IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w06 7/15 iphe. 10-iphe. 13 isiqe.¶ 11
  • Iimbalasane Zenxalenye Yesithathu Neyesine Yencwadi YeeNdumiso

No video available for this selection.

Sorry, there was an error loading the video.

  • Iimbalasane Zenxalenye Yesithathu Neyesine Yencwadi YeeNdumiso
  • IMboniselo Evakalisa UBukumkani BukaYehova—2006
  • Imixholwana
  • Amanqaku Afanayo
  • “UKUSONDELA KUTHIXO KULUNGILE KUM”
  • (INdumiso 73:1–89:52)
  • “BULELANI KUYE, NIBONGE IGAMA LAKHE”
  • (INdumiso 90:1–106:48)
  • “Dumisani uYa!”
  • Incwadi YeBhayibhile 19—IiNdumiso
    “Sonke ISibhalo Siphefumlelwe NguThixo Kwaye Siyingenelo”
  • Iimbalasane Zenxalenye Yokuqala Yencwadi YeeNdumiso
    IMboniselo Evakalisa UBukumkani BukaYehova—2006
  • Iimbalasane Zenxalenye Yesihlanu Yencwadi YeeNdumiso
    IMboniselo Evakalisa UBukumkani BukaYehova—2006
  • Iingoma Eziphefumlelweyo Ezithuthuzelayo Nezifundisayo
    IBhayibhile—Sithini Isigidimi Sayo?
Khangela Okunye
IMboniselo Evakalisa UBukumkani BukaYehova—2006
w06 7/15 iphe. 10-iphe. 13 isiqe.¶ 11

ILizwi LikaYehova Liphilile

Iimbalasane Zenxalenye Yesithathu Neyesine Yencwadi YeeNdumiso

ETHANDAZA kuThixo umdumisi wabuza: “Buya kuvakaliswa kwindawo yokungcwaba na ububele bakho bothando, ukuthembeka kwakho kwindawo yentshabalalo na?” (INdumiso 88:11) Ngokuqinisekileyo akunjalo. UYehova asinakumdumisa sifile. Ukudumisa uYehova yeyona njongo yokuphila kwethu, yaye xa siphila sifanele sifune ukumdumisa.

Inxalenye Yesithathu Neyesine Yencwadi YeeNdumiso equka INdumiso 73 ukusa kweye-106, isenza sibe nezizathu ezininzi zokudumisa uMdali nokuzukisa igama lakhe. Xa sicingisisa ngezi ndumiso simele silixabise ngokwenene “ilizwi likaThixo” size siphucule indlela esimdumisa ngayo. (Hebhere 4:12) Singaphozisanga maseko, makhe siye Kwinxalenye Yesithathu YeeNdumiso.

“UKUSONDELA KUTHIXO KULUNGILE KUM”

(INdumiso 73:1–89:52)

Iindumiso zokuqala ezili-11 zecandelo lesithathu zabhalwa nguAsafu okanye ngamalungu endlu yakhe. Ingoma yokuqala ichaza into eyanceda uAsafu angakhukuliswa yingcinga ephosakeleyo. Isigqibo awafikelela kuso sasichanile. Wavuma le ngoma: “Ke mna, ukusondela kuThixo kulungile kum.” (INdumiso 73:28) KwiNdumiso 74 sifunda ngesikhalo sokutshatyalaliswa kweYerusalem. INdumiso 75, 76, neyama-77 zithi uYehova nguMgwebi olilungisa, uMsindisi wabalulamileyo, noMphulaphuli wemithandazo. KwiNdumiso 78 kuhlolisiswa ubomi bamandulo bamaSirayeli, ukususela kwixesha likaMoses ukusa kwelikaDavide. Kweyama-79 kukhalelwa ukutshatyalaliswa kwetempile. Kulandela eyama-80 apho kuthandazelwa ukubuyiswa kwabantu bakaThixo. KwiNdumiso 81 sibongozwa ukuba sithobele uYehova. Ukanti kweyama-82 nama-83 kuthandazelwa ukuba uThixo agwebe abagwebi abangendawo neentshaba zakhe.

