Uze “Uzaliswe Luvuyo Kuphela”

“Wowubhiyozela . . . umthendeleko lowo kaYehova . . . , uzaliswe luvuyo kuphela.”—DUTERONOMI 16:15.

1. (a) Ngawaphi amabango awenziwa nguSathana? (b) Sisiphi isiprofeto esenziwa nguYehova emva kwemvukelo ka-Adam noEva?

XA USATHANA wayentlokothisa uAdam noEva ukuba bavukele uMdali wabo, wavusa imbambano ngemiba emibini ebalulekileyo. Okokuqala, watyhola uYehova ngokungabi nanyaniso nangokulawula ngendlela engafanelekanga. Okwesibini, wayitsho into yokuba abantu bakhonza uThixo kuba begxeleshe amaqithiqithi athile. Eli lesibini ibango walikhupha latsola ngexesha likaYobhi. (Genesis 3:1-6; Yobhi 1:9, 10; 2:4, 5) Noko ke, uYehova akazange alibazise ukusingatha lo mcimbi. Besekumyezo wase-Eden njalo ooAdam noEva, uYehova waprofeta echaza indlela aza kuwaphendula ngayo la mabango. Wachaza ukuba kwakuza kubakho ‘imbewu’ eyayiza kuthi, emva kokuba yenzakaliswe esithendeni, yona ityumze intloko kaSathana.—Genesis 3:15.

2. Yiyiphi inkcazelo awayikhuphayo uYehova ngokuphathelele inzaliseko yesiprofeto esikwiGenesis 3:15?

² Ekuhambeni kwethuba, uYehova waman’ ukuzidandalazisa iinkcukacha zeso siprofeto, ngaloo ndlela ebonisa ukuba ngokwenene sasiza kuzaliseka. Ngokomzekelo, uThixo waxelela uAbraham ukuba “imbewu” yayiza kuvela kwinzala yakhe. (Genesis 22:15-18) Kumzukulwana ka-Abraham onguYakobi kwaphuma izizwe zakwaSirayeli ezili-12. Ngowe-1513 B.C.E., xa ezo zizwe zaba luhlanga, uYehova wakhupha imithetho eyayiquka imithendeleko eliqela eyayiza kuqhutywa minyaka le. Umpostile uPawulos wathi loo mithendeleko ‘yayisisithunzi sezinto ezizayo.’ (Kolose 2:16, 17; Hebhere 10:1) Yayibonisa indlela izinto ezaziza kwenzeka ngayo xa kuphunyezwa injongo kaYehova ngeMbewu. Ukubhiyozela le mithendeleko kwakubangela uvuyo olungathethekiyo kwaSirayeli. Ukholo lwethu luya kuqina nangakumbi kwizithembiso zikaYehova xa sinokukhe siyivandlakanye.

Imbewu Iyavela

3. Yayingubani iMbewu ethenjisiweyo, yaye isithende sayo satyunyuzwa njani?

³ Kwiminyaka engaphezu kwama-4 000 emva kokuba uYehova eprofete okokuqala, iMbewu yavela. YayinguYesu. (Galati 3:16) Ekubeni uYesu wayefezekile, wakwazi ukuhlala egqibelele de kwasa ekufeni, waza ngaloo ndlela wabonisa ukuba uSathana wayexoka xa wayesenza amabango akhe. Ukongezelela koko, ekubeni uYesu wayengenasono, ukufa kwakhe kwaba lidini elixabiseke kakhulu. Ngokufa kwakhe, uYesu wakhulula inzala ethembekileyo ka-Adam noEva esonweni nasekufeni. Ukufa kukaYesu kwisibonda sentuthumbo ‘yayikukutyunyuzwa kwesithende’ seMbewu ethenjisiweyo.—Hebhere 9:11-14.

4. Lafuziselwa njani idini likaYesu?

⁴ UYesu wafa ngoNisan 14, 33 C.E.a KwaSirayeli uNisan 14 wayelusuku lwemivuyo kuba kwakubhiyozelwa iPasika. Ngolo suku, minyaka le iintsapho zazisenza isidlo esasiquka imvana engenasiphako. Ngale ndlela zazikhumbula indima eyaphunyezwa ligazi lemvana ekuhlangulweni kwamazibulo amaSirayeli xa ingelosi yayibulala amazibulo amaYiputa ngoNisan 14, 1513 B.C.E. (Eksodus 12:1-14) Imvana yePasika yayifuzisela uYesu, awathetha wenjenje ngaye uPawulos: “UKristu ipasika yethu ubingelelwe.” (1 Korinte 5:7) Njengegazi lemvana yePasika, igazi likaYesu liza nosindiso kwabaninzi.—Yohane 3:16, 36.

