Indlela Yokusondela ‘KuMphulaphuli Wemithandazo’

“Owu mphulaphuli wemithandazo, abantu bayo yonke inyama baya kuza kuwe.”—INDUMISO 65:2.

1. Yintoni eyenza abantu bahluke kwezinye izidalwa ezisemhlabeni, ibe oku kubavulela liphi ithuba?

KUWO onke amawaka ezidalwa eziphila emhlabeni, ngabantu kuphela abakwaziyo ukunqula uMdali. Ngabo kuphela abayiphapheleyo intswelo yabo yokomoya baze babe nomnqweno wokuyanelisa. Oku kusivulela ithuba elihle lokuba nolwalamano noBawo wethu wasezulwini.

2. Isono saba nawuphi umphumo obuhlungu kulwalamano lomntu noMdali wakhe?

² UThixo wadala umntu wakwazi ukuthetha noMdali wakhe. UAdam noEva badalwa bengenasono. Ngenxa yoko, babekwazi ukuthetha noThixo ngokukhululekileyo ngendlela umntwana athetha ngayo noyise. Noko ke, isono sabaphulukanisa nelo lungelo lingathethekiyo. UAdam noEva abazange bamthobele uThixo lwaba ke luyaphela ulwalamano naye. (Genesis 3:8-13, 17-24) Ngaba oko kuthetha ukuba inzala ka-Adam engafezekanga ayinakukwazi ukusondela kuThixo? Akunjalo, uYehova usayivumela ukuba ithethe naye kodwa kuphela xa ifikelela imilinganiselo ethile. Yiyiphi loo milinganiselo?

Oko Kufunekayo Ukuze Usondele KuThixo

3. Abantu abanesono banokusondela njani kuThixo, yaye nguwuphi umzekelo obonisa oko?

³ Okwenzeka koonyana ababini baka-Adam kusinceda sibone oko kufunwa nguThixo kubantu abangafezekanga abafuna ukusondela kuye. UKayin noAbheli bazama ukusondela kuThixo ngokwenza umnikelo. Umnikelo ka-Abheli wamkelwa kodwa okaKayin awuzange wamkelwe. (Genesis 4:3-5) Kwakutheni ukuze kube njalo? AmaHebhere 11:4 athi: “Ngokholo uAbheli wanikela kuThixo umbingelelo oxabiso likhulu ngakumbi kunokaKayin, kholo olo awathi ngalo wangqinelwa ukuba ulilungisa.” Kucacile ke ukuba, ubani ufanele abe nokholo ukuze akwazi ukusondela kuThixo. Enye into efunekayo ibonwa koko kwathethwa nguYehova kuKayin: “Ukuba uyaguquka wenze okulungileyo, akusayi kuphakanyiswa yini na?” Ewe, uThixo ngewayewamkele umnikelo kaKayin ukuba wayeguqukile wenza okulungileyo. Kodwa, uKayin wasigatya isiluleko sikaThixo, wabulala uAbheli waza waba likheswa. (Genesis 4:7-12) Ngoko ke, kwasekuqaleni kwembali yoluntu, kwabethelelwa ukubaluleka kokuba umntu asondele kuThixo ngokholo nemisebenzi elungileyo.

4. Yintoni esimele siyikhumbule xa sisondela kuThixo?

⁴ Xa sifuna ukusondela kuThixo kubalulekile ukuyikhumbula into yokuba sinesono. Bonke abantu banesono, ibe isono singumqobo osithintelayo ukuba sisondele kuThixo. Umprofeti uYeremiya wabhala wathi ngokuphathelele amaSirayeli: “Thina sinxaxhile . . . Ngengqimba yelifu ukuthintele ukusondela kuwe, ukuze umthandazo ungadluli.” (IZililo 3:42, 44) Sekunjalo, ukutyhubela imbali yabantu uThixo uye wabonisa ukuba ukulungele ukuphulaphula imithandazo yabo basondela kuye benokholo nentliziyo efanelekileyo, begcina imithetho yakhe. (INdumiso 119:145) Ngoobani abanye babo bantu, ibe yintoni esinokuyifunda kwimithandazo yabo?

