Nceda Abanye Bathobele Oko Kufundiswa YiBhayibhile
“Leyo ke ikumhlaba omhle, ngabo bathi, emva kokuliva ilizwi ngentliziyo entle nelungileyo, baligcine baze bathwale isiqhamo ngonyamezelo.”—LUKA 8:15.
1, 2. (a) Incwadi ethi Yintoni Ngokwenene Efundiswa YiBhayibhile? yenzelwe yiphi injongo? (b) Kwiminyaka yakutshanje, uYehova uye wayisikelela njani imigudu yabantu bakhe yokwenza abafundi?
“LE INCWADI ilula ngendlela engathethekiyo. Izifundo zam ziyayithanda. Nam ndiyayithanda. Le ncwadi yenza kube lula ukuqalisa izifundo zeBhayibhile nabantu nokuba nimi emnyango.” Watsho njalo omnye uvulindlela oliNgqina likaYehova nokwinkonzo yexesha elizeleyo mayela nale ncwadi ethi Yintoni Ngokwenene Efundiswa YiBhayibhile?a Ebhekisela kule ncwadi inye, omnye umvakalisi woBukumkani osele ekhulile wathi: “Ndiye ndanelungelo lokunceda abantu abaninzi bazi uYehova kule minyaka ingama-50 idluleyo. Kodwa ndimele ndivume ukuba le yona impapasho isemagqabini. Inemifanekiso nemizekeliso emihle.” Ngaba leyo yindlela ovakalelwa ngayo ngencwadi ethi Okufundiswa YiBhayibhile? Le ncwadi yokufundisa iBhayibhile yenzelwe ukukunceda ukwazi ukuphumeza umyalelo kaYesu othi: “Hambani ke ngoko niye kubenza abafundi abantu beentlanga zonke, . . . nibafundisa ukuba bazigcine zonke izinto endiniyalele zona.”—Mateyu 28:19, 20.
2 Ngokuqinisekileyo, uYehova uyavuya njengokuba ebona amaNgqina azizigidi ezi-6,6 ethobela ngokuzithandela ulwalathiso lukaYesu lokwenza abafundi. (IMizekeliso 27:11) Kucacile ukuba uYehova uyayisikelela imigudu yawo. Ngokomzekelo ngowama-2005 iindaba ezilungileyo ziye zashunyayelwa kumazwe angama-235 yaye ngokomlinganiselo kuye kwaqhutywa izifundo zeBhayibhile ezizizi-6 061 500. Ngenxa yoko, abantu abaninzi baye ‘baliva iLizwi likaThixo baza balamkela, kungekhona njengelizwi labantu, kodwa njengelizwi likaThixo.’ (1 Tesalonika 2:13) Kule minyaka mibini idluleyo babe ngaphezu kwesiqingatha sesigidi, abafundi abatsha abaye bavisisanisa ubomi babo nemilinganiselo kaYehova baza bazahlulela kuThixo.
3. Yiyiphi imibuzo eza kuxutyushwa ngokuphathelele ukusetyenziswa kwencwadi ethi Okufundiswa YiBhayibhile kweli nqaku?
3 Ngaba mvanje uye wanenyhweba yokuqhuba isifundo seBhayibhile nomntu othile? Ehlabathini ngokubanzi basekho abantu ‘abanentliziyo entle nelungileyo’ abathi bakuliva ilizwi likaThixo “baligcine baze bathwale isiqhamo ngonyamezelo.” (Luka 8:11-15) Makhe sibone ukuba unokuyisebenzisa njani incwadi ethi Okufundiswa YiBhayibhile kumsebenzi wokwenza abafundi. Kule ngxubusho siza kuxubusha imibuzo emithathu: (1) Unokusiqalisa njani isifundo seBhayibhile? (2) Ziziphi ezona ndlela zokufundisa ziphumelelayo? (3) Unokumnceda njani umntu ofunda naye ukuba naye abe ngumfundisi weLizwi likaThixo elibhaliweyo, iBhayibhile?
