Ukuzibekela Amangomso Izinto—Isela Lexesha

“Ukuzibekela amangomso izinto lisela lexesha.”—UEdward Young, c. 1742.

KHAWUME! Ungayeki ukulifunda eli nqaku! Uyakwazi oko kusenokwenzeka. Usenokuyeka ukulifunda uze uthi: “Lo ngumxholo obangel’ umdla, kodwa andinaxesha lakuwufunda ngoku. Ndiza kulifunda kamva.” Kodwa usenokungalifundi.

Musa ukukubekela amangomso ukufunda eli nqaku lithetha ngokuzibekela amangomso izinto! Zibekele ixesha. Kusenokwenzeka ukuba uya kulifunda eli nqaku malunga nemizuzu emihlanu. Ngaloo ndlela uya kube ugqibe malunga neshumi ekhulwini leli phephancwadi xa lilonke! Khangela iwotshi yakho uze uqalise ukubala ixesha ngoku. (Sele ufunde isihlanu ekhulwini seli nqaku!)

Ngaba Kukuzibekela Amangomso Izinto?

Ukuba ukubekela elinye ixesha oko unokukwenza, okanye ufanele ukwenze ngoku—ngoko ubeka amangomso. Ngamany’ amazwi, ukubekela ingomso oko unokukwenza ngoku, namhlanje. Umntu ozibekela amangomso izinto uyalibazisa ekwenzeni umsebenzi kwanaxa efanele awenze ngokwenene loo msebenzi.

Umphathi ucela ingxelo kumqeshwa; abazali bacela umntwana wabo ukuba acoce igumbi lakhe; umfazi ucela indoda yakhe ukuba ilungise itepu. Amazwi athi “bendixakeke kakhulu” okanye, “ndilibele” okanye, “bendingenaxesha” zizingxengxezo zokungafumani xesha lokwenza okuthile. Inyaniso yona yile, bambalwa kuthi abathanda ukwenza ingxelo okanye ukucoca amagumbi okanye ukulungisa imibhobho yamanzi xa kukho izinto ekonwabisa ngakumbi ukuzenza. Ngoko sikubekela elinye ixesha oko, silibazise ukukwenza.

Noko ke, ngaba uyazi ukuba maxa wambi asikokuzibekela amangomso izinto xa sikubekela elinye ixesha ukwenza okuthile? Elinye ibhinqa elingusomashishini elifumana isicelo elingaziyo ukuba lenze ntoni na ngaso lisifaka kwibhokisi ekwidesika yalo ebhalwe oku “izinto eziza kubonwa ngelinye ixesha.” Emva kweeveki ezimbalwa, liphinda lizihlolisise kwakhona ezi zinto lize lifumanise ukuba isiqingatha sazo zizinto nje ezingenamsebenzi. Iingxaki ezikuzo zisuke nje zaziphelela okanye ezi zinto azisafuneki nganto. Ukuba akuqinisekanga enoba umele ulibazise okanye wenze ngokukhawuleza, zama ukufumanisa oko kuya kwenzeka ukuba awukwenzi oko ukubekela elinye ixesha. Ngaba isiphumo sisenokuba sihle ukuba uyakwenza oko okanye siya kuba sibi ngakumbi?

Ukuba sinako yaye sifanele senze okuthile ngoku yaye ukulibazisa ukwenza oko kufunekayo kunokubangela iingxaki ezininzi kamva, ngoko ukulibazisa kukuzibekela amangomso izinto. Ngokomzekelo, ukuhlamba izitya emva kokuba ziye zahlala ixesha elithile kwenza kube nzima ngakumbi ukuzityura zicoceke. Ukumana ukubekela elinye ixesha ukulungisa inqwelo-mafutha kunokuphumela ekuyilungiseni ngemali eninzi kamva. Ukuhlawula ityala emva kwexesha kunokuphumela ekuhlawuleni imali eninzi okanye ekuphulukaneni neenkonzo ezithile. Elinye ibhinqa labala laza lafumanisa ukuba amatikiti elaliwanikwe ngamagosa endlela, iikhasethi zevideo, iincwadi zomzi wogcino-zincwadi elalingazihlawulanga kuselithuba xa zizonke zazibiza iidola ezingama-46 (i-167 leerandi) ngenxa yokungahlawuli ngokukhawuleza! Oko yayikokwenyanga nje enye!

Ukubamba Eli Sela

Siqonde isizathu sokuba uzibekele amangomso izinto. Qwalasela ezi zizathu zilandelayo, uze ubone enoba unako na ukusibona eso singena kakuhle kumsebenzi wangoku ongakhange uwuqale okanye uwugqibe:

Umkhwa:

Ukuba ndilinda de kube ngumzuzu wokugqibela, ndiya kuba nentshukumisa engakumbi yokuwugqiba.