‘Intlahlela Yabafileyo’

5, 6. (a) UYesu wavuswa nini ekufeni, ibe loo nto yafuziselwa njani kuMthetho? (b) Ukuvuswa kukaYesu kwayenza yazaliseka njani iGenesis 3:15?

⁵ Ngosuku lwesithathu, uYesu wavuswa ekufeni ukuze asondeze ixabiso ledini lakhe kuYise. (Hebhere 9:24) Ukuvuswa kwakhe kwafuziselwa ebudeni bomnye umthendeleko. Kusuku olulandela uNisan 14 kwakuqalisa uMthendeleko Wamaqebengwana Angenagwele. Ngosuku olulandela olo, ngoNisan 16, amaSirayeli ayesiza nesithungu sentlahlela yesivuno serhasi, isivuno sokuqala kwaSirayeli, asinike umbingeleli ukuze asitshangatshangise phambi koYehova. (Levitikus 23:6-14) Kwakufaneleke ngokwenene ukuba ngonyaka wama-33 C.E., ngolo suku kanye, uYehova akatyise imizamo yolunya kaSathana yokulicim’ igama naphakade “ingqina elithembekileyo neliyinyaniso”! NgoNisan 16, 33 C.E., uYehova wavusa uYesu kwabafileyo ukuze aphile kumzimba womoya.—ISityhilelo 3:14; 1 Petros 3:18.

⁶ UYesu waba ‘yintlahlela kwabalele ekufeni.’ (1 Korinte 15:20) Ngokwahlukileyo kwabo babekhe bavuswa ngaphambili, uYesu akazange afe kwakhona. Kunoko, wanyukela ezulwini waza wahlala ngasekunene kukaYehova, apho wayeza kulinda khona de athweswe njengoKumkani woBukumkani basezulwini. (INdumiso 110:1; IZenzo 2:32, 33; Hebhere 10:12, 13) Ukususela oko uYesu wathi wathweswa njengoKumkani, unokukwazi ukutyumza intloko yotshaba olukhulu, uSathana, alutshabalalise luphele tu, lona nembewu yalo.—ISityhilelo 11:15, 18; 20:1-3, 10.

Amalungu Angakumbi Embewu Ka-Abraham

7. Wawuyintoni uMthendeleko Weeveki?

⁷ UYesu wayeyiMbewu eyayithenjiswe e-Eden eyayiza kusetyenziswa nguYehova ukuze ‘achithe imisebenzi kaMtyholi.’ (1 Yohane 3:8) Noko ke, xa uYehova wayethetha noAbraham, wabonisa ukuba “imbewu” ka-Abraham yayingayi kuba ngumntu omnye nje kuphela. Yayiza kuba “njengeenkwenkwezi zasemazulwini nanjengentlabathi eselunxwemeni lolwandle.” (Genesis 22:17) Ukuvela kwamanye amalungu ‘embewu’ kwafuziselwa ngomnye umthendeleko owawubangela uvuyo. Kwiintsuku ezingama-50 emva koNisan 16, uSirayeli wayebhiyozela uMthendeleko Weeveki. UMthetho wawusithi: “Nifanele nibale iintsuku ezingamashumi amahlanu, ukusa kusuku lwasemva kwesabatha yesixhenxe, yaye nimele nisondeze umnikelo wokudla okuziinkozo ezintsha kuYehova. Nize nizise izonka ezibini zomnikelo otshangatshangiswayo ezivela kwiindawo enihlala kuzo. Zifanele zibe zezezahlulo ezibini zesishumi se-efa yomgubo ocolekileyo. Ziya kubhakwa zinegwele, zibe yintlahlela kuYehova.”b—Levitikus 23:16, 17, 20.

8. Sisiphi isiganeko esibalaseleyo esenzeka ngePentekoste yowama-33 C.E.?

⁸ Xa uYesu wayelapha emhlabeni, uMthendeleko Weeveki wawusaziwa ngokuba yiPentekoste (gama elo ngesiGrike elithetha “owamashumi amahlanu”). NgePentekoste yowama-33 C.E., uMbingeleli Omkhulu, uYesu Kristu owayesele evusiwe ekufeni, wathulula umoya oyingcwele phezu kweqela labafundi abali-120 ababehlanganisene eYerusalem. Ngenxa yoko, abo bafundi baba ngoonyana abathanjisiweyo bakaThixo nabazalwana bakaYesu Kristu. (Roma 8:15-17) Baba luhlanga olutsha, “uSirayeli kaThixo.” (Galati 6:16) Lwaqalisa kancinane olo hlobo ke olu hlanga, de ekugqibeleni lwaya kutsho kwi-144 000.—ISityhilelo 7:1-4.

