Uloyiso Kwinkundla Yamalungelo Abantu YaseYurophu
NGOJANUWARI 11, 2007, iNkundla Yamalungelo Abantu YaseYurophu, eseStrasbourg, eFransi, yawisa isigwebo ngazwi-nye igwebela amaNgqina kaYehova aseRashiya kwisimangalo sawo nxamnye neRussian Federation. Eso sigqibo sayo sanika amaNgqina kaYehova inkululeko yonqulo nelungelo lokuphulaphulwa kwesimangalo sawo ngaphandle kwekhethe. Makhe sithi vandla ngento eyabangela ukuba kude kuze kufikelelwa kweli nqanaba.
Ibandla lamaNgqina kaYehova elikwisixeko saseChelyabinsk, eRashiya, linabantu abaninzi abazizithulu. Iintlanganiso zabo bebeziqhubela kwikholeji yokuqeqeshela abantu kwimisebenzi yobugcisa. NgeCawa, umhla ka-Aprili 16, 2000, intlanganiso yabo yaphazanyiswa libhinqa elalingusihlalo, okanye umKomishinala, kwiKomishini Yamalungelo Abantu yesithili kunye nezikhulu ezibini zamapolisa nenye indoda eyayinganxibanga yunifom. Ngenxa yekhethe labo, ngakumbi loo mKomishinala, abo babehlanganisene apho babekwa izityholo zokuqhuba intlanganiso engekho mthethweni. Ukususela ngoMeyi 1, 2000, abazange baphinde bavunyelwe ukuba basebenzise elo holo.
AmaNgqina kaYehova amangala kwinkundla yaseChelyabinsk, kodwa abuya ephaca. UMgaqo-Siseko WaseRashiya neNkomfa Yokukhuselwa Kwamalungelo Abantu neNkululeko Esisiseko uyiqinisekisa kakuhle inkululeko yonqulo nenkululeko yokuhlanganisana. Ngoko eso simangalo sasiwa kwinkundla yeso sithili emva koko kwabhenelwa kwinkundla yenqila. Kwityala elalingaphambi kweli, ngoJulayi 30, 1999, inkundla ephakamileyo yawisa isigwebo esithi “ngokoMthetho waseRashiya wenkululeko yesazela neentlanganiso zonqulo, ibinzana elithi ‘ngaphandle kokuphazanyiswa’ lithetha ukuba akukho mfuneko yokuqala ufumane imvume kwabasemagunyeni xa uza kuba neentlanganiso zonqulo kwizakhiwo ezilungiselelwe [loo njongo].” (Izibiyeli zezabo.) Nakuba kunjalo, ezo zimangalo zakhatywa ziinkundla zesithili nezenqila.
NgoDisemba 17, 2001, eli tyala lasiwa kwiNkundla Yamalungelo Abantu YaseYurophu. Laphulaphulwa ngoSeptemba 9, 2004. Nanga amagqabantshintshi esigwebo saloo Nkundla:
“INkundla ifumanisa ukuba kuye kwaphazanyiswana nelungelo labamangali lokuba nenkululeko yonqulo, kuba, ngomhla we-16 ngoAprili 2000, amagunya kaRhulumente aye avala intlanganiso yonqulo ngaphambi kwexesha.”
“Sasingekho isizathu esisemthethweni sokuchitha loo ntlanganiso yonqulo neyayikwisakhiwo esiqeshelwe loo njongo ngokusemthethweni.”
“[INkundla] yabonisa nento yokuba ngokomthetho weNkundla Ephakamileyo YaseRashiya akukho mfuneko yokufumana nayiphi na imvume yabasemagunyeni ngaphambi kokuba uqhube intlanganiso yonqulo.”
“Ngenxa yoko kuye kophulwa umthetho okwiSolotya 9 [inkululeko yonqulo] weNkomfa yamalungelo ngokuphazanyiswa kwaloo ntlanganiso yabamangali ngumKomishinala namahlakani akhe ngomhla we-16 kuAprili 2000.”
“INkundla ifumanise ukuba iinkundla eziphantsi ziye zasilela kumsebenzi wazo . . . ukubonisa ukuba izimangalo ziye zavakala kakuhle ngendlela engenakhwiniba . . . kuye kophulwa umthetho okwiSolotya 6 [ilungelo lokuphulaphulwa] leNkomfa.”
AmaNgqina kaYehova ambulela gqitha uThixo ngokuwanika olu loyiso kwiNkundla Yamalungelo Abantu YaseYurophu. (INdumiso 98:1) Siya kuba nefuthe kangakanani esi sigqibo seNkundla? UJoseph K. Grieboski, umongameli weInstitute on Religion and Public Policy uthi: “Esi sesinye sezigqibo ezibalulekileyo kwinkululeko yonqulo kulo lonke elaseYurophu, njengoko esi sigqibo siza kuba nefuthe kumalungelo onqulo kuwo onke amazwe aphantsi kweNkundla Yamalungelo Abantu YaseYurophu.”