Ndivuyiswa kukuwenza kanye ngomzuzu wokugqibela.

Ndiza kulinda de umphathi andikhumbuze izihlandlo eziliqela, ngaloo ndlela ndiya kukwazi ukuba yinto afuna ndiyenze ngokwenene.

Ndinokuninzi kakhulu endimele ndikwenze kangangokuba zizinto ezibalulekileyo kuphela endizinikela ingqalelo.

Isimo Sengqondo:

Andinamnqweno okanye intshukumisa yokwenza isabelo.

Izinto ndizenza xa ndiziva ndifuna ukuzenza.

Ndifuna ukwenza enye into.

Andikwazi ukuziqeqesha.

Ukoyika:

Andiqinisekanga enoba ndinako na ukuwenza.

Andinaxesha laneleyo lakuwenza.

Ngumsebenzi omkhulu kakhulu lo. Ndifuna ukuncedwa.

Kuthekani ukuba andiphumeleli okanye andiwugqibi?

Kufuneka ndifumane izixhobo ukuze ndiwugqibe lo msebenzi.

Ndoyika ukuba ndiza kugxekwa okanye ndiphoxwe.

Ahlukahlukene amanqanaba abangela abantu abahlukahlukeneyo bazibekele amangomso izinto. Bambi babeka amangomso ngaphambi kokuba baqalise ngenxa yokuba bewujonga umsebenzi njengomkhulu kakhulu. Abanye bayaqalisa, kodwa phakathi, ihlombe liphele, baze ke bakubekele elinye ixesha ukuwugqiba. Ukanti abanye bathi sele beza kuwugqiba kodwa baqale omnye umsebenzi, bewushiya owokuqala bengawugqibanga. (Kodwa wena, wenza kakuhle. Sele ukwisiqingatha seli nqaku.)

Izizathu onazo zokungawuqalisi okanye ungawugqibi umsebenzi zisenokunxulunyaniswa nazo zonke ezi ndidi zintathu. Kwincwadi ethi The Now Habit, uNeil Fiore wabhala oku: “Ezona zinto zintathu ezingoonobangela bengxaki yokuzibekela amangomso izinto zezi: ukuziva ngathi uyaxhatshazwa, ukoyiswa nokoyika ukungaphumeleli.” Enokuba ziyintoni na izizathu, ukuba unokubaqonda oonobangela, uya kuba ukufutshane ekufumaneni isicombululo.

Ukuba akuqinisekanga ngesizathu sokuba uzibekele amangomso izinto, yenza ingxelo yemisebenzi oye wayenza kwisiqingatha seyure evekini. Fumanisa indlela olichitha ngayo ixesha. Kuya kusivula amehlo ngokwenene ukubona ukuba lingakanani na ixesha esilichithela kwizinto ezingabalulekanga kangako kunakwimisebenzi ebalulekileyo. Kodwa ke wenza ntoni emva koko?

Cinga Ngeziphumo

Ukulindela ukuba okuthile kuya kwenzeka ngaphandle kokuzibhokoxa kunokubangela ukuba uzive ubuhlungu. Njengoko usondela kwixesha olindele ukugqiba ngalo, uqalisa ukuziva ucinezelekile yaye unexhala. Njengoko ezi mvakalelo zikhula, ubuchule bakho bokwenza izinto busenokuphazamiseka. Awutyekeli kangako ekulingeni iindlela ezahlukahlukeneyo ukuze ufeze usukelo kodwa ngokuyintloko unomdla ekubeni ude ulugqibe.

Ngokomzekelo: Unikwe isabelo sokunikela intetho. Kubusuku obungaphambili, uhlala phantsi ukuze ubhale amagama ambalwa ephepheni. Awuchithanga xesha laneleyo lokuphanda ngalo mbandela wakho, ngoko uwukha nje phezulu. Mhlawumbi ngomgudu nje ongakumbi ongephi, ubusenokuquka amava, inkcazelo ewuxhasayo, okanye izicangca ukuze uncede abaphulaphuli bakho babe nomfanekiso-ngqondweni walo mbandela.

Esinye isiphumo esibangelwa kukulibazisa ukwenza umsebenzi kukungakwazi ukuphumla xa sinexesha esingenzi nto ngalo. Oko kubangelwa kukuba nemvakalelo esikhathazayo (okanye umntu osikhathazayo osoloko esikhumbuza) ukuba sishiye umsebenzi othile ungagqitywanga.