9, 10. Ibandla lamaKristu athanjisiweyo lalifuziselwa njani ngePentekoste?

⁹ Ibandla lamaKristu athanjisiweyo lalifuziselwa zizonka ezibini ezazitshangatshangiswa phambi koYehova rhoqo ngePentekoste. Isibakala sokuba ezo zonka zazinegwele sasibonisa ukuba amaKristu athanjisiweyo ayeseza kuqhubeka enegwele lesono asizuze ilifa. Noko ke, ayenako ukusondela kuYehova ngesizinzi sedini lentlawulelo likaYesu. (Roma 5:1, 2) Kutheni kwakusetyenziswa izonka ezibini nje? Kusenokwenzeka ukuba loo nto yayibonisa ukuba ekugqibeleni oonyana abathanjisiweyo bakaThixo babeza kuthathwa kumaqela amabini—kwakuza kuqalwa ngamaYuda omthonyama kuze kulandele abeeNtlanga.—Galati 3:26-29; Efese 2:13-18.

¹⁰ Izonka ezibini ezazinikelwa ngePentekoste zazisenziwa ngentlahlela yesivuno sengqolowa. Ngendlel’ efanayo ke, namaKristu azelwe ngomoya abizwa ngokuba “ziintlahlela ezithile zezidalwa zakhe.” (Yakobi 1:18) Angawokuqala ukuxolelwa izono ngegazi elaphalalayo likaYesu, ibe loo nto iwenza akwazi ukunikwa ubomi bokungafi ezulwini, apho aya kulawula noYesu eBukumkanini bakhe. (1 Korinte 15:53; Filipi 3:20, 21; ISityhilelo 20:6) Ekubeni ekweso sigxina, kungekudala aza “kubalusa abantu [iintlanga] ngentonga yentsimbi” aze ‘atyumze uSathana phantsi kweenyawo zawo.’ (ISityhilelo 2:26, 27; Roma 16:20) Umpostile uYohane wathi: “Aba ngabo bahlala beyilandela iMvana kungakhathaliseki apho iya khona. Aba bathengwa phakathi koluntu njengeentlahlela kuThixo nakuyo iMvana.”—ISityhilelo 14:4.

Umhla Obalaselisa Intlangulo

11, 12. (a) Yintoni eyayisenzeka ngoMhla Wocamagusho? (b) Ziziphi iingenelo ezazifunyanwa nguSirayeli kumadini enkunzi neebhokhwe?

¹¹ Ngomhla weshumi kwinyanga kaEthanim (ethe kamva yabizwa ngokuba nguTishri),c uSirayeli wayebhiyozela umthendeleko owawufuzisela indlela ezaziya kufumaneka ngayo iingenelo zentlawulelo kaYesu. Ngolo suku, uMhla Wocamagusho, lonke uhlanga lwaluhlanganisana luze lunyuse imibingelelo yokucamagushela izono zawo.—Levitikus 16:29, 30.

¹² NgoMhla Wocamagusho, umbingeleli omkhulu wayexhela inkunzi entsha aze afefe igazi layo kasixhenxe phambi kwesigqubuthelo seTyeya kwEyona Ngcwele, ngaloo ndlela efuzisela ukunikelwa kwegazi kuYehova. Lowo yayiba ngumnikelo wezono wombingeleli omkhulu ‘nendlu yakhe,’ nababingeleli abangaphantsi kunye nabaLevi. Emva koko, umbingeleli omkhulu wayethatha iibhokhwe ezimbini. Enye wayeyixhela njengombingelelo wesono “ongowabantu.” Elinye kwigazi layo wayelifefa phambi kwesigubungelo seTyeya kwEyona Ngcwele. Emva koko, umbingeleli omkhulu wayebeka izandla zakhe phezu kwentloko yebhokhwe yesibini aze avume izono zoonyana bakaSirayeli. Wayesandula ke ayalele ukuba igxothwe loo bhokhwe isiwe ngasentlango, ngelifuziselayo isimka nezono zohlanga.—Levitikus 16:3-16, 21, 22.