5, 6. Yintoni esinokuyifunda kwindlela awayethetha ngayo uAbraham noThixo?

⁵ Omnye wabo yayinguAbraham. UThixo wamamkela uAbraham, kuba wambiza ngokuthi “umhlobo wam.” (Isaya 41:8) Yintoni esinokuyifunda kwindlela awasondela ngayo uAbraham kuThixo? Lo solusapho uthembekileyo wabuza uYehova ngendlalifa, esithi: “Uya kundinika ntoni na, njengokuba ndingenabantwana.” (Genesis 15:2, 3; 17:18) Ngesinye isihlandlo, wayefuna ukwazi abo babeza kusinda xa uThixo egweba abangendawo eSodom naseGomora. (Genesis 18:23-33) UAbraham wathandazela nabanye. (Genesis 20:7, 17) NjengoAbheli, maxa wambi uAbraham wayesenza umbingelelo xa eza kuthetha noThixo.—Genesis 22:9-14.

⁶ Kuzo zonke ezi zihlandlo, uAbraham wayethetha ngokukhululekileyo noYehova. Noko ke, nangona wayethetha ngokukhululekileyo wayebonisa ukuthobeka kuMdali wakhe. Phawula amazwi akhe entlonipho, akwiGenesis 18:27 athi: “Tarhu, naku sendide ndathetha noYehova, ngoxa ndiluthuli nothuthu.” Esi sisimo sengqondo esihle esimele sisixelise!

7. Ziziphi izinto ezathandazelwa ngoosolusapho?

⁷ Oosolusapho bathandazela izinto ezahlukahlukeneyo ibe uYehova wabaphulaphula. UYakobi wenza umthandazo osisifungo. Emva kokuba ecele uThixo ukuba amxhase, ngokunyaniseka wenza esi sithembiso: “Entweni yonke oya kundinika yona ndikunike ngokuqinisekileyo isishumi sayo.” (Genesis 28:20-22) Kamva, xa wayeza kudibana nomntakwabo, uYakobi wacela uYehova ukuba amkhusele, esithi: “Khawuncede undihlangule, esandleni somntakwethu, esandleni sikaEsawu, kuba ndiyamoyika.” (Genesis 32:9-12) Usolusapho uYobhi wathandazela intsapho yakhe kuYehova, wenza imibingelelo ngenxa yayo. Xa abahlobo abathathu bakaYobhi bonayo ngoko bakuthethayo, uYobhi wabathandazela, ibe “uYehova wabamkela ubuso bukaYobhi.” (Yobhi 1:5; 42:7-9) Ezi ngxelo zisinceda siqonde izinto esinokuzithandazela kuYehova. Sikwabona nokuba uYehova ukulungele ukwamkela imithandazo yabo basondela kuye ngendlela efanelekileyo.

Indlela Yokusondela KuYehova Phantsi Komnqophiso Womthetho

8. Liliphi ilungiselelo lokuthandazela abantu kuYehova elamiselwa kumnqophiso woMthetho?

⁸ Emva kokuba uYehova ekhulule uhlanga lakwaSirayeli eYiputa, walunika umnqophiso woMthetho. Kulo Mthetho kwakukho ilungiselelo lokusondela kuThixo ngababingeleli abamiselweyo. Abanye abaLevi babenikwe isabelo sokuba ngababingeleli babantu. Xa kukho umbandela obalulekileyo kolo hlanga, ummeli wabantu—maxa wambi ukumkani okanye umprofeti—wayethandaza kuThixo ngalo mbandela. (1 Samuweli 8:21, 22; 14:36-41; Yeremiya 42:1-3) Ngokomzekelo, xa kwakunikezelwa itempile, uKumkani uSolomon wathandaza kuYehova ngokusuka entliziyweni. Naye uYehova wabonisa ukuba uyawamkela umthandazo kaSolomon ngokuzalisa itempile ngozuko lwakhe wathi: ‘Iindlebe zam ziya kuphulaphula umthandazo kule ndawo.’—2 Kronike 6:12–7:3, 15.