Indlela Onokuqalisa Ngayo Isifundo SeBhayibhile
4. Kutheni abanye besenokuba mathidala ukufunda iBhayibhile, kwaye unokubanceda njani boyise loo mqobo?
4 Ukuba ubunokuyalelwa ukuba utsibe isiziba esikhulu, ubungenakuvuma. Kodwa ukuba kukho amatye okuchankcatha, ubuya kuvuma. Ngendlela efanayo, umntu oxakekileyo usenokuba mathidala ukufunda iBhayibhile. Umninimzi usenokucinga ukuba kuza kufuneka ixesha nomgudu ongakumbi ukuze ayifunde. Ungamnceda njani oyise loo mqobo? Ngokuba nengxubusho eziliqela ezimfutshane naye, unokusebenzisa incwadi ethi Okufundiswa YiBhayibhile ukuze ekugqibeleni ufunde naye iLizwi likaThixo. Ukuba ulungiselela kakuhle, isihlandlo ngasinye obuyela ngaso kuloo mntu siya kufana nomchankcatho wokwakha ubuhlobo bakhe noYehova.
5. Kutheni ufanele uyifunde incwadi ethi Okufundiswa YiBhayibhile?
5 Noko ke, ngaphambi kokuba uncede omnye umntu ngale ncwadi, kufuneka wena uyazi kakuhle. Ngaba sele uyifundile le ncwadi wayigqiba? Esinye isibini sahamba nayo xa sasiye ekhefini saza saqalisa ukuyifunda ngoxa sasiselwandle. Ibhinqa elithile lasekuhlaleni elalithengisela abakhenkethi lathetha nabo, labona le ncwadi inomxholo othi Yintoni Ngokwenene Efundiswa YiBhayibhile? Laxelela esi sibini ukuba kwiyure ezimbalwa ngaphambi koko, lalithandaza kuThixo licela impendulo yalo mbuzo. Esi sibini salinika umbhalo wale ncwadi. Ngaba ukhe ‘wazongela ixesha’ lokufunda le mpapasho, isihlandlo sesibini, ngoxa ulindele into ethile okanye ngexesha lekhefu emsebenzini okanye esikolweni? (Efese 5:15, 16) Ukuba uyayifunda, uza kuqhelana nale ncwadi yokufundisa iBhayibhile uze ukwazi ukuvula amathuba okuthetha nabanye ngayo.
6, 7. Ungayisebenzisa njani incwadi ethi Okufundiswa YiBhayibhile ukuze uqalise izifundo zeBhayibhile?
6 Xa uhambisa le ncwadi kubulungiseleli basesidlangalaleni, yisebenzise kakuhle imifanekiso, izibhalo nemibuzo ekwiphepha lesi-4,5 nelesi-6. Ngokomzekelo usenokuqalisa incoko ngokubuza ukuba, “Ekubeni uluntu luthwaxa ziingxaki namhlanje, ucinga ukuba sinokulufumana phi olona khokelo lufanelekileyo?” Emva kokuphulaphula kakuhle impendulo, funda eyesi-2 kuTimoti 3:16, 17, uze umchazele ukuba iBhayibhile inesicombululo sokwenene kwiingxaki zoluntu. Emva koko bonisa umninimzi imifanekiso ekwiphepha lesi-4, nelesi-5 uze ubuze oku: “Kule mifanekiso ikula maphepha, nguwuphi owona ukukhathaza kakhulu?” Emva kokuba umninimzi ekubonisile, mcele aqhubeke eyivulile incwadi ngoxa wena ufunda isibhalo esiphathelele oko kwiBhayibhile yakho. Emva koko funda iphepha lesi-6, uze ubuze umininimzi uthi, “Kule mibuzo mithandathu esekupheleni kweli phepha, nguwuphi obungathanda ukufumana impendulo kuwo?” Esakuba ewukhethile umbuzo, mbonise isahluko esiphendula umbuzo wakhe, mshiyele incwadi, uze wenze amalungiselelo aqinisekisiweyo okubuyela ukuze nixubushe loo mbuzo.
7 Le ntshumayelo besithetha ngayo inokuthabatha malunga nemizuzu emihlanu. Kulo mizuzu imbalwa, uza kube sele uyazi into ekhathaza umninimzi, wafunda waze wacacisa izibhalo ezibini ngoxa wenze amalungiselelo okubuyela. Kusenokwenzeka ukuba incoko yakho emfutshane nomninimzi ngawona mava akhuthazayo nathuthuzelayo aye wawafumana emva kwexesha elide. Ngenxa yoko, kwanoyena mntu uxakekileyo usenokukhangela phambili ekuchitheni imizuzu engakumbi nawe njengoko umncede ukuze ahambe ‘kwindlela esa ebomini.’ (Mateyu 7:14) Ethubeni, njengokuba umdla womninimzi ukhula, nexesha lesifundo limele lande. Oku kunokwenziwa ngokumcela ukuba nihlale phantsi ukuze nifunde ixesha elingakumbi elilungiselelwe kusengaphambili.
