Ibali Lobomi
Sasizimisele Ukukhonza UYehova
KUBALISA URAIMO KUOKKANEN
Ngowe-1939, kwaqhambuka iMfazwe Yehlabathi II eYurophu, yaza iSoviet Union yahlasela ilizwe lakuthi iFinland. Utata waya kuncedisa umkhosi waseFinland. Akuzange kube kudala iinqwelomoya zokulwa zaseRashiya zahlwayela iibhombu kweso sixeko sethu, waza ke umama wandithumela kumakhulu ukuze ndihlale naye kwindawo ekhuselekileyo.
NGOWE-1971, ndandingumvangeli wasemazweni eUganda, kwiMpuma Afrika. Ngoxa ndandishumayela kwindlu ngendlu ngenye imini, kwadlula kum abantu ababefile luloyiko bebaleka. Ndeva izithonga zompu ndaza ndabaleka ukugoduka. Njengoko zaziya zisondela ezo zithonga, ndaziphosa kumsele owawusecaleni kwendlela. Njengoko iimbumbulu zazidlula phezu kwam ndarhubuluza ukuya ekhaya.
Kwakungekho nto ingako ndinokuyenza ukuphepha iMfazwe Yehlabathi II, kodwa kwakutheni ukuze nenkosikazi yam sizibeke esichengeni sodushe lwaseMpuma Afrika? Impendulo iphathelele ukuzimisela kwethu ukukhonza uYehova.
Ukuhlwayelwa Kwembewu Yokuzimisela
Ndazalwa ngowe-1934 eHelsinki, eFinland. Umsebenzi katata yayikukupeyinta, ibe ngenxa yoko wazibona sele epeyinta isebe lamaNgqina kaYehova laseFinland. AmaNgqina amxelela ngeentlanganiso zawo zebandla. Akufika ekhaya, waxelela umama ngezo ntlanganiso. Akazange aqalise kwangoko ukuya kuzo, kodwa kamva waqalisa ukuxubusha ngeBhayibhile nelinye iNgqina awayesebenza nalo. Umama wazimisela koko wayekufunda, ibe ngowe-1940 wabhaptizwa waba liNgqina likaYehova.
Ngaphambi nje koko umakhulu wandisa kowabo emaphandleni ebudeni beMfazwe Yehlabathi II. Ngoxa wayelapho eHelsinki umama waqalisa ukubhalela umakhulu nomakazi ngeenkolelo zamaNgqina kaYehova. Bobabini baba nomdla baza bandincokolela ngezo zinto babezifunda. Abaveleli abahambahambayo bamaNgqina kaYehova babetyelela kwikhaya likamakhulu beze kusikhuthaza, kodwa ndandingekazimiseli ukukhonza uThixo.
Uqeqesho Olwandincedayo Ndakhonza UThixo
Ukuphela kwemfazwe ngowe-1945, ndabuyela eHelsinki, waza umama waqalisa ukuya nam kwiintlanganiso zamaNgqina kaYehova. Kunokuba ndiye kuzo maxa wambi ndandikhetha ukuya kubukela iimovie. Umama wayendibalisela ngentetho ayive kwiintlanganiso, ibe wayesoloko ebethelela ingongoma enye kum yokuba: IArmagedon ikufuphi. Ndade ndakukholelwa oko ndaza ndayeka ukuphoswa ziintlanganiso. Njengoko ndandisiya ndiyiqonda inyaniso yeBhayibhile, ndazibandakanya kuyo yonke imisebenzi yebandla.
Into endandiyithanda ngakumbi kukuya kwiindibano ezincinane nezinkulu. Ngowe-1948, ndaya kwindibano yesithili eyayikufuphi kulo mama, apho ndandiye kuchithela khona iiholide zasehlotyeni. Omnye umhlobo wam wayeza kubhaptizwa kuloo ndibano, ngoko wandicela ukuba nam ndenjenjalo. Ndamxelela ukuba andizanga nampahla yokungena emanzini, kodwa wathi akugqiba yena ukubhaptizwa ndinokusebenzisa leyo yakhe. Ndavuma ibe ndabhaptizwa ngoJuni 27, 1948, xa ndandineminyaka eli-13 ubudala.
