQUE MORGOU

NgoDisemba 1998, lada lazaliseka iphupha lam lokuya eAfrika! Ngaphambi koko ndandisoloko ndilangazelela ukubona amadlelo athe thaa nezilwanyana zasendle ezibangel’ umdla zaseAfrika. Kodwa ngoku ndandilapho kanye! Kwangaxeshanye kwakuzaliseke nomnye umnqweno wam. Ndandingumshumayeli wexesha elizeleyo kwilizwe lasemzini. Kwabaninzi oku kwakunokubonakala njengento engenakwenzeka. Andiboni kakuhle, ibe ndincedwa yinja ekhokela iimfama ukuze ndihambe kwizitrato ezinothuli zeelali zaseAfrika nakuba yona iqeqeshelwe ukuhamba kwizitrato zezixeko zaseYurophu. Makhe ndikubalisele ngento eyandincedayo ukuze ndikwazi ukushumayela eAfrika nangendlela uYehova awandinceda ngayo ndafumana ‘izicelo zentliziyo yam.’—INdumiso 37:4.

NDAZALWA ngoJuni 9, 1966, kumazantsi eFransi. Ndandinguntondo kubantwana abasixhenxe—amakhwenkwe amabini neentombi ezintlanu—sonke sakhuliswa ngothando ngabazali bethu. Noko ke, ngoxa ndandisengumntwana ndehlelwa yinto ebuhlungu kubomi bam. Njengomakhulu, umama, kunye nomnye udadewethu, ndinesifo esibangela ukuba ubani angakwazi kubona ekugqibeleni.

Xa ndandikwishumi elivisayo ubudala ndajamelana nocalucalulo, ikhethe nohanahaniso, izinto ezandenza ndaba nemvukelo ebantwini. Kwaba kweli xesha linzima esaye safudukela kummandla waseHérault. Apho, kwenzeka into echulumancisayo.

Ngenye intsasa ngeCawa, kwafika amaNgqina kaYehova amabini ekhaya. Umama wayewazi waza wawamkela. Elinye kulo maNgqina lakhumbuza umama ngesithembiso awayesenzile sokuba ngenye imini uya kuvuma ukuqhutyelwa isifundo seBhayibhile. Umama wayesasikhumbula eso sithembiso waza wabuza, “Siza kuqala nini?” Bavumelana ngokufunda rhoqo kusasa ngeCawa, ngoko umama waqala ukufunda ‘inyaniso yeendaba ezilungileyo.’—Galati 2:14.

Ukufumana Ukukhanya

Umama wazibhokoxa ukuze akuqonde yaye akugcine oko wayekufunda. Ekubeni wayengaboni, kwafuneka akugcine entloko konke oko. AmaNgqina ayemfundisa ngomonde. Mna ndandizimela kwigumbi lam de ahambe. Noko ke, ngenye imvakwemini uEugénie oliNgqina wadibana nam saza sancokola. Wandixelela ukuba uBukumkani bukaThixo buya kuphelisa lonke uhanahaniso, intiyo nekhethe emhlabeni. Wathi: “NguThixo kuphela onokwenza oko.” UEugénie wandibuza enoba ndiyafuna kusini na ukwazi okungakumbi. Ngosuku olulandelayo, nam ndaqalisa ukufunda iBhayibhile.

Yayintsha yonke into endandiyifunda. Ndatsho ndazi ukuba uThixo uvumele ubungendawo okwexeshana ngezizathu ezivakalayo. (Genesis 3:15; Yohane 3:16; Roma 9:17) Ndafunda nokuba uYehova akasishiyanga kwesinomhlwa. Usinike ithemba elimangalisayo lokuphila ngonaphakade kumhlaba oyiparadesi. (INdumiso 37:29; 96:11, 12; Isaya 35:1, 2; 45:18) Kuloo Paradesi, ndiya kuphinda ndibone.—Isaya 35:5.

Ukuqalisa Inkonzo Yexesha Elizeleyo

NgoDisemba 12, 1985, ndafuzisela ukuzahlula kwam kuYehova ngokubhaptizwa emanzini, ndilandela udadewethu uMari-Claire, owayesele ebhaptiziwe. Umnakwethu uJean-Pierre kunye nomama nabo babhaptizwa.

