Ileta Evela EMadagascar

Lwalungathi Ngumculo Omnandi

MNA nomyeni wam sasijongise amabombo kwisabelo sethu esitsha sokuba ngabathunywa bevangeli—kwisiqithi saseMadagascar. Sathi nisale kakuhle ngamehlo aneenyembezi, sinethemba lokuba uYehova uya kusisikelela kuloo ndawo siya kuyo.

Asisayi kuze sililibale ibandla lethu lokuqala kwisabelo sethu esitsha. Umzalwana owayeqhuba iSifundo SeMboniselo wayengathi ubhexesha ikwayara. Ekubeni ulwimi sasingaluva kakuhle, xa abantu bethetha kwakuba ngathi bayacula. Kwakuza kuthatha ixesha ngaphambi kokuba siyive into ethethwayo.

Ukuqala kwam ukuva xa kubuzwa umbuzo ongabhalwanga, ndadubuleka ndaphendula. Abo babehleli ecaleni kwam bandiva, ndazama ukuzibamba ukuze ndingahleki. Ndandihlazekile kodwa ke ndandivuya kuba ndandisiva xa kuthethwa!

Kunokuba ndimisele umzekelo entsimini, kwakuncedwa mna. Abazalwana noodade babendixelela into emandiyithethe entsimini, nokuba ndisebenzise eziphi izibhalo.

Ndikhumbula ngenye imini xa ndandisentsimini, omnye umntwana wakhwaza wathi: “Vazaha! Vazaha!” Le yindlela ababizwa ngayo abantu basemzini ngesiMalagasy. Sahamba ngokukhawuleza ukuze abanye abantwana bangasinkqangazi ngelo gama. Enye inkwenkwe yayikhalimela le yayisikhwaza. Yathi: “Akayontlanga, kuba uyakwazi ukuthetha ulwimi lwethu!” Udade endandihamba naye kwakufuneka anditolikele, kuba babekhawulezisa xa bethetha. Nakuba kunjalo, ndeva kusithi ngco ngaphakathi. Ekugqibeleni ndandiziva ndisekhaya eMadagascar.

Maxa wambi xa ndikhumbula ekhaya, ndandidla ngokubanjwa sisandla esincinane, ndithi xa ndijonga umniniso ndibone ubuso obuncinane obundincumeleyo nangona ndingakwazi ukuthetha naye. Abantwana abasebandleni bayintsikelelo evela kuYehova. Omnye oselula, uHasina uyanditolikela. Xa abanye bengayiva into endiyithethayo, uyandiva. Udla ngokundinceda xa ndincokola ebandleni, ngokucacisa loo nto ndizama ukuyithetha.

Mna nomyeni wam sasisebandleni elaliza kwahlulwa. Loo nto yayithetha ukuba kwakuza kufuneka sidlulisele izifundo kwabanye kuba zazihlala kwintsimi yebandla elitsha. Omnye udade wandicela ukuba ndiqhube esinye sezifundo zakhe. Ndandisoyika kuba ndandicinga ukuba andinakukwazi, kodwa wandicenga. Wandiqinisekisa ukuba uYehova uza kundinceda ndikwazi. Endijonge ngobubele yaye esebenzisa ulwimi olulula, wandixelela ukuba ndiza kude ndikwazi ukufundisa abantu. Loo mazwi andikhuthaza kakhulu.

Eso sifundo siye senza inkqubela encomekayo ukususela ngoko. Ngenye imini xa ndandiphandle, ndasiva sindibiza ngegama. Sona nomyeni waso babesiya kubhalisa umtshato wabo ngokusemthethweni. Umyeni waso uye waqalisa ukufunda yaye banosukelo lokomoya abazibekele lona kuquka ukubhaptizwa. Kuye kwandivuyisa oku, nangona ndisazi ukuba ayisithi kodwa nguYehova osondeza abantu kuye.

Zininzi izinto esiye sazifunda kwesi sabelo. Nangona sizikhumbula izihlobo neentsapho zethu, siziva ngathi sikunye nazo apha. Sidla ngokuthetha ngabo kubazalwana noodade, ngoku ngabo abasibuza ngabo. Sikhangele phambili xa “intsapho” zethu ziza kudibana.

Nangoku kuba ngathi bayacula xa bethetha. Kodwa ngoku ndiyabeva. Ndikhangele phambili xa nam ndiza kuba ndithetha njengabo, kunokuba ndivakale ngathi ndiyivuvuzela. UYesu wathi: “Musani ukuxhalela ingomso, kuba ingomso liya kuba namaxhala alo.” (Mateyu 6:34) Siza kuqhubeka sifunda “inowuthi,” okanye igama libe linye ngexesha. Okwangoku, ndiza kuqhubeka ndiqeqesha iindlebe zam, ingqondo nentliziyo ukuze ndisebenze ngaxhatha linye nabazalwana noodade abanomonde nothando apha eMadagascar.

[Umfanekiso okwiphepha 25]

Ndishumayela noHasina