Uloyiso Lonqulo Lokwenyaniso Luyasondela

“UYehova woba ngukumkani phezu kwehlabathi lonke.”—ZEKARIYA 14:9.

1. Yintoni eyenzekayo kumaKristu athanjisiweyo ebudeni beMfazwe Yehlabathi I, yaye kwaxelwa njani oku kwangaphambili?

EBUDENI bemfazwe yehlabathi yokuqala, amaKristu athanjisiweyo abandezeleka ngeendlela ezininzi nangokuvalelwa ezintolongweni ziintlanga ezazisilwa. Imibingelelo yawo yeendumiso kuYehova yabekelwa imiqathango ngeyona ndlela, yaye aba kwimeko yokuthinjwa ngokomoya. Konke oku kwaxelwa kwangaphambili kuZekariya 14:2, ochaza ngokuhlaselwa kweYerusalem ziintlanga ezininzi. Isixeko sesi siprofeto ‘yiYerusalem yasezulwini,’ uBukumkani bukaThixo basezulwini yaye buyindawo ‘enetrone kaThixo neyeMvana.’ (Hebhere 12:22, 28; 13:14; ISityhilelo 22:3) Abathanjiswa bakaThixo abasemhlabeni bangabameli beso sixeko. Ababethembekile phakathi kwabo basinda kuloo ntlaselo, bengavumi ukuthinjwa bemke “kweso sixeko.”a

2, 3. (a) Unqulo lukaYehova luye loyisa njani ukususela ngowe-1919? (b) Yintoni ebisenzeka ukususela ngowe-1935?

² Ngowe-1919 abathanjiswa abathembekileyo bakhululwa kwimeko ababekuyo yokuthinjwa, yaye abazange balibazise ekusebenziseni ixesha loxolo lasemva kwemfazwe. Njengoonozakuzaku beYerusalem yasezulwini, balixhakamfula ilungelo elizukileyo lokushumayela iindaba ezilungileyo zoBukumkani bukaThixo baze bancedise ekuhlanganiseni amalungu aseleyo e-144 000. (Mateyu 24:14; 2 Korinte 5:20) Ngowe-1931 amkela igama elifanelekileyo nelingokweZibhalo elithi amaNgqina kaYehova.—Isaya 43:10, 12.

³ Ukususela ngoko, amaNgqina kaThixo athanjisiweyo akazange ahlehle. Nkqu noHitler nentlangano yakhe yamaNazi akazange aphumelele ukuwaval’ umlomo. Nakuba ebetshutshiswa ehlabathini lonke, umsebenzi wawo uye wathwala isiqhamo emhlabeni wonke. Ngokukodwa ukususela kunyaka we-1935, aye athelelwa ‘sisihlwele esikhulu’ sezizwe ngezizwe, esaxelwa kwangaphambili kwincwadi yeSityhilelo. Naso singamaKristu azahluleleyo nabhaptiziweyo yaye siye ‘sayihlamba imiwunduzo yaso saza sayenza mhlophe egazini leMvana,’ uYesu Kristu. (ISityhilelo 7:9, 14) Noko ke, asingobathanjiswa, abanethemba lokuphila ezulwini. Ithemba laso kukuzuza njengelifa oko uAdam noEva bakulahlayo, oko kukuthi, ubomi obufezekileyo kumhlaba oyiparadisi. (INdumiso 37:29; Mateyu 25:34) Namhlanje, isihlwele esikhulu singabantu abangaphezu kwezigidi ezihlanu. Unqulo lokwenyaniso lukaYehova luyoyisa, kodwa uloyiso lwalo olupheleleyo luseza.

Iintlanga Kwitempile KaThixo Yokomoya

4, 5. (a) Isihlwele esikhulu simnqula siphi uYehova? (b) Ngawaphi amalungelo esiwanandiphayo, yaye oko kuzalisekisa siphi isiprofeto?

⁴ Njengoko kwakuxelwe kwangaphambili, isihlwele esikhulu ‘sinqula uThixo imini nobusuku etempileni yakhe.’ (ISityhilelo 7:15, bona umbhalo osemazantsi weNW.) Ekubeni singengomaSirayeli angababingeleli bokomoya, uYohane umele ukuba usibona simi etempileni kwintendelezo engaphandle yeeNtlanga. (1 Petros 2:5) Hayi indlela ezuke ngayo itempile kaYehova yokomoya, iintendelezo zayo zizaliswe yile ndimbane inkulu emdumisa ndawonye nentsalela yoSirayeli wokomoya!

