UYehova Uya ‘Kubangela Ukuba Okusesikweni Kwenziwe’

“Akayi kuthi na uThixo abangele ukuba okusesikweni kwenziwe kwabo banyuliweyo bakhe abadanduluka kuye imini nobusuku?”—LUKA 18:7.

1. Ngoobani abangumthombo wokhuthazo kuwe, ibe kutheni kunjalo?

KWIHLABATHI lonke amaNgqina kaYehova anabazalwana noodade abakhonze uYehova ngokuthembeka kangangeminyaka. Ngaba bakho wena obaziyo? Usenokucinga ngodade okhulileyo, osele eneminyaka ebhaptiziwe kodwa akafane aphoswe ziintlanganiso kwiHolo yoBukumkani. Mhlawumbi ucinga ngomzalwana owalupheleyo onyanisekileyo exhasa umsebenzi wokushumayela webandla veki nganye yaye ebesenjenjalo kangangeminyaka. Eneneni, abaninzi kubo babecinga ukuba iya kube sele ifike yadlula iArmagedon ngeli xesha. Ukanti, isibakala sokuba eli hlabathi lingenabulungisa lisekho asikhange sibenze bayeke ukuthembela kwizithembiso zikaYehova yaye basazimisele ‘ukunyamezela de kube sekupheleni.’ (Mateyu 24:13) Ukholo olunjalo lwabakhonzi abathembekileyo bakaYehova luba ngumthombo wokhuthazo kwibandla liphela.—INdumiso 147:11.

2. Yiyiphi imeko esenza sibe buhlungu?

² Noko ke, maxa wambi kwenzeka into eyahlukileyo kuleyo. Kukho amaNgqina ashumayele iminyaka, kodwa ethubeni lwabuthathaka ukholo lwawo, atsho ayeka nokuya kwibandla lamaKristu. Ibuhlungu into yokuba abantu ababekunye nathi basuka bamshiya uYehova, ibe ngumnqweno osuka entliziyweni ukuba siqhubeke sinceda ‘imvu nganye elahlekileyo’ ibuyele emhlambini. (INdumiso 119:176; Roma 15:1) Noko ke, le yokuba abanye bahlale benokholo olomeleleyo ngoxa luphela kwabanye, ivusa imibuzo ethile. Yintoni enceda iqela lamaNgqina lihlale linokholo kwizithembiso zikaYehova ngoxa luphela kwamanye? Yintoni thina esinokuyenza ukuze sihlale siqinisekile ukuba “imini enkulu kaYehova ikufuphi”? (Zefaniya 1:14) Makhe siqwalasele umzekeliso okwincwadi yeVangeli kaLuka.

Isilumkiso Kwabaphilayo “Xa UNyana Womntu Efika”

3. Ngoobani abancedwa ngokukhethekileyo ngumzekeliso womhlolokazi nomgwebi, yaye ngoba?

³ KuLuka isahluko 18, siva umzekeliso kaYesu ophathelele umhlolokazi nomgwebi othile. Uyafana nomzekeliso womamkeli zindwendwe ozingisayo, esixubushe ngawo kwinqaku elandulela eli. (Luka 11:5-13) Kodwa wona umongo weBhayibhile onalo mzekeliso womhlolokazi nomgwebi ubonisa ukuba oku kwenzeka ngokukhethekileyo kwabo baphilayo “xa uNyana womntu efika” esemandleni oBukumkani, ixesha elaqala ngowe-1914.—Luka 18:8.a

4. Yintoni awaqala wayixubusha uYesu ngaphambi kokuba abalise umzekeliso okuLuka isahluko 18?

⁴ Ngaphambi kokwenza lo mzekeliso, uYesu wachaza ukuba ubungqina bokubakho kwakhe esemandleni oBukumkani babuya kubonakala ngokucacileyo “njengokuba umbane” “ukhanya ukususela kwenye inxalenye ephantsi kwezulu ukusa kwenye inxalenye ephantsi kwezulu.” (Luka 17:24; 21:10, 29-33) Sekunjalo, inkoliso yabantu abaphila ‘kwixesha lesiphelo’ babengayi kunikela ngqalelo kobo bungqina bucacileyo. (Daniyeli 12:4) Yintoni ebangela oko? Isizathu sinye seso sabantu bomhla kaNowa noLote abazibetha ngoyaba izilumkiso zikaYehova. Ngaloo mihla, abantu ‘babesidla, besela, bethenga, bethengisa, betyala yaye besakha de kwafika imini abatshatyalaliswa ngawo.’ (Luka 17:26-29) Bafa ngenxa nje yokubanjwa zezo zinto de abanikela ngqalelo ekuthandeni kukaThixo. (Mateyu 24:39) Nanamhlanje abantu baxakeke zizinto zamihla le kangangokuba ababuboni ubungqina bokuba sikufuphi isiphelo seli hlabathi labantu abangahloneli uThixo.—Luka 17:30.

