Fundisa Umntwana Wakho Ukuba Seluxolweni Nabanye

Engakwazi ukuzibamba yimincili ekubeni intsapho yakowabo ifudukela kwelinye ilizwe, uNicole oneminyaka esibhozo wayedla ngokuxelela umhlobo wakhe osenyongweni uGabrielle ngazo zonke iinkcukacha eziphathelele ukuhamba kwakhe. Ngolunye usuku, ekruqukile uGabrielle waxelela uNicole ukuba akanamdla ngokuthetha ngokuhamba kwakhe. Ebuhlungu kakhulu yaye enomsindo, uNicole wathi kunina, “Andifuni kuphinda ndimbone uGabrielle!”

IINGXABANO phakathi kwabantwana enjengekaNicole noGabrielle zidla ngokufuna abazali—kungekhona nje ukuthuthuzela kodwa kwanokubonisa indlela yokuzisingatha. Ngokuqhelekileyo abantwana badla ngokubonakalisa “iimpawu zobusana,” yaye abadli ngokukuqonda oko kunokubangelwa ngamazwi nezenzo zabo. (1 Korinte 13:11) Bafuna ukuncedwa bahlakulele neempawu ezithile ukuze bakwazi ukuba seluxolweni nabanye entsatsheni nakwezinye iindawo.

Abazali abangamaKristu banomdla wokwenene ekuqeqesheni abantwana babo ukuba ‘bafune uxolo, baluphuthume.’ (1 Petros 3:11) Ulonwabo olubakho xa umntu edala uxolo luwufanele umgudu ukuze loo mntu angarhaneli abanye, anxunguphale okanye abe nenzondo. Ukuba ungumzali, unokubafundisa njani abantwana bakho ukuba babe seluxolweni nabanye?

Bancede Bafune Ukumkholisa “UThixo Woxolo”

UYehova ubizwa ngokuba ‘nguThixo woxolo’ yaye kuthiwa ‘unika uxolo.’ (Filipi 4:9; Roma 15:33) Ngoko ke, abazali abalumkileyo ngobuchule basebenzisa iLizwi likaThixo, iBhayibhile, ukuhlakulela ebantwaneni babo umnqweno wokufuna ukukholisa uThixo nokuxelisa iimpawu zakhe. Ngokomzekelo, nceda abantwana bakho bazakhele umfanekiso-ngqondweni woko kwabonwa ngumpostile uYohane kumbono wakhe omangalisayo—umnyama omangalisayo onjenge-emaraldi ungqonge itrone kaYehova.a (ISityhilelo 4:2, 3) Bacacisele ukuba lo mnyama umela uxolo lukaYehova yaye bonke abantu abamthombelayo nabo baza kusikelelwa ngoxolo.

Kwakhona uYehova ulungiselele ulwalathiso ngoNyana wakhe, uYesu, obizwa ngokuba ‘yiNkosana yoXolo.’ (Isaya 9:6, 7) Ngoko ke, funda uze uxubushe nabantwana bakho ngeengxelo zeBhayibhile apho uYesu wafundisa khona ngezifundo ezixabisekileyo zokuphepha iingxabano neengxaki. (Mateyu 26:51-56; Marko 9:33-35) Chaza isizathu sokuba uPawulos, ‘owayengumntu osileyo,’ aguqule iindlela zakhe aze abhale ukuba “ikhoboka leNkosi akufuneki lilwe, kunoko kufuneka lithantamise kubo bonke, . . . linyamezela ububi.” (1 Timoti 1:13; 2 Timoti 2:24) Isenokukothusa indlela asabela ngayo umntwana wakho.

UEvan ukhumbula egculelwa ngomnye umfana oneminyaka esixhenxe awayehamba naye ngebhasi xa esiya esikolweni. Uthi: “Wayendicaphukisa lo mfana kangangokuba ndandifuna ukuziphindezela! Kodwa ndakhumbula isifundo endasifunda ekhaya ngabo baqalisa umlo. Ndandisazi ukuba uYehova akafuni ukuba ‘ndibuyisele ububi ngobubi’ kodwa ufuna ‘ukuba ndibe noxolo nabantu bonke.’” (Roma 12:17, 18) UEvan wafumana amandla nenkalipho yokuphelisa le meko ngokusabela ngomoya wobulali. Wayefuna ukukholisa uThixo woxolo.

Yiba Ngumzali Oseluxolweni Nabanye

Ngaba kukho uxolo ekhayeni lakho? Ukuba kunjalo, abantwana bakho banokufunda lukhulu ngoxolo, ngokubona nje izenzo zakho. Indlela ophumelela ngayo ekufundiseni abantwana bakho ngoxolo ixhomekeke ubukhulu becala kwindlela wena ozixelisa ngayo iindlela zikaThixo noKristu zoxolo.—Roma 2:21.