13. Iziganeko zoMhla Wocamagusho zaziyifuzisela njani indima ephunyezwa nguYesu?

¹³ Iyonke le nto yayifuzisela ukusebenzisa koyena Mbingeleli Omkhulu, uYesu, ixabiso legazi lakhe ukuze kuxolelwe izono. Okokuqala, ixabiso legazi lisetyenziswa ‘kwindlu yokomoya’ yamaKristu athanjisiweyo ali-144 000, ibe liwenza akwazi ukugqalwa njengamalungisa kwaye abe nokuma okucocekileyo phambi koYehova. (1 Petros 2:5; 1 Korinte 6:11) Loo nto ifuziselwa lidini lenkunzi. Ngaloo ndlela kuvuleka ithuba lokuba afumane ilifa lawo lasezulwini. Okwesibini, ixabiso legazi likaYesu lisetyenziswa nakwizigidi zabanye abanokholo kuKristu, njengoko kuboniswa lidini lebhokhwe. Aba baza kusikelelwa ngobomi obungunaphakade apha emhlabeni, ilifa elalahlwa nguAdam noEva. (INdumiso 37:10, 11) UYesu usebenzisa igazi lakhe eliphaleleyo ukuze asuse izono kuluntu, kanye njengokuba ibhokhwe ephilayo ngelifuziselayo yayithwala izono zikaSirayeli iye nazo entlango.—Isaya 53:4, 5.

Ukuvuya Phambi KoYehova

14, 15. Yintoni eyayisenzeka ngoMthendeleko Weminquba, ibe yayiwakhumbuza ntoni amaSirayeli?

¹⁴ Emva koMhla Wocamagusho, amaSirayeli ayebhiyozela uMthendeleko Weminquba, owona mthendeleko wawusiba nemigcobo kunyaka wamaYuda. (Levitikus 23:34-43) Lo mthendeleko wawuqalisa ngomhla we-15 uye kutsho ngowama-21 kwinyanga kaEthanim ibe wawuqukunjelwa ngendibano eyayibakho ngolwama-22 kuloo nyanga. Wawuphawula isiphelo sokuhlanganiswa kwesivuno kwaye wawuba lixesha lokubulela ukulunga kukaThixo. Ngenxa yoko, uYehova wayalela abo babesiza kulo mthendeleko esithi: “UYehova uThixo wakho uya kukusikelela kuyo yonke imveliso yakho nakuko konke esikwenzayo isandla sakho, uzaliswe luvuyo kuphela.” (Duteronomi 16:15) Kumele ukuba kwakumnandi ngokwenene kulo mthendeleko!

¹⁵ Ebudeni balo mthendeleko, amaSirayeli ayehlala kwiminquba kangangeentsuku ezisixhenxe. Loo nto yayiwakhumbuza ukuba ngaxa lithile ayekhe ahlala eminqubeni xa ayesentlango. Lo mthendeleko wawuwanika ithuba elaneleyo lokucinga ngendlela uyise wawo, uYehova, awayewakhathalela ngayo. (Duteronomi 8:15, 16) Kwaye ekubeni bonke abantu, izityebi namahlwempu, babehlala kwiminquba efanayo, amaSirayeli ayekhumbula ukuba kulo mthendeleko, ayelingana onke.—Nehemiya 8:14-16.

16. Wawufuzisela ntoni uMthendeleko Weminquba?

¹⁶ UMthendeleko Weminquba wawungumbhiyozo owenzelwa isivuno, ibe wawufuzisela ukuhlanganiswa kwabo banokholo kuYesu Kristu. Ukuhlanganiswa kwabo kwaqala ngePentekoste yowama-33 C.E., xa abafundi bakaYesu abali-120 bathanjiswa ukuba babe yinxalenye “yobubingeleli obungcwele.” Kanye njengamaSirayeli awayehlala eminqubeni kangangeentsuku ezimbalwa, abathanjiswa bayazi ukuba ‘bangabemi bokwexeshana’ kweli hlabathi lingamhloneliyo uThixo. Banethemba lokuphila ezulwini. (1 Petros 2:5, 11) Oko kuhlanganiswa kwamaKristu athanjisiweyo kufikelela esiphelweni kule “mihla yokugqibela,” xa abokugqibela kwabali-144 000 behlanganiswa.—2 Timoti 3:1.

17, 18. (a) Yintoni ebonisa ukuba bakho nabanye abangenelwayo kwidini likaYesu ngaphandle kwamaKristu athanjisiweyo? (b) Ngoobani namhlanje abangenelwayo kuMthendeleko Weminquba womfuziselo, yaye umbhiyozo walo mthendeleko uya kuyifikelela nini incopho yawo?

