IArmagedon—Ngaba Sisiphelo Esoyikekayo Sehlabathi?

IARMAGEDON! Ngaba eli gama likwenza ucinge ngokubulawa kwabantu abaninzi okanye ukutsha komhlaba wonke? Ambalwa amabinzana eBhayibhile angundaba-mlonyeni njengeli lithi “Armagedon.” Eli binzana liye lasetyenziswa ngokubanzi ukuchaza isihelegu abajamelene naso abantu. Iimovie, umabonwakude, neevidiyo ziye zenza abantu baba nombono owoyikekayo wokuza ‘kweArmagedon.’ Eli gama alaziwa ukuba lithetha ukuthini kwaye abantu baneembono ezingachananga ngalo. Nangona abantu beneembono ezininzi ngentsingiselo yeli gama, uninzi lwazo luyangqubana noko kufundiswa yiBhayibhile ngeArmagedon engumthombo weli binzana.

Ekubeni iBhayibhile inxulumanisa iArmagedon “nesiphelo sehlabathi” ngaba akuvumi ukuba kubalulekile ukuyiqonda ngokucacileyo intsingiselo yeli gama? (Mateyu 24:3, King James Version) Ngaba akukho ngqiqweni ukubhenela kumthombo wenyaniso, iLizwi likaThixo, ukuze sifumane iimpendulo ngoko iArmagedon ikuko nendlela eya kukuchaphazela ngayo wena nentsapho yakho?

Olo hlolisiso luya kusinceda sibone ukuba kunokuba iArmagedon ibe sisiphelo esoyikekayo, iya kuzisa isiqalo esonwabisayo kubantu abanqwenela ukuphila nokunandipha ubomi kwihlabathi elitsha lobulungisa. Njengoko ufunda ngentsingiselo yokwenene yegama elithi Armagedon kwinqaku elilandelayo, uya kuyiqonda ngokucacileyo le nyaniso ibalulekileyo yeZibhalo.

[Ibhokisi/Umfanekiso okwiphepha 3]

UCINGA UKUBA YINTONI IARMAGEDON?

• Yimbubhiso yenyukliya

• Yintlekele yendalo

• Ukuntlithwa komhlaba sesinye sezijikelezi-langa

• Ukutshatyalaliswa kwabangendawo nguThixo