Ukulunga Kuqubisana Nobubi—Idabi Ekudala Lisiliwa

KWIMIFANEKISO eshukumayo yeminyaka edluleyo, “umntu olungileyo” ebesoloko eyoyisa imikhosi yobubi. Kodwa oku ngokoqobo akuzange kube lula ngolo hlobo. Ngokufuthi kwihlabathi lokwenene, ububi bubonakala ibubo obukhonyayo.

Iingxelo ezihambis’ umzimba zezenzo zobubi ziyinto yamihla le kwiindaba zangokuhlwa. Kumntla welaseUnited States, indoda yaseMilwaukee ibulala abantu abali-11 ize iqhusheke amalungu aseleyo emizimba yabo esuswe amalungu athile kwisikhenkcisi sayo. Mgama ngasemazantsi, umntu ongaziwayo umbonzeleka kwikhefi yaseTexas aze atshise ngombayimbayi engakhethe bani kangangemizuzu elishumi, eshiya abantu abangama-23 itshoba lilel’ umbethe, kuquka naye. EKorea umchasi onganelisekanga untumeka umlilo kwiHolo yoBukumkani yamaNgqina kaYehova, ebulala abanquli abali-14.

Oku kuqhambuka kobubi ngamaxesha athile asikuphela kwako okukhoyo kodwa kukwakho nobunye ububi oboyikekayo obuchaphazela ihlabathi—ukutshatyalaliswa kweentlanga zoluntu. Kuqikelelwa ukuba kule nkulungwane kuphela kwiinkqubo zobuhlanga nezobupolitika zokususa abantu abangafunwayo kuye kwatshatyalaliswa isigidi esinye sama-Armenia, izigidi ezithandathu zamaYuda namaCambodia angaphezu kwesigidi esinye. Oko kufane kubizwe ngokuba kukucocwa kohlanga kuye kwabathwaxa kanobom abaninzi kwindawo eyayisakuba yiYugoslavia. Akukho mntu waziyo ukuba zininzi kangakanani izigidi zabantu abamsulwa abaye bathuthunjiswa ngenkohlakalo ehlabathini jikelele.

Iintlekele ezinjengezi zisinyanzelela ukuba sijamelane nalo mbuzo uphazamisayo, Kutheni abantu besenza izinto ngolu hlobo? Ezi zenzo zenkohlakalo asinakuzibetha ngoyaba njengezinto ezenziwa ngabantu abambalwa abangemanga kakuhle engqondweni. Ubungakanani bobubi obenziweyo kule nkulungwane yethu abunakuchazwa nje kuphela ngolo hlobo.

Isenzo esibi sichazwa njengento ephosakeleyo ngokokuziphatha. Kusisenzo esenziwe nguthile onako ukukhetha phakathi kokwenza okulungileyo nokwenza okubi. Ngandlel’ ithile izigqibo zakhe zokwenza okulungileyo ziyagqwetheka buze ububi boyise. Kodwa kutheni oku kusenzeka yaye kwenzeka njani?

Ngokufuthi indlela abantu bonqulo ababuchaza ngayo ububi ayanelisi. Isithandi sobulumko esingumKatolika uThomas Aquinas sathi “izinto ezininzi ezilungileyo bezingayi kubakho ukuba uThixo ebengavumelanga ububi bubekho.” Izithandi zobulumko zamaProtestanti ezininzi zineembono ezinjalo. Ngokomzekelo, njengokuba kuboniswe kwiThe Encyclopædia Britannica, uGottfried Leibniz ububi wabujonga “njengento nje yokuchasana nokulunga ehlabathini, nto leyo ebubangela bande ngokwanda kokulunga.” Ngamanye amazwi, wayekholelwa kwelokuba kufuneka kubekho ububi ukuze siqonde ukulunga. Ukuqiqa ngolo hlobo kufana nokuxelela umguli onomhlaza ukuba isigulo sakhe sikoko kufunekayo ukuze senze omnye umntu azive ukuba uyaphila ngokwenene kwaye ungumqabaqaba.