9. Yintoni ekwakufuneka yenziwe ukuze abantu basondele kuYehova kwingcwele?

⁹ KuMthetho awawunika amaSirayeli, uYehova wachaza nendlela eyamkelekileyo yokusondela kuye kwingcwele. Yiyiphi lo ndlela? Ukongezelela ekunikeleni amadini ezilwanyana, rhoqo kusasa nangokuhlwa, umbingeleli omkhulu wayefanele atshise isiqhumiso sobulawu phambi koYehova. Kamva, nababingeleli abangaphantsi babekwenza oku, ngaphandle kokuba olo luSuku Locamagushelo. Xa ababingeleli bengamniki lo mbeko, uYehova wayengayamkeli inkonzo yabo.—Eksodus 30:7, 8; 2 Kronike 13:11.

10, 11. Bubuphi ubungqina esinabo bokuba uYehova wayesamkela umthandazo womntu ngamnye?

¹⁰ KuSirayeli wamandulo, ngaba abantu babesondela kuThixo ngabameli abamiselweyo kuphela? Akunjalo, iZibhalo zibonisa ukuba uYehova wayephulaphula umthandazo womntu ngamnye. Kumthandazo wokunikezela itempile, uSolomon wabongoza uYehova esithi: “Nawuphi na umthandazo, nasiphi na isicelo sobabalo esinokubakho kuye nawuphi na umntu kubo bonke abantu bakho amaSirayeli, . . . baze bazolulele kule ndlu izandla zabo, kwanga ungeva usemazulwini.” (2 Kronike 6:29, 30) Ingxelo kaLuka isixelela ukuba xa uZekariya, uyise kaYohane umBhaptizi, wayenikela isiqhumiso engcweleni, inkitha yabanquli bakaYehova engengobabingeleli “yayithandaza ngaphandle.” Kuyabonakala ukuba, yayilisiko labantu ukuhlanganisana ngaphandle kwengcwele bathandaze ngoxa kunikelwa isiqhumiso kuYehova kwisibingelelo segolide.—Luka 1:8-10.

¹¹ Ngoko ke, xa kusondelwa kuye ngendlela efanelekileyo, uYehova wayeyiphulaphula ngovuyo imithandazo yabo bamela isizwe neyabo bazithandazelayo. Namhlanje asisekho ngaphantsi komnqophiso woMthetho. Sekunjalo, sinokufunda izinto ezibalulekileyo ngomthandazo kwindlela awayethandaza ngazo uSirayeli wamandulo kuThixo.

Indlela Yokusondela KuYehova Phantsi Kwelungiselelo Lebandla LamaKristu

12. Liliphi ilungiselelo lamaKristu lokusondela kuYehova?

¹² Ngoku siphila phantsi kwelungiselelo likaKristu. Ayisekho itempile yokoqobo apho ababingeleli bamela abantu bakaThixo okanye esinokuthandazela kuyo. Sekunjalo, uYehova wenze ilungiselelo lokuba sisondele kuye. Liliphi elo lungiselelo? Ngowama-29 C.E., xa uKristu wathanjiswa waza wamiselwa njengoMbingeleli Omkhulu, itempile yokomoya yaqalisa ukusebenza.a Itempile yokomoya yaba lilungiselelo elitsha lokusondela kuYehova elisekelwe kumbingelelo kaYesu Kristu wokucamagushela.—Hebhere 9:11, 12.