Ezona Ndlela Zokufundisa Ziphumelelayo
8, 9. (a) Ungasinceda njani isifundo seBhayibhile sikwazi ukuhlangabezana nemiqobo nezilingo? (b) Zinokufunyanwa phi izinto zokwakha ukholo ezingatshiyo?
8 Uthi ke umntu akuqalisa ukuthobela izinto azifundiswa yiBhayibhile, nakanjani na kuvele imiqobo ethintela inkqubela yakhe. Umpostile uPawulos wathi: “Bonke abo banqwenela ukuphila ngozinikelo lobuthixo ngokunxulumene noKristu Yesu, nabo baya kutshutshiswa.” (2 Timoti 3:12) UPawulos wafanisa ezi mvavanyo nomlilo onokutshabalalisa izinto zokwakha ezingomelelanga kodwa uzishiye izinto ezifana negolide, isilivere namatye anqabileyo. (1 Korinte 3:10-13; 1 Petros 1:6, 7) Ukuze uncede isifundo sakho seBhayibhile sibe neempawu ezifunekayo ukuze simelane nezilingo ezinokuvela, kufuneka usincede ngokusakha ngezinto ezingatshiyo.
9 Umdumisi wafanisa ‘amazwi kaYehova nesilivere esulungekiswe kwiziko lokunyibilikisa lomhlaba, yacikizwa kasixhenxe.’ (INdumiso 12:6) Enyanisweni, iBhayibhile inazo zonke izinto ezifunekayo zokwakha ukholo olomeleleyo. (INdumiso 19:7-11; IMizekeliso 2:1-6) Ibe incwadi ethi Okufundiswa YiBhayibhile ibonisa indlela onokuzisebenzisa ngayo iZibhalo.
10. Unokuyalathisela njani ingqalelo yomfundi eBhayibhileni?
10 Xa uqhuba isifundo, sincede siqonde izibhalo ezikwisahluko ngasinye esixutyushwayo. Sebenzisa imibuzo ukuze usincede siqonde imibhalo eyintloko esetyenziswe kweso sahluko size siyisebenzise kubomi baso. Musa ukusixelela oko simele sikwenze. Kunoko xelisa umzekelo kaYesu. Xa enye indoda eyayisazi uMthetho yabuza, uYesu ukuba yenze ntoni ukuze ibudle ilifa ubomi obungunaphakade waphendula wathi: “Kubhalwe ntoni na eMthethweni? Ufunda njani na?” Le ndoda yaphendula isebenzisa iZibhalo, kwaye uYesu wayinceda yabona ukuba usebenza njani loo mgaqo kuyo. Esebenzisa umzekeliso, uYesu wayinceda le ndoda yabona nendlela eyayimele ichatshazelwe ngayo yiloo mfundiso. (Luka 10:25-37) Le ncwadi ithi Okufundiswa YiBhayibhile inemizekeliso emininzi elula onokuyisebenzisa ukuze uncede isifundo siphile ngokuvisisana nemigaqo yeZibhalo.
11. Ungakanani umbandela omele uwugubungele kwisifundo ngasinye?
11 Kanye njengokuba uYesu wacacisa izinto ezintsonkothileyo esebenzisa intetho elula, nayo le ncwadi isebenzisa intetho elula necacileyo ukucacisa iLizwi likaThixo. (Mateyu 7:28, 29) Landela umzekelo wakhe. Cacisa izinto ngendlela elula, ecacileyo nechanileyo. Musa ukusigqwagqwa isifundo. Kunoko, iimeko zomfundi mayibe zizo ezigqibayo ngexesha eniza kulichitha kwisifundo ngasinye. UYesu wayezazi iintsilelo zabafundi bakhe ibe akazange abangxixhe ngezinto ezininzi kunezo babenokuzithwala.—Yohane 16:12.
