Sinokuzixhathisa Njani Iidemon?
‘Iingelosi ezingasigcinanga isigxina sazo santlandlolo, zasuka zayishiya indawo yazo efanelekileyo yokuhlala, [uThixo] uzigcinele umgwebo wemini enkulu ngemixokelelwane kanaphakade phantsi kwentsunguzi yobumnyama.’—YUDE 6.
1, 2. Yiyiphi imibuzo ephakamayo ngoSathana uMtyholi needemon?
UMPOSTILE uPetros ulumkisa esithi: “Hlalani nithe qwa, nilindile. Utshaba lwenu, uMtyholi, luhambahamba njengengonyama egqumayo, efuna ubani engamqwengayo.” (1 Petros 5:8) Ngokuphathelele iidemon, umpostile uPawulos uthi: “Andifuni nibe nesabelo needemon. Aninakusela indebe kaYehova nendebe yeedemon; aninakuba nenxaxheba etafileni kaYehova nasetafileni yeedemon.”—1 Korinte 10:20, 21.
2 Kodwa, ngubani lo Sathana uMtyholi needemon? Babakho njani ibe nini? Ngaba badalwa nguThixo? Banempembelelo engakanani ebantwini? Sinokuzikhusela njani kubo?
Babakho Njani USathana Needemon?
3. Ingelosi kaThixo yaba nguye njani uSathana uMtyholi?
3 Kwasekuqaleni kwembali yabantu, umntu esasandul’ ukuhlala e-Eden, ingelosi kaThixo yavukela. Kwakutheni ukuze yenjenjalo? Kuba yayinganeliswanga yindima yayo kwilungiselelo likaYehova lasezulwini. Xa kwadalwa uAdam noEva, yabona ithuba lokubaphambukisa ekuthobeleni nasekunquleni uThixo oyinyaniso ukuze oko kwenziwe kuyo. Ngokuvukela uThixo nangokulukuhla isibini sokuqala ekubeni sithabathe ikhondo elisisono, le ngelosi yaba izenza uSathana uMtyholi. Ethubeni, nezinye iingelosi zamthelela kule mvukelo. Njani?—Genesis 3:1-6; Roma 5:12; ISityhilelo 12:9.
4. Yintoni eyenziwa ziingelosi ezithile ngaphambi koMkhukula womhla kaNowa?
4 IZibhalo eziphefumlelweyo zisixelela ukuba ngaphambi koMkhukula womhla kaNowa, iingelosi ezithile zaqalisa ukuba nomdla kumabhinqa asemhlabeni. IBhayibhile ithi ngenjongo ephosakeleyo, “baziphawula ke oonyana [basezulwini] boThixo oyinyaniso iintombi zabantu, ukuba zintle ngenkangeleko; baza bazithabathela abafazi kuzo zonke abazikhethayo.” Oku kwakungeyonto yemvelo, ngoko bazala amabhastile aziwa ngokuba ziiNefili. (Genesis 6:2-4) Ezo zidalwa zomoya zingazange zimthobele uThixo zathelela uSathana ekuvukeleni uYehova.
5. Yintoni eyenzeka kubavukeli xa uYehova wazisa intshabalalo ngoMkhukula omkhulu?
5 Xa uYehova wahlisela abantu uMkhukula, iiNefili nonina bazo abangabantu batshabalala. Zona ezo ngelosi zinemvukelo kwanyanzeleka ukuba ziyilahle imizimba yazo yenyama zibuyele kummandla womoya. Noko ke, azizange zikwazi ukuqhubeka zikunye noThixo ‘kwisigxina sazo santlandlolo’. Kunoko, zaphoswa ‘kwintsunguzi yobumnyama [yokomoya],’ eyaziwa ngokuba yiTartaro.—Yude 6; 2 Petros 2:4.
6. Iidemon zibalahlekisa njani abantu?
6 Ukususela ekubeni iingelosi ezingendawo zaphulukana ‘nesigxina sazo santlandlolo,’ zaba ngamahlakani kaSathana aziidemon ibe ziye zamxhasa ekwenzeni okungendawo. Ukususela ngoko, iidemon azisenawo amandla okuzambathisa imizimba yabantu. Kodwa, zinokuphembelela abantu benze izinto ezahlukahlukeneyo ezigqwethekileyo ngokwesini. Iidemon zikwakhohlisa abantu ngokusebenzisa imimoya, esenokuquka ukwenza imilingo, ivoodoo nokubuza kwabaneshologu. (Duteronomi 18:10-13; 2 Kronike 33:6) Isiphelo seengelosi ezingendawo siyafana nesikaMtyholi—ukutshatyalaliswa ngonaphakade. (Mateyu 25:41; ISityhilelo 20:10) Noko ke, okwangoku simele sime siqinile size sibaxhathise. Kububulumko ukuba siqwalasele indlela anamandla ngayo uSathana nesinokumxhathisa ngayo ngempumelelo yena needemon zakhe.
