Ngaba Uyakhumbula?

Ngaba uye wakuvuyela ukufunda iiMboniselo zakutshanje? Ukuba kunjalo, khawubone ukuba unokuyiphendula kusini na le mibuzo ilandelayo:

• Kutheni “ITestamente Endala” ingaphelelwa lixesha?

UMbhali wayo akasosithixo sikhohlakeleyo kodwa nguThixo onothando, uYehova. UYesu nabalandeli bakhe bokuqala baqhubeka becaphula iZibhalo zesiHebhere. Zinamacebiso aluncedo kubomi bemihla ngemihla yaye zisinika ithemba elimangalisayo ngekamva.—9/1, iphepha 4-7.

• Yintoni eye yafezwa kukuvumela kukaThixo kudlule ixesha elaneleyo emva kokona kuka-Adam noEva?

Kule minyaka imalunga nama-6 000 idluleyo uSathana uye wangqineka elixoki—uAdam noEva nezinye izigidi zenzala yabo ziye zafa. Ukuhamba kwexesha kuye kwabonisa ukuba abantu abanakukwazi ukuziphilela ngaphandle koThixo yaye abakwazi bengenalo nelungelo lokwalathisa amanyathelo abo.—9/15, iphepha 6-7.

• Kwakutheni ukuze uYakobi angabekwa tyala ngokuzenza uEsawu?

Ekubeni wayelithengile ilungelo lobuzibulo kuEsawu, uYakobi wayekufanelekela ukusikelelwa nguyise. Xa uIsake wafumanisa ukuba usikelele uYakobi, akazange afune ukukuguqula oko. Kuyacaca ukuba noThixo owayenokukwazi ukungenelela wayefuna ukuba kusikelelwe uYakobi.—10/1, iphepha 31.

• Kunokutshiwo njani ukuba, ukuba nezazela kwethu kuyangqubana nengcamango yendaleko?

Abantu bazo zonke iintlanga neenkcubeko bebesoloko bekwazi ukubanceda abanye, nkqu nokuba oko kubonakala kuza kubafaka engozini. Oko bekungenakwenzeka ukuba abantu bebezizilwanyana ezizabalazela nje ukuphila.—10/15, iphepha 20.

• Sinokutsho njani ukuba uThixo uthobekile, yaye ulubonakalisa ngaziphi iindlela olu phawu?

Ekubeni enguMdali noMongami, uThixo akukho nto angenakukwazi ukuyenza njengathi. Ukanti, ngokuvisisana neyesi-2 kuSamuweli 22:36, uThixo uthobekile ngengqiqo yokuba ubaxhalabele abantu abathobekileyo abazama ukumkholisa, kwaye unenceba kubo. Ngokungathi kunjalo, wondela phantsi emhlabeni ukuze abaphathe ngobubele abo bamoyikayo.—11/1, iphepha 4-5.

• Iingceba zeengqayi zamandulo zikungqina njani ukuchana kwengxelo yeBhayibhile?

Abembi bezinto zamandulo baye bafumana iingceba zeengqayi zaseSamariya ezinamagama ezizwe ezisixhenxe ekuthethwa ngazo kuYoshuwa 17:1-6. Iingceba zaseAradi zingqina ukuchana kwenkcazelo ephathelele iintsapho zababingeleli kuquka igama likaThixo. Zona ezaseLakishe zisithela thsuphe ngemeko yezopolitiko nezidubedube ezazisenzeka kwelo lakwaYuda ngaphambi kokuba lihlaselwe yiBhabhiloni.—11/15, iphepha 12-14.

• Yintoni esinceda sifikelele kwisigqibo sokuba nguLuka umbhali wencwadi yeZenzo?

IVangeli kaLuka nencwadi yeZenzo zabaPostile, zombini zibhalelwe uTiyofilo, nto leyo ebonisa ukuba zombini zabhalwa nguLuka. Ukusetyenziswa kwesimelabizo esithi “sa,” kubonisa ukuba uLuka wayekho xa kwakusenzeka ezinye iziganeko. (IZenzo 16:8-15)—11/15, iphepha 18.

• AmaKristu afanele akujonge njani ukuzingela nokuloba?

Ukususela ngomhla kaNowa, uThixo uye wavumela abantu ukuba bazixhele baze bazitye izilwanyana. Noko ke, ukuzophisa kubonisa ukuba ubomi besilwanyana bufanele buhlonelwe kuba buvela kuThixo. AmaKristu akafanele angenelele kwimidlalo eza kufuna ukuba abulale izilwanyana okanye azibulale ngenjongo yokuzonwabisa. Kubalulekile ukuthobela imithetho kaKesare nokuhlonela izazela zabanye. (Roma 14:13)—12/1, iphepha 31.