Ukufumana Isiqabu Kwiinzingo Zobutsha

Kubalisa UEusebio Morcillo

NgoSeptemba 1993 ndatyelela intolongo enokhuseleko olungqingqwa. Kaloku kwakubhaptizwa udadewethu omncinane uMariví, owayelibanjwa kuloo ntolongo. Amanye amabanjwa namagosa entolongo ayebukele njengokuba ndandimbhaptiza. Ngaphambi kokuba ndichaze isizathu sokuba sibe lapho, makhe ndikucacisele ngendlela esikhule ngayo.

ILANGA ndalibona ngoMeyi 5, 1954, eSpeyini yaye ndilizibulo kubantwana abasibhozo. UMariví wayengowesithathu. Sakhuliswa ngumakhulu owayengumKatolika ozinikeleyo yaye ndisayikhumbula nangoku indlela endandizinikele ngayo kuThixo ngoxa ndandisahlala naye. Kodwa abazali bam yayingengobantu babeyikhuthalele icawa. Utata wayesibethel’ oogqirha nezicaka kuquka nomama. Sasiphil’ ubomi bentshontsho yaye ndandiba buhlungu kukubona umama engcungcutheka.

Nasesikolweni yayiyinto efanayo. Omnye utitshala owayengumfundisi wayesibethekisa eludongeni ngentloko ukuba siphendule ngokungachananga. Omnye umfundisi wayebaxhaphaza ngokwesini abafundi xa ehlola umsebenzi wabo wasekhaya. Ukongezelela, iimfundiso zamaKatolika njengesihogo ndandingaziqondi kakuhle yaye zindoyikisa. Yaye idamba inzondelelo yam kuThixo.

Ukuphila Ubomi Obungenanjongo

Ngenxa yokuba kwakungekho nto indifundisa ngoThixo ndandichitha ixesha elininzi nabantu abaziphethe kakubi nabanogonyamelo kwiipotsoyi. Kwakusoloko kusiliwa ngeemela, amatyathanga, iiglasi nangezitulo. Nangona ndandingalwi, ngesinye isihlandlo ndabethwa ngenqindi ndaf’ isiqaqa.

Ekugqibeleni ndemka kulo potsoyi ndaza ndakhangela ezinye iindawo ezingenazingxwabangxwaba kangako. Nalapho iziyobisi zazidlal’ abantwana. Kunokuba ndibe noxolo lwengqondo iziyobisi zazindenza ndibe nemibono ndize ndixinezeleke.

Nakuba ndandinganelisekanga ndarhwebesha umninawa wam uJosé Luis nomhlobo wam uMiguel ukuba baphile obu bomi. Njengalo lonke ulutsha lwaseSpeyin sasisebugxwayibeni. Ndandisenza nantoni ukuze ndifumane imali yokuthenga iziyobisi. Ndandingungantweni.

UYehova Wandihlangula

Ebudeni belo xesha ndandidla ngokuthetha nabahlobo bam ngobukho bukaThixo nangenjongo yobomi. Ndafuna uThixo ngokukhangela umntu endandinokuzityand’ igila kuye. Ndaphawula ukuba uFrancisco endandisebenza naye wayahlukile kwabanye abantu. Ekubeni wayebonakala onwabile, enyanisekile yaye enobubele ndagqiba ekubeni ndiphalaze imbilini yam kuye. UFrancisco wayeliNgqina likaYehova yaye wandinika iMboniselo enenqaku elalithetha ngeziyobisi.

Emva kokuba ndilifundile eli nqaku ndathandazela uncedo lukaThixo ndisithi: “Nkosi, ndiyazi ukuba ukho yaye ndifuna ukukwazi ndize ndenze ukuthanda kwakho. Ndincede!” UFrancisco namanye amaNgqina basebenzisa iBhayibhile ukuze bandikhuthaze yaye bandinika iimpapasho ezisekelwe eBhayibhileni ukuze ndizifunde. Ndaqonda ukuba bandinika uncedo endandilucele kuThixo. Kungekudala ndaqalisa ukwabelana nabahlobo bam noJosé Luis ngezinto endandizifunda.

Ngeny’ imini xa sasiphuma kwikonsathi yomculo werock nabanye abahlobo bam, ndamela bucala. Ndabona indlela eyayisonyanyeka ngayo indlela esasiziphethe ngayo ngenxa yeziyobisi. Ngelo xesha ndagqiba ekubeni ndibe liNgqina likaYehova.

Ndacela iBhayibhile kuFrancisco yaye wandinika nencwadi ethi Inyaniso Ekhokelela Kubomi Obungunaphakade.a Emva kokuba ndifunde ngesithembiso sikaThixo sokusula iinyembezi nesokuphelisa ukufa ndaqiniseka ukuba ndiyifumene inyaniso ekhulula uluntu. (Yohane 8:32; ISityhilelo 21:4) Kamva ndaya kwintlanganiso eyayikwiHolo YoBukumkani yamaNgqina kaYehova. Ndachukumiseka gqitha yindlela ababenobubele ngayo abantu ababelapho yaye ndaziva ndisekhaya.