12. Sinokusetyenziswa njani isihlomelo?
12 Isihlomelo sencwadi ethi Okufundiswa YiBhayibhile sixubusha ngemibandela eli-14. Kuxhomekeka kwiintswelo zomfundi lowo, njengomfundisi nguwe ofanele agqibe ngendlela oza kusetyenziswa ngayo umbandela lowo. Ngokomzekelo, ukuba umfundi kunzima ukuwuqonda umbandela okanye unemibuzo ngemibandela ethile ngenxa yezinto ebezikholelwa ngaphambili, kusenokuba kuhle ukumbonisa inxalenye yesihlomelo exubusha loo mbandela aze azifundele ngokwakhe. Kwelinye icala, imeko yomfundi isenokugqiba enoba kuza kufuneka niwufunde kunye lo mbandela. Isihlomelo sixubusha imixholo ebalulekileyo yeZibhalo, njengothi “‘Umphefumlo’ ‘noMoya’—Athetha Ukuthini Kanye Kanye La Magama?” nothi “Oko Ikuko ‘IBhabhiloni Enkulu.’” Usenokufuna ukuxubusha le mixholo nesifundo sakho. Ekubeni ingekho imibuzo elungiselelwe le nxalenye kuya kufuneka uqhelane nale nkcazelo ukuze ukwazi ukuzakhela imibuzo efanelekileyo.
13. Unayiphi indima umthandazo ekomelezeni ukholo?
13 INdumiso 127:1 ithi: “Ngaphandle kokuba uYehova uyayakha indlu, kulilize ukusebenza nzima kwabakhi bayo kuyo.” Njengoko ulungiselela ukuqhuba isifundo seBhayibhile, thandazela uncedo lukaYehova. Imithandazo oyenza xa uza kuqalisa isifundo naxa usiqukumbela mayibonise ulwalamano lwakho olufudumeleyo noYehova. Khuthaza isifundo ukuba sithandaze kuYehova sicele ubulumko nokuqonda iLizwi lakhe namandla okwenza oko likutshoyo. (Yakobi 1:5) Ukuba siya kwenza oko, siya kukwazi ukunyamezela iimvavanyo kwaye siya kuqhubeka somelele elukholweni.
Nceda Izifundo ZeBhayibhile Zibe Ngabafundisi
14. Yiyiphi inkqubela ekufuneka yenziwe zizifundo zeBhayibhile?
14 Ukuba izifundo zethu zeBhayibhile ziza kuthobela “zonke izinto” awaziyalela abafundi bakhe uYesu, kufuneka zenze inkqubela zinganeli nje ukuba ngabafundi beLizwi likaThixo kodwa zibe ngabafundisi balo. (Mateyu 28:19, 20; IZenzo 1:6-8) Yintoni onokuyenza ukuze uncede isifundo senze lo nkqubela?
15. Kutheni umele ukhuthaze isifundo sakho ukuba sibekho kuzo zonke iintlanganiso zamaKristu?
15 Kwakwisifundo sokuqala, simemele kwiintlanganiso zebandla isifundo. Sichazele ukuba kwiintlanganiso kulapho uqeqeshwa khona ukuze ube ngumfundisi weLizwi likaThixo. Emva kweeveki ezithile, rhoqo ekupheleni kwesifundo ngasinye, sebenzisa imizuzu embalwa uchazele isifundo sakho ngocwangciso lokufundisa lokomoya olufumana kwiintlanganiso neendibano ezahlukeneyo. Thetha ngehlombe ngezinto ozifunda kwezi ntlanganiso. (Hebhere 10:24, 25) Xa isifundo sisiya kuzo zonke iintlanganiso, sidla ngokuba ngumfundisi weLizwi likaThixo.
16, 17. Luluphi usukelo esinokuzibekela lona isifundo size silufikelele?
16 Nceda isifundo sibe nosukelo lwezinto esinokukwazi ukuzenza. Ngokomzekelo, sikhuthaze ukuba izinto esizifundayo sizibalisele umhlobo okanye isalamane. Kwakhona, sicebise ukuba sizibekele usukelo lokufunda yonke iBhayibhile. Ukuba uyasinceda sibe nocwangciso lokufunda iBhayibhile rhoqo, oko kuya kusinceda nasemva kokuba sibhaptiziwe. Ukongezelela, kutheni ungasikhuthazi isifundo ukuba sikhumbule nokuba sisibhalo esinye esekelwe kuso impendulo yesahluko ngasinye sencwadi ethi Okufundiswa YiBhayibhile? Xa sisenjenjalo siya kuba ‘ngumsebénzi ongenazintloni nganto, oliphatha ngokufanelekileyo ilizwi lenyaniso.’—2 Timoti 2:15.
