Ngaba Uyilungele Imini KaYehova?
“Imini enkulu kaYehova ikufuphi. Ikufuphi, yaye ikhawuleza kakhulu.”—ZEFANIYA 1:14.
1-3. (a) Ithini iBhayibhile ngemini kaYehova? (b) Yiyiphi “imini kaYehova” esiyilindeleyo?
IMINI enkulu kaYehova ayilosuku nje oluneeyure ezingama-24, kodwa lixesha lomgwebo apho uThixo eya kube etshabalalisa abangendawo. Abo bangamkhonziyo uThixo bafanele bayoyike loo mini yobumnyama, yobushushu, yokuvutha komsindo, yokubandezeleka neyesiphanziso. (Isaya 13:9; Amos 5:18-20; Zefaniya 1:15) Isiprofeto sikaYoweli sithi: “Awu ke loo mini; ngenxa yokuba ikufuphi imini kaYehova, kwaye iya kuza njengokuphanga ivela kuLowo unguSomandla!” (Yoweli 1:15) Noko ke, ngaloo mini inkulu uThixo uya kubahlangula abo “bathe tye entliziyweni.”—INdumiso 7:10.
2 Ibinzana elithi “imini kaYehova” libhekisela kwizihlandlo ezahlukeneyo zaxa uThixo ephumeza umgwebo wakhe. Ngokomzekelo, “imini kaYehova” yafikela abemi baseYerusalem xa uYehova wasebenzisa iBhabhiloni ngowama-607 B.C.E. (Zefaniya 1:4-7) Kanti uThixo waphinda waphumeza umgwebo ngowama-70 C.E. esebenzisa amaRoma ukohlwaya amaYuda awagatya uNyana wakhe. (Daniyeli 9:24-27; Yohane 19:15) IBhayibhile iphinda iprofete ‘ngemini kaYehova’ apho eya ‘kulwa imfazwe nazo zonke iintlanga.’ (Zekariya 14:1-3) Ephefumlelwe, umpostile uPawulos wanxulumanisa loo mini nobukho bukaKristu, obaqala ngokubekwa kukaYesu njengoKumkani wasezulwini ngowe-1914. (2 Tesalonika 2:1, 2) Ekubeni kucaca ukuba isondele imini kaYehova, ubufaneleke gqitha umxholo wonyaka wama-2007 wamaNgqina kaYehova. Ubuthatyathwe kuZefaniya 1:14, othi: “Imini enkulu kaYehova ikufuphi.”
3 Ekubeni imini enkulu kaThixo ikufuphi, eli lixesha lokuba sizingqine siyilungele. Ungenza njani ukuze uyilungele loo mini? Yintoni enye into omele uyenze ukuze uyilungele imini kaYehova?
Hlala Ulungile
4. Luluphi uvavanyo olunzima uYesu awayezilungiselele lona?
4 Kwisiprofeto sakhe sokuqosheliswa kwale nkqubo yezinto, uYesu Kristu wathi kubafundi bakhe: “Hlalani nilungile.” (Mateyu 24:44) Xa uYesu wayethetha loo mazwi, naye wayelungele uvavanyo olunzima—ukufa abe lidini lentlawulelo. (Mateyu 20:28) Yintoni esinokuyifunda kwindlela awayezilungiselele ngayo uYesu?
5, 6. (a) Ukuthanda uThixo nabantu kusinceda njani ukuba siyilungele imini kaYehova? (b) Nguwuphi umzekelo owamiselwa nguYesu ngokuthanda ummelwane?
5 UYesu wayemthanda ngentliziyo yakhe yonke uYehova nemilinganiselo yakhe yobulungisa. Ethetha ngoYesu amaHebhere 1:9 athi: “Wabuthanda ubulungisa, waza wakuthiya ukuchas’ umthetho. Kungenxa yoko le nto uThixo, uThixo wakho, ekuthambise ngeoli yemigcobo ngaphezu kwamaqabane akho.” Ekubeni wayemthanda uYise wasezulwini, uYesu wakwazi ukugcina ingqibelelo. Nathi ukuba simthanda ngolo hlobo uThixo size siphile ngemilinganiselo yakhe, uya kusilondoloza. (INdumiso 31:23) Olo thando nokuzithoba kuya kusinceda siyilungele imini enkulu kaYehova.
