Ukubaluleka Kokuthandaza Nokuthobeka

UYesu ebesele ebenzele umzekelo abafundi bakhe obonisa ukubaluleka kokuba baqhubeke bethandaza bangancami. (Luka 11:5-13) Mhlawumbi ngoku useSamariya okanye useGalili ibe nalapho uphinda akubethelele ukubaluleka kokungapheli mandla ekuthandazeni. Le nto uyenza ngomnye umzekelo, uthi:

“Kwesinye isixeko kwakukho ijaji eyayingamoyiki uThixo, ingabakhathalelanga nabantu. Kwakukho nomhlolokazi owayehlala esiya kuyo, esithi, ‘Ndicela undikhulule kulo mntu undimangalelayo.’ Kwadlula ixesha elide ingavumi ukumnceda, kodwa emva kwexesha yathi entliziyweni, ‘Nangona ndingamoyiki uThixo, ndingabakhathalelanga nabantu, ndiza kumkhulula lo mhlolokazi kulo mntu, kuba equqa ebuyelela, ukuze ayeke ukuza apha, endidika.’”​—Luka 18:2-5.

UYesu uwucacisa athi lo mzekelo: “Andithi niyivile ukuba yathini le jaji, nangona ingelolungisa? Ngokuqinisekileyo ke, uThixo uza kubalinda ngomonde, aze abancede abantu bakhe abakhethileyo, abakhalela kuye imini nobusuku.” (Luka 18:6, 7) UYesu uthetha ukuthini ngoTata wakhe?

Akathethi ukuba uYehova uThixo ufana nale jaji ingenabulungisa. Into ayithethayo kukuba: Ukuba ijaji engumntu nengenabulungisa iyakwazi ukumnceda umntu xa engancami, kubekiselaphi ke ngoThixo. Ulilungisa kwaye ulungile ngoko uza kubanceda abantu bakhe xa beqhubeka bethandaza, bengancami. Loo nto siyibona kwenye into ayithethayo, uthi: “Ndithi kuni, [uThixo] uza kubanceda ngokukhawuleza.”​—Luka 18:8.

Abantu abangathathi ntweni nabahluphekayo badla ngokungabenzelwa ubulungisa kuba kukhethwa abantu abakwizikhundla eziphezulu nabanemali. Kodwa uThixo yena akakho njalo. Ngexesha lakhe uza kuqiniseka ukuba bayohlwaywa abantu abenza izinto ezimbi aze anike abakhonzi bakhe ubomi obungunaphakade.

Ngoobani abanokholo olufana nolwalo mhlolokazi? Bangaphi abantu abakholelwa nyhani ukuba uThixo “uza kubanceda ngokukhawuleza”? UYesu usandokwenza umzekelo ofundisa ukubaluleka kokungayeki ukuthandaza. Ngoku, ufundisa ukubaluleka kokuba abantu babe nokholo kumandla omthandazo, uthi: “Baza kube bekhona na abantu abanokholo olunje emhlabeni xa uNyana womntu ebuya?” (Luka 18:8) Uthetha ukuba abantu basenokungabi nalo ukholo olunje xa uKristu efika.

Abanye abantu abammameleyo baqinisekile ngokholo lwabo. Bazithembile ukuba bangamalungisa kodwa babe bebajongela phantsi abanye abantu. UYesu ubenzela lo mzekelo abo bantu:

“Kwakukho amadoda amabini awenyuka eyokuthandaza etempileni; enye yayingumFarisi, enye ingumqokeleli werhafu. Le ingumFarisi yema, yathandaza entliziyweni isithi, ‘Owu Thixo, ndiyabulela kuba ndingekho njengabanye abantu, abangabaphangi, abantu abangengomalungisa, abakrexezi, okanye abanjengalo mqokeleli werhafu. Ndizila ukutya kabini ngeveki; ndinikela isishumi sayo yonke into endiyifumanayo.’”​—Luka 18:10-12.

AbaFarisi badume ngokuzibonakalisa kwiindawo ezinabantu ukuba bona bangamalungisa. Le nto bayenza kuba befuna ukuthandwa ngabantu. Iintsuku abadla ngokuzila ngazo ukutya iba nguMvulo noLwesine, kuba ngezi ntsuku kudla ngokuxakeka kwiindawo ekuthengiswa kuzo, kubekho abantu abaninzi abanokubabona. Abakuphosi nokukhupha isishumi semifuno nokuba mincinci kangakanani loo mifuno. (Luka 11:42) Kwiinyanga ezimbalwa ezidlulileyo, baye babonisa indlela ababacaphukela ngayo abantu abaqhelekileyo. Bathe: “Aba bantu bangawaziyo uMthetho [ngokwendlela abaFarisi abawubona ngayo] baqalekisiwe.”​—Yohane 7:49.

UYesu uqhubeka nomzekelo wakhe, uthi: “Kodwa le ingumqokeleli werhafu yema kude, ingakwazi nokuphakamisa amehlo ijonge phezulu, izibetha esifubeni isithi, ‘Owu Thixo, ndicela undenzele inceba, kuba ndingumoni.’” Le ndoda ingumqokeleli werhafu iyazithoba ize ivume ukuba iyona. UYesu uwugqibezela ngokuthi lo mzekelo: “Ndithi kuni, le ndoda yagoduka ililungisa ngaphezu kwalo mFarisi; kuba wonke umntu oziphakamisayo uza kuthotywa, nalowo uzithobayo uza kuphakanyiswa.”​—Luka 18:13, 14.

Ngala mazwi uYesu ubonisa ukubaluleka kokuthobeka. Eli cebiso labanceda abafundi bakhe ababekhule phakathi kwabaFarisi abazenza amalungisa nababefundisa ukuthanda izikhundla. Liyabanceda nabalandeli bakaYesu namhlanje.