Emva kwendibano, abanye abahlobo bakamama bamxelela ukuba ndiye ndabhaptizwa. Ukudibana kwethu wafuna ukwazi ukuba kutheni ndingakhange ndimlum’ indlebe xa ndiza kuthabatha elo nyathelo libaluleke kangako. Ndamchazela ukuba bendiziqonda iimfundiso ezisisiseko zeBhayibhile yaye ndisazi ukuba ndimele ndiziphendulele kuYehova ngoko ndikwenzayo.
Umnqweno Wam Uyakhula
Abazalwana ebandleni bandinceda ndomelela kumnqweno wam wokukhonza uYehova. Babendipheleka xa sisiya kubulungiseleli bendlu ngendlu baze bandinike isabelo kwiintlanganiso veki nganye. (IZenzo 20:20) Ndanikela intetho yam yokuqala yesidlangalala xa ndandineminyaka eli-16 ubudala. Kungekudala emva koko, ndamiselwa njengesicaka sesifundo seBhayibhile ebandleni. Yonke loo misebenzi yokomoya yandinceda ndaqola, nakuba kwakusafuneka ndilwe nokoyika abantu.
Kuloo mihla, intetho yesidlangalala yendibano yesithili sasiyibhengeza ngemibhalo emikhulu. Mbhalo ngamnye wawuba kwiikhadibhodi ezimbini ezidityanisiweyo zize zigangxwe emagxeni enye ijinge ngaphambili ize enye ibe ngasemva. Ngenxa yeso sizathu abanye abantu babesibiza ngaloo mibhalo.
Ngesinye isihlandlo ndandimi kwikona yesitrato esizolileyo ndixwaye loo mbhalo xa kwathi gqi iqela labantwana endifunda nabo besiza ngqo kum. Njengoko bedlula, indlela ababendijonge ngayo yanditsho ndoyika. Ndathandaza ndicela uYehova andomeleze ukuze ndiqhubeke ndime naloo mbhalo. Ukoyisa into yokoyika abantu ngelo xesha kwandomelezela uvavanyo oluqatha lokulondoloza ubundilele bobuKristu.
Ekuhambeni kwexesha, urhulumente wayalela ukuba mna namanye amaNgqina aselula siye kubhalisela ukuya emkhosini. Sithobela umyalelo saya kwiziko lomkhosi, kodwa ngentlonelo sala ukunxiba iyunifom yomkhosi. Abasemagunyeni basivalela, ibe ngokukhawuleza sagwetywa iinyanga ezintandathu entolongweni. Savalelwa nezinye iinyanga ezisibhozo, ixesha esasimele silichithe emkhosini. Ngoko zili-14 iinyanga esazichith’ entolongweni ngenxa yobundilele.
Apho entolongweni sasidibana kunye yonk’ imihla ukuze sixubushe iBhayibhile. Kwezo nyanga, abaninzi kuthi bayifunda bayigqiba izihlandlo ezibini iBhayibhile. Ukuphela kwesigwebo, inkoliso yethu yaphuma entolongweni izimisele ngakumbi ukukhonza uYehova. Nanamhlanje, abaninzi kwelo qela lamaNgqina aselula basakhonza uYehova ngokunyaniseka.
Ukuphuma kwam entolongweni, ndabuyela ekhaya. Kungekudala ndadibana noVeera, iNgqina elinenzondelelo elalisandul’ ukubhaptizwa. Satshata ngowe-1957.