6 Enye into awayebalasele ngayo uYesu kukuthanda abantu. Enyanisweni, ‘wayebasizela, ngenxa yokuba babehlinzekile, belahliwe njengezimvu ezingenamalusi.’ (Mateyu 9:36) Ngenxa yoko, washumayela kubo iindaba ezilungileyo, kanye njengokuba nathi uthando lusenza sivakalise isigidimi soBukumkani kubamelwane bethu. Ukuthanda uThixo nommelwane kusigcina sixakekile kumsebenzi wamaKristu size sihlale siyilungele imini enkulu kaYehova.—Mateyu 22:37-39.
7. Njengoko silindele imini kaYehova, yintoni enokusenza sihlale sivuya?
7 UYesu wayevuyiswa kukwenza intando kaYehova. (INdumiso 40:8) Nathi xa sinokuba neso simo sengqondo, siya kuvuyiswa kukunikela inkonzo engcwele kuThixo. NjengoYesu, siya kupha ngesisa, ibe oko kuya kusenza sonwabe ngokwenene. (IZenzo 20:35) Ewe, “uvuyo lukaYehova ligwiba [lethu].” Olo vuyo luya kusenza siyilungele kakuhle imini enkulu kaThixo.—Nehemiya 8:10.
8. Kutheni simele sisondele kuYehova ngomthandazo?
8 Ukuzingisa emthandazweni kwamnceda uYesu wazilungela iimvavanyo zokholo lwakhe. Wayethandaza ngoxa ebhaptizwa nguYohane. Wathandaza ubusuku bonke xa wayeza kukhetha abapostile bakhe. (Luka 6:12-16) Ngubani onokufunda iBhayibhile aze angachukunyiswa ngumthandazo osuk’ entliziyweni kaYesu kubusuku bakhe bokugqibela ephila emhlabeni? (Marko 14:32-42; Yohane 17:1-26) Ngaba nawe uhlala uthandaza njengoYesu? Qhubeka uthandaza kuYehova, uziphe ixesha elaneleyo xa uthetha naye, funa ukhokelo lomoya oyingcwele uze ungabi madolw’ anzima ukulwamkela. Ulwalamano oluhle noBawo wethu wasezulwini lubaluleke gqitha kweli xesha lamanqam apho imini enkulu kaThixo sele isemnyango. Ngoko, yenza konke okusemandleni akho ukuze usondele ngakumbi kuYehova ngomthandazo.—Yakobi 4:8.
9. Kubaluleke kangakanani ukuxhalabela ukungcwaliswa kwegama likaYehova?
9 Enye into eyanceda uYesu walungela iimvavanyo kukuxhalabela kwakhe ukungcwaliswa kwegama likaYehova. Eneneni, wafundisa abalandeli bakhe ukuba xa bethandaza bamele baquke esi sicelo: “Malingcwaliswe igama lakho.” (Mateyu 6:9) Ukuba ngokwenene sifuna lingcwaliswe igama likaYehova, okanye liphathwe ngobungcwele, siya kukuphepha ukwenza nantoni na eya kulenza ligculelwe. Ngenxa yoko, siya kuyilungela ngakumbi imini enkulu kaYehova.
Ngaba Zikho Iinguqu Omele Uzenze?
10. Kutheni simele sihlolisise indlela esiphila ngayo?
10 Ukuba imini kaYehova ibinokufika ngomso, ngaba ibiya kufika uyilungele? Ingantle into yokuba ngamnye kuthi ahlole indlela aphila ngayo ukuze abone apho amele aphucule khona. Ekubeni bubufutshane yaye bungaqinisekanga obu bomi, mihla le simele sonke sihlale siphaphile ngokomoya. (INtshumayeli 9:11, 12; Yakobi 4:13-15) Makhe sikhangele iinkalo ekusenokufuneka sinikele ingqalelo kuzo kubomi bethu.