Uncuthu lwengoma yoonyana bakaKora luthi: “Umphefumlo wam uphelile kukulangazelela iintendelezo zikaYehova.” (INdumiso 84:2) KwiNdumiso 85 kucelwa ukuba uThixo abaxhase abo babuya ekuthinjweni. Le ndumiso ibalaselisa ukuba iintsikelelo zokomoya zixabiseke ngaphezu kwezenyama. KwiNdumiso 86, uDavide ucela ukhokelo nolwalathiso lukaThixo. Kweyama-87, kuvunywa ingoma ngeZiyon nenzalelwane yalapho kuze kulandeliswe ngomthandazo okwiNdumiso 88. Kumnqophiso kaDavide kuboniswa ububele bothando bukaYehova obubalaseliswa kwiNdumiso 89, ezabhalwa nguEtan, mhlawumbi owayengomnye wamadoda amane awayezizilumko ngemihla kaSolomon.—1 Kumkani 4:31.

Iimpendulo Kwimibuzo YeZibhalo:

73:9—Kwenzeka njani ukuba abangendawo ‘babeke umlomo wabo emazulwini, nolwimi lwabo luhambahambe emhlabeni’? Ekubeni abangendawo bengalinanze nganto izulu okanye umhlaba, abachithi xesha xa kufuneka begculele uThixo ngemilomo yabo. Banyemba abanye abantu ngolwimi lwabo.

74:13, 14—UYehova ‘wazaphula nini iintloko zezilo ezikhulu zaselwandle ezisemanzini waza watyumza neentloko zeLeviyatan’? ‘UFaro, ukumkani waseYiputa,’ ubizwa ngokuba ‘sisilo esikhulu saselwandle esibuthume phakathi kwemijelo yomNayile.’ (Hezekile 29:3) Mhlawumbi iLeviyatan imela “amadoda anezoso exesha likaFaro.” (INdumiso 74:14, umbhalo osemazantsi weNW) Ukutyunyuzwa kweentloko zawo kusenokuba kubhekisela ekoyisweni ngendlela elihlazo kukaFaro nomkhosi wakhe xa uYehova wayehlangula amaSirayeli ekuthinjweni eYiputa.

75:4, 5, 10—Lifuzisela ntoni ibinzana elithi “uphondo”? Iimpondo zesilwanyana zisisixhobo esinamandla. Ngenxa yoko, ibinzana elithi “uphondo” lifuzisela igunya okanye amandla. UYehova uphakamisa iimpondo zabantu bakhe, ebangela ukuba baphakanyiswe, ngoxa ‘esaphula iimpondo zabangendawo.’ Siyalunyukiswa ukuba ‘singaluphakamiseli phezulu uphondo lwethu,’ oko kukuthi, singabi nekratshi okanye sizikhukhumalise. Ekubeni siphakanyiswa nguYehova, iimbopheleleko esizifumana ebandleni simele sizijonge njengezivela kuye.—INdumiso 75:7.

76:10—“Umsindo womntu” unokumbonga njani uYehova? Xa uThixo evumela abantu ukuba bavuthe ngumsindo nxamnye nathi kuba singabakhonzi bakhe, kunokubakho imiphumo encumisayo. Nabuphi na ubunzima esinokutyhubela kubo busenokusiqeqesha ngandlela ithile. UYehova uvumela ubungendawo ukusa kumkhamo wokuba businike olo qeqesho. (1 Petros 5:10) ‘Umsindo oseleyo womntu, uThixo uya kuwubhinqa.’ Kuthekani ukuba sibandezeleka side sife? Nale into inokumbonga uYehova kuba abantu abasibukeleyo ngoxa sinyamezele ngokuthembeka basenokumzukisa uThixo.