Kwibandla endandikulo, kwakukho oovulindlela abathe-ngxi okanye abashumayeli bexesha elizeleyo abaninzi. Lwandikhuthaza uvuyo nenzondelelo ababenayo entsimini. NoMarie-Claire owayengaboni enxiba isixhobo ekuthiwa yiorthopedic device emlenzeni, wangenelela inkonzo yexesha elizeleyo. Umzekelo wakhe usandikhuthaza nanamhla oku. Ifuthe loovulindlela ebandleni kunye nenkxaso yentsapho yakuthi zandinceda ndanomnqweno wokungenelela inkonzo yexesha elizeleyo. NgoNovemba 1990, ndaba nguvulindlela kwisixeko iBéziers.—INdumiso 94:17-19.

Ukuhlangabezana Nokudimazeka

Entsimini ndandincedwa ngabanye oovulindlela. Nalapho, ndandikhe ndidimazeke ngenxa yokungaboni yaye ndandinqwenela ukwenza okungakumbi. Kodwa uYehova wayendomeleza kumaxesha anjalo. Ndaphanda kwiWatch Tower Publications Index, ndikhangela amabali obomi oovulindlela abangaboniyo njengam. Ndamangaliswa kukufumanisa ukuba baninzi abanjalo! Ezi ngxelo zikhuthazayo zandifundisa ukukuxabisa oko ndikwaziyo ukukwenza nokuba ndiyamkele ingxaki yam.

Ukuze ndizixhase, sasicoca iivenkile ezinkulu namanye amaNgqina. Ngenye imini ndaphawula ukuba abanye bayaziphinda ezo ndawo sele ndizicocile. Ndimele ukuba ndandishiyelela gqitha. Ndaya kuValérie uvulindlela owayephethe iqela lethu lokucoca, ndamcela ukuba athethe phandle ukuba ndandingabathwalisi bunzima na abanye. Ngobubele wayekela kum ukuba ndizenzele isigqibo xa ndifuna ukuwuyeka loo msebenzi. NgoMatshi 1994, ndawuyeka.

Ndaphinda ndavakalelwa kukuba akukho yam. Ndazingisa ndithandaza kuYehova, ibe ndiyazi ukuba waziphulaphula izicelo zam. Ndancedwa kukufundisisa iBhayibhile neempapasho zamaKristu. Nakuba amehlo am ayesiba buthathaka ngakumbi, wawukhula ngamandla umnqweno wokukhonza uYehova. Ndandiza kuthini bethu?

Ukulinda, Nokwenza Isigqibo Esikhawulezileyo

Ndafaka isicelo sokuya kuqeqeshwa kwiRehabilitation Center for the Blind and Visually Impaired eNîmes ndaza ndamkelwa kangangeenyanga ezintathu. Lwandinceda gqitha olo qeqesho. Ndatsho ndakuqonda kakuhle oko kuthethwa kukungaboni ndaza ndafunda indlela yokuhlangabezana nako. Ukuhlala nabantu abaneziphene ezahlukahlukeneyo kwandinceda ndayiqonda indlela okubaluleke ngayo ukuba nethemba lekamva njengomKristu. Ekubeni ndandinosukelo oluthile kwakukho into endinokuyenza. Ukongezelela, ndafunda iBraille yesiFrentshi.

Ekufikeni kwam ekhaya, bayibona indlela olundincede ngayo olo qeqesho. Ekuphela kwento endandingayithandi kukuphatha intonga emhlophe njengabanye abantu abangaboniyo. Kwakunzima ukuqhelana naloo ntonga. Kwakunokuba bhetele ukufumana olunye uncedo—mhlawumbi inja ekhokela iimfama.

Ndafaka isicelo sokufumana loo nja, kodwa ndaxelelwa ukuba kukho uludwe lwabantu abalindileyo. Kwakufuneka elo ziko liqale lenze uphando. Le nja ayinikwa nje nabani na, kukho imigaqo emele ilandelwe kuqala. Ngenye imini ibhinqa eliphethe umbutho weemfama landixelela ukuba iqela lentenetya liza kuphisa ngenja ekhokela iimfama kumntu oyimfama okanye obona luzizi ohlala kummandla wethu. Lathi liye lacinga ngam. Labuza enoba ndiyayifuna na. Ndaqonda ukuba nguYehova ongeneleleyo, ngoko ndavuma. Noko ke, kwafuneka ndilinde kangangexesha elithile.