⁵ Isihlwele esikhulu asimkhonzi uThixo kwimeko eyayifanekiselwa yintendelezo yababingeleli engaphakathi. Asivakaliswa singamalungisa ngenjongo yokusamkela njengoonyana bakaThixo bokomoya. (Roma 8:1, 15) Sekunjalo, ngokubonakalisa ukholo kwidini lentlawulelo likaYesu, sinokuma okuhle phambi koYehova. Sivakaliswa njengamalungisa khon’ ukuze sibe ngabahlobo bakhe. (Thelekisa uYakobi 2:21, 23.) Naso sinelungelo lokusondeza imibingelelo eyamkelekileyo kwisibingelelo sikaThixo sokomoya. Ngaloo ndlela, isiprofeto sikaIsaya 56:6, 7 sizaliseka ngendlela ezukileyo kwesi sihlwele sikhulu: “Oonyana bolunye uhlanga, abanamathele kuYehova, ukuze balungiselele kuye, balithande igama likaYehova, . . . ndobazisa entabeni yam engcwele, ndibavuyise endlwini yam yokuthandaza; amadini abo anyukayo nemibingelelo yabo yokholiseka esibingelelweni sam; kuba indlu yam kuya kuthiwa yindlu yokuthandaza ezizweni zonke.”

6. (a) Abantu basemzini banikela luhlobo luni lwemibingelelo? (b) Isitya samanzi esasikwintendelezo yababingeleli sibakhumbuza ngantoni?

⁶ Phakathi kwemibingelelo enikelwa ngabantu basemzini ‘sisiqhamo semilebe [esifana nomnikelo wokudla ocolwe kakuhle] eyenza uvakaliso lwasesidlangalaleni kwigama [likaThixo] neyenza okulungileyo ize yabelane ngezinto nabanye.’ (Hebhere 13:15, 16) Isitya esikhulu samanzi ababehlambela kuso ababingeleli sikwakhumbuza aba bantu basemzini ngokuthile okubalulekileyo. Nabo bamele bazithobe ekucocweni ngokomoya nangokuziphatha njengoko iLizwi likaThixo likhanya ngakumbi kubo.

INgcwele Nezinto Ezazikuyo

7. (a) Isihlwele esikhulu siwajonga njani amalungelo ababingeleli abangcwele? (b) Ngawaphi amalungelo angakumbi aye afunyanwa ngabathile kubantu basemzini?

⁷ Ngaba iNgcwele nezinto ezazikuyo zinentsingiselo kwesi sihlwele sikhulu sabantu basemzini? Asisayi kuze sibe kwindawo eyayifanekiselwa yiNgcwele. Asizalwa kwakhona njengoonyana bokomoya bakaThixo abangabemi basezulwini. Ngaba oku kusenza sibe nomona? Akunjalo. Kunoko, siyalivuyela ilungelo lokuxhasa intsalela ye-144 000, yaye siyixabisa ngokunzulu injongo kaThixo yokwamkela aba nyana bokomoya, abaya kuthelela uKristu ekwenzeni uluntu lufezeke. Kwakhona, isihlwele esikhulu sabantu basemzini siyaluvuyela ubabalo lukaThixo lokusinika ithemba lasemhlabeni lobomi obungunaphakade eParadisi. Bambi kwaba bantu basemzini, njengamaNethini akudala, baye banikwa amalungelo okongamela ekuncediseni ababingeleli abangcwele.b (Isaya 61:5) Phakathi kwabo uYesu umisela “abathetheli ehlabathini lonke.”—INdumiso 45:16.

8, 9. Isihlwele esikhulu singenelwa njani ngokufunda ngezinto ezazikwiNgcwele?

⁸ Ngoxa singayi kuze singene kwindawo eyayifanekiselwa yiNgcwele, isihlwele esikhulu sabantu basemzini sifunda izifundo ezibalulekileyo kwizinto ezazikuyo. Kanye njengokuba isiphatho sesibane sasifanele sihlale sizaliswa ngeoli, ngoko aba bantu basemzini bafanele bafumane umoya oyingcwele ukuze baziqonde ngakumbi iinyaniso zeLizwi likaThixo, abazifumana ‘ngekhoboka elithembekileyo neliyingqondi.’ (Mateyu 24:45-47) Ukongezelela, umoya kaThixo uyabanceda ukuba basabele kwesi simemo: “Umoya nomtshakazi [intsalela ethanjisiweyo] bahlala besithi: ‘Yiza!’ Kwaye nabani na ovayo makathi: ‘Yiza!’ Ibe nabani na onxaniweyo makeze; nabani na onqwenelayo makathabathe amanzi obomi ngesisa.” (ISityhilelo 22:17) Ngaloo ndlela, isiphatho sesibane sikhumbuza isihlwele esikhulu ngembopheleleko yaso yokubengezela njengamaKristu nokuphepha nasiphi isimo sengqondo, iingcinga, amazwi, okanye izenzo ezinokuwenza buhlungu umoya oyingcwele kaThixo.—Efese 4:30.