78:24, 25; umbhalo osemazantsi weNW eneembekiselo—Kutheni imana ibizwa ngokuba ‘ziinkozo zezulu nesonka seengelosi’? Omabini la mabinzana awathethi kuthi imana yayikukutya kweengelosi. ‘Yayiziinkozo zezulu’ kuba yayivela ezulwini. (INdumiso 105:40) Ekubeni iingelosi okanye ‘abanamandla’ behlala ezulwini, ibinzana elithi “isonka seengelosi” lisenokuthetha ukuba imana yayivela kuThixo ohlala ezulwini. (INdumiso 11:4) Kusenokwenzeka nokuba uYehova wathumela iingelosi ukuba zise imana kumaSirayeli.

82:1, 6—Ngoobani aba kuthiwa ‘ngoothixo noonyana bOyena Uphakamileyo’? Omabini la mabinzana abhekisela kubagwebi bakwaSirayeli. Kufanelekile ukuba babizwe ngale ndlela kuba babengabameli bakaThixo.—Yohane 10:33-36.

83:2—‘Ukuphakamisa intloko’ kuthetha ntoni? Kubonisa ukukulungela ukusebenzisa igunya okanye ukwenza okuthile, ngokuqhelekileyo ukuchasa, ukulwa okanye ukucinezela.

Oko Sikufundayo:

73:2-5, 18-20, 25, 28. Asifanele sibamonele abangendawo ngenxa yokuba bephumelela size samkele iindlela zabo ezingafunwayo nguThixo. Abangendawo basemhlabeni omtyibilizi. Ngokuqinisekileyo baya ‘kuwa bonakale.’ Ngaphezu koko, ekubeni umntu olawulayo engenakuze akwazi ukuphelisa ubungendawo, siya kuba sidlala ngexesha xa sisithi sizama ukubuphelisa. NjengoAsafu, siya kuba silumkile ukuba sijamelana nobungendawo ‘ngokusondela kuThixo’ nangokuba nolwalamano olusondeleyo kunye naye.

73:3, 6, 8, 27. Simele sikulumkele ukuqhayisa, ukuziphakamisa, ukugxeka nokuqhatha. Oku kunjalo naxa kusenokubonakala kuluncedo ukuba nemikhwa enjalo.

73:15-17. Xa singaqinisekanga ngento, simele singayithethi. Ukuchaza “ibali elinjalo” kuya kubatyhafisa abanye. Sifanele sicamngce kakuhle ngezinto esizixhalabeleyo size sizicombulule ngokunxulumana nabo sikholwa kunye nabo.—IMizekeliso 18:1.

73:21-24. Ukuba nentliziyo emuncu ngenxa yokuphumelela kwabangendawo kufana nokucatshukiswa sisilwanyana esingenangqondo. Oku kukwenza ngokungxama, ukuqhutywa ziimvakalelo. Kunoko, sifanele sifumane ulwalathiso lukaYehova, siqinisekile ukuba uya ‘kusibamba ngesandla sasekunene’ aze asomeleze. Ukongezelela, uYehova uya ‘kusinika uzuko,’ oko kukuthi, uya kusisondeza kuye.

77:6. Ukuba nentliziyo exhalabele iinyaniso zokomoya uze uphandisise ngazo kufuna ube nexesha lokufundisisa nokucamngca. Hayi indlela ekubaluleke ngayo ukuba sifumane ixesha lokuba khe sibe kwindawo engenabantu!

79:9. UYehova uyayiphulaphula imithandazo yethu, ngokukodwa xa sithandazela ukungcwaliswa kwegama lakhe.

81:13, 16. Ukuphulaphula ilizwi likaYehova uze uhambe ngeendlela zakhe kuzisa intabalala yeentsikelelo.—IMizekeliso 10:22.

82:2, 5. Ukungabikho kokusesikweni kushukumisa ‘iziseko zomhlaba.’ Izinto ezenziwa ngokungekho sikweni ziyaligungqisa ibutho labantu.

