Akunakulifaka Kuvimba Ngoko Ke Lisebenzise Kakuhle

IXESHA yimali, adla ngokutsho njalo amaNgesi. Enyanisweni, ixesha lahluke gqitha kwimali nezinye izinto eziphathekayo. Akunakulibekela bucala ngenjongo yokulisebenzisa ngenye imini njengoko kunjalo ngemali, ukutya, ipetroli okanye ezinye izinto. Kububuyatha ukuyeka ixesha lidlule ungalisebenzisanga. Yintoni eyenzekayo xa ulala iyure ezisibhozo uze uphinde ugqibe imini yonke ungenzi nto? Inyaniso kukuba, lonke elo xesha ungalisebenzisanga limke namanzi.

Ixesha lisenokufaniswa nomlambo omkhulu oqukuqelayo. Usoloko uqukuqela usiya calanye. Akunakukwazi ukuwumisa, okanye usebenzise ithontsi ngalinye lawo. Kwiinkulungwane ezidluleyo, abantu baqalisa ukwakha oomatshini abaneevili ezijikeleziswa ngamanzi elunxwemeni lomlambo. Basebenzisa la manzi aqukuqelayo ukuphehla umbane ukuze aba matshini bagube ukutya, benze amaplanga, bampompe amanzi nokuze iihamile ezinkulu zikwazi ukusebenza. Ngokufanayo, ixesha akunakulimisa lingadluli, kodwa unokulisebenzisa ukuphumeza umsebenzi obalulekileyo. Noko ke, ukuze wenjenjalo, umele ulwe nezinto ezimbini ezitya ixesha—ukuzibekel’ amangomso izinto nokungalungelelani. Makhe siqale sihlolisise lo mba wokuzibekel’ amangomso izinto.

Kuphephe Ukuzibekel’ Amangomso Izinto

Kukho intetho eqhelekileyo ethi, Musa ukuzibekel’ amangomso izinto. Kodwa bambi abaliphulaphuli eli cebiso. Xa kufuneka benze umsebenzi onzima, baye bawubekel’ amangomso. Ngokutsho kwesinye isichazi-magama “ukubekel’ amangomso izinto” kuthetha ukuba nomkhwa wokubekel’ ecaleni umsebenzi omelwe wenziwe. Abantu abenza oku, bazinika isiqabu ngokuwubekel’ amangomso umsebenzi xa ubacinezela—de uphinde ubaxhalabise.

Maxa wambi, impilo neentlungu esikuzo zinokusenza siwubekele elinye ixesha umsebenzi othile okanye wonke. Kakade ke, wonk’ ubani uyalifuna ikhefu kumsebenzi wakhe wamihla le. NoNyana kaThixo wayekwenza oku. UYesu wayehlala exakekile kubulungiseleli bakhe, kodwa wayekhe aphumle nabafundi bakhe. (Marko 6:31, 32) Olu hlobo lokuphumla luyanceda. Noko ke, kona ukuzibekel’ amangomso yinto eyahlukileyo koku; ngokuqhelekileyo kuba yingozi. Qwalasela lo mzekelo.

Umfundi okwishumi elivisayo uneeveki ezintathu zokuba alungiselele uviwo lwemathematika. Ufanele ahlole amanqaku neencwadi ezininzi. Uyaqonda ukuba unomsebenzi omninzi. Ubanjiswa ngulo mgibe wokuzibekel’ amangomso izinto. Kunokuba afunde incwadi zakhe ubukela umabonwakude. Suku ngalunye ubekela bucala umsebenzi afanele awenze ukuze aphumelele olu vavanyo. Wandula ke, ngosuku lokugqibela ngaphambi koviwo ajongane nomsebenzi omninzi afanele awufunde. Ehleli kwidesika yakhe, ufunda amanqaku akhe neencwadi.

Ixesha liyahamba. Ngoxa amanye amalungu entsapho yakowabo elele, yena uzama ukunkqaya yonke le nto ayifundileyo. Ngosuku olulandelayo esikolweni, uzama ukuphendula imibuzo kodwa ingqondo yakhe ediniweyo ayikwazi ukucinga. Ufumana amanqaku angancumisiyo aze angaphumeleli. Ngoku kufuneka afunde yonke le nto kwakhona ibe usenokungaphumeleli ukuya kwibanga elilandelayo.

Ukubekel’ izinto amangomso kube yintlekele kulo mfundi. Kukho umgaqo weBhayibhile onokunceda abantu bakuphephe ukuba kule meko. Umpostile uPawulos wathi: “Hlalani nikuphaphele ngokungqongqo ukuba indlela enihamba ngayo ingabi njengeyabantu abangezozilumko kodwa ibe njengeyezilumko, nizongele ixesha.” (Efese 5:15, 16) UPawulos wayebongoza amaKristu ukuba asebenzise ixesha lawo ngobulumko anyamekele izinto zokomoya, kodwa lo mgaqo unokuba luncedo kwiinkalo ezininzi zobomi. Ekubeni sidla ngokuzigqibela ngexesha esifuna ukuwuqalisa ngawo umsebenzi othile, ukuba sikhetha ukuwuqalisa kwangethuba siya kuwenza ngempumelelo size siwugqibe ngokukhawuleza. Le yindlela ezibonakala ngayo ‘izilumko,’ njengoko esi sibhalo sibonisa.

