Ukuya Ekukhanyeni

IINQABA ezikhanyisela iinqanawa ziye zasindisa inkitha yabantu. Noko ke, kumqhubi wenqanawa odiniweyo, oku kukhanya kumgama akwaneli nje ukumlumkisa ngamawa aphantsi kwamanzi anokuba yingozi. Kumxelela nokuba sel’ eza kufika apho ebesiya. Ngokufanayo, amaKristu namhlanje sele eza kulugqiba uhambo lwawo olude, obelutyhubela kwiingozi zobumnyama bokomoya obukweli hlabathi. EBhayibhileni, uluntu ngokubanzi—inkitha yabantu abahlukanisiweyo noThixo—lufaniswa ‘nolwandle olulatyuzayo, xa lungakwazi ukuzola, namanzi alo emana evumbulula ukhula lwaselwandle nodaka.’ (Isaya 57:20) Abantu bakaThixo baphila phakathi kwabantu abanjalo. Sekunjalo, banethemba eliqaqambileyo lokusinda, elikukukhanya kokomfuziselo abaqinisekileyo ngako. (Mika 7:8) UYehova esebenzisa iLizwi lakhe elibhaliweyo wenze ukuba “ukukhanya kulibengezelele ilungisa, nemihlali kwabo bathe tye entliziyweni.”—INdumiso 97:11.a

Noko ke, amanye amaKristu aye avumela iziphazamiso ziwahlehlisele kude ekukhanyeni kukaYehova, nto leyo ebangele ukuba inqanawa yawo yokholo yaphulwe koko sinokukufanisa namatye enkohliso—izinto eziphathekayo, ukuziphatha okubi, okanye uwexuko. Ewe, njengakwinkulungwane yokuqala, abaninzi namhlanje baye “baphukelwa yinqanawa mayelana nokholo.” (1 Timoti 1:19; 2 Petros 2:13-15, 20-22) Ihlabathi elitsha sinokulifanisa nezibuko esisinge kulo. Ekubeni lisemnyango ngolu hlobo, kuya kuba yintlungu engathethekiyo ukuphulukana nothando lukaYehova.

Kuphephe ‘Ukwaphukelwa Yinqanawa Mayelana Nokholo’

Kwiinkulungwane ezidluleyo, kwakukhe kwenzeke inqanawa ihambe kulwandle olukhulu, ngaphandle kwengxaki kodwa iyokwaphuka xa isondela ezibukweni. Ixesha elininzi inqanawa yayiba sengozini xa sele iza kufika emhlabeni. Ngokufanayo, le “mihla yokugqibela” yenkqubo yezinto lelona xesha liyingozi kubantu abaninzi. IBhayibhile ichan’ ucwethe xa isithi “kunzima ukujamelana nayo,” ngokukodwa kumaKristu azahluleleyo.—2 Timoti 3:1-5.

Kutheni kunzima kangaka ukuphila kule mihla yokugqibela? Kaloku, uSathana uyazi ukuba ixesha analo lokulwa nabantu bakaThixo “lifutshane.” Ngoko, uya eyiqinisa imigudu yakhe yokwaphula ukholo lwabo. (ISityhilelo 12:12, 17) Sekunjalo, asishiywanga nyanyeni. UYehova akayekanga ukuba ligwiba labo bathobela isiluleko sakhe. (2 Samuweli 22:31) Usinike imizekelo esilumkisayo ebhenca inkohlakalo echuliweyo kaSathana. Makhe siqwalasele nje imizekelo emibini ebandakanya uhlanga lwakwaSirayeli njengoko lwalusondela kwiLizwe Lesithembiso.—1 Korinte 10:11; 2 Korinte 2:11.

Emgubasini WeLizwe Lesithembiso

Ekhokelwa nguMoses, amaSirayeli asaba eYiputa. Kungabanga thuba lide, asondela kumda osemazantsi weLizwe Lesithembiso. Ngoko uMoses wathumela amadoda ali-12 ukuba aye kuhlola elo lizwe. Iintlola ezilishumi kuwo ezazingenakholo zabuya nengxelo enganiki themba, zisithi amaSirayeli akanakuwoyisa amaKanan kuba azizigantsontso zamadoda ayiqhelileyo imfazwe yaye ‘makhulu ngokungaqhelekanga.’ Asabela njani amaSirayeli akuva oku? Ingxelo ithi aqalisa ukumbombozela kuMoses noAron, esithi: “Yini na ukuba uYehova asizise kweli lizwe ukuze siwe likrele? Abafazi nabantwana bethu baza kuphangwa. . . . Masizimisele intloko, sibuyele eYiputa!”—Numeri 13:1, 2, 28-32; 14:1-4.