Ubusuku Obaguqula Ubomi Bethu
Xa sasityelele abazalwana abavela kwiofisi yesebe ngobunye ubusuku, omnye wasibuza enoba singathanda na ukuba ngabaveleli besiphaluka. Emva kokuthandaza ubusuku bonke, ndatsalela umnxeba kwisebe ndabaxelela ukuba ndiyasamkela eso sabelo. Ukungenelela ubulungiseleli bexesha elizeleyo kwakuthetha ukushiya umsebenzi wam ohlawula kakuhle, kodwa sasizimisele ukubeka uBukumkani kuqala ebomini bethu. Ndandineminyaka engama-23 ubudala, yena uVeera ili-19 ukuqalisa kwethu ukuba ngabaveleli abahambahambayo ngoDisemba 1957. Kangangeminyaka emithathu sasityelela size sikhuthaze amabandla amaNgqina kaYehova eFinland.
Ngasekupheleni kowe-1960, ndamenyelwa kwiSikolo seBhayibhile seWatchtower saseGiliyadi esiseBrooklyn, eNew York. Sasibathathu abaseFinland size kuqeqesho olukhethekileyo lweenyanga ezilishumi siza kufunda ngokuphathwa kwesebe. Amakhosikazi ethu asala ngasemva esebenza kwiofisi yesebe laseFinland.
Ngaphambi nje kokuba ezo zifundo ziphele, kwathiwa mandiye kwiofisi kaNathan H. Knorr, owayevelela umsebenzi wamaNgqina kaYehova ehlabathini lonke ngoko. UMzalwan’ uKnorr wacela ukuba mna nenkosikazi yam sibe ngabavangeli basemazweni kwiRiphabliki yaseMalagasy, ngoku ekuthiwa yiMadagascar. Ndabhalela uVeera, ndifuna ukwazi oko akucingayo ngeso sabelo, ibe waphendula kwangoko esithi, “Kulungile.” Ukubuyela kwam eFinland, sagxabhagxabhisa silungiselela ukuya eMadagascar.
Uvuyo Nokuphoxeka
NgoJanuwari 1962 sakhwel’ inqwelo-moya saya kutsho eAntananarivo, ikomkhulu laseMadagascar, safika sinxibe ezasebusika kuba semka kusebusika eFinland. Kuloo ngqatsini yelanga laseMadagascar, sakhawuleza satshintsha indlela yokunxiba. Indawo yokuqala eyayihlala abavangeli basemazweni yayiyindlu encinane enegumbi elinye lokulala. Kwakusele kukho esinye isibini sabavangeli basemazweni esihlala apho, ngoko ke, mna noVeera sasiza kulala kwigunjana elixokonyozelelwe kuloo ndlu ngaphandle.
Saqalisa ukufunda isiFrentshi, ulwimi olusemthethweni apho. Oku kwathanda ukuba nzima kuba sobabini sasingathethi ulwimi olunye nalowo wayesifundisa, uDade Carbonneau. Wayesebenzisa isiNgesi ukusifundisa isiFrentshi, wabe yena uVeera engasazi isiNgesi. Ngoko, ukuze uVeera eve kwakufuneka ndiguqulele eso siNgesi sifundiswa ngaso kwisiFinish. Ethubeni saphawula ukuba uVeera uyiqonda kakuhle imigaqo yesiFrentshi xa ichazwa ngesiSwedish. Akuzange kube kudala sasiqonda isiFrentshi saza ke safunda isiMalagasy, ulwimi lwalapho.
Umntu wokuqala ukufunda naye iBhayibhile eMadagascar yindoda eyayisazi isiMalagasy kuphela. Ndandikhangela iindinyana zeBhayibhile kweyam yesiFinnish, ndize ndizikhangele kweyakhe yesiMalagasy. Kwakungekho nto ingako ndinokuyenza ukuze ndiyicacisele ngeZibhalo, kodwa akuzange kube kudala inyaniso yeBhayibhile yakhula yaza ke yenza inkqubela yabhaptizwa.