84:1-4, 10-12. Indlela abadumisi ababeyixabisa ngayo indawo yokunqula uYehova nendlela eyayibanelisa ngayo inkonzo yabo ingumzekelo kuthi.

86:5. Hayi indlela esimele simbulele ngayo uYehova ngenxa yokuba ‘ekulungele ukuxolela’! Ukhangela nantoni na enokubangela ukuba abonise inceba kumenzi-bubi oguqukayo.

87:5, 6. Ngaba abo baza kuphila kumhlaba oyiParadesi baya kuze bawazi amagama abo bavuselwe kubomi basezulwini? Ezi ndinyana zibonisa ukuba kusenokwenzeka.

88:13, 14. Kusenokwenzeka ukuba xa uYehova engayiphenduli ngokukhawuleza imithandazo yethu ufuna sibonise ukuba sizinikele kuye ngokupheleleyo.

“BULELANI KUYE, NIBONGE IGAMA LAKHE”

(INdumiso 90:1–106:48)

Khawucingisise ngezizathu ezahlukahlukeneyo zokudumisa uYehova ezichazwe kwicandelo lesine lencwadi yeendumiso. KwiNdumiso 90, uMoses wenza umahluko phakathi ‘koKumkani kanaphakade’ nobomi bomntu obufutshane. (1 Timoti 1:17) Ngokutsho kweNdumiso 91:2, uMoses uthi uYehova ‘yindawo yakhe yokusabela negwiba lakhe’—uMthombo wonqabiseko. Iindumiso ezimbalwa ezilandelayo zithetha ngeempawu ezithandekayo zikaThixo, iingcamango eziphakamileyo, nemisebenzi yakhe emangalisayo. Zintathu iingoma eziqala ngala mazwi: “UYehova uthe waba ngukumkani.” (INdumiso 93:1; 97:1; 99:1) Ethetha ngoYehova njengoMenzi wethu, umdumisi uyasikhuthaza esithi ‘masibulele kuye, sibonge igama lakhe.’—INdumiso 100:4.

Umlawuli owoyika uYehova angayalathisa njani imicimbi yakhe? Impendulo ifumaneka kwiNdumiso 101, eyabhalwa nguKumkani uDavide. Kwindumiso elandelayo sixelelwa ukuba uYehova “uya kuphethukela emthandazweni wabo baphangwe yonk’ into, aze angawudeli umthandazo wabo.” (INdumiso 102:17) INdumiso ye-103 itsalel’ ingqalelo kububele bothando kunye nenceba kaYehova. Ethetha ngemveliso kaThixo emhlabeni, umdumisi uthi: “Hayi indlela emininzi ngayo imisebenzi yakho, Yehova! Yonke uyenze ngobulumko.” (INdumiso 104:24) Iingoma ezimbini equkumbela ngazo le Nxalenye Yesine zidumisa uYehova ngenxa yemisebenzi yakhe emangalisayo.—INdumiso 105:2, 5; 106:7, 22.

Iimpendulo Kwimibuzo YeZibhalo:

91:1, 2—Iyintoni “indawo efihlakeleyo yOyena Uphakamileyo,” yaye ‘sinokuhlala’ njani kuyo? Le yindawo yokomfuziselo yonqabiseko nenkuselo yokomoya—apho ukhuseleka khona ekonakalisweni ngokomoya. Le ndawo ifihlakele kuba abo bangakholosi ngoThixo abayazi. UYehova simenza indawo yethu yokuhlala ngokuba simenze igwiba nenqaba yethu, simdumise njengoMlawuli onguMongami wendalo iphela size sishumayele iindaba ezilungileyo zoBukumkani. Siyanqabiseka ngokomoya kuba siyazi ukuba uYehova usoloko ekulungele ukusinceda.—INdumiso 90:1.