Khawuzikis’ ukucinga ngale ngxelo! Apha sithetha ngabantu ababekho xa uYehova ebetha iYiputa enamandla neyayiligunya lehlabathi laloo mihla ngezibetho ezilishumi ezitshabalalisayo, babona nommangaliso owoyikekayo owenzeka kuLwandle Olubomvu. Ngoku babekufuphi neLizwe Lesithembiso, into eyayifuneka yayikukuba bangqale kulo kanye njengenqanawa esondela kwisibane esiyikhokelela apho isinge khona. Kodwa bacinga ukuba uYehova akanakukwazi ukubhukuqa ubukumkani baseKanan obungabalulekanga nganto nobabahlulelene bodwa. Oku kungabi nakholo kwabo kwamdimaza uThixo kunye neentlola ezimbini ezazikhaliphile, uYoshuwa noKalebhi, ezathi iKanan ‘isisonka [kumaSirayeli].’ Ezi ntlola zimbini zeza nenkcazelo echanileyo, kuba zaziyibonile iKanan. Xa abantu bengazange bangene kwiLizwe Lesithembiso, uYoshuwa noKalebhi baqhubeka nohambo lwasentlango kangangamashumi eminyaka, abazange bafe naloo maSirayeli ayengenakholo. Ewe, uYoshuwa noKalebhi bakhokelela isizukulwana esilandelayo ngaphandle kwentlango besisa kwiLizwe Lesithembiso. (Numeri 14:9, 30) Kwakhona, xa uSirayeli esondela kwiLizwe Lesithembiso isihlandlo sesibini, uza kujamelana novavanyo olwahlukileyo. Uza kwenza ntoni?

Esebenzisa umprofeti wobuxoki uBhileham, uKumkani uBhalaki wakwaMowabhi wazama ukuwaqalekisa amaSirayeli. Noko ke, uYehova walithintela eli yelenqe ngokubangela ukuba uBhileham awasikelele endaweni yokuwaqalekisa. (Numeri 22:1-7; 24:10) Oku akuzange kumphelise mandla uBhileham, kodwa wavela nelinye iyelenqe lokwenza abantu bakaThixo bangalifumani elo lizwe. Wenza ntoni? Wabahendela ekuziphatheni okubi nasekunquleni uBhahali. Nangona neli cebo lingazange liphumelele ngokupheleleyo, kodwa kwalukuhlwa amaSirayeli angama-24 000. Aziphatha kakubi nabafazi bamaMowabhi aza azibandakanya noBhahali wasePehore.—Numeri 25:1-9.

Khawufan’ ucinge! Uninzi lwaloo maSirayeli lwazibonela ngawalo amehlo xa uYehova elukhuphela ngaphaya ‘kwentlango enkulu neyoyikekayo.’ (Duteronomi 1:19) Sekunjalo, xa lusemgubasini wokufumana ilifa lawo, abantu bakaThixo abangama-24 000 bayekelela kwiminqweno yenyama ibe wababulala. Esinjani sona isilumkiso kubakhonzi bakaThixo namhlanje njengoko sele beza kufumana ilifa elingenakulinganiswa nanto!

Kwilinge lakhe lokugqibela lokuthintela abakhonzi bakaYehova banamhlanje ukuba bangawufumani umvuzo, akuyomfuneko ukuba uSathana eze namacebo angaziwayo. Ngokufanayo noko kwenzeka kumaSirayeli ngesihlandlo sokuqala esiya kwiLizwe Lesithembiso, uSathana usoloko ezama ukuboyikisa abantu nokubenza babe namathandabuzo, enoba kungezisongelo, intshutshiso okanye ukugculelwa. Wambi amaKristu aye ayekelela kwezo zoyikiso. (Mateyu 13:20, 21) Elinye iqhinga elimsebenzelayo lelokungcolisa abantu ngokuziphatha. Ngesinye isihlandlo, bambi kwabo barhubuluzele kwibandla lamaKristu baye bazama ukonakalisa abo babuthathaka ngokomoya nabayithandabuzayo indlela abakuyo enokukhanya okuvela kuThixo.—Yuda 8, 12-16.

Kubantu abaqolileyo ngokomoya nabaphaphileyo, indlela eya iwohloka ngayo imilinganiselo yokuziphatha kweli hlabathi ibubungqina bokuba uSathana uyazi ukuba utshelwe zizicheku. Ewe, uSathana uyazi ukuba kungekudala akazi kukwazi ukufikelela kubakhonzi abathembekileyo bakaThixo. Ngoko ke, ngokuqinisekileyo eli lixesha lokuba sihlale siyiphaphele imigudu kaSathana.

Uncedo Lokuhlala Uphaphile Ngokomoya

Umpostile uPetros wathi ilizwi likaThixo lesiprofeto ‘lisisibane esikhanya kwindawo emnyama,’ kuba linceda amaKristu aqonde indlela ephunyezwa ngayo injongo kaThixo. (2 Petros 1:19-21) Abo bahlakulela ukulithanda iLizwi likaThixo baze baqhubeke bekhokelwa lilo bayabona ukuba uYehova uza kuwenza uthi tye umendo wabo. (IMizekeliso 3:5, 6) Ngethemba abo banombulelo ‘bamemelela ngovuyo ngenxa yemeko elungileyo yentliziyo,’ ngoxa abangamaziyo uYehova okanye abazishiyayo iindlela zakhe ‘benentliziyo ebuhlungu nokuwa komoya.’ (Isaya 65:13, 14) Ngenxa yoko, ukuba sikukhuthalele ukufunda iBhayibhile sinokuhlala sinikele ingqalelo kwithemba esiqinisekileyo ngalo kuneziyolo zokomzuzwana zale nkqubo yezinto.