⁹ Itafile yezonka ezingenagwele ikhumbuza isihlwele esikhulu ukuba ukuze sihlale siphilile ngokomoya, simele sihlale sizondla ngokudla kokomoya okuseBhayibhileni nakwiimpapasho ‘zekhoboka elithembekileyo neliyingqondi.’ (Mateyu 4:4) Isibingelelo sesiqhumiso sisikhumbuza ngokubaluleka kokuthandaza ngokunyanisekileyo kuYehova ukuze asincede sigcine ingqibelelo. (Luka 21:36) Imithandazo yaso ifanele iquke amazwi asuk’ entliziyweni endumiso nokubulela. (INdumiso 106:1) Isibingelelo sesiqhumiso sikwasikhumbuza ngokubaluleka kokudumisa uThixo nangezinye iindlela, njengokuzicula ngokusuk’ entliziyweni iingoma zoBukumkani kwiintlanganiso zamaKristu nangokulungiselela kakuhle ukuze zilwenze kakuhle “uvakaliso lwasesidlangalaleni losindiso.”—Roma 10:10.

Uloyiso Olupheleleyo Lonqulo Lokwenyaniso

10. (a) Liliphi ithemba elizukileyo esinokulilindela? (b) Yintoni efanele yenzeke kuqala?

¹⁰ Namhlanje “izizwe ezininzi” ziyathontelana ukuya kwindlu kaYehova yonqulo. (Isaya 2:2, 3) Singqina oku, ISityhilelo 15:4 sithi: “Ngubani na ongayi kukoyika ngokwenene wena, Yehova, aze azukise igama lakho, ngenxa yokuba inguwe wedwa onyanisekileyo? Kuba zonke iintlanga ziya kuza zize zinqule phambi kwakho, ngenxa yokuba imimiselo yakho yobulungisa yenziwe yabonakala.” UZekariya isahluko 14 uchaza okuya kulandela. Kungekudala, isimo sengqondo esibi esikwinkoliso yabantu abasemhlabeni siya kufikelela incopho njengoko beya kuhlanganisana okwesihlandlo sokugqibela ukuze benze imfazwe neYerusalem—oonozakuzaku abasemhlabeni beYerusalem yasezulwini. Ngelo xesha uYehova uya kuthabatha amanyathelo. NjengoThixo onguMphumi-mkhosi, ‘uya kuphuma, alwe nezo ntlanga’ zinesibindi sokuhlasela abantu bakhe.—Zekariya 14:2, 3.

11, 12. (a) UYehova uya kusabela njani xa abanquli bakhe abakwitempile yakhe behlaselwa emhlabeni wonke? (b) Uya kuba yintoni umphumo wemfazwe kaThixo?

¹¹ “Siso esi isibetho aya kuzibetha ngaso uYehova zonke izizwe eziyiphumele umkhosi iYerusalem: uya kuyingcungcuthekisa inyama yomntu, emi ngeenyawo zakhe, aphelele amehlo akhe emakrolomeni awo, luphelele ulwimi lwakhe emlonyeni wakhe. Kothi ngaloo mini, sibe sikhulu isaqunge phakathi kwazo, siphuma kuYehova; babambe elowo isandla sommelwane wakhe, isandla sakhe siphakamele isandla sommelwane wakhe.”—Zekariya 14:12, 13.

¹² Enoba esi sibetho sesokoqobo okanye siyafuzisela, kuza kufuneka silinde. Noko ke, siqiniseke ngento enye. Ngoxa iintshaba zikaThixo zilungiselela ukuhlasela abakhonzi bakaYehova emhlabeni wonke, ziya kuthintelwa ngamandla akhwankqisayo kaThixo ongumongami. Ziya kuvalw’ imilomo. Amalwimi azo anendelelo aya kuba ngathi abolile. Usukelo lwazo ebezimanyene ngalo luya kuphel’ emehlweni, ngokungathi amehlo azo abolile. Amandla azo, azenze zanesibindi sokuhlasela, aya kuphela. Zididekile, ziya kujikelana zize zibulalane ngokupheleleyo. Ziya kuphanziswa ngaloo ndlela zonke iintshaba zonqulo lukaThixo ezisemhlabeni. Ekugqibeleni, zonke iintlanga ziya kunyanzeleka ukuba ziqonde ukuba uYehova ungumongami wendalo iphela. Esi siprofeto siya kuzaliseka: “UYehova woba ngukumkani phezu kwehlabathi lonke.” (Zekariya 14:9) Emva koko, uSathana needemon zakhe baya kuvalelwa njengoko uLawulo lukaKristu Lweminyaka Eliwaka luqalisa ngeentsikelelo ezizukileyo ezigcinelwe uluntu.—ISityhilelo 20:1, 2; 21:3, 4.