URuss noCindy bayazibhokoxa beqeqesha oonyana babo ababini, bebabongoza ukuba babonise uthando xa abanye bebacaphukisa. UCindy uthi: “Isimo sam nesikaRuss sengqondo esisibonisayo kwaba bafana nakwabanye xa kuvela iingxaki sinendima enkulu kwindlela abaza kuzicombulula ngayo iingxaki ezifanayo.”

Kwanaxa usenza impazamo—ekubeni nabazali bezenza iimpazamo—unokusebenzisa elo thuba ukufundisa isifundo esibalulekileyo. UStephen uvuma ngelithi: “Kukho amaxesha xa mna nomfazi wam, uTerry, siye sabohlwaya abantwana bethu abathathu ngaphambi kokuba sifumane zonke iinkcukacha. Xa oko kusenzeka, siye sicele uxolo.” UTerry wongezelela ngelithi: “Siyabaxelela abantwana bethu ukuba nathi asifezekanga yaye siyazenza iimpazamo. Sivakalelwa kukuba oku akubangeli uxolo nje kuphela entsatsheni yethu kodwa kukwanceda abantwana bafunde ukudala uxolo.”

Ngaba abantwana bakho bafunda indlela yokuba seluxolweni ngokubona indlela wena obaphatha ngayo? UYesu wasibongoza esithi: “Zonke izinto, ngoko, enifuna abantu bazenze kuni, yenzani ngokunjalo nani kubo.” (Mateyu 7:12) Phezu kwazo nje iimpazamo ozenzayo, qiniseka ukuba uthando olubonisayo kubantwana bakho luya kuvelisa imiphumo emihle. Abantwana bakho baya kusabela kakuhle xa besalathiswa ngothando.

Cotha Ukuba Nomsindo

IMizekeliso 19:11 ithi: “Ingqiqo yomntu ngokuqinisekileyo imenza azeke kade umsindo.” Unokubanceda njani abantwana bakho bahlakulele ingqiqo enjalo? UDavid uchaza into yena nomfazi wakhe uMariann eye yabanceda kunyana nentombi yabo. Uthi: “Xa becatshukiswa ngumntu othetha okanye owenza into ebakhubekisayo, siyabanceda ukuba babe novelwano. Sibabuza imibuzo enjengethi: ‘Ngaba loo mntu ebenosuku olucinezelayo? Ngaba kusenokwenzeka ukuba unomona? Ngaba ukho umntu oye wamkhubekisa?’” UMariann wongeza ngelithi, “Oku kuyabanceda abantwana bazole kunokuba bazivumele bahlale beneengcinga eziphosakeleyo okanye bazame ukubek’ ityala umntu othile.”

Uqeqesho olunjalo lunokuba nemiphumo emihle. Phawula indlela uNicole, okhankanywe ekuqaleni kweli nqaku aye wancedwa ngayo ngunina uMichelle ukuba enze okungaphezu kokulungisa izinto phakathi kwakhe nomhlobo wakhe uGabrielle. UMichelle uthi: “Mna noNicole safunda isahluko 14 sencwadi ethi Funda KuMfundisi Omkhulu.b Ndaza ndambonisa oko kwakuthethwa nguYesu xa esithi sifanele sibaxolele abantu ‘izihlandlo ezingamashumi asixhenxe anesixhenxe.’ Emva kokuba ndimphulaphule ngenyameko uNicole njengoko echaza iimvakalelo zakhe, ndiye ndamnceda ukuba azame ukuyiqonda indlela abuhlungu ngayo uGabrielle ekubeni umhlobo wakhe osenyongweni efuduka.”—Mateyu 18:21, 22.

Emva kokuba uNicole esiqondile isizathu esasinokwenza uGabrielle acaphuke, oku kwamnceda ukuba abe novelwano, kwaza kwambangela ukuba amfowunele uGabrielle aze acele uxolo. UMichelle uthi: “Ukususela ngelo xesha, kuyamvuyisa uNicole xa ebonakalisa uvelwano nobubele kwabanye.”—Filipi 2:3, 4.

Nceda abantwana bakho bakuphephe ukucatshukiswa ziimpazamo nokungaqondani nabanye. Mhlawumbi kuya kukuvuyisa ukubona abantwana bakho bebonakalisa inceba nothando lokwenene kwabanye.—Roma 12:10; 1 Korinte 12:25.

Khuthaza Ukuxolela, Okuyinto Entle

IMizekeliso 19:11 ithi: “Kuyinto entle . . . ukukubetha ngoyaba ukunxaxha.” Kwelona xesha linzima, uYesu waxelisa uYise ekubonakaliseni umoya wokuxolela. (Luka 23:34) Abantwana bakho banokufunda into entle yokuxolela xa bebona ukuba nawe uyaxolela.