5. (a) Ngoobani ababelunyukiswa nguYesu, ngoba? (b) Yintoni ebangele ukuba abanye baphelelwe lukholo?

⁵ Kucacile ukuba, uYesu wayexhalabele ukuba nabalandeli bakhe babenokuphazanyiswa lihlabathi likaSathana, de abanye ‘babuyele kwizinto ezisemva.’ (Luka 17:22, 31) Ibe ngokwenene kuye kwanjalo kwamanye amaKristu. Kangangeminyaka ebelinde ukufika kwemini uYehova aya kuphelisa ngayo eli hlabathi lingendawo. Kodwa, yathi yakungafiki ngexesha awayeyilindele ngalo iArmagedon, atyhafa. Yaphela intembelo yokuba kufuphi kwemini yomgwebo kaYehova kuwo. Ayekelela umxakatho kubulungiseleli aza agqibela ngokuxakeka zizinto zobu bomi ade akabi nalo ixesha lezinto zokomoya. (Luka 8:11, 13, 14) Ethubeni, ‘abuyela kwizinto ezisemva’—nto leyo ibuhlungu gqitha!

Imfuneko ‘Yokusoloko Sithandaza’

6-8. (a) Chaza umzekeliso womhlolokazi nomgwebi. (b) UYesu wawucacisa njani lo mzekeliso?

⁶ Yintoni esinokuyenza ukuqinisekisa ukuba sihlala sinentembelo ekuzalisekeni kwezithembiso zikaYehova? (Hebhere 3:14) UYesu waphendula loo mbuzo emva nje kokuba elumkise abafundi bakhe ngokubuyela kwihlabathi elingendawo likaSathana.

⁷ ULuka unikela ingxelo yokuba uYesu “wabenzela umzekeliso ngokubhekisele kwimfuneko yokuba basoloko bethandaza bangayeki.” Wathi: “Kwisixeko esithile kwakukho umgwebi owayengamoyiki uThixo, engahloneli mntu. Kodwa kwakukho umhlolokazi kweso sixeko owayehlala esiya kuye, esithi, ‘Qinisekisa ukuba umthetho uphumeza okusesikweni nxamnye notshaba lwam.’ Kwaba mzuzu engavumi, kodwa kamva waqiqa ngelithi, ‘Nangona ndingamoyiki uThixo, ndingahloneli namntu, noko ke, ngenxa yokuba lo mhlolokazi eqhubeka endikhathaza, ndiza kuqinisekisa ukuba okusesikweni kuyaphunyezwa khon’ ukuze angahlali esiza aze andiqobe andigqibe.’”

⁸ Emva kokwenza eli bali, uYesu wacacisa oko likutshoyo wathi: “Khanive okwathethwa ngumgwebi, engenabulungisa enjalo! Ngokuqinisekileyo, ngoko, akayi kuthi na uThixo abangele ukuba okusesikweni kwenziwe kwabo banyuliweyo bakhe abadanduluka kuye imini nobusuku, kwanakuba enokuzeka kade umsindo ngabo? Ndithi kuni, Uya kubangela ukuba okusesikweni kwenziwe kubo ngokukhawuleza. Noko ke, xa uNyana womntu efika, uya kulufumana ngokwenene na ukholo emhlabeni?”—Luka 18:1-8.

“Qinisekisa Ukuba Umthetho Uphumeza Okusesikweni”

9. Yiyiphi eyona ngongoma yomzekeliso womhlolokazi nomgwebi?

⁹ Icace gca eyona ngongoma yalo mzekeliso. Bobabini abantu abakulo mzekeliso bayayikhankanya kuquka uYesu. Umhlolokazi wabongoza wathi: “Qinisekisa ukuba umthetho uphumeza okusesikweni.” Umgwebi wathi: “Ndiza kuqinisekisa ukuba okusesikweni kuyaphunyezwa.” Yena uYesu wabuza: “Akayi kuthi na uThixo abangele ukuba okusesikweni kwenziwe?” Ibe xa ethetha ngoYehova, uYesu wathi: “Uya kubangela ukuba okusesikweni kwenziwe kubo ngokukhawuleza.” (Luka 18:3, 5, 7, 8) Kunini apho uThixo eya ‘kubangela ukuba okusesikweni kwenziwe’ ngokukhethekileyo?