11. Luluphi usukelo lokufunda iBhayibhile onalo?
11 Enye inkalo ebalulekileyo sisibongozo ‘sekhoboka elithembekileyo’ sokuba sifunde iBhayibhile yonk’ imihla. (Mateyu 24:45) Unokuzenzela usukelo lokufunda iBhayibhile yonke nyaka ngamnye uze uziphe ithuba lokucamngca ngayo. Xa unokufunda malunga nezahluko ezine ngosuku, unokuzifunda uzigqibe izahluko ezili-1 189 zeBhayibhile ngonyaka. Kumkani ngamnye kwaSirayeli wayemele afunde uMthetho kaYehova “yonke imihla yobomi bakhe.” Kuyabonakala ukuba uYoshuwa wenza loo nto kanye. (Duteronomi 17:14-20; Yoshuwa 1:7, 8) Kubaluleke gqitha ukuba abelusi bokomoya balifunde yonk’ imihla iLizwi likaThixo, kuba oku kuya kubanceda badlulisele kwabanye “imfundiso ephilileyo.”—Tito 2:1.
12. Ukusondela kwemini kaYehova kumele kukushukumisele entwenini?
12 Ukusondela kwemini kaYehova kumele kukwenze uye futhi ube nenxaxheba kangangoko unako kwiintlanganiso zamaKristu. (Hebhere 10:24, 25) Oko kuya kukunceda uphucule ubuchule bakho bokuba ngumvakalisi woBukumkani ofuna ukufumana abo bafanelekele ubomi obungunaphakade. (IZenzo 13:48) Unokuba negalelo nangezinye iindlela ebandleni, njengokunceda abakhulileyo nokukhuthaza abaselula. Uya kufumana uvuyo olungathethekiyo ngokwenjenjalo.
Ulwalamano Lwakho Nabanye
13. Yiyiphi imibuzo esinokuzibuza yona ngokuphathelele ukwambatha ubuntu obutsha?
13 Ekubeni imini kaYehova isemnyango, ngaba kufuneka uzabalazele ‘ukwambatha ubuntu obutsha obadalwa ngokokuthanda kukaThixo ngobulungisa bokwenyaniso nokunyaniseka’? (Efese 4:20-24) Njengoko uzama ukuba neempawu zikaThixo, abanye baya kubona ukuba ‘uhamba ngokomoya kaThixo’ nokuba ubonakalisa isiqhamo sawo. (Galati 5:16, 22-25) Ngaba zikho izinto ezalatha ukuba wena nentsapho yakho niye nambatha ubuntu obutsha? (Kolose 3:9, 10) Ngokomzekelo, ngaba waziwa ngokuwenzela ububele amanye amaKristu nabanye abantu? (Galati 6:10) Ukufundisisa iZibhalo rhoqo kuya kukunceda ube neempawu zobuthixo eziya kukunceda uyilungele imini kaYehova.
14. Kutheni simele sithandazele umoya oyingcwele njengoko sizabalazela ukuzeyisa?
14 Kuthekani ukuba ucaphuka msinya yaye uyabona ukuba kufuneka uzame ukuzeyisa? Olo phawu yinxalenye yesiqhamo esinokuveliswa ngumoya oyingcwele kaThixo kuwe. Ngoko, thandazela umoya oyingcwele, ngokuvisisana namazwi kaYesu athi: “Qhubekani nicela, niya kunikwa; qhubekani nifuna, niya kufumana; qhubekani ninkqonkqoza, niya kuvulelwa. . . . Ukuba ke ngoko nina, ningendawo nje, niyakwazi ukunika abantwana benu izipho ezilungileyo, wobeka phi na ke yena uYihlo osezulwini ukubanika umoya oyingcwele abo bamcelayo!”—Luka 11:9-13.
