Fundisa Oko Kufundiswa YiBhayibhile Ngokwenene
‘Yenzani abafundi abantu beentlanga zonke, nibafundise.’—MATEYU 28:19, 20.
1. Yintoni enokuthethwa ngokufumaneka kweBhayibhile?
ILIZWI LIKAYEHOVA, iBhayibhile eNgcwele, yenye yezona ncwadi zindala neziye zasasazwa kakhulu ehlabathini. Ubuncinane inxalenye yayo iye yaguqulelwa kwiilwimi ezingaphezu kwama-2 300. Ngaphezu kwama-90 ekhulwini abemi bomhlaba banayo ngolwimi lwabo lomthonyama.
2, 3. (a) Kutheni kukho ukungavisisani nje ngemfundiso zeBhayibhile? (b) Yiyiphi imibuzo esiza kuyixubusha?
2 Izigidi zabantu zifunda inxalenye yeBhayibhile yonke imihla. Bambi baye bayifunda bayigqiba izihlandlo ezininzi. Amawaka enkonzo athi iimfundiso zawo zisekelwe eBhayibhile, kodwa akavumelani nezinye iinkonzo ngemfundiso zayo. Ukongeza kulo mbhodamo kukungaboni ngasonye kwamalungu enkonzo enye. Abanye banenkolelo ezithile ngemvelaphi yeBhayibhile, nokubaluleka kwayo. Abanye bayijonga njengencwadi engcwele emele isetyenziswe ngezihlandlo ezibalulekileyo okanye xa umntu esenza izibhambathiso okanye efunga enkundleni ukuba uza kuthetha inyaniso.
3 Eyona nyaniso kukuba, iBhayibhile iqulethe ilizwi likaThixo elinamandla, okanye isigidimi esiya kuluntu. (Hebhere 4:12) Ngenxa yoko, njengamaNgqina kaYehova, sifuna ukufundisa abantu oko kufundiswa yiBhayibhile. Siyakuvuyela ukuphumeza uthumo uYesu Kristu awalunika abalandeli bakhe xa wathi: “Hambani . . . niye kubenza abafundi abantu beentlanga zonke, . . . nibafundisa.” (Mateyu 28:19, 20) Kubulungiseleli bethu basesidlangalaleni, sifumana abantu abanyanisekileyo abadimazekileyo ngenxa yombhodamo obangelwa lunqulo ehlabathini. Bafuna ukwazi inyaniso ngoMdali wethu yaye banqwenela ukuva oko kuthethwa yiBhayibhile ngentsingiselo yobomi. Makhe sixubushe imibuzo emithathu ekhathaza abantu abaninzi. Kumbuzo ngamnye, siza kuxubusha oko kuthethwa ziinkokeli zonqulo ziphazama, sandule ke sixubushe oko kufundiswa yiBhayibhile ngokwenene. Le mibuzo ithi: (1) Ngaba uThixo usikhathalele? (2) Kutheni silapha nje? (3) Kwenzeka ntoni kuthi xa sisifa?
Ngaba UThixo Usikhathalele?
4, 5. Kutheni abantu becinga ukuba uThixo akasikhathalelanga?
4 Masiqale ngombuzo othi, Ngaba uThixo usikhathalele? Okulusizi kukuba abaninzi bacinga ukuba uThixo akanaxesha lethu. Kutheni bevakalelwa ngaloo ndlela nje? Esinye isizathu kukuba baphila kwihlabathi elizaliswe yintiyo, imfazwe nokubandezeleka. Baqiqa ngelithi, ‘Ukuba uThixo ebesikhathalele ngokwenene, ebeya kuzithintela nakanjani na iintlekele zingenzeki.’
5 Esinye isizathu kukuba iinkokeli zakwalizwi zibenza bavakalelwe ngaloo ndlela. Yintoni edla ngokuthethwa ngabefundisi xa kusehla intlekele? Xa elinye ibhinqa lafelwa ngabantwana balo ababini kwingozi yemoto, umfundisi wecawa yalo wathi: “Ibikukuthanda kukaThixo. UThixo ebefuna ezinye iingelosi ezimbini.” Enyanisweni, xa abefundisi besitsho, batyhola uThixo ngezinto ezimbi ezenzekayo. Ukanti, umfundi uYakobi wathi: “Makungabikho nabani na, xa esesilingweni othi: ‘Ndilingwa nguThixo.’ Kuba uThixo akanakulingwa ngezinto ezimbi yaye naye akalingi namnye.” (Yakobi 1:13) UYehova uThixo akazenzi izinto ezimbi. Kakade ke, “makube lee kuThixo oyinyaniso ukwenza ngobungendawo.”—Yobhi 34:10.