10. (a) Kwaphunyezwa nini okusesikweni ngenkulungwane yokuqala? (b) Kuya kuphunyezwa nini okusesikweni kubantu bakaThixo namhlanje?

¹⁰ Kwinkulungwane yokuqala, “imihla yokuphunyezwa kokusesikweni” (okanye, “imihla yempindezelo,” ngokweKingdom Interlinear) yafika ngowama-70 C.E. xa kwatshatyalaliswa iYerusalem netempile yayo. (Luka 21:22) Kubantu bakaThixo namhlanje, okusesikweni kuya kwenziwa ‘kwimini enkulu kaYehova.’ (Zefaniya 1:14; Mateyu 24:21) Ngelo xesha, uYehova uya ‘kubabuyekeza ngembandezelo abo babandezela’ abantu bakhe ‘kanye njengokuba [uYesu Kristu] eya kubaphindezela abo bangamaziyo uThixo nabo bangazithobeliyo iindaba ezilungileyo ezingeNkosi yethu uYesu.’—2 Tesalonika 1:6-8; Roma 12:19.

11. Yiyiphi indlela okuya kuphunyezwa “ngokukhawuleza” ngayo okusesikweni?

¹¹ Noko ke, simele sisiqonde njani isiqinisekiso sikaYesu sokuba uYehova uya kubangela ukuba okusesikweni kuphunyezwe “ngokukhawuleza”? ILizwi likaThixo libonisa ukuba “kwanakuba [uYehova] enokuzeka kade umsindo,” uya kukhawulezisa ukwenza okusesikweni xa kufika ixesha loko. (Luka 18:7, 8; 2 Petros 3:9, 10) Ngexesha likaNowa, xa kwafika uMkhukula, abangendawo batshatyalaliswa ngokukhawuleza. Nangomhla kaLote, xa kwana umlilo uvela emazulwini, abangendawo batshayelwa. UYesu wathi: “Kuya kuba njalo kanye ngemini yokutyhileka koNyana womntu.” (Luka 17:27-30) Abangendawo baza kuphinda bafikelwe ‘yintshabalalo yequbuliso.’ (1 Tesalonika 5:2, 3) Ewe, simele siqiniseke ukuba uYehova akayi kulivumela eli hlabathi likaSathana ukuba lihlale likho nokuba lusuku nje olunye ngaphezu kwexesha elifanelekileyo lokusesikweni.

“Uya Kubangela Ukuba Okusesikweni Kwenziwe”

12, 13. (a) Lo mzekeliso kaYesu usifundisa siphi isifundo? (b) Kutheni siqiniseka nje ukuba uYehova uya kuyiphulaphula imithandazo yethu aze abangele okusesikweni kwenziwe?

¹² Lo mzekeliso kaYesu uphinda uveze enye inyaniso ebalulekileyo. Echaza indlela osebenza ngayo lo mzekeliso, uYesu wathi: “Khanive okwathethwa ngumgwebi, engenabulungisa enjalo! Ngokuqinisekileyo, ngoko, akayi kuthi na uThixo abangele ukuba okusesikweni kwenziwe kwabo banyuliweyo bakhe?” Kakade, uYesu wayengathelekisi uYehova nalo mgwebi ngokungathi uThixo wayeza kubaphatha ngendlela efanayo abakhonzi bakhe. Kunoko, uYesu wafundisa abalandeli bakhe isifundo ngoYehova ebalaselisa umahluko ophakathi komgwebi noThixo. Ziziphi ezo ndlela bangafani ngazo?