13. Ngokuphathelele umthandazo, yintoni efana ngazo itempile yaseYerusalem netempile yokomoya?

¹³ Izinto ezininzi ezazikwitempile yaseYerusalem zazibonisa ngokucacileyo iinkalo ezahlukahlukeneyo zetempile yokomoya, kuquka nezo zinxulumene nomthandazo. (Hebhere 9:1-10) Ngokomzekelo, yintoni eyayifuziselwa sisiqhumiso esasinikelwa kusasa nangokuhlwa, kwisibingelelo sesiqhumiso kwindawo Engcwele yetempile? Ngokutsho kwencwadi yeSityhilelo “iziqhumiso zithetha imithandazo yabo bangcwele.” (ISityhilelo 5:8; 8:3, 4) UDavide waphefumlelwa ukuba athi: “Ngamana umthandazo wam ungalungiselelwa njengempepho phambi kwakho.” (INdumiso 141:2) Ngoko ke, kwilungiselelo lebandla lamaKristu, isiqhumiso sobulawu sasimela imithandazo nendumiso eyamkelekileyo kuYehova.—1 Tesalonika 3:10.

14, 15. Kunokuthiwani ngokusondela kuYehova (a) kwamaKristu athanjisiweyo? (b) ‘kwezinye izimvu’?

¹⁴ Ngubani onokusondela kuThixo kule tempile yokomoya? Kwitempile yokoqobo, ababingeleli nabaLevi babenelungelo lokukhonza kwintendelezo engaphakathi, kodwa yayingababingeleli kuphela ababenokungena kwiNgcwele. AmaKristu athanjisiweyo anethemba lokuphila ezulwini akwimeko yokomoya ekhethekileyo efuziselwa yintendelezo engaphakathi neNgcwele, ebangela akwazi ukuthandaza nokudumisa uThixo.

¹⁵ Kuthekani ngabo banethemba lokuphila emhlabeni, “ezinye izimvu”? (Yohane 10:16) Umprofeti uIsaya wathi “ekupheleni kwemihla” abantu beentlanga ngeentlanga baya kunqula uYehova. (Isaya 2:2, 3) Waphinda wathi “abasemzini” babeya kuzihlanganisa kuYehova. Ebonisa indlela akulungele ngayo ukubamkela, uThixo wathi: ‘Ndiza kubenza babe nemihlali endlwini yam yomthandazo.’ (Isaya 56:6, 7) ISityhilelo 7:9-15 sinikela iinkcukacha ezibhekele phaya, sichaza “isihlwele esikhulu” ‘esiphuma kuzo zonke iintlanga’ esihlanganisene ekunquleni nasekuthandazeni kuThixo “imini nobusuku” njengoko simi kwintendelezo engaphandle yetempile yokomoya. Kuthuthuzela ngokwenene ukwazi ukuba bonke abakhonzi bakaThixo namhlanje banokusondela ngokukhululekileyo kuThixo benentembelo yokuba uyabaphulaphula!

Yiyiphi Imithandazo Eyamkelekileyo?

16. Yintoni esinokuyifunda kumaKristu okuqala ngokuphathelele umthandazo?

¹⁶ AmaKristu okuqala ayethandaza gqitha. Zintoni awayezithandazela? Abadala abangamaKristu bacela ukhokelo ekunyuleni amadoda anokunikwa iimbopheleleko ebandleni. (IZenzo 1:24, 25; 6:5, 6) UEpafra wathandazela amanye amakholwa. (Kolose 4:12) Amalungu ebandla elaliseYerusalem athandazela uPetros xa wayevalelwe entolongweni. (IZenzo 12:5) AmaKristu okuqala acela uThixo ukuba awanike inkalipho xa ayejamelene nenkcaso, esithi: “Yehova, khawunikele ingqalelo kwizisongelo zabo, uze uwanike amakhoboka akho ukuba ahlale elithetha ilizwi lakho ngenkalipho yonke.” (IZenzo 4:23-30) Umfundi uYakobi wabongoza amaKristu ukuba acele kuThixo ubulumko xa evavanywa. (Yakobi 1:5) Ngaba uyazithandazela ezi zinto kuYehova xa uthandaza?