15. Yintoni omele uyenze xa ungevani nomnye umKristu?
15 Masithi akuvani nomnye umKristu. Yenza umgudu wokuyilungisa loo meko ukuze kubekho uxolo nomanyano ebandleni. (INdumiso 133:1-3) Sebenzisa isiluleko sikaYesu esikuMateyu 5:23, 24 okanye eso sikuMateyu 18:15-17. Ukuba bekutshona ilanga uqumbile, zama ukukhawuleza uyilungise loo nto. Eyona nto idla ngokufuneka kukuxolela. UPawulos wathi: “Yibani nobubele omnye komnye, nibe nemfesane, nixolelane ngesisa kanye njengokuba noThixo wanixolelayo ngesisa ngaye uKristu.”—Efese 4:25, 26, 32.
16. Ziziphi iinkalo ezifuna imfesane emtshatweni?
16 Emtshatweni kufuneka imfesane, nokuxolela maxa wambi. Ukuze ulithande iqabane lakho lomtshato, ube nemfesane ngakumbi kulo, cela uncedo kuThixo uze ufunde iLizwi lakhe. Ngaba ikho into ekufuneka uyenzile ukuze uphile ngokuvisisana neyoku-1 kwabaseKorinte 7:1-5 uze unciphise udandatheko uphephe nokungathembeki? Ngokuqinisekileyo le yinkalo efuna indoda okanye umfazi abe “nemfesane.”
17. Yintoni omele uyenze ukuba uye wona ngokunzulu?
17 Kuthekani ukuba uye wenza isono esithile esinzulu? Silungise ngokukhawuleza. Yenza unako nako wokufuna uncedo lwabadala abangamaKristu. Imithandazo nesiluleko sabo siya kukunceda uchache ngokomoya. (Yakobi 5:13-16) Thandaza kuYehova ngentliziyo eguqukileyo. Xa ungakwenzi oko uya kuhlala utyiwa ngumvandedwa nesazela. Kwakunjalo nakuDavide, kodwa kwatsho kwee qabu kuye akusivuma isono sakhe kuYehova. Wabhala wathi: “Unoyolo lowo imvukelo yakhe ixolelweyo, isono sakhe esigutyungelweyo. Unoyolo umntu uYehova angasibaleli kuye isiphoso, nekungekho nkohliso kumoya wakhe.” (INdumiso 32:1-5) UYehova uyabaxolela abo baye bona baza baguquka ngokunyanisekileyo.—INdumiso 103:8-14; IMizekeliso 28:13.
Hlala Ungeyonxalenye Yehlabathi
18. Umele ulijonge njani ihlabathi?
18 Akuthandabuzeki ukuba ukhangele phambili kwihlabathi elitsha esilithenjiswe nguBawo wethu osezulwini. Kodwa ulijonga njani ihlabathi labantu abangendawo nelahlukanisiweyo noThixo? USathana, “umlawuli wehlabathi,” wayengenandlela yakubambelela kuYesu Kristu. (Yohane 12:31; 14:30) Ngenxa yokuba ungafuni kwanto yakwenza noMtyholi nehlabathi lakhe, waphulaphule amazwi ompostile uYohane athi: “Musani ukulithanda ihlabathi nezinto ezisehlabathini.” Elo likhondo lobulumko, kuba “ihlabathi liyadlula nenkanuko yalo, kodwa lowo wenza ukuthanda kukaThixo uhleli ngonaphakade.”—1 Yohane 2:15-17.
19. Ulutsha olungamaKristu lubongozwa ukuba lube nosukelo olunjani?
19 Ngaba uyabanceda abantwana bakho ukuba ‘bazigcine bengenabala kweli hlabathi’? (Yakobi 1:27) USathana angathanda ukubabambisa kanye njengomntu obambisa intlanzi. Kukho imibutho neentlangano ezahlukahlukeneyo ezilungiselelwe ukwenza abaselula babe yinxalenye yeli hlabathi likaSathana. Kodwa bona abakhonzi bakaYehova sele beneyabo intlangano nekuphela kwayo eya kusinda ekupheleni kwale nkqubo yezinto ingendawo. Ngoko ulutsha olungamaKristu lumele lukhuthazwe ukuba lube ‘nokuninzi kokwenza emsebenzini weNkosi.’ (1 Korinte 15:58) Abazali abahlonela uThixo kufuneka bancede abantwana babe nosukelo oluya kubazuzisa ubomi obonwabisayo nobunomvuzo obuzukisa uThixo noluya kubanceda balungele imini kaYehova.