¹³ Umgwebi okumzekeliso kaYesu ‘wayengenabulungisa,’ ngoxa yena “uThixo nguMgwebi olilungisa.” (INdumiso 7:11; 33:5) Lo mgwebi wayengenaxesha lakhe kwaphela loo mhlolokazi, kodwa yena uYehova unomdla kumntu ngamnye. (2 Kronike 6:29, 30) Umgwebi wayengafuni ukumnceda loo mhlolokazi, kodwa yena uYehova uyafuna—ewe, uyakulangazelela ukunceda abo bamkhonzayo. (Isaya 30:18, 19) Sifunda ntoni koku? Ukuba umgwebi ongelolungisa waziphulaphula izicelo zomhlolokazi waza wenza okusesikweni, kobeka phi ke kuYehova ukuphulaphula imithandazo yabantu bakhe aze nakanjani na abangele okusesikweni kwenziwe ngenxa yabo?—IMizekeliso 15:29.

14. Kutheni singamele siphelelwe lukholo ekufikeni kwemini yomgwebo kaThixo?

¹⁴ Xa kunjalo, abo baphelelwa lukholo ekufikeni kwemini kaThixo yomgwebo benza impazamo enkulu. Ngoba? Enyanisweni, ngokunikezela kwabo kukholo lokuba “imini enkulu kaYehova” ikufuphi, bathandabuza into yokuba uYehova ufanele ukuthenjwa njengogcina izithembiso zakhe. Akukho namnye omele athandabuze ukunyaniseka kukaThixo. (Yobhi 9:12) Umbuzo obalulekileyo ngulo, Ngaba thina siya kuhlala sithembekile? Ibe yiloo nto kanye eyaphakanyiswa nguYesu xa ephetha umzekeliso wakhe womhlolokazi nomgwebi.

“Uya Kulufumana Ngokwenene Na Ukholo Emhlabeni?”

15. (a) Nguwuphi umbuzo owabuzwa nguYesu, ngasiphi isizathu? (b) Yintoni esimele sizibuze yona?

¹⁵ UYesu wabuza lo mbuzo ubangela umdla: “Xa uNyana womntu efika, uya kulufumana ngokwenene na ukholo emhlabeni?” (Luka 18:8) Apha uYesu wayengabhekiseli kulo naluphi na ukholo, kodwa wayethetha ngokholo olufana nolo lomhlolokazi. UYesu wawushiya engawuphendulanga loo mbuzo. Wawubuza ngenjongo yokuba abafundi bakhe bacingisise nzulu ngohlobo lokholo abanalo. Ngaba lwalusiba buthathaka, ngoko bengena engozini yokubuyela kwizinto ababezishiye ngasemva? Okanye babenokholo olufana nolwaloo mhlolokazi? Nathi namhlanje, simele sizibuze, ‘Lunjani ukholo olufunyanwa “nguNyana womntu” entliziyweni yam?’

16. Umhlolokazi wayenokholo olunjani?

¹⁶ Ukuze sibe phakathi kwabo baza kuzuza okusesikweni kukaYehova, kufuneka sixelise loo mhlolokazi. Lunjani ukholo awayenalo? Wabonisa ukholo ngokuzingisa ‘ehlala esiya [kumgwebi], esithi, “Qinisekisa ukuba umthetho uphumeza okusesikweni.”’ Loo mhlolokazi wazingisa ukuze afumane okusesikweni kumntu ongelolungisa. Nabakhonzi bakaThixo namhlanje bamele baqinisekise ukuba baya kufumana okusesikweni kuYehova—kwanokuba oko kwenzeka emva kwexesha elide kunokuba bebelindele. Ukongezelela, babonisa intembelo abanayo kwizithembiso zikaThixo ngokuzingisa bethandaza—ewe, ‘ngokudanduluka kwabo kuYehova imini nobusuku.’ (Luka 18:7) Enyanisweni, ukuba umKristu ebenokuyeka ukuthandazela ukuba okusesikweni kwenziwe, ebeya kuba ubonisa ukuphelelwa yintembelo kwinto yokuba uYehova uza kubahlangula abakhonzi bakhe.

17. Ziziphi izizathu esinazo zokuzingisa emthandazweni nokuhlala sinokholo olomeleleyo lokufika kwemini yomgwebo kaYehova?