¹⁷ Ebudeni balo mthendeleko wamandulo, kwakunikelwa iinkunzi ezingama-70. (Numeri 29:12-34) Eli nani lingama-70 limela isi-7 esiphindaphindwe nge-10, ibe eBhayibhileni la manani afuzisela ukugqibelela kwezinto zasezulwini nezasemhlabeni. Ngenxa yoko, idini likaYesu liya kuba yingenelo kwabathembekileyo abavela kuzo zonke iintsapho ezingama-70 zoluntu ezizalwa nguNowa. (Genesis 10:1-29) Ngenxa yoko ke, kweli xesha lethu, ukuhlanganiswa kwabantu kuye kwaquka nabantu bazo zonke iintlanga abanokholo kuYesu nabanethemba lokuphila kumhlaba oyiparadesi.

¹⁸ Umpostile uYohane wawubona embonweni lo msebenzi wokuhlanganisa abantu wenziwa kule mihla. Okokuqala, weva xa kwakusenziwa isaziso sokuba abokugqibela be-144 000 babetywiniwe. Emva koko wabona “isihlwele esikhulu, ekungekho mntu wakwaziyo ukusibala,” simi phambi koYehova noYesu, siphethe “amasebe esundu ezandleni zaso.” Esi sihlwele ‘siphuma embandezelweni enkulu’ size sidlulele kwihlabathi elitsha. Naso singabemi nje bexeshana kule nkqubo indala yezinto, kwaye sikhangele phambili kwixesha apho ‘iMvana iya kusalusa, ize isikhokelele emithonjeni yamanzi obomi.’ Ngelo xesha, “uThixo uya kuzisula zonke iinyembezi emehlweni abo.” (ISityhilelo 7:1-10, 14-17) UMthendeleko Weminquba womfuziselo uya kufikelela incopho yawo emva kokuphela koLawulo LukaKristu Lweminyaka Eliwaka xa isihlwele esikhulu, kunye nabo bavusiweyo, sifumana ubomi obungunaphakade.—ISityhilelo 20:5.

19. Singenelwa njani kwingxubusho engemithendeleko yakwaSirayeli?

¹⁹ Nathi sinako ‘ukuzaliswa luvuyo kuphela’ njengoko sicamngca ngentsingiselo yemithendeleko yamaYuda amandulo. Kubangel’ imincili ukucinga ukuba uYehova wayithi thsuphe kwase-Eden indlela awayeza kusizalisekisa ngayo isiprofeto sakhe, ibe kuyasichulumancisa ukusibona sizaliseka ngokuthe ngcembe. Namhlanje siyazi ukuba iMbewu sele ivelile nokuba sele ityunyuzwe isithende. Ngoku inguKumkani wasezulwini. Ukongezelela koko, inkoliso yabali-144 000 sele izingqinile ukuba ithembekile de kwasa ekufeni. Yintoni ke ekusafuneka yenziwe? Likufutshane kangakanani ixesha lokuba sizaliseke ngokupheleleyo esi siprofeto? Loo nto siza kuyihl’ amahlongwane kwinqaku elilandelayo.

[Imibhalo esemazantsi]

Ngaba Unokuchaza?

• Yayifuzisela ntoni imvana yePasika?

• Kukuphi ukuhlanganiswa kwabantu okwakufuziselwa nguMthendeleko WePentekoste?

• Ziziphi iinkalo zoMhla Wocamagusho ezazibonisa indlela elaliza kusebenza ngayo idini lentlawulelo likaYesu?

• Ukuhlanganiswa kwamaKristu kufuziselwa njani nguMthendeleko Weminquba?

[Isicangca esikwiphepha 22, 23]

(Ukuba ufuna inkcazelo ehlahlelwe kakuhle, yiya kwimpapasho)

Isiganeko: Oko Sasikufuzisela:

↑

Imihla engama-50

↓

[Imifanekiso ekwiphepha 21]

Njengegazi lemvana yePasika, igazi elaphalazwayo likaYesu liza nosindiso kwabaninzi

[Imifanekiso ekwiphepha 22]

Intlahlela yeziqhamo zesivuno serhasi eyayinikelwa ngoNisan 16 yayifuzisela uvuko lukaYesu

[Imifanekiso ekwiphepha 23]

Izonka ezibini ezazinikelwa ngePentekoste zazifuzisela ibandla lamaKristu athanjisiweyo

[Imifanekiso ekwiphepha 24]

UMthendeleko Weminquba wawufuzisela ukuhlanganiswa kwabathanjiswa ‘nesihlwele esikhulu’ esivela kuzo zonke iintlanga