Ngowe-1963, uMilton Henschel wekomkhulu lamaNgqina kaYehova eBrooklyn watyelela eMadagascar. Emva koko, kwasekwa iofisi yesebe eMadagascar, ndaza ndamiselwa njengomveleli wesebe, kusongezelelwa kuloo msebenzi wam wokuba ngumveleli wesiphaluka nowesithili. Ngalo lonke elo xesha, uYehova wasisikelela gqitha. Ukususela ngowe-1962 ukusa kowe-1970, inani labavakalisi boBukumkani eMadagascar landa lisusela kwabangama-85 laya kutsho kwabangama-469.
Sathi sivela kushumayela ngenye imini ngowe-1970, safumana umbhalo emnyango uyalela ukuba bonke abavangeli basemazweni bamaNgqina kaYehova kufuneka baye kuvela kwiofisi yesebe lemicimbi yekhaya. Igosa lalapho lasixelela ukuba urhulumente uyalele ukuba siphume ngokukhawuleza kwelo. Xa ndabuza ityala lethu, elo gosa lathi: “Mnumzan’ uKuokkanen, akukho kwanto niyenzileyo.”
Ndathi: “Besihlala apha kangangeminyaka esibhozo. Eli likhaya lethu. Asinakusuka nje sihambe ngolo hlobo.” Phezu kwayo nje imigudu yethu, bonke abavangeli basemazweni kwafuneka bemke ingaphelanga iveki. Elo sebe lavalwa, aza ke amaNgqina alapho athabathela kuwo loo msebenzi. Ngaphambi kokushiya abo bazalwana bathandekayo apho, safumana isabelo esitsha eUganda.
Ukuqala Isabelo Esitsha Kwakhona
Kwiintsuku nje ezimbalwa simkile eMadagascar, sagaleleka eKampala, ikomkhulu laseUganda. Saqalisa ukufunda isiLuganda, ulwimi olunezandi ezimnandi okwengoma nakuba kunzima ukulufunda. Abanye abavangeli basemazweni baqala bafundisa uVeera isiNgesi, satsho sakwazi ukushumayela kakuhle ngesiNgesi.
Imozulu enolophu nomoya ofumileyo yaseKampala yamphatha kakubi uVeera. Ngoko ke, sathunyelwa eMbarara, idolophu yaseUganda enemozulu ebuphola noko. Saba ngamaNgqina okuqala apho, ibe kusuku lwethu lokuqala ukuya kushumayela, safumana amava akhuthazayo. Ndandithetha neny’ indoda emzini wayo xa kwathi gqi umfazi wayo ekhitshini. WayenguMargaret, igama lakhe ibe wayephulaphule xa ndibeka isigidimi. UVeera waqalisa ukufunda naye iBhayibhile, ibe wenza inkqubela ngokomoya. Wabhaptizwa waza waba ngumvakalisi woBukumkani onenzondelelo.
Umlo Ezitratweni
Imfazwe yamakhaya eyaqhambuka ngowe-1971 yalutshayela tu uxolo eUganda. Ngenye imini kwaqhambuka udushe kufuphi nekhaya labavangeli basemazweni eMbarara. Lelo xesha ekwafuneka ndiziphose emseleni njengoko kuchazwe ekuqaleni.
UVeera wayesele esekhaya ukufika kwam ndigqiba kurhubuluza emseleni, ndizimele amajoni. Kwikona yendlu yethu, senza “inqaba” ngoomatrasi nefanitshala. Sagqiba iveki sihleli endlwini, siphulaphula iindaba kunomathotholo. Iimbumbulu zazikhe zibeth’ eludongeni njengoko sizifihle kwinqaba yoomatrasi. Ebusuku sasingakhanyisi zibane, ukuze kungaziwa ukuba kukho abantu kuloo ndlu. Kwakha kweza kuma amajoni emnyango afika akhwaza. Sathi ncwaba singenako nokuzonwaya, sathandaza kuYehova ngeentliziyo. Emva kwaloo mlo, kweza abamelwane bebulela ngokukhuseleka kwabo. Babekholelwa ukuba nguYehova oye wasikhusela sonke, ibe savumelana nabo.