¹⁷ Ezinye iimeko zaloo mhlolokazi zibonisa ukuba sinezizathu ezingakumbi zokuzingisa emthandazweni. Khawucinge ngezinto eyahluke ngazo imeko yethu kweyakhe. Lo mhlolokazi wahlala esiya kumgwebi nakuba kwakungekho mntu umana emkhuthaza ukwenjenjalo, kodwa thina iLizwi likaThixo lisikhuthaza ngamandla ukuba ‘sizingise emthandazweni.’ (Roma 12:12) Wayengenasiqinisekiso sokuba ziya kuviwa izicelo zakhe, kodwa thina uYehova usiqinisekisa ukuba uya kuqinisekisa ukuba okusesikweni kuyenziwa. Ngomprofeti wakhe, uYehova wathi: “Kwanokuba unokulibala, hlala uwulindile; kuba uya kuba yinyaniso nakanjani na. Awuyi kufika emva kwexesha.” (Habhakuki 2:3; INdumiso 97:10) Umhlolokazi wayengenabani unokumncedisa ekubongozeni ukuze sibe namandla eso sicelo sakhe. Thina sinaye umncedi onamandla, uYesu, “okwisandla sasekunene sikaThixo, nosibongozelayo.” (Roma 8:34; Hebhere 7:25) Ngoko ke, ukuba phezu kwabo nje ubunzima awayekubo loo mhlolokazi waqhubeka ebongoza loo mgwebi enethemba lokuba uya kwenzelwa okusesikweni, thina simele sibe nokholo ngakumbi kwisiqinisekiso sokuba nakanjani na iza kufika imini yomgwebo kaYehova!

18. Umthandazo uya kulomeleza njani ukholo lwethu uze usincede sifumane okusesikweni?

¹⁸ Lo mzekeliso usifundisa ukuba ukholo nomthandazo zizinto ezihamba kunye yaye ukuzingisa kwethu emthandazweni kunokusinceda xa ukholo lwethu lusiba buthathaka. Noko ke, oku akuthethi kuthi ukuguqa nje sithandaze kuya kusinceda sihlale sinokholo. (Mateyu 6:7, 8) Xa sithandaza kuba siqonda ukuba sixhomekeke kuThixo, imithandazo yethu isisondeza kuye lutsho lomelele nokholo lwethu. Yaye ekubeni kufuneka ukholo ukuze sisindiswe, iyaqondakala into yokuba uYesu wabona kuyimfuneko ukukhuthaza abafundi bakhe ukuba “basoloko bethandaza bangayeki”! (Luka 18:1; 2 Tesalonika 3:13) Yinyaniso kona ukuba, ukuza ‘kwemini enkulu kaYehova’ akuxhomekekanga kwimithandazo yethu—iya kufika enoba siyathandaza okanye akunjalo. Kodwa yona into yokuba siya kufumana okusesikweni size sisindiswe kwimfazwe kaThixo okanye kungabi njalo ixhomekeke kukholo esinalo nokuzingisa kwethu emthandazweni.

19. Sibunikela njani ubungqina bokuba sikholelwa ngokupheleleyo ukuba uThixo uza “kubangela ukuba okusesikweni kwenziwe”?

¹⁹ Njengoko sikhumbula, uYesu wabuza oku: “Xa uNyana womntu efika, uya kulufumana ngokwenene na ukholo emhlabeni?” Ithini impendulo kulo mbuzo ubangel’ umdla? Akukho nto isivuyisa njengokwazi ukuba emhlabeni wonke namhlanje kukho izigidi zabakhonzi abathembekileyo bakaYehova eziye zangqina ngemithandazo, umonde nokunyamezela kwazo ukuba zinalo olu kholo! Ngoko ke, umbuzo kaYesu unokuphendulwa ngomzimba ongenaxhala. Ewe, phezu kwako nje ukungabikho kokusesikweni esikufumana kweli hlabathi likaSathana, sikholelwa ngokupheleleyo ukuba uThixo uza ‘kubangela ukuba okusesikweni kwenziwe kwabo banyuliweyo bakhe.’

[Umbhalo osemazantsi]

Uyakhumbula Na?

• Yintoni ebangele ukuba amanye amaKristu aphelelwe lukholo?

• Kutheni sinokuba nokholo ngokupheleleyo ekufikeni kwemini yomgwebo kaYehova?

• Ziziphi izizathu ezenza sizingise emthandazweni?

• Ukuzingisa emthandazweni kuya kusinceda njani singaphelelwa lukholo?

[Umfanekiso okwiphepha 26]

Yiyiphi eyona ngongoma yomzekeliso womhlolokazi nomgwebi?

[Imifanekiso ekwiphepha 29]

Namhlanje kukho izigidi ezikholelwa ngokupheleleyo ukuba uThixo uza “kubangela ukuba okusesikweni kwenziwe”