6. Ngubani unobangela wobungendawo nokubandezeleka kweli hlabathi?
6 Kutheni ke, kukho ubungendawo nokubandezeleka okungaka? Esinye isizathu kukuba abantu baye bamgatya uThixo njengoMlawuli, abafuni ukuthobela imithetho nemigaqo yakhe yobulungisa. Bengazi abantu baye bazithoba kuTshaba lukaThixo, uSathana, kuba “ihlabathi liphela lisemandleni ongendawo.” (1 Yohane 5:19) Ukwazi esi sibakala kwenza kube lula ukuqonda isizathu sokuba kubekho iimeko ezimbi. USathana ungendawo, unentiyo, ngumkhohlisi kwaye ukhohlakele. Simele siliyindele ke into yokuba ihlabathi libe neempawu zomphathi walo. Yiloo nto ke, besamele kangaka nje ubungendawo!
7. Ziziphi ezinye izizathu ezibangela abantu babandezeleke?
7 Ukungafezeki kwabantu ngomnye unobangela wokubandezeleka. Ngenxa yesono abanaso abantu bathanda ukubalasela kwabanye, kwaye oko kudla ngokuphumela kwiimfazwe, ingcinezelo nokubandezeleka. INtshumayeli 8:9 ithi: ‘Umntu ulawula umntu iba kukwenzakala kwakhe.’ Esinye isizathu sokubandezeleka kwabantu ‘lixesha nesihlo esingenakubonwa kwangaphambili.’ (INtshumayeli 9:11) Abantu badla ngokwehlelwa yintlekele kuba nje bekwindawo enentlekele ngexesha eyehla ngalo.
8, 9. Sazi njani ukuba uYehova usikhathalele ngokwenene?
8 Kuyathuthuzela ukwazi ukuba asingoYehova obangela ukubandezeleka. Kodwa ngaba ngokwenene uThixo ukukhathalele oko kwenzeka kubomi bethu? Ewe ukukhathalele. Siyazi ukuba uYehova usikhathalele kuba iLizwi lakhe eliphefumlelweyo liyasichazela isizathu sokuba eye wavumela uluntu lwalandela ikhondo elibi. Izizathu zikaThixo ziphathelele iimbambano ezimbini: ulongamo lwakhe nokugcina kwabantu ingqibelelo. Ekubeni enguMdali onamandla onke, uYehova akanyanzelekanga ukuba asixelele isizathu sokuba avumele ukubandezeleka. Kodwa, uyasichazela isizathu soko kuba usikhathalele.
9 Khawuqwalasele esinye isizathu esibonisa ukuba uThixo usikhathalele. “Yaba buhlungu intliziyo yakhe” xa wabona ihlabathi lizaliswe bububi ngemihla kaNowa. (Genesis 6:5, 6) Ngaba uThixo uvakalelwa ngendlela eyahlukileyo namhlanje? Nakanye, kuba uThixo akatshintshi. (Malaki 3:6) Ukuthiyile okungekho sikweni nokubona abantu bebandezeleka. IBhayibhile ifundisa ukuba kungekudala uThixo uza kuwulungisa wonke umonakalo oye wabangelwa lulawulo lomntu nayimpembelelo kaMtyholi. Ngaba obo asibobungqina beyisayo bokuba uThixo usikhathalele?
10. UYehova uvakalelwa njani ngokubandezeleka kwabantu?
10 Iinkokeli zonqulo zimmela kakubi uThixo xa zisithi iintlekele ezisehlelayo kukuthanda kwakhe. Ngokwahlukileyo, yena uYehova ufuna ukukuphelisa ukubandezeleka kwabantu. Eyoku-1 kaPetros 5:7 ithi “unikhathalele.” Yiloo nto kanye efundiswa ngokwenene yiBhayibhile!
