Buyintoni UBukumkani BukaThixo?

ENJANI yona intlekele eyehlela uluntu mandulo! Ingelosi yavukela igunya loMdali wayo. Lo mvukeli walukuhla umfazi wokuqala uEva, ukuba atye isiqhamo esalelweyo. Ibhekisa kuye nomyeni wakhe uAdam, le ngelosi yathi: “Ngokuqinisekileyo anisayi kufa. Kuba uThixo uyazi ukuba mhla nithe nadla kuzo aya kuvuleka amehlo enu nize nibe njengoThixo, nazi okulungileyo nokubi.” (Genesis 2:16, 17; 3:1-5) Lo mvukeli wabizwa ngokuba nguMtyholi noSathana.—ISityhilelo 12:9.

Ngaba uEva wamphulaphula uSathana? IBhayibhile ithi: “Umfazi wabona ukuba umthi wawulungele ukudliwa kwanokuba wawulangazeleleka emehlweni, ewe, kwakunqweneleka ukuwujonga umthi lowo. Ngoko wathabatha eziqhameni zawo waza wadla. Emva koko wanika nendoda yakhe isakuba kunye naye yaza nayo yadla.” (Genesis 3:6) Ewe, isibini sokuqala, uAdam noEva savukela kunye noSathana. Ngenxa yoko, bona kunye nenzala yabo baphulukana neParadesi. Kunokuba abantwana babo bazalwe befezekile benethemba lokuphila ngonaphakade, bafumana ilifa lesono nokufa.—Roma 5:12.

Wasabela njani uYehova uThixo, onguMlawuli onguMongami wendalo yonke? Wenza ilungiselelo lokuxolelwa kwezono. (Roma 5:8) UYehova uThixo wamisela norhulumente oza kulungisa lo monakalo. Lo rhulumente ubizwa ngokuba ‘bubukumkani bukaThixo.’ (Luka 21:31) Ekubeni obu Bukumkani bungaphantsi kolawulo lukaThixo lwendalo yonke, bumiselwe ngenjongo ekhethekileyo.

Iyintoni injongo yoBukumkani bukaThixo? Ziziphi ezinye zezinto eziza kwenziwa bubo yaye zinjani xa zithelekiswa nolawulo lwabantu? Buza kuqalisa nini ukulawula? Le mibuzo iza kuxutyushwa kwinqaku elilandelayo.