Khangela Ngaphaya Kwemini Enkulu KaYehova
20. Kutheni simele sihlale sicinga ngobomi obungunaphakade?
20 Ukuba uhlala ucinga ngobomi obungunaphakade, uya kukwazi ukuyilinda uzolile imini kaYehova. (Yude 20, 21) Uya kukhangela phambili ekuphileni ngonaphakade eParadesi, uze ube nethemba lokubuyela ebutsheni unexesha elaneleyo lokwenza zonke izinto ezintle ozilangazelelayo ngoxa ufunda izinto ezininzi ngoYehova. Eneneni, ungaqhubeka ufunda ngoThixo ngonaphakade kuba izinto abazaziyo ngoku abantu “yimiphetho yeendlela zakhe.” (Yobhi 26:14) Kuvuyisa ngokwenene oko.
21, 22. Ziziphi izinto eninokwabelana ngazo nabantu abavuswe ekufeni?
21 EParadesi, abantu abavusiweyo baya kusinika yonke inkcazelo esingayaziyo eya kusityebisela ngakumbi ngezinto ezenzeka ngaphambili. UEnoki uya kube elapho esichazela ngento eyamnceda wanesibindi sokuvakalisa isigidimi sikaYehova kubantu abangenabuthixo. (Yude 14, 15) Nakanjani na uNowa uya kusibalisela ngokwakha umkhombe. UAbraham noSara baya kusichubela ngendlela ababevakalelwa ngayo ngokushiya ubunewunewu baseUre baye kuhlala ezintenteni. Cinga ngoEstere echaza iinkcukacha ngendlela awakhusela ngayo abantu bakowabo waza waphanzisa iyelenqe likaHaman. (Estere 7:1-6) Yiva uYona ebalisa ngokuchitha kwakhe iintsuku ezintathu esiswini sentlanzi okanye uYohane uMbhaptizi echaza indlela awaziva ngayo xa wayebhaptiza uYesu. (Luka 3:21, 22; 7:28) Zininzi gqitha izinto ezibangel’ umdla esiza kuzifunda!
22 Ebudeni boLawulo lukaKristu Lweminyaka Eliwaka, unokufumana ithuba lokunceda abanye ‘bafumane ukumazi uThixo.’ (IMizekeliso 2:1-6) Namhlanje, sivuyiswa kukubona abantu bezuza ukwazi uYehova uThixo baze benze okuthile ngoko. Cinga ngovuyo lwexa elizayo xa uYehova esikelela imigudu yakho yokufundisa abantu ababephila mandulo baze bakwamkele ngoxabiso oko!
23. Yintoni esimele sizimisele ukuyenza?
23 Iingenelo esizixhamla ngoku njengabantu bakaYehova azinakuthelekiswa nanto. (INdumiso 40:5) Sinombulelo ngokukhethekileyo ngamalungiselelo kaThixo okomoya. (Isaya 48:17, 18) Enoba zinjani na iimeko zethu, masinikele inkonzo engcwele ngentliziyo yonke njengoko silindele imini enkulu kaYehova.
Ungaphendula Uthini?
• Yintoni “imini kaYehova”?
• Yintoni onokuyenza ukuze uhlale uyilungele imini kaYehova?
• Ekubeni imini enkulu kaThixo ikufuphi kangaka, ziziphi iinguqu ekusenokufuneka sizenze ebomini?
• Yintoni okhangele phambili kuyo xa sele ifike yadlula imini kaYehova?
[Umfanekiso okwiphepha 12]
UYesu wahlala ezilungele iimvavanyo
[Umfanekiso okwiphepha 15]
Kuya kuba lilungelo elingathethekiyo ukunceda abo bavuswe ekufeni ukuba bazi uYehova