Ndandisacinga NgeAfrika

Ngoxa ndandisalinde, ndacinga ngenye into. Njengoko ndiye ndatsho ngaphambilana, kwasebuntwaneni ndandinqwenela ukuya eAfrika. Nangona ndandisiya ndingaboni ngakumbi, loo mnqweno waya ukhula ngamandla, ngakumbi ndakuva ukuba abantu balapho banomdla wokufunda iBhayibhile nokukhonza uYehova. Ngaphambilana ndakha ndachazela uValérie ngomnqweno wokutyelela eAfrika. Ndambuza enoba angathanda na ukuhamba nam. Wavuma, saza ke sabhalela amasebe amaNgqina kaYehova aseAfrika akwezo ndawo zithetha isiFrentshi.

Kwafika impendulo evela eTogo. Ndingaziva yimincili ndacela uValérie ukuba andifundele. Le leta yayikhuthaza, ibe uValérie wathi: “Sisalinde ntoni ke?” Emva kokubhalela abazalwana abakwelo sebe, bacela ukuba ndiqhagamshelane noSandra uvulindlela owayehlala eLomé, ikomkhulu lalapho. Sanduluka ngoDisemba 1, 1998 sisingise eTogo.

Yayahluke gqitha le ndawo, kodwa kwandivuyisa ukuba lapho! Emva kokufika eLomé, saphuma kwinqwelo-moya saze sabethwa lulophu lwaseAfrika. USandra wayesele esilindile. Sasiqala ukubonana, kodwa kwaba ngathi singabahlobo abadala. Ngaphambi nje kokufika kwethu, uSandra nomnye uvulindlela awayesebenza naye uChristine babemiselwe njengoovulindlela abakhethekileyo kwidolophana yaseTabligbo, ekumbindi weli lizwe. Sahamba nabo ukuya kweso sabelo sitsha. Sahlala apho malunga neenyanga ezimbini, ibe xa sasigoduka ndandizimisele ukuphinda ndibuye.

Ndakuvuyela Ukubuyela ETogo

Ukufika kwam eFransi, ndenza amalungiselelo okubuyela eTogo. Ngoncedo lwasekhaya, ndakwazi ukwenza amalungiselelo okuhlala apho iinyanga ezintandathu. NgoSeptemba 1999, ndabuyela eTogo. Kodwa ngoku ndandihamba ndedwa. Cinga nje indlela ababevakalelwa ngayo ekhaya xa bebona ndihamba ndedwa ngoxa ndingaboni! Kodwa kwakungekho sizathu sakuxhalaba. Ndabaqinisekisa abazali bam ukuba ndiza kufika abahlobo bam ababesele befana nentsapho yam, bendilindele eLomé.

Ndandingaziva luvuyo lokubuyela kulo ndawo, inabantu abaninzi abanomdla wokufunda iBhayibhile! Yinto eqhelekileyo ukubona abantu befunda iBhayibhile esitratweni. ETabligbo abantu bakubiza ngokwabo ukuze nincokole ngeBhayibhile. Kwakulilungelo elingathethekiyo ukuhlala nabo dade babini bangoovulindlela abakhethekileyo kwezo zindlu zabo zifanelekileyo nakuba zingenabunewunewu. Ndafunda indlela entsha yokuphila neyenza izinto ndazijonga ngolunye uhlobo. Okokuqala ndabona ukuba kubazalwana noodade baseAfrika izinto zokomoya zikwindawo yokuqala kubomi babo. Ngokomzekelo, ukuhamba imigama emide akubathinteli bangayi kwiintlanganiso ezikwiHolo yoBukumkani. Ndafunda lukhulu kububele babo nomoya wokubuk’ indwendwe.

Ngenye imini xa ndandivela entsimini, ndaxelela uSandra ukuba ndiyoyika ukubuyela eFransi. Ndandisiya ndingaboni nangakumbi. Ndandicinga izitrato eziphithizelayo nezinengxolo zaseBéziers. Kaloku, izakhiwo zalapho zinezinyuko nezinye izinto ezenza ubomi bube nzima kumntu ongaboniyo. Nakuba izitrato zaseTabligblo zingenatha, zazingaphithizeli—kungekho bantu baninzi neemoto eziphithizelayo. Kwakuza kuba nzima ukubuyela eFransi ekubeni ndandisele ndiqhele eTabligbo.