Kwakhona, umthandazo ubalulekile ukuze sihlale siphaphile ngokomoya. Xa wayethetha ngesiphelo sale nkqubo yezinto, uYesu wathi: “Hlalani niphaphile, ngoko, lonke ixesha nisenza isikhungo ukuze niphumelele ekubalekeni zonke ezi zinto zimiselwe ukubakho, nasekumeni phambi koNyana womntu.” (Luka 21:34-36) Phawula indlela uYesu alisebenzisa ngayo igama elithi “isikhungo,” gama elo elibonisa umthandazo onyanisekileyo. UYesu wayesazi ukuba umntu wayeza kuba semngciphekweni wokuphulukana nobomi obungunaphakade kula maxesha amanqam. Ngaba imithandazo yakho ibonisa ukuba ukunqwenela ngokunyanisekileyo ukuhlala uthe qwa ngokomoya?

Singaze silibale ukuba ingozi yokwenene kuhambo lwethu sinokuyifumana xa sele sikufuphi apho siya khona. Ngoko, kubalulekile ukuba singaphulukani nokukhanya okunokusikhokelela kusindiso.

Zilumkele Izibane Zobuxoki

Mandulo phayaa, zisasetyenziswa kakhulu iinqanawa, amadoda akhohlakeleyo ayebuthanda kakhulu ubusuku obungenanyanga, xa oomatiloshe bengaboni kakuhle. Phakathi kwezinye izinto la madoda ayebeka izibane kwiindawo eziyingozi elunxwemeni ukuze oomatiloshe bajikele iinqanawa kwezo ndawo. Abo babekhohliseka babesaphukelwa ziinqanawa, kuphangwe iimpahla, kuze kufe nabantu.

Ngokufanayo, uSathana, ‘oyingelosi yokukhanya’ ekhohlisayo, ufuna ukuphelisa ulwalamano lukaThixo nabantu Bakhe. UMtyholi unokusebenzisa ‘abapostile bobuxoki nabalungiseleli bobulungisa’ abangabawexuki ukuze akhohlise abo bangalumkanga. (2 Korinte 11:13-15) Kodwa, kanye njengokuba umatiloshe ophaphileyo nabantu asebenza nabo bengenakuqhathwa zizibane zenkohliso, amaKristu ‘athe ngokuwasebenzisa amandla awo okuqonda awaqeqeshela ukwahlula okulungileyo nokubi’ awalahlekiswa ngabantu abakhuthaza iimfundiso zobuxoki neentanda-bulumko eziyingozi.—Hebhere 5:14; ISityhilelo 2:2.

Oomatiloshe banoludwe lwezindlu ezikhanyisela iinqanawa abaza kudibana nazo endleleni. Kolu ludwe kuchazwe nendlela ebonakala ngayo indlu nganye, kuquka nomqondiso wayo owahlukileyo kowezinye. IThe World Book Encyclopedia ithi: “Oomatiloshe bayakwazi ukuqonda ukuba yiyiphi indlu abayibonayo—batsho bayazi indawo abakuyo—ngokuqwalasela indlela ebonakala ngayo nangokujonga kuludwe abanalo.” Ngokufanayo, iLizwi likaThixo linceda abo bantliziyo zinyanisekileyo ukuba balwazi unqulo lokwenyaniso nabantu abakulo, ingakumbi kula maxesha esiphelo, kuba uYehova uluphakamise ngaphezu konqulo lobuxoki. (Isaya 2:2, 3; Malaki 3:18) Ebonisa indlela olwahluke ngokuphelele ngayo unqulo lokwenyaniso kolobuxoki, uIsaya 60:2, 3 uthi: “Ubumnyama buya kuwugubungela umhlaba, nesithokothoko amaqela eentlanga; kodwa phezu kwakho uYehova uya kukhanyisa, bubonakale phezu kwakho ubuqaqawuli bakhe. Yaye ngokuqinisekileyo iintlanga ziya kuya ekukhanyeni kwakho, nookumkani ekuqaqambeni kokukhanyisa kwakho.”

Njengoko izigidi zabantu abaphuma kuzo zonke iintlanga ziqhubeka zikhanyiselwa nguYehova, aziyi kwaphukelwa ngumkhombe mayelana nokholo lwazo xa sele ziza kufika entanjeni. Kunoko, ziya kuhamba ngokukhuselekileyo ukutyhubela ezi ntsuku ziseleyo zale nkqubo yezinto zisinge kwizibuko elilihlabathi elitsha elinoxolo.

[Umbhalo osemazantsi]

[Umfanekiso okwiphepha 15]

Ngokufanayo noomatiloshe, amaKristu akulumkele ukukhohliswa zizibane zobuxoki