Kutheni Silapha Nje?
11. Yintoni edla ngokutshiwo ziinkonzo zehlabathi ngobukho babantu emhlabeni?
11 Ngoku makhe sixubushe umbuzo wesibini abazibuza wona abantu abaninzi, Kutheni silapha nje? Iinkonzo zeli hlabathi zidla ngokuthi umntu ungumhambi apha emhlabeni. Bathi lo mhlaba wethu ngumchankcatho wokuya kwenye indawo. Bambi bafundisa ubuxoki bokuba ngamizan’ ithile uThixo uya kuze asitshabalalise esi sijikelezi langa. Ngenxa yezi mfundiso, abaninzi baye bagqiba kwelokuba baziyolise kangangoko lo gama besaphila kuba bahleli beza kufa kakade. Yintoni ngokwenene efundiswa yiBhayibhile ngobukho bethu apha emhlabeni?
12-14. Yintoni efundiswa yiBhayibhile ngenjongo kaThixo ngomhlaba nabantu?
12 UThixo unenjongo entle ngomhlaba nabantu. Akazange ‘awudalele ilize [umhlaba] kunoko wawubumba ukuba umiwe.’ (Isaya 45:18) Ukongeza koko, uYehova “useke umhlaba phezu kweendawo omiswe kuzo; awuyi kushukunyiswa ukusa kwixesha elingenammiselo, okanye nangonaphakade.” (INdumiso 104:5) Ukufunda ezi zinto ngenjongo kaThixo ngomhlaba noluntu kunokusinceda siqonde isizathu sokuba sibe lapha.
13 IGenesis isahluko 1 nesesi-2 zibonisa ukuba uYehova walungisa umhlaba ngokukhethekileyo ewulungiselela ukuba umiwe ngabantu. Xa kwaphela ixesha lokudalwa kwezinto kuquka umhlaba lo wethu, yonke into ‘yayilunge gqitha.’ (Genesis 1:31) UThixo wabeka indoda nebhinqa lokuqala, uAdam noEva kumyezo omhle wase-Eden waze wabanika intabalala yokutya. Esi sibini sokuqala saxelelwa oku: “Qhamani, nande, niwuzalise umhlaba nize niwoyise.” Sasiza kuba nabantwana abafezekileyo, sandise imida yomyezo owawulikhaya laso ude use eziphelweni zomhlaba, size silawule izilwanyana ngothando.—Genesis 1:26-28.
14 Yinjongo kaYehova ukuba nentsapho efezekileyo yabantu abahlala apha emhlabeni ngonaphakade. ILizwi likaThixo lithi: “Amalungisa aya kuwudla ilifa umhlaba, ahlale kuwo ngonaphakade.” (INdumiso 37:29) Ewe, abantu babedalelwe ukuphila ngonaphakade kumhlaba oyiParadesi. Yileyo injongo kaThixo, yaye koko okufundiswa yiBhayibhile ngokwenene!
Kwenzeka Ntoni Kuthi Xa Sisifa?
15. Yintoni efundiswa ziinkonzo zehlabathi ezininzi ngoko kwenzeka kuthi xa sisifa?
15 Ngoku masixubushe lo mbuzo wesithathu nokhathaza abantu abaninzi: Kwenzeka ntoni kuthi xa sisifa? Inkoliso yeenkonzo zehlabathi ifundisa ukuba kukho into ethile engaphakathi emntwini neqhubeka iphila emva kokuba efile. Zisekho nezisabambelele kwinto yokuba uThixo wohlwaya abantu abangendawo ngokubathuthumbisa esihogweni ngonaphakade. Ngaba yinyaniso leyo? Yintoni ngokwenene efundiswa yiBhayibhile ngokufa?
16, 17. Ngokutsho kweBhayibhile, injani imeko yabafi?
16 ILizwi likaThixo lithi: “Abaphilayo bayazi ukuba baya kufa; kodwa abafileyo, abazi nto konke konke, abasenamvuzo.” Ekubeni abafileyo ‘bengazi nto konke konke,’ abeva, ababoni, abathethi abavakalelwa okanye bacinge nto. Abasafumani mvuzo. Bebeza kuwufumana njani kaloku? Akukho kwamsebenzi banokuwenza! Ngaphezulu, “uthando lwabo, intiyo yabo nekhwele labo sele latshabalala,” kuba abasenazimvakalelo.—INtshumayeli 9:5, 6, 10.