Liliphi ixesha ebemele azilungiselele ngalo iimviwo zakhe lo mfundi uselula ukuze abe ukwenze kwangethuba oko? Mhlawumbi busuku ngabunye ebenokuchitha imizuzu eli-15 nangaphezulu efunda iincwadi zakhe. Ngaloo ndlela, bekungayi kufuneka ankqaye ngobusuku bokugqibela, ixesha abemele abe ulele ngalo. Ngosuku lweemviwo, ebeza kube ephumle ngokwaneleyo equle waligangatha, yaye ebenokufumana amanqaku amahle.

Ngoko ke, xa unikwe umsebenzi, gqiba ngexesha elifanelekileyo lokuwenza uze uwenze. Uya kuwuphepha umgibe wokuzibekel’ amangomso izinto neengxaki zako. Uya kuvuyiswa nayinto yokuba uwenze kakuhle umsebenzi. Oku kubaluleke ngakumbi xa umsebenzi uza kuchaphazela abanye abantu, njengokuba kunjalo kwizabelo zebandla lamaKristu.

Lungelelana

Njengokuba kutshiwo ngaphambili, inkalo yesibini enokusinceda sisebenzise kakuhle ixesha kukulungelelana. Siyazi ukuba kuthabatha ixesha ukusingatha izinto, ukuzilungiselela, ukuzicoca, ukuzigcina nokuzinyamekela. Izinto ezininzi zifuna ixesha elingakumbi. Ukusebenza egumbini okanye endlwini ezaliswe zizinto kutya ixesha ibe kuyadimaza kunokuba kunjalo ngokusebenzela kwindawo evulekileyo nethe gabalala. Njengoko izinto ezininzi ziqokeleleka, kuya kuthabatha ixesha elingakumbi ukufumana into oyikhangelayo.

Abacebisi ngendlela yokucoca izindlu bathi phantse isiqingatha sexesha abantu abalisebenzisa becoca balichitha “besiya ngapha nangapha, besusa inkunkuma nezinto ezithe saa endleleni yabo.” Kunjalo nakwezinye iinkalo zobomi. Ngoko ukuba ufuna ukulisebenzisa kakuhle ixesha lakho, jonga indawo osebenzela kuyo. Ngaba izaliswe zizinto, akukwazi nokushukuma, nto leyo ekutyela ixesha? Ukuba kunjalo phungula ezo zinto zikuxinileyo.

Kusenokungabi lula ukulahla izinto ezizalise igumbi lakho. Kusenokuba buhlungu ukulahla izinto ozithandayo kodwa ongazisebenzisiyo—kunokufana nokulahlekelwa ngumhlobo osenyongweni. Yintoni enokukwenza ugqibe ngento omele uyigcine nomele uyilahle? Abanye basebenzisa lo mthetho: Ukuba into akukhange uyisebenzise unyaka wonke, yilahle. Kuthekani ukuba uyathandabuza ukuba uyilahle emva konyaka? Yigcine kwindawo ethile kangangeenyanga ezintandathu. Xa uphinda uyibona uze ukhumbule ukuba akukhange uyisebenzise kangangonyaka onesiqingatha, kusenokuba lula ukuyilahla. Eneneni, oyena ndoqo kukunciphisa izinto ezizalise igumbi lakho—ukuze usebenzise kakuhle ixesha lakho.

Kakade ke, izinto ezenza ubani angalungelelani azipheleli nje kwikhaya lakhe okanye indawo asebenzela kuyo. UYesu wathetha ‘ngexhala lale nkqubo yezinto namandla akhohlisayo obutyebi anokuminxa ilizwi’ likaThixo aze ubani “angabi nasiqhamo” ngokuphathelele iindaba ezilungileyo. (Mateyu 13:22) Ubani usenokuminxwa kukusukela izinto ezininzi kangangokuba akufumanise kunzima ukufumana ixesha lokuhlala elungelelene ngokomoya. Oku kunokuphumela ekubeni aphole ngokomoya aze ekugqibeleni angakwazi ukungena kwihlabathi elitsha uThixo alithembisileyo, apho kuya kubakho ixesha elingenasiphelo lokwenza izinto ezizisa ulwaneliseko lokwenene novuyo.—Isaya 65:17-24; 2 Petros 3:13.

Ngaba usoloko ufuna ixesha lokwenza zonke izinto ovakalelwa kukuba umele uzenze—enoba zinxulumene nomsebenzi wakho, ikhaya, imoto, ukuzonwabisa, uhambo, ukwenza umthambo, amatheko okanye ezinye izinto ezininzi ezibangel’ umdla? Ukuba kunjalo, mhlawumbi ngoku lixesha lokunciphisa izinto ezikutyela ixesha zize zikwenze ungabi nalo elokwenza izinto zokomoya.

Kukho nenye intetho ethi ixesha nomsinga ziya phambili azilindi mntu. Eneneni, ixesha liya phambili njengomsinga oqukuqelayo. Akunakulibuyisela emva okanye ulifake kuvimba; ukuba limkile soze uphinde ulifumane. Noko ke, ngokulandela imigaqo yeBhayibhile elula nangokuthabatha amanyathelo ambalwa asebenzisekayo, sinokuba nexesha lokunyamekela ‘izinto ezibaluleke ngakumbi’ nto leyo eya kuba yinzuzo ngonaphakade size ‘sise uzuko nendumiso kuThixo.’—Filipi 1:10, 11.

[Umfanekiso okwiphepha 8, 9]

Njengomlambo oqukuqelayo, ixesha linokusetyenziswa ekwenzeni okulungileyo

[Umfanekiso okwiphepha 9]

Liliphi elona thuba lifanelekileyo belinokusetyenziswa ngulo mfundi ukulungiselela iimviwo?

[Umfanekiso okwiphepha 10]

Ukusebenza kwindawo exineneyo kutya ixesha ibe kuyadimaza