Uvuko Lwasemhlabeni

13. Ngoobani “amaqongqolo eentlanga zonke”?

¹³ Isiprofeto sikaZekariya siyaqhubeka kwisahluko 14, indinyana 16: “Othi onke amaqongqolo [abaseleyo, NW] eentlanga zonke ezibe ziyingenele iYerusalem, enyuke iminyaka ngeminyaka, aye kumnqula uKumkani, uYehova wemikhosi, enze umthendeleko weminquba.” Ngokutsho kweBhayibhile, bonke abantu abaphilayo namhlanje nabaqhubeka bephilela le nkqubo ingendawo nabagqalwa njengeentshaba zonqulo lokwenyaniso baya kufumana “isohlwayo sesigwebo sentshabalalo engunaphakade.” (2 Tesalonika 1:7-9; bona noMateyu 25:31-33, 46.) Abasayi kuvuka ekufeni. Ngoko, ‘amaqongqolo’ amele ukuba aquka abathile beentlanga abafa ngaphambi kwemfazwe kaThixo yokugqibela nabanethemba lovuko elisekelwe eBhayibhileni. UYesu wathembisa: “Liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe baze baphume, abo benze izinto ezilungileyo beze kuvuko lobomi, abo baqhelisele izinto ezingcolileyo kuvuko lomgwebo.”—Yohane 5:28, 29.

14. (a) Abavusiweyo bafanele benze ntoni ukuze bafumane ubomi obungunaphakade? (b) Yintoni eya kwenzeka kwabangayi kuvuma ukuzahlulela kuYehova nokuqhelisela unqulo lokwenyaniso?

¹⁴ Bonke aba bavusiweyo bamele benze okuthile ukuze uvuko lwabo lube lolobomi lungabi lolokugwetyelwa ukufa. Bamele bangene kwiintendelezo zasemhlabeni zetempile kaYehova baze baqubude bezahlulela kuThixo egameni likaYesu Kristu. Nabaphi na abavusiweyo abangafuniyo ukukwenza oko baya kufumana isibetho esifanayo neso sifunyanwa ziintlanga zanamhlanje. (Zekariya 14:18) Ngubani na olaziyo inani labavusiweyo abaya kukuvuyela ukuthelela isihlwele esikhulu ekubhiyozeleni oko kwakufanekiselwa nguMthendeleko Weminquba? Ngokungathandabuzekiyo, baya kuba baninzi, yaye itempile kaYehova yokomoya enkulu iya kuzuka ngakumbi!

Oko Kwakufanekiselwa NguMthendeleko Weminquba

15. (a) Ziziphi ezinye zeenkalo ezazibalasele kuMthendeleko Weminquba wamaSirayeli amandulo? (b) Sasiyintoni isizathu sokuba kunikelwe iinkomo ezingama-70 ebudeni baloo mthendeleko?

¹⁵ Nyaka ngamnye, amaSirayeli amandulo ayefanele abhiyozele uMthendeleko Weminquba. Wawuqhuba iveki enye yaye wawuphela xa kugqityiwe ukuvunwa. Yayiba lixesha elimnandi lokubulela. Ebudeni baloo veki, ayefanele ahlale kwiminquba efulelwe ngamagqabi emithi, ngokukodwa amasebe esundu. Lo mthendeleko wawukhumbuza amaSirayeli ngendlela uThixo awabakhupha ngayo ooyisemkhulu eYiputa nendlela awabanyamekela ngayo njengoko babehlala eminqubeni ngoxa babehamba iminyaka engama-40 entlango de bafika kwiLizwe Ledinga. (Levitikus 23:39-43) Ebudeni baloo mthendeleko, kwakubingelelwa ngeenkomo ezingama-70 kwisibingelelo setempile. Kucacile ukuba, le nkalo yomthendeleko yayifanekisela umsebenzi wokusindis’ ubomi ogqibeleleyo nopheleleyo owenziwa nguYesu Kristu. Ekugqibeleni iingenelo zedini lakhe lentlawulelo ziya kufunyanwa yinyambalala yenzala yeentsapho zoluntu ezingama-70 ezaphuma kuNowa.—Genesis 10:1-29; Numeri 29:12-34; Mateyu 20:28.