Ndilangazelela ukuchazela abanye ngoko kwenzeka kwiHolo YoBukumkani, ngoko nangoko ndachazela uJosé Luis nabahlobo bam. Emva kweentsuku ezithile saya ezintlangansiweni. Enye intombazana eyayihleli kwizitulo ezingaphambili yayisithe ntshoo. Wayethe nqa ukubona amadoda aneenwele ezinde ibe akazange aphinde ajonge ngasemva. Imele ukuba ayizange ikholelwe xa isibona kwiveki elandelayo kwiHolo YoBukumkani sinxibe iisuti namaqhina.

Kamva, mna noMiguel saya kwindibano yesiphaluka yamaNgqina kaYehova. Sasiqal’ ukuyibona into enjengaleyo—abazalwana bokwenene abakubudala obahlukahlukeneyo. Indibano yayikwiholo ekwakukho kuyo ikonsathi yomculo werock. Kodwa kweli tyeli imeko nomculo esasiwuva wawuchukumisa.

Iqela lethu lonke laqalisa ukufunda iBhayibhile. Emva kweenyanga ezisibhozo ngoJulayi 26, 1974 mna noMiguel sabhaptizwa. Sobabini sasineminyaka engama-20 ubudala. Emva kweenyanga ezimbalwa abanye abane beqela lethu babhaptizwa. IBhayibhile yandifundisa ukuba ndincedise umama kumsebenzi wasekhaya yaye ndandincokola naye ngezinto endandizifundile. Sasondelelana nangakumbi. Kwakhona ndachitha ixesha elininzi ndinceda abantwana basekhaya.

Ekuhambeni kwexesha umama nabo bonke abantwana basekhaya bafunda inyaniso baza babhaptizwa ngaphandle komninawa wam. Ngowe-1977 ndazimanya ngeqhina lomtshato noSoledad. Yila ntombazana yayisithe ntshoo xa sasiqala ukuya kwiHolo yoBukumkani. Emva kweminyaka embalwa saba ngoovulindlela abathe ngxi, njengokuba amaNgqina kaYehova ebabiza njalo abashumayeli bexesha elizeleyo.

Ukuhlangulwa Kwentandane

Udadewethu omncinane uMariví waxhatshazwa ngokwesini xa wayemncinane yaye oko kwashiya iziva ezingapheliyo. Xa wayekwishumi elivisayo wayeziphethe kakubi esebenzisa iziyobisi, elisela yaye engunongogo. Xa wayeneminyaka engama-23 ubudala wabanjwa yaye xa wayelapho waqhubeka ephila ubomi bokuzibhubhisa.

Ngelo xesha ndandingumveleli wesiphaluka, umlungiseleli ohambahambayo wamaNgqina kaYehova. Ngowe-1989 mna noSoledad sabelwa kummandla uMariví awayevalelwe kuwo. Kwakusandula ukuhluthwa unyana wakhe kuye, intliziyo yakhe yayilihlwili wayenqwenela ukufa. Ngenye imini ndimtyelele ndacela ukumqhubela isifundo seBhayibhile yaye wavuma. Emva kwenyanga ndifunda naye wayeka ukusebenzisa iziyobisi nokutshaya icuba. Ndachukumiseka kukubona indlela uYehova awamnika amandla ngayo ukuze enze iinguqulelo ebomini bakhe. Hebhere 4:12.

Akazange aphozise maseko waqalisa ukuthetha namanye amabanjwa namagosa entolongo ngezinto azifundileyo. Nakuba wayezitshintshatshintsha iintolongo waqhubeka eshumayela. Kwenye intolongo wayeshumayela kwisisele ngesisele. Kangangeminyaka emininzi uMariví waqalisa izifundo zeBhayibhile namabanjwa amaninzi kumacandelo awahlukahlukeneyo eentolongo.

Ngeny’ imini uMariví wandichazela ukuba unqwenela ukuzahlulela kuThixo aze abhaptizwe. Kodwa wayengavumelekanga ukuba aphume entolongweni yaye kwakungavumelekanga nokuba kuze umntu aze kumbhaptiza. Kangangeminyaka emine wanyamezela ukuhlala kobo bugxwayiba balo ntolongo. Yintoni eyamnceda wahlala enokholo? Ngexesha kuqhutywa iintlanganiso zebandla lasekuhlaleni naye wayeziqhubela ezakhe entolongweni. Kwakhona wayeyifunda rhoqo iBhayibhile yaye ethandaza.

Ekuhambeni kwexesha uMariví wafuduselwa kwintolongo enokhuseleko olungqingqwa eyayinequla. Wayevakalelwa kukuba wayenako ukubhaptizwa kule ntolongo. Ekugqibeleni uMarivi wavunyelwa. Kwakungesi sihlandlo ke endanikela ngaso intetho yobhaptizo. Ndandikunye naye ngesona sihlandlo sibalulekileyo ebomini bakhe.