Unamandla Kangakani USathana?
7. Unempembelelo engakanani uSathana ehlabathini?
7 Kuyo yonke imbali uSathana ebenyelisa uYehova. (IMizekeliso 27:11) Uye wanempembelelo kwabona bantu baninzi. Eyoku-1 kaYohane 5:19 ithi: “Ihlabathi liphela lisemandleni ongendawo.” Yilonto uMtyholi wakwaziyo ukuvavanya uYesu ngokumnika igunya nozuko lwazo “zonke izikumkani zomhlaba omiweyo.” (Luka 4:5-7) Ngokuphathelele uSathana, umpostile uPawulos uthi: “Ukuba, ke, iindaba ezilungileyo esizivakalisayo zigqutyuthelwe, zigqutyuthelwe kwabo batshabalalayo, phakathi kwabo uthixo wale nkqubo yezinto aye wamfamekisa iingqondo zabangakholwayo, ukuze ukhanyiso lweendaba ezilungileyo ezizukileyo ezingoKristu, ongumfanekiso kaThixo, lungakhanyi.” (2 Korinte 4:3, 4) USathana “ulixoki noyise wabo ubuxoki,” kodwa uzenza ‘ingelosi yokukhanya.’ (Yohane 8:44; 2 Korinte 11:14) Unamandla nendlela yokumfamekisa iingqondo zabalawuli behlabathi nabo babalawulayo. Uye wakhohlisa abantu ngeengcamango neemfundiso zonqulo ezibubuxoki.
8. Yintoni eboniswa yiBhayibhile ngokuphathelele impembelelo kaSathana?
8 Amandla nempembelelo kaSathana acaca ngexesha lomprofeti uDaniyeli, kwiinkulungwane ezintlanu ngaphambi kweXesha Eliqhelekileyo. Xa uYehova wathumela ingelosi ukuya kukhuthaza uDaniyeli, le ngelosi yathintelwa ‘yinkosana [engumoya] yommandla wasebukhosini wasePersi.’ Le ngelosi ithembekileyo yabanjwa iintsuku ezingama-21 de “uMikayeli, omnye weenkosana ezibalaseleyo,” weza kuyinceda. Kwale ngxelo inye ithetha ‘[ngedemon] eyinkosana yaseGrisi.’ (Daniyeli 10:12, 13, 20) KwiSityhilelo 13:1, 2, uSathana uchazwa ‘njengenamba’ enika irhamncwa lezopolitiko “amandla alo netrone yalo negunya elikhulu.”
9. AmaKristu alwa nabani?
9 Akumangalisi ke ngoko ukuba umpostile uPawulos wathi: “Sizamazamana, kungekhona negazi nenyama, kodwa noorhulumente, namagunya, nabalawuli behlabathi bobu bumnyama, kwanemikhosi yoomoya abangendawo kwezasezulwini iindawo.” (Efese 6:12) Nanamhlanje, iidemon ezilawulwa nguSathana uMtyholi azibonakali, ziphembelela abalawuli babantu nabantu bephela, zibashukumisela ukuba benze inkohlakalo engathethekiyo njengokutshabalalisa uhlanga, ubugrogrisi nokubulala. Ngoku makhe sihlolisise indlela esinokuyixhathisa ngayo ngempumelelo le mimoya inamandla.
Yintoni Enokusinceda Sixhathise?
10, 11. Sinokumxhathisa njani uSathana neengelosi zakhe ezingendawo?
10 Asinako ukuxhathisa uSathana neengelosi zakhe ezingendawo ngamandla ethu okanye ngobulumko bethu. UPawulos ucebisa oku: “Qhubekani nizuza amandla eNkosini nasekomeleleni kwayo.” Sifanele sicele uThixo asikhusele. UPawulos wongezelela athi: “Yambathani sonke isikrweqe sikaThixo ukuze nikwazi ukuma niqinile nxamnye namaqhinga kaMtyholi . . . Thabathani sonke isikrweqe sikaThixo, ukuze nikwazi ukuxhathisa ngemini embi nize, nakuba nenze zonke izinto ngokucokisekileyo, nime niqinile.”—Efese 6:10, 11, 13.
11 UPawulos ubongoza amanye amaKristu izihlandlo ezibini ukuba ambathe “sonke isikrweqe sikaThixo.” Igama elithi “sonke” lithetha ukuba iintlaselo zeedemon asinakuzixhathisa ukuba senza ngokungakhathali. Ziziphi ke izixhobo ezibalulekileyo kwesi sikrweqe somoya amaKristu amele abe nazo ngokungxamisekileyo ukuze axhathise iidemon?