17 Oko kuthethwa yiBhayibhile ngalo mba kucace okwekat’ emhlophe ehlungwini—abantu abafileyo abaqhubeki bephila kwenye indawo. Ayikho into ephumayo kuthi xa sisifa ize iqhubeke iphila ukuze izalwe sele ingomnye umntu komnye umzimba, njengokuba besitsho abo bakholelwa kwimfundiso yokuzalwa ngokutsha. Le nkalo sinokuyizekelisa ngale ndlela: Ubomi bethu bunokufaniswa nedangatye lekhandlela. Xa licinywa ikhandlela, elo dangatye aliyi ndawo. Liphela tu lingabikho.
18. Xa isifundo seBhayibhile sifunda ukuba abafileyo abazinto, ziziphi izigqibo esinokufikelela kuzo?
18 Khawucinge ngokubaluleka kwale nyaniso ilula nenamandla ngolu hlobo. Xa isifundo seBhayibhile sifunda ukuba abantu abafileyo abazinto, kufanele kube lula ukuqonda ukuba enoba babekhohlakele kangakanani na ookhokho bakhe ngoxa babesaphila, abanakumkhathaza nganto xa efile. Ukwamele aqonde ukuba izihlobo zakhe ezifileyo aziva, aziboni, azikwazi kuthetha, azisenamvakalelo okanye azicingi. Ngenxa yoko, azinakudandatheka kukulinda kwindawo yokuhlambulula imiphefumlo okanye zithuthunjiswe esihogweni. Noko ke, iBhayibhile ifundisa ukuba abafileyo abakwinkumbulo kaThixo baza kuvuswa. Limangalisa ngokwenene eli ithemba!—Yohane 5:28, 29.
Incwadi Eyenzelwe Ukusinceda
19, 20. NjengamaKristu, yiyiphi imbopheleleko esinayo, kwaye yiyiphi incwadi eyenzelwe ukusinceda entsimini?
19 Siye saxubusha imibuzo emithathu kuphela abazibuza yona abantu abaninzi. Kwimeko nganye, oko kufundiswa yiBhayibhile kucace gca. Hayi indlela ekuvuyisa ngayo ukwabelana nabo bafuna ukwazi oko kufundiswa yiBhayibhile! Kodwa kusekho imibuzo emininzi ebalulekileyo abafuna iimpendulo zayo abaninzi abanyanisekileyo. NjengamaKristu, sinembopheleleko yokubanceda bafumane iimpendulo zalo mibuzo.
20 Kulucelomngeni ukufundisa iinyaniso zeZibhalo ngendlela ecacileyo nefikelela intliziyo. Ukuze sihlangabezane nalo mqobo, “ikhoboka elithembekileyo neliyingqondi” liye lalungiselela incwadi eyenziwe ngokukhethekileyo ukuze siyisebenzise entsimini. (Mateyu 24:45-47) Le ncwadi inamaphepha angama-224 inomxholo othi Yintoni Ngokwenene Efundiswa Yibhayibhile?
21, 22. Ziziphi ezinye zeembalasane zencwadi ethi Yintoni Ngokwenene Efundiswa YiBhayibhile?
21 Le ncwadi yakhululwa kwiNdibano yeSithili yamaNgqina kaYehova ‘Yokuthobela uThixo’ yowama-2005/06 ixubusha ngemibandela eyahlukahlukeneyo nebalulekileyo. Ngokomzekelo, kukho intshayelelo enamaphepha amahlanu eluncedo kakhulu ekuqaliseni izifundo zeBhayibhile. Uya kufumanisa kulula ukuxubusha imifanekiso nezibhalo ezikule ntshayelelo. Usenokusebenzisa kwaeli candelo ukuze ubonise izifundo indlela yokufumana izahluko neendinyana zeBhayibhile.