Ngokomzekelo, uWilly oneminyaka emihlanu ubudala uyathanda ukufaka imibala kwimifanekiso kunye nomakhulu wakhe. Ngesinye isihlandlo, uMakhulu wayeka ukukwenza oku waza wamngxolisa uWilly wandula ke wahamba. UWilly wacaphuka. Uyise, uSam, uthi: “Umakhulu kaWilly unesifo sika-Alzheimer. Ngoko samcacisela oku uWilly ngendlela anokuyiqonda.” Emva kokukhumbuza uWilly ukuba sele exolelwe izihlandlo ezininzi yaye naye ufanele abaxolele abanye, uSam wothuswa yindlela uWilly awasabela ngayo. USam uthi: “Ngaba unokuthelekelela ukuba mna nomfazi wam savakalelwa njani, njengoko sibukele unyana wethu omncinane esiya kumakhulu wakhe oneminyaka engama-80 ubudala, ecela uxolo aze ambambe ngesandla emsa etafileni?”

Eneneni kuyinto entle gqitha xa abantwana befunda ‘ukuqhubeka benyamezela’ iintsilelo neempazamo zabanye baze babaxolele. (Kolose 3:13) Kwanaxa abantu bathi ngabom basicaphukise, qinisekisa umntwana wakho ukuba kunamandla ukusabela ngoxolo, kuba “xa uYehova ekholiswa ziindlela zomntu ubangela kwaiintshaba zakhe zibe seluxolweni naye.”—IMizekeliso 16:7.

Hlala Umnceda Umntwana Wakho Abe Seluxolweni

Xa abazali besebenzisa iLizwi likaThixo ekufundiseni abantwana babo “phantsi kweemeko zoxolo” yaye ‘bengabo benza uxolo,’ babanceda ngokwenene abantwana babo. (Yakobi 3:18) Abazali abanjalo baxhobisela abantwana babo ngoko bakufunayo ukuze bakwazi ukucombulula iingxaki baze babe seluxolweni. Oku kuba negalelo elikhulu kulonwabo lwabo nasekwanelisekeni ebomini.

UDan noKathy banabantwana abathathu abaselula nabaqhuba kakuhle ngokomoya. UDan uthi: “Nangona kwakunzima ukubakhulisa besebancinane, sivuya gqitha kuba abantwana bethu baye baqhuba kakuhle. Ngoku bayavisisana nabanye, yaye babaxolela ngesisa abanye xa kukho into ephazamisa uxolo.” UKathy uthi, “Oku kuyasikhuthaza ngokwenene, ekubeni uxolo luyinxalenye yesiqhamo somoya kaThixo.”—Galati 5:22, 23.

Ngoko ke, kubalulekile ukuba nina bazali abangamaKristu ‘ningayeki’ okanye ‘ningadinwa’ ekufundiseni abantwana benu ukuba baphile ngoxolo—nokuba ekuqaleni abenzi nkqubela kangako. Njengoko nisenjenjalo, qinisekani ukuba “uThixo wothando nowoxolo uya kuba kunye nani.”—Galati 6:9; 2 Korinte 13:11.

[Imibhalo esemazantsi]

[Ibhokisi/Umfanekiso okwiphepha 20]

NGABA NIBAPHEMBELELA KAKUHLE?

Isincoko esaphuma kwiMedia Awareness Network esinomxholo othi “Ugonyamelo Kumajelo Eendaba” sithi: “Amajelo eendaba akhuthaza ugonyamelo njengendlela yokucombulula iingxaki ngokuthi abonise izaphuli-mthetho namagorha ahlala enogonyamelo.” Lishumi ekhulwini kuphela loko sikubona kumabonwakude, kwimifanekiso eshukumayo nakwiividiyo zomculo okuye kubonise imiphumo emibi yogonyamelo. Esi sincoko sithi, kunoko, “ugonyamelo luboniswa njengento efanelekileyo, eqhelekileyo nengenakuphepheka—eyona ndlela icacileyo yokucombulula ingxaki.”

Ngaba uyayibona imfuneko yokwenza uhlengahlengiso ngokuphathelele indlela obukelwa ngawo umabonwakude ekhayeni lakho? Musa ukuvumela amajelo eendaba ayidodobalise imigudu yakho yokufundisa abantwana bakho ukuba babe seluxolweni.

[Umfanekiso okwiphepha 17]

Bethelela kubantwana bakho umnqweno wokufuna ukukholisa “uThixo woxolo”

[Umfanekiso okwiphepha 18]

Ziphe ixesha lokulungisa intetho nezenzo eziyingozi

[Umfanekiso okwiphepha 19]

Abantwana bakho bafanele bafunde ukucela uxolo baze baxolele