“Yimani Niqinile”—Njani?
12. AmaKristu anokuyibhinqa njani inyaniso ezinqeni zawo?
12 UPawulos ucacisa athi: “Yimani niqinile, ke ngoko, nibhinqe inyaniso ezinqeni zenu, ninxibe isigcina-sifuba sobulungisa.” (Efese 6:14) Izixhobo ezibini zesikrweqe ekubhekiselwa kuzo apha, libhanti nesigcina-sifuba. Ijoni kwakufuneka linxibe ibhanti lalo liliqinise ukuze likhusele isinqe salo nokuze ikrele likwazi ukuhlala. Ngokufanayo, inyaniso yeBhayibhile ifuna siyibhinqe ngokuqinileyo njengebhanti, ukuze siphile ngokuvisisana nayo. Ngaba sinalo ucwangciso lokufunda iBhayibhile yonke imihla? Ngaba yonke intsapho iba nenxaxheba? Ngaba sinocwangciso lokuhlola itekisi yosuku njengentsapho? Ukongezelela, ngaba sihambisana neengcaciso zakutshanje ezikwiimpapasho esizilungiselelwe “likhoboka elithembekileyo neliyingqondi”? (Mateyu 24:45) Ukuba senjenjalo, siya kuba senza umgudu wokusebenzisa isiluleko sikaPawulos. Sikwanazo iividiyo neeDVD ezinokusinika ulwalathiso lweZibhalo. Ukubambelela ngokuqinileyo kwinyaniso kunokusinceda senze izigqibo zobulumko kuze kusikhusele ekulandeleni ikhondo eliphosakeleyo.
13. Sinokuyikhusela njani intliziyo yethu yokomfuziselo?
13 Isigcina-sifuba sokoqobo sasikhusela isifuba, intliziyo namanye amalungu abalulekileyo ejoni. UmKristu unokukhusela intliziyo yakhe yokomfuziselo—umntu anguye ngaphakathi—ngokuhlakulela ubulungisa bukaThixo nokubambelela kwimilinganiselo kaYehova yobulungisa. Isigcina-sifuba sokomfuziselo sisenza singalithabathi lula iLizwi likaThixo. Njengoko ‘sithiya okubi, sithande okulungileyo,’ siyazithintela iinyawo zethu “kuwo wonke umendo wobubi.”—Amosi 5:15; INdumiso 119:101.
14. Kuthetha ukuthini ‘ukuxhobisela iinyawo zethu iindaba ezilungileyo zoxolo’?
14 Amajoni aseRoma ayedla ngokunxiba izihlangu ezifanelekileyo ukuze akwazi ukuhamba imigama emide kwiindlela zalapho ezinkulu. Lithetha ntoni kumaKristu ibinzana elithi ‘iinyawo zenu nizixhobisele iindaba ezilungileyo zoxolo’? (Efese 6:15) Lithetha ukuba silungele ukwenza okuthile. Silungele ukushumayela iindaba ezilungileyo zoBukumkani bukaThixo ngalo lonke ixesha elifanelekileyo. (Roma 10:13-15) Ukuxakeka kwethu kubulungiseleli bamaKristu kusikhusela ‘kumaqhinga’ kaSathana.—Efese 6:11.
15. (a) Yintoni ebonisa ukuba libaluleke gqitha ikhaka elikhulu lokholo? (b) Yiyiphi “imijukujelwa evuthayo” enokonakalisa ukholo lwethu?
15 Umpostile uPawulos uhlabela mgama esithi: “Ngaphezu kwezinto zonke, thabathani ikhaka elikhulu lokholo, enothi ngalo nikwazi ukucima yonke imijukujelwa evuthayo yalowo ungendawo.” (Efese 6:16) Icebiso lokuba sithabathe ikhaka elikhulu lokholo litshayelelwa ngamazwi athi “ngaphezu kwezinto zonke” into ebonisa ukuba le nxalenye yesikrweqe ibaluleke gqitha. Ukholo lwethu lumele lungasileli nakancinane. Njengekhaka elikhulu elikhuselayo, ukholo lwethu lusikhusela ‘kwimijukujelwa evuthayo’ kaSathana. Le “mijukujelwa” imela ntoni namhlanje? Isenokuba zizinyeliso eziqatha, ubuxoki neenyaniso ezigqwethekileyo ezisasazwa ziintshaba nabawexuki bezama ukwenza ukholo lwethu lube buthathaka. Isenokuba kukulingwa zizinto eziphathekayo, zisenze sixakeke kukuthenga izinto ezininzi side sifune ukuxelisa abo baphila ubomi obuqheleqhele. Mhlawumbi banezindlu neemoto ezingayiwayo okanye badlisela ngezacholo zexabiso neempahla zefashoni. Kungakhathaliseki ukuba abanye benza ntoni, simele sibe nokholo olomeleleyo lokucima le “mijukujelwa evuthayo.” Sinokulakha size sihlale sinalo njani ukholo olomeleleyo?—1 Petros 3:3-5; 1 Yohane 2:15-17.