22 Le ncwadi ibhalwe ngendlela elula necacileyo. Kuye kwazanywa ukufikelelwa intliziyo yesifundo ngokusibandakanya xa kunokwenzeka. Isahluko ngasinye sinemibuzo etshayelelayo size siqukunjelwe ngebhokisi enomxholo othi “Oko Kufundiswa YiBhayibhile.” Le bhokisi ineZibhalo eziphendula imibuzo ekwintshayelelo yesahluko ngasinye. Imifanekiso emihle nemibhalo eyicacisayo, nemizekeliso iya kunceda isifundo siqonde iingongoma ezintsha. Nangona le ncwadi yenziwe yalula, inesihlomelo esixubusha imibandela eli-14 ebalulekileyo xa isifundo sifuna inkcazelo engakumbi.
23. Ngawaphi amacebiso okusebenzisa incwadi ethi Okufundiswa YiBhayibhile kwizifundo zeBhayibhile?
23 Incwadi ethi Okufundiswa YiBhayibhile yenzelwe ukusinceda sifundise abantu abanemilinganiselo engafaniyo yemfundo nabasuka kwiinkonzo ezahlukeneyo. Ukuba isifundo asazi nowathwethwa ngeBhayibhile, isahluko esinye sisenokuqhutywa izihlandlo ezingaphezu kwesinye. Musa ukusigqwagqwa isifundo, kunoko zama ukufikelela intliziyo yomfundi. Ukuba umzekeliso othile osetyenziswe kule ncwadi akawuqondi, wucacise okanye usebenzise omnye umzekeliso. Lungiselela kakuhle, zama ukuyisebenzisa kakuhle le ncwadi, yaye uthandazele uncedo lukaThixo ukuze ‘uliphathe ngokufanelekileyo ilizwi lenyaniso.’—2 Timoti 2:15.
Lixabise Ilungelo Onalo Elingenakuthelekiswa Nanto
24, 25. Liliphi ilungelo elingenakuthelekiswa nanto uYehova alinike abantu bakhe?
24 UYehova ubanike ilungelo elingenakuthelekiswa nanto abantu bakhe. Uye wasinceda safunda inyaniso ngaye. Singaze silithabathe lula elo lungelo! Ngapha koko, uThixo uzifihlile iinjongo zakhe kubantu abanekratshi waze wazityhilela abantu abathobekileyo. Mayela noku uYesu wathi: “Ndiyakudumisa esidlangalaleni, Bawo, Nkosi yezulu nomhlaba, ngenxa yokuba uzifihlile ezi zinto kwizilumko nakwiingqondi, wazityhilela iintsana.” (Mateyu 11:25) Liwonga elinqabileyo ukubalwa phakathi kwabantu abathobekileyo abakhonza uMongami weNdalo Iphela, uYehova.
25 Kwakhona uThixo usinike ilungelo lokufundisa abanye ngaye. Khumbula ukuba uye wamelwa kakubi ngabo baye bafundisa ubuxoki ngaye. Abantu abaninzi banembono ephosakeleyo ngoYehova, bacinga ukuba akakhathali kwaye akanalo uvelwano. Ngaba ukulungele, ukulungisa lo monakalo? Ngaba ufuna abantu abanyanisekileyo kuzo zonke iindawo bazi inyaniso ngoThixo? Ngoko bonisa ukuba uyamthobela uThixo ngokushumayela ngenzondelelo nokufundisa abantu oko kufundiswa ziZibhalo ngezinto ezibalulekileyo. Abo bafuna inyaniso kufuneka bafunde oko kufundiswa yiBhayibhile ngokwenene.
Ubuya Kuphendula Uthini?
• Sazi njani ukuba uThixo usikhathalele?
• Kutheni silapha emhlabeni nje?
• Kwenzeka ntoni kuthi xa sisifa?
• Ziziphi iinkalo zencwadi ethi Okufundiswa YiBhayibhile ozithanda ngokukhethekileyo?
[Imifanekiso ekwiphepha 22]
IBhayibhile ifundisa ukuba ukubandezeleka kuza kuphela
[Inkcazelo]
Top right, girl: © Bruno Morandi/age fotostock; left, woman: AP Photo/Gemunu Amarasinghe; bottom right, refugees: © Sven Torfinn/Panos Pictures
[Umfanekiso okwiphepha 23]
Amalungisa aya kuphila ngonaphakade eParadesi