92:12—Iya kwenzeka njani into yokuba ilungisa ‘lityatyambe njengesundu’? Isundu laziwa ngokuba nemveliso. Ilungisa lifana nomthi wesundu kuba lithe tye emehlweni kaYehova yaye liqhubeka livelisa “isiqhamo esihle,” esiquka imisebenzi emihle.—Mateyu 7:17-20.

Oko Sikufundayo:

90:7, 8, 13, 14. Okubi esikwenzayo kusoloko kusonakalisa ulwalamano lwethu noThixo oyinyaniso. Nezono esithi zifihlakele zize kuye. Noko ke, ukuba siguquka ngokwenene size silahle ikhondo lethu elibi, uYehova uya kusamkela, ‘asanelise ngobubele bakhe bothando.’

90:10, 12. Ekubeni ubomi bubufutshane, sifanele ‘sibale imihla yethu.’ Njani? Ngokuzuza “intliziyo yobulumko,” okanye ngokuba nobulumko ukuze imihla yethu eseleyo singadlali ngayo, kodwa siyisebenzise ngendlela emkholisayo uYehova. Oku kufuna ukuba sizibekele usukelo lwezinto zokomoya size silisebenzise ngobulumko ixesha.—Efese 5:15, 16; Filipi 1:10.

90:17. Kufanelekile ukuthandazela ukuba uYehova ‘awumisele ngokuqinileyo umsebenzi wezandla zethu’ aze asikelele imigudu esiyenzayo entsimini.

92:14, 15. Ngokuba ngabafundi abakhutheleyo beLizwi likaThixo nangokunxulumana nabantu bakhe ngalo lonke ixesha, abakhulileyo baqhubeka “betyebile yaye besiba nentlahla”—bomelele ngokomoya—yaye babe lulutho ebandleni.

94:19. Enokuba yintoni ebangela “iingcamango eziphazamisayo,” siya kosulwa iinyembezi xa sifunda size sicamngce ‘ngentuthuzelo’ eseBhayibhileni.

95:7, 8. Ukuphulaphula isiluleko seZibhalo, sinikel’ ingqalelo kuso, size sikulungele ukusamkela, kuya kubangela ukuba singabi neentliziyo ezilukhuni.—Hebhere 3:7, 8.

106:36, 37. Ezi ndinyana zifanisa ukunqula izithixo nokubingelela kwiidemon. Oku kuthetha ukuba umntu osebenzisa izithixo usenokuphenjelelwa ziidemon. IBhayibhile iyasibongoza: “Zilindeni kuzo izithixo.”—1 Yohane 5:21.

“Dumisani uYa!”

Iingoma ezintathu zokugqibela Zenxalenye Yesine ziqukumbela ngesi siluleko: “Dumisani uYa!” Nendumiso yokugqibela yale nxalenye itshayelela kwangala mazwi. (INdumiso 104:35; 105:45; 106:1, 48) Phofu ke, amazwi athi “Dumisani uYa!” abonakala izihlandlo eziliqela Kwinxalenye Yesine YeeNdumiso.

Ngokuqinisekileyo sinesizathu sokumdumisa uYehova. INdumiso 73 ukusa kweye-106 ibangela ukuba sibe nokuninzi esinokucinga ngako, iintliziyo zethu zizaliswe kukumbulela uBawo wethu osezulwini. Xa sicinga ngazo zonke izinto asenzele zona naza kusenzela zona kwikamva, ngaba asiziva sifuna ‘ukumdumisa’ ngakumbi?

[Umfanekiso okwiphepha 10]

NjengoAsafu, sinokujamelana nobungendawo ‘ngokusondela kuThixo’

[Umfanekiso okwiphepha 11]

UFaro woyiswa kuLwandle Olubomvu

[Umfanekiso okwiphepha 11]

Uyasazi isizathu sokuba kuthiwe imana ‘sisonka sabanamandla’?

[Umfanekiso okwiphepha 13]

Luluphi uncedo esilufumanayo ukuze sigxothe ‘iingcamango eziphazamisayo’?

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share