17. UYehova uphulaphula imithandazo yoobani?

¹⁷ UThixo akaphulaphuli yonke imithandazo. Ngoko, sinokuqiniseka njani ukuba imithandazo yethu iyaphulwaphulwa? Abantu abathembekileyo uThixo awaphulaphula imithandazo yabo bamandulo, babesondela kuye ngokunyaniseka benentliziyo efanelekileyo. Babonisa ukholo olwaluhambisana nemisebenzi emihle. Sinokuqiniseka ukuba uYehova uya kubaphulaphula abo basondela kuye ngendlela efanayo namhlanje.

18. Yintoni amele ayenze amaKristu ukuze imithandazo yawo iviwe?

¹⁸ Kukho nenye into efunekayo. Umpostile uPawulos wakucacisa oku, esithi: “Ngaye . . . sisondela kuBawo ngamoya mnye.” UPawulos wayebhekisela kubani xa wayesithi “ngaye”? Wayebhekisela kuYesu Kristu. (Efese 2:13, 18) Ewe, sinokuthandaza ngokukhululekileyo kuBawo wethu kuphela ngoYesu.—Yohane 14:6; 15:16; 16:23, 24.

19. (a) Kunini apho imibingelelo yesiqhumiso yamaSirayeli yayiba yecekisekayo kuYehova? (b) Sinokuqiniseka njani kuba imithandazo yethu injengesiqhumiso sobulawu kuYehova?

¹⁹ Njengoko sekukhankanyiwe, isiqhumiso esasinikelwa ngababingeleli bakwaSirayeli sasimela imithandazo eyamkelekileyo yabakhonzi bakaThixo abathembekileyo. Noko ke, maxa wambi, uYehova wayeyicekisa iminikelo yesiqhumiso yamaSirayeli. Oko kwakuba njalo xa amaSirayeli etshisa isiqhumiso etempileni kwangaxeshanye aqubude kwizithixo. (Hezekile 8:10, 11) Ngokufanayo namhlanje, imithandazo yabo bathi bakhonza uYehova kwangaxeshanye benze imisebenzi engqubanayo nemithetho yakhe, baba njengevumba elicekisekayo kuye. (IMizekeliso 15:8) Ngoko ke, masihlale sicocekile kuzo zonke iinkalo zobomi bethu ukuze imithandazo yethu ibe njengesiqhumiso sobulawu kuThixo. UYehova uyayithanda imithandazo yabo balandela iindlela zakhe zobulungisa. (Yohane 9:31) Noko ke, kusekho imibuzo ephakamayo. Simele sithandaze njani? Yintoni esinokuyithandazela? Yena uThixo uyiphendula njani imithandazo yethu? Inqaku elilandelayo liza kuphendula le mibuzo neminye.

[Umbhalo osemazantsi]

Ngaba Unokucacisa?

• Abantu abangafezekanga banokusondela njani kuThixo ngendlela eyamkelekileyo?

• Sinokubaxelisa njani oosolusapho kwimithandazo yethu?

• Yintoni esiyifundayo kwimithandazo yamaKristu okuqala?

• Kunini apho imithandazo yethu iba njengesiqhumiso sobulawu kuThixo?

[Umfanekiso okwiphepha 23]

Kwakutheni ukuze uThixo awamkele umbingelelo ka-Abheli aze angawamkeli okaKayin?

[Umfanekiso okwiphepha 24]

“Ndiluthuli nothuthu”

[Umfanekiso okwiphepha 25]

‘Ndiya kukunika ngokuqinisekileyo isishumi sayo’

[Umfanekiso okwiphepha 26]

Ngaba imithandazo yakho injengesiqhumiso sobulawu kuYehova?