17 Kunokuba usifundise ukuphinda izibhalo okanye sizishwankathele, sikhuthaze ukuba sichaze indlela iindinyana zeBhayibhile ezidibana ngayo nomxholo lowo uxutyushwayo njengoko ephendula abantu abafuna ukwazi isizathu sokholo lwakhe. Ukuqhelisela ixesha nje elifutshane kunokunceda, mhlawumbi usenokuzenza isalamane sakhe okanye umntu asebenza naye omcelayo ukuba achaze iinkolelo zakhe. Njengokuba isifundo siphendula, sibonise indlela yokuphendula “ngomoya wobulali nentlonelo enzulu.”—1 Petros 3:15.
18. Xa isifundo seBhayibhile sifanelekela ukuba ngumvakalisi ongabhaptizwanga, ziziphi ezinye iindlela onokusinceda ngazo?
18 Ethubeni, sinokukufanelekela ukuya kwinkonzo yasentsimini. Yibethelele into yokuba lilungelo ukuvunyelwa ube nesabelo kulo msebenzi. (2 Korinte 4:1, 7) Besakuba abadala begqibe ukuba isifundo siyakufanelekela ukuba ngumvakalisi ongabhaptizwanga, sincede silungiselele intshumayelo elula uze usipheleke xa sisiya kwinkonzo yasentsimini. Qhubeka usebenza naso kwiinkalo ezahlukeneyo zobulungiseleli basesidlangalaleni, uze usifundise ukuba kulungiselelwa njani xa kubuyelwa uze usifundise nendlela ephumelelayo yokubuyela. Umzekelo wakho omhle uya kuba nempembelelo entle kuso.—Luka 6:40.
‘Sindisa Wena Nabo Bakuphulaphuleyo’
19, 20. Luluphi usukelo esifanele sizibekele lona, kwaye ngoba?
19 Akuthandabuzeki ukuba, kufuneka ukuzibhokoxa ukuze uncede umntu afikelele “elwazini oluchanileyo lwenyaniso.” (1 Timoti 2:4) Noko ke, zimbalwa izinto ezivuyisayo ebomini ezinokuthelekiswa nokunceda umntu athobele oko kufundiswa yiBhayibhile. (1 Tesalonika 2:19, 20) Lilungelo ngokwenene eli sinalo, ukuba “ngabasebenzi abangamadlelane kaThixo” kulo msebenzi wokufundisa wenziwa ehlabathini lonke!—1 Korinte 3:9.
20 Esebenzisa uYesu Kristu neengelosi ezinamandla, uYehova uza kubatshabalalisa abo “bangazithobeliyo iindaba ezilungileyo ezingeNkosi yethu uYesu.” (2 Tesalonika 1:6-8) Ubomi busemngciphekweni. Ngaba unokuzibekela usukelo lokuqhuba isifundo seBhayibhile nokuba sinye ngencwadi ethi Yintoni Ngokwenene Efundiswa YiBhayibhile? Njengokuba unenxaxheba kulo msebenzi, unethuba ‘lokusindisa wena nabo bakuphulaphulayo.’ (1 Timoti 4:16) Kunanini na ngaphambili, ngoku kungxamisekile ukuba sincede abantu bathobele iimfundiso zeBhayibhile.
[Umbhalo osemazantsi]
a Ipapashwe ngamaNgqina kaYehova.
Ufunde Ntoni?
• Yenzelwe ntoni incwadi ethi Okufundiswa YiBhayibhile?
• Ungaziqalisa njani izifundo zeBhayibhile usebenzisa incwadi ethi Okufundiswa YiBhayibhile?
• Ziziphi ezona ndlela zokufundisa ziphumelelayo?
• Ungasinceda njani isifundo sibe ngumfundisi weLizwi likaThixo?
[Umfanekiso okwiphepha 26]
Ngaba uyisebenzisa kakuhle le ncwadi?
[Umfanekiso okwiphepha 27]
Ingxubusho emfutshane ingavuselela umdla womntu afune ukwazi iBhayibhile
[Umfanekiso okwiphepha 29]
Yintoni onokuyenza ukuze walathise ingqalelo yesifundo eBhayibhileni?
[Umfanekiso okwiphepha 30]
Nceda isifundo seBhayibhile senze inkqubela