16, 17. (a) UMthendeleko Weminquba owafanekiselwayo waqalisa nini, yaye waqhubeka njani? (b) Isihlwele esikhulu sithelela njani kulo mbhiyozo?

¹⁶ Ngoko uMthendeleko Weminquba wamandulo wawusalatha kuvuyo lokuhlanganisela aboni abahlangulweyo kwitempile kaYehova enkulu yokomoya. Umthendeleko owawufanekiselwa waqalisa ngePentekoste yowama-33 C.E. xa kwaqaliswa ukuhlanganisela uSirayeli wokomoya kwibandla lamaKristu. (IZenzo 2:41, 46, 47) Aba bathanjiswa babeqonda ukuba ‘babengabemi bokwexeshana’ kwihlabathi likaSathana ngenxa yokuba bona “ngabemi basemazulwini.” (1 Petros 2:11; Filipi 3:20) Okwexesha elithile lo mthendeleko uvuyisayo waphazanyiswa luwexuko olweza neNgqobhoko. (2 Tesalonika 2:1-3) Noko ke, lo mthendeleko wavuselelwa ngowe-1919 ngokuhlanganiswa kwamalungu okugqibela amaSirayeli okomoya ali-144 000, kwaza kwalandela ukuhlanganiswa kwesihlwele esikhulu sezizwe ngezizwe seSityhilelo 7:9.

¹⁷ Isihlwele esikhulu sichazwa njengesiphethe amasebe esundu ezandleni zaso, nto leyo ebonisa ukuba naso siyawuvuyela uMthendeleko Weminquba owawufanekiselwa. NjengamaKristu azahluleleyo, ngovuyo sinenxaxheba kumsebenzi wokuhlanganisela abanquli abangakumbi kwitempile kaYehova. Ngaphezu koko, njengaboni, siyaqonda ukuba asikabi naso isiqinisekiso sokuba singabemi basemhlabeni. Sikunye nabo baya kuvuswa kwixesha elizayo, simele siqhubeke sibonakalisa ukholo kwidini lentlawulelo likaKristu de sifikelele emfezekweni ekupheleni koLawulo LukaKristu Lweminyaka Eliwaka.—ISityhilelo 20:5.

18. (a) Yintoni eya kwenzeka ekupheleni koLawulo LukaYesu Kristu Lweminyaka Eliwaka? (b) Unqulo lokwenyaniso lukaYehova luya koyisa njani ekugqibeleni?

¹⁸ Emva koko, abakhonzi bakaThixo abasemhlabeni baya kuma phambi kwakhe njengabantu abafezekileyo abangalufuniyo uncedo lwababingeleli basezulwini. Elo iya kuba lixesha laxa uYesu Kristu “enikela ubukumkani kuThixo wakhe noYise.” (1 Korinte 15:24) USathana uya kukhululwa “kangangethuba elincinane” ukuze avavanye uluntu olwenziwe lwafezeka. Nabaphi na abangathembekanga baya kutshatyalaliswa ngonaphakade, kunye noSathana needemon zakhe. Abo bahlala bethembekile baya kufumana ubomi obungunaphakade. Baya kuba ngabemi beParadisi yasemhlabeni ngokusisigxina. Ngaloo ndlela uMthendeleko Weminquba owafanekiselwayo uya kuqukunjelwa ngendlela ezukileyo neyimpumelelo. Unqulo lokwenyaniso luya kube loyisile ukuze kuzukiswe uYehova ngonaphakade nokuze uluntu lonwabe ngonaphakade.—ISityhilelo 20:3, 7-10, 14, 15.

[Imibhalo esemazantsi]

Imibuzo Yempinda

◻ ‘IYerusalem’ yahlaselwa njani ebudeni bemfazwe yehlabathi yokuqala?—Zekariya 14:2.

◻ Yintoni ebisenzeka kubakhonzi bakaThixo ukususela ngowe-1919?

◻ Ngoobani namhlanje abanenxaxheba ekubhiyozeleni uMthendeleko Weminquba owafanekiselwayo?

◻ Unqulo lokwenyaniso luya koyisa njani ngokupheleleyo?

[Umfanekiso okwiphepha 23]

Kwakusetyenziswa amasebe esundu xa kubhiyozelwa uMthendeleko Weminquba