16. Yintoni enokusinceda sibe nokholo olomeleleyo?
16 Sinokusondela kuThixo ngokuhlala sifundisisa iBhayibhile rhoqo size sithandaze ngokunyanisekileyo. Sinokucela uYehova asiphe ukholo olomeleleyo size senze ngokuvisisana nemithandazo yethu. Ngokomzekelo, ngaba sisilungiselela kakuhle iSifundo seMboniselo seveki nganye sinenjongo yokuba nenxaxheba kuso? Ukholo lwethu luya komelela ukuba sifunda iBhayibhile neempapasho ezisekelwe kuyo.—Hebhere 10:38, 39; 11:6.
17. Sinokusamkela njani “isigcina-ntloko sosindiso”?
17 UPawulos uqukumbela inkcazelo yakhe ngesikrweqe sokomoya ngesi siluleko: “Yamkelani isigcina-ntloko sosindiso, nekrele lomoya, oko kukuthi, ilizwi likaThixo.” (Efese 6:17) Isigcina-ntloko sasikhusela intloko nobuchopho bejoni, izinto kanye ezenza ubani akwazi ukwenza isigqibo. Ngokufanayo, njengamaKristu ithemba lethu likhusela amandla ethu engqondo. (1 Tesalonika 5:8) Kunokuba sizalise iingqondo zethu ngosukelo lwehlabathi neminqweno yezinto eziphathekayo, simele sinikele ingqalelo ekucingeni ngethemba lethu esilinikwe nguThixo, njengoYesu.—Hebhere 12:2.
18. Kutheni simele singalutyesheli ucwangciso lwethu lokufunda iBhayibhile yonke imihla?
18 Into yokugqibela enokusikhusela kwimpembelelo kaSathana needemon zakhe lilizwi likaThixo, okanye isigidimi, esibhalwe eBhayibhileni. Esi sesinye isizathu esimele sisenze singalutyesheli ucwangciso lwethu lokufunda iBhayibhile yonke imihla. Ulwazi oluchanileyo lweLizwi likaThixo lusikhusela kubuxoki nobuqhetseba bukaSathana needemon zakhe nakwiintetho ezinyelisayo zabawexuki.
‘Ngazo Zonke Izihlandlo Qhubekani Nithandaza’
19, 20. (a) Yintoni eza kwenzeka kuSathana needemon zakhe? (b) Yintoni enokusomeleza ngokomoya?
19 Sele kusemnyango ukushenxiswa kukaSathana, iidemon zakhe neli hlabathi lingendawo. USathana uyazi ukuba “ixesha analo lifutshane.” Unomsindo yaye ulwa nabo “bagcina imiyalelo kaThixo nabanomsebenzi wokungqinela uYesu.” (ISityhilelo 12:12, 17) Kubalulekile ukuba sixhathise uSathana needemon zakhe.
20 Simele sibe nombulelo ngesiluleko sokuba sambathe sonke isikrweqe sokomoya sikaThixo. UPawulos uqukumbela ingxubusho yakhe yesikrweqe sokomoya ngesi siluleko: “Ngazo zonke izihlandlo niqhubeka nithandaza ngako konke ukuthandaza nokukhunga nikuwo umoya. Yaye ngenxa yoko hlalani niphaphile rhoqo kwaye nikhunga ngenxa yabo bonke abo bangcwele.” (Efese 6:18) Umthandazo unokusomeleza ngokomoya uze usincede sihlale siphaphile. Masinikel’ ingqalelo kumazwi kaPawulos size siqhubeke sithandaza, kuba oku kuya kusinceda sixhathise uSathana needemon zakhe.
Ufunde Ntoni?
• Babakho njani uSathana needemon zakhe?
• Unamandla kangakanani uMtyholi?
• Sinokuzikhusela njani kuSathana needemon zakhe?
• Sinokusambatha njani sonke isikrweqe sikaThixo?
[Imifanekiso ekwiphepha 26]
“Baziphawula ke oonyana boThixo oyinyaniso iintombi zabantu”
[Umfanekiso okwiphepha 28]
Ngaba unokukwazi ukuzichaza iinxalenye ezintandathu zesikrweqe sokomoya?
[Imifanekiso ekwiphepha 29]
Kutheni ukwenza ezi zinto kunokusinceda sikwazi ukuxhathisa uSathana needemon zakhe?