Yintoni Endinokuyenza?

Yenza uludwe. Kwenze oku kubusuku obungaphambili. Bhala ephepheni izinto ofuna ukuzenza kusuku olulandelayo. Ngale ndlela awuyi kulibala nto, yaye uya kuyibona inkqubela yakho njengoko uphawula izinto osele uzigqibile. Kwicala elingasekunene lento nganye, bhala ixesha oqikelela ukuba uya kulithabatha ekwenzeni eso sabelo. Ukuba wenza uludwe ‘Lwezinto Oza Kuzenza’ ngosuku, sebenzisa imizuzu. Ukuba wenza uludwe lwemisebenzi emikhulu, sebenzisa iiyure. Lwenze olu ludwe kubusuku obungaphambili. Zinike imizuzu embalwa yokulungiselela uludwe lwakho losuku olulandelayo. Gcina ikhalenda yenyanga ngenyanga isekuhleni. Xa usamkela izabelo namadinga, zibhale kuyo.

Xa uhlola kwakhona imisebenzi yosuku olulandelayo, phawula izinto ezibalulekileyo kwikhalenda yakho, ubhala uA, B, C, njalo njalo ecaleni kwento eza kwenziwa. Abanye abantu basebenza kakuhle kusasa, abanye emva kwemini okanye ngorhatya. Yenza ucwangciso lweyona misebenzi yakho mikhulu ngelona xesha lakho elibalulekileyo. Qala ngale misebenzi inganiki mdla ngaphambi kwale uyithandayo.

Zibekele ixesha. Ukuba usoloko ushiywa lixesha, kude kufuneke ubaleke ngokoqobo kuba ushiywe lixesha, funda ukuzibekela ixesha. Oko kukuthi, lungelelanisa ngokuchanileyo ixesha oya kulifuna ekwenzeni umsebenzi lowo. Yongezelela imizuzu embalwa ethe chatha kuloo msebenzi usenzela “into engekehli” esenokuthi yehle. Musa ukulibala ukuvumela ixesha phakathi kwamadinga. Kufuneka wongezelele nexesha lokuhamba. Awunakuqukumbela intlanganiso ngeye–10:00 kusasa uze ube kwenye kwangeye-10:00 kwakusasa njalo kwanokuba ikwelinye igumbi, singasathethi ke ukuba ikwenye idolophu. Vumela ixesha elaneleyo phakathi kwazo.

Nika abanye umsebenzi. Ngokufuthi sizama ukwenza izinto ngokwethu nangona kungasoloko kuyimfuneko oko. Omnye umntu usenokukwazi ukusihambisela umthwalo ukuba siyazi ukuba uya eposini.

Wahlulahlule. Maxa wambi asiwuqali umsebenzi omtsha ngenxa yobukhulu bawo. Kutheni ungahlulahluli umsebenzi omkhulu ube yimisetyenzana emincinane? Njengoko sigqibezela le misetyenzana, siya kuyibona inkqubela yethu size sikhuthazelwe ukugqiba olandelayo.

Kulindele ukuphazanyiswa. Kusoloko kukho iziphazamiso ngoxa sisebenza ebudeni bemini—iminxeba, iindwendwe, iingxaki, iileta. Sifuna ukusebenza ngokuphumelelayo, nto leyo equka ukusebenza nabanye abantu abanosukelo. Ukuba sixhalabele ukusebenza ngenkuthalo kuphela, siya kukhathazeka xa abanye abantu besiphazamisa emisebenzini yethu. Ngoko ke, kulindele ukuphazanyiswa. Mihla le zinike ixesha lezinto ezingacwangciswanga ezisenokuvela. Xa ezi zivela, unako ukuhlangabezana nazo, usazi ukuba uye wazinika ixesha lazo.

Zivuze. Xa usenza ucwangciso lwakho, ufanele ucwangcise umsebenzi onzima okanye oza kukugcina uxakekile kangangama-90 emizuzu. Musa ukulibala ukucwangcisa ixesha lokulungiselela umsebenzi. Emva kokuba uwuqalile umsebenzi yaye usebenze kangangeyure enesiqingatha, usenokufuna ukuphumla nje kancinane. Ukuba usebenza eofisini, nqumama, ukhe uzolule, yaye ucamngce. Ukuba usebenza ngaphandle, fumana izimuncumuncwana. Zivuze ngomsebenzi wakho.—INtshumayeli 3:13.

Khawufan’ ucinge, uye waligqiba eli nqaku malunga nemizuzu nje emihlanu emva kokuba ufunde umxholo. Usenokuba sele uza kuphucula!