Kwiintsuku ezimbini emva koko umama wandifowunela endixelela ukuba bemi ngam kwiziko lokuqeqesha inja ekhokela imfama. Ndandilindelwe yinja yohlobo lwe-Labrador egama linguOcéane eyayiza kuba “ngamehlo am.” Yaba ke iyalunga leyo ingxaki kwatsho kwexibilili kwamanye amaxhala. Emva kweenyanga ezintandathu ndiseTabligbo, ndabuyela eFransi ndiye kudibana no-Océane.

Emva kokuqeqeshwa iinyanga ezithile, ndanikwa uOcéane. Ekuqaleni kwakungelula. Kwafuneka siqale siqhelane. Ethubeni ndayibona indlela aluncedo ngayo uOcéane. Enyanisweni, ngoku sekunzima ukuphila ngaphandle ko-Océane. Babesithini abantu baseBéziers xa bebona umntu oza nenja kwimizi yabo? Babendihlonela yaye bendiphatha ngobubele. UOcéane wayethandwa gqitha ekuhlaleni. Ekubeni abantu abaninzi bengakhululeki xa kukho umntu onesiphene, ukuhamba nenja kwandenza ndakhululeka ukuthetha nabanye ngengxaki yam. Abantu bebendiphulaphula ngokukhululekileyo. Ngokwenene, ubukho bukaOcéane babusenza kube lula ukuqalisa incoko.

Ukuya No-Océane EAfrika

Ndandisacinga ngeAfrika, ngoko ndaqalisa ukwenza amalungiselelo okubuyela khona ityeli lesithathu. Kweli ityeli ndahamba noOcéane. Ndahamba nesinye isibini esiselula, uAnthony noAurore, kunye nomhlobo wam uCaroline—sonke sasingoovulindlela. NgoSeptemba 10, 2000, sagaleleka eLomé.

Ekuqaleni abantu abaninzi babemoyika uOcéane. Babembalwa abantu balapho abakhe bayibona inja engako ukuba nkulu, ekubeni inkoliso yezinja zalapho zincinane. Xa bebona ibhanti lakhe, abanye babecinga ukuba sisilwanyana esikhohlakeleyo esimele sihlale sibanjiwe. Yena uOcéane wayefuna ukundikhusela kuyo nantoni na ebonakala ngathi ifuna ukundihlasela. Noko ke, akuzange kube kudala uOcéane waqhelana nemeko yalapho. Xa efakwe ibhanti uyazi ukuba usemsebenzini—uziphatha kakuhle, enze umsebenzi wakhe, aze ahlale nam. Lithi lakukhululwa aqale adlale, maxa wambi afune ukunqandwa. Zininzi izinto ezisonwabisayo.

Sonke sasihlala noSandra noChristine eTabligbo. Ukuze abazalwana balapho baqhelane no-Océane, sasibamema ukuba basityelele size sibacacisele umsebenzi wakhe, isizathu sokuba ehamba nam nendlela ekufuneka bamphathe ngayo. Abadala bavuma ukuba uOcéane angene kwiHolo yoBukumkani. Ekubeni lento yayingaqhelekanga eTogo, kwenziwa isaziso ukuze ibandla licaciselwe. Entsimini, uOcéane wayehamba nam xa ndisiya emabuyelweni naxa ndisiya kuqhuba izifundo zeBhayibhile—apho abantu babesiqonda isizathu sokuba ndihamba naye.

Ukushumayela kulo mmandla kuzisa uvuyo olungathethekiyo. Ndandisoloko ndichukunyiswa kukuphathwa ngobubele ngabantu balapho, njengokundiphathela isitulo. Ngo-Oktobha 2001, umama wandipheleka kuhambo lwam lwesine lokuya eTogo. Emva kweeveki ezintathu wabuyela eFransi, eqinisekile ukuba ndonwabile.

Ndinombulelo ongazenzisiyo kuYehova ekubeni ndiye ndakwazi ukushumayela eTogo. Ndiqinisekile ukuba uYehova uya kundinika ‘izicelo zentliziyo yam’ njengoko ndiqhubeka ndisenza konke okusemandleni kwinkonzo yakhe.a

[Umbhalo osemazantsi]

[Imifanekiso ekwiphepha 10]

Ndandisoloko ndilangazelela ukubona amadlelo athe thaa nezilwanyana zasendle ezibangel’ umdla zaseAfrika

[Umfanekiso okwiphepha 10]

UOcéane wayehamba nam xa ndisiya emabuyelweni

[Umfanekiso okwiphepha 11]

Abadala bavuma ukuba ndize no-Océane ezintlanganisweni