Ngenxa yendlela awayefudula ephila ngayo, uMariví waba nesifo sikaGawulayo. Ngoko ke, ngenxa yokuba wayeziphethe kakuhle entolongweni, wakhululwa ngoMatshi 1994. Wayehlala ekhaya nomama engumKristu okhutheleyo de wafa emva kweminyaka emibini.

Ukujamelana Nomvandedwa

Nam andizange ndibhungce kwimiphumo yendlela endandiphila ngayo. Ukubethwa kwam ngutata ngokungenalusini nendlela endandiphila ngayo ngoxa ndandikwishumi elivisayo yachaphazela ubuntu bam. Naxa ndandisele ndimdala ndandibhuqwa ngumvandedwa nokuziva ndingento yanto. Maxa wambi ndandidakumba. Kodwa iLizwi likaThixo liye landinceda kakhulu ekulweni ezi mvakalelo ziphazamisayo. Ukucamngca ngokuphindaphindiweyo ngezibhalo ezinjengoIsaya 1:18 neNdumiso 103:8-13 kuye kwandinceda ukudambisa ezo mvakalelo ukutyhubela iminyaka.

Umthandazo sesinye isixhobo sokomoya endiye ndasisebenzisa ekulwisaneni nemvakalelo yokuziva ndingento yanto. Maxa wambi ndiye ndithandaze kuYehova ndiyinyhididi zinyembezi. Nakuba kunjalo amazwi akweyoku-1 Yohane 3:19-20 aye andomeleza, athi: “Yiyo ke leyo indlela esiya kwazi ngayo ukuba siphuma kuyo inyaniso, yaye siya kuziqinisekisa iintliziyo zethu phambi kwakhe ngokubhekisele kuko nakuphi na oko iintliziyo zethu ezisenokusigwebela isohlwayo kuko, ngenxa yokuba uThixo mkhulu kuneentliziyo zethu yaye uyazazi zonke izinto.”

Ekubeni ndisondela kuThixo ngentliziyo “eyaphukileyo netyumkileyo” ndaqonda ukuba ndandingeyiyo le nto ndandicinga ukuba ndiyiyo. IBhayibhile iqinisekisa bonke abo bafuna uYehova ukuba akabathiyanga abo banomvandedwa ngenxa yendlela ababefudula bephila ngayo.—INdumiso 51:17.

Nanini ndiziva ndimathidala ndiye ndizame ukucinga ngezinto ezakhayo, izinto zokomoya ezikhankanywe kumaFilipi 4:8. Ndiyazi ngentloko iNdumiso 23 neNtshumayelo yaseNtabeni. Xa kufika ingcinga ezidimazayo ndicengceleza ezi Zibhalo. Ukuphelisa ezi ngcinga kuyandinceda ndingaphuthelwa.

Enye into eye yandinceda kukunconywa ngumfazi wam nangamanye amaKristu. Nangona kwakungelula ekuqaleni ukwamkela la mazwi okhuthazo, iBhayibhile iye yandinceda ndaqonda ukuba uthando “lukholelwa izinto zonke.” (1 Korinte 13:7) Eny’ into ngokuthe ngcembe ndiye ndafunda ukwamkela ukuba andinakukwazi ukwenza yonk’ into.

Kwelinye icala, ukuba nomvandedwa kuye kwandifundisa ukuba ndibe ngumveleli ohambahambayo onovelwano. Mna nowakwam siye sachitha iminyaka engama-30 umntu emnye kwinkonzo yexesha elizeleyo. Uvuyo lokunceda abanye luye kwanegalelo ekudambiseni umvandedwa namava abuhlungu obuntwana.

Ngoku xa ndicinga ngeentsikelelo uYehova asithululele zona, ndivakalelwa njengomdumisi owadanduluka wathi: “Mbonge uYehova, mphefumlo wam, . . . yena oxolela sonke isiphoso sakho, ophilisa zonke izifo zakho, ohlangula ubomi bakho emhadini, okuthwesa ububele bothando neenceba.”—INdumiso 103:1-4.

[Umbhalo osemazantsi]

[Amagama acatshulweyo akwiphepha 30]

Ndandibhuqwa ngumvandedwa nokuziva ndingento yanto, kodwa iLizwi likaThixo liye landinceda kakhulu ekulweni ezi mvakalelo ziphazamisayo

[Imifanekiso ekwiphepha 27]

Umninawa wam uJosé Luis nomhlobo wam uMiguel balandela umzekelo wam ombi nomhle

[Umfanekiso okwiphepha 28, 29]

Intsapho yakwa Morcillo ngowe-1973

[Umfanekiso okwiphepha 29]

UMarivi esentolongweni

[Umfanekiso okwiphepha 30]

Ndikunye nomfazi wam uSoledad