Saba seluxolweni de seva kunomathotholo ngenye intsasa ukuba umsebenzi wamaNgqina kaYehova uvaliwe ngurhulumente waseUganda. Umntu owayesenza eso saziso wathi bonke abo bangamaNgqina kaYehova bamele babuyele kwiicawa ababekhonza kuzo ngaphambili. Ndazama ukuthetha norhulumente ngalo mbandela kodwa ndatsho phantsi. Emva koko ndaya kwiofisi kaMongameli Idi Amin ndacela ukuthetha naye. Umamkeli ziindwendwe kuloo ofisi wandixelela ukuba umongameli uxakeke gqitha. Ndaquqa ndibuyelela apho, kodwa ndibuya ze. Ekugqibeleni, ngoJulayi, 1973 sade sayishiya iUganda.
Isabelo Sonyaka Omnye Sigqiba Iminyaka Elishumi
Udano esalufumana ukugxothwa kwethu eMadagascar lwaphinda lwenzeka xa sasishiya abazalwana bethu eUganda. Ngaphambi kokuya kwisabelo sethu esitsha eSenegal, saya eFinland. Saxelelwa ukuba singabi saya kwisabelo sethu eAfrika kodwa sihlale eFinland. Kwabonakala ngathi iphelile into yokuba ngabavangeli basemazweni kuthi. EFinland, saba ngoovulindlela abakhethekileyo senza nomsebenzi wesiphaluka.
Ngowe-1990 yayisele iphelile inkcaso eMadagascar ngoko ikomkhulu laseBrooklyn lasothusa ngokusicela ukuba siye kukhonza apho unyaka nje omnye. Sasifuna ukuya kodwa kukho imiqobo emibini phambi kwethu. Utata wayesele emdala efuna ukunyanyekelwa, wabe noVeera esagula. Kwaba buhlungu ukufa kukatata ngoNovemba 1990, kodwa yena uVeera wachacha saza sakwazi ukubuyela kumsebenzi wobuvangeli basemazweni eMadagascar ngoSeptemba 1991.
Ukuya kwethu eMadagascar sasisiya unyaka omnye nje kuphela, kodwa sahlala iminyaka elishumi. Ngelo xesha, inani labavakalisi landa lisusela kuma-4 000 laya kutsho kwi-11 600. Ndakunandipha gqitha ukuba ngumvangeli wasemazweni. Noko ke, maxa wambi ndandikhe ndidimazeke, ndivakalelwa kukuba ndiye ndazityeshela iintswelo zokwenyama neemvakalelo zomfazi wam endimthandayo. Sobabini uYehova wasipha amandla okutyhalela phambili. Ekugqibeleni, ngowama-2001 sabuyela eFinland saza sasebenza kwiofisi yesebe lalapho. Nangoku sisenenzondelelo ngoBukumkani, ibe sisayikhumbula iAfrika. Sisazimisele ukwenza ukuthanda kukaYehova naphina apho asithumela khona.—Isaya 6:8.
[Imaphu ekwiphepha 12]
(Ukuba ufuna inkcazelo ehlahlelwe kakuhle, yiya kwimpapasho)
EFINLAND
IYUROPHU
[Imaphu ekwiphepha 14]
(Ukuba ufuna inkcazelo ehlahlelwe kakuhle, yiya kwimpapasho)
IAFRIKA
EMADAGASCAR
[Imaphu ekwiphepha 15]
(Ukuba ufuna inkcazelo ehlahlelwe kakuhle, yiya kwimpapasho)
IAFRIKA
EUGANDA
[Umfanekiso okwiphepha 14]
Ngomhla womtshato wethu
[Imifanekiso ekwiphepha 14, 15]
Sasingabaveleli besiphaluka eFinland, ngowe-1960 . . .
. . . saza sangabavangeli basemazweni eMadagascar, ngowe-1962
[Umfanekiso okwiphepha 16]
Ndikunye noVeera namhlanje