Utyekelo lokwenza okubi lumele ukuba luvela ndawen’ ithile. Ngaba uThixo ngandlel’ ithile ubekek’ ityala? IBhayibhile iyaphendula: “Makungabikho namnye utshoyo akuhendwa ukuthi, Ndihendwa kwaThixo; kuba uThixo akanakuhendeka kokubi, akahendi namnye ke yena.” Ukuba asingoThixo obekek’ ityala, ngubani? Iindinyana ezilandelayo zinikela impendulo: “Elowo ke uhendwa akutsalwa, abanjiswe, yeyakhe inkanuko. Ithi inkanuko, yakuba ithabathile, izale isono.” (Yakobi 1:13-15) Ngaloo ndlela isenzo sobubi sizalwa xa umnqweno wobubi uye wahlakulelwa kunokuba ukhutshwe. Noko ke, akuphelelanga apho.

IZibhalo zichaza ukuba iminqweno yobubi ivela ngenxa yokuba uluntu lunesiphako esisisiseko—ukungafezeki okwazuzw’ ilifa. Umpostile uPawulos wabhala: “Ngenxa yoko, njengokuba isono sangena ngamntu mnye ehlabathini, kwangena ke ukufa ngaso isono; kwaza ngokunjalo ukufa kwabatyhutyha abantu bonke, ekubeni bonke bonayo.” (Roma 5:12) Ngenxa yesono esasizuz’ ilifa, ukuzingca kusenokuboyisa ububele ekucingeni kwethu, yaye inkohlakalo isenokuyoyisa imfesane.

Kambe ke, abantu abaninzi ngokwemvelo bayazi ukuba indlela ethile yokuziphatha iphosakele. Isazela sabo—okanye ‘umthetho obhalwe ezintliziyweni zabo’ njengokuba uPawulos esibiza njalo—siyabanqanda ekwenzeni isenzo sobubi. (Roma 2:15) Sekunjalo, imeko-bume enenkohlakalo isenokuzicinezela iimvakalelo ezinjalo, yaye isazela sisenokufa ukuba ngokuthe rhoqo siyatyeshelwa.a—Thelekisa eyoku-1 kuTimoti 4:2.

Ngaba ukungafezeki koluntu kukodwa kungunobangela wabo bonke ububi obukhoyo kwixesha lethu? Umbhali-mbali uJeffrey Burton Russell wathi: “Kuyinyaniso ukuba mntu ngamnye kuthi unobubi, kodwa naxa bonke obo bubi budityaniswa abungonobangela wobubi obabusenzeka eAuschwitz . . . Ububi obukulo mlinganiselo bubonakala buluhlobo olwahlukileyo kwaye bukumlinganiselo owahlukileyo.” UYesu Kristu wawuchaza ngokuthe ngqo umthombo wolu hlobo lwahlukileyo lobubi.

Ngaphambi nje kokufa kwakhe, uYesu wachaza ukuba abo bantu babeceba ukumbulala babengakwenzi oko kuba ingumnqweno wabo kuphela ukwenjenjalo. Babekhokelwa ngamandla angabonakaliyo. UYesu wabaxelela oku: “Nina ningaboyihlo uMtyholi, neenkanuko zoyihlo niyathanda ukuzenza. Yena waye esisibulala-mntu kwasekuqaleni; akemi enyanisweni.” (Yohane 8:44) UMtyholi, uYesu awambiza ngokuthi ‘ngumphathi weli hlabathi,’ ngokucacileyo unendima ebalaseleyo ekuphembeleleni ububi.—Yohane 16:11; 1 Yohane 5:19.

Ukungafezeki koluntu nempembelelo kaSathana ezo zinto ziye zaphumela ekubandezelekeni okukhulu kangangamawaka eminyaka. Yaye akukho nto ibonisa ukuba ulawulo lwazo kuluntu luyathotha. Ngaba ububi buya kuhlala bukho? Okanye ngaba imikhosi yokulunga ekugqibeleni iya kubuphelisa?

[Umbhalo osemazantsi]

[Inkcazelo Ngomfanekiso okwiphepha 2]

Cover: U.S. Army photo

[Inkcazelo Ngomfanekiso okwiphepha 3]

U.S. Army photo