Ukubalelwa Ekubeni Ngabafanelwe Kukukhokelelwa Emithonjeni Yamanzi
“IMvana . . . iya kubalusa, ibakhokelele emithonjeni yamanzi obomi.”—ISITYHI. 7:17.
1. ILizwi likaThixo liwachaza njani amaKristu athanjisiweyo, yaye uYesu wawanika yiphi imbopheleleko?
ILIZWI LIKATHIXO lithi amaKristu athanjisiweyo anyamekela izilangazelelo zikaKristu emhlabeni ‘alikhoboka elithembekileyo neliyingqondi.’ Xa uKristu weza kuhlola “ikhoboka” ngowe-1918, wafika abo bathanjiswa babesesemhlabeni bekulungiselela ngokuthembeka ‘ukutya kokomoya ngexesha elifanelekileyo.’ Ngenxa yoko, iNkosi uYesu yabona kufanelekile ukubamisela “phezu kwayo yonke impahla yayo.” (Funda uMateyu 24:45-47.) Ngoko ke, ngaphambi kokuba bafumane ilifa labo lasezulwini, abathanjiswa balungiselela abanquli bakaYehova apha emhlabeni.
2. Chaza impahla kaYesu.
2 Inkosi inegunya kwimpahla yayo yaye inokuyisebenzisa nangayiphi na indlela ethanda ngayo. Impahla kaYesu Kristu, onguKumkani omiselwe nguYehova, zizo zonke izilangazelelo zoBukumkani ezisemhlabeni. Le mpahla iquka “isihlwele esikhulu” esabonwa ngumpostile uYohane embonweni. UYohane uthi xa echaza esi sihlwele sikhulu: “Khangela! ndabona naso isihlwele esikhulu, ekungekho mntu wakwaziyo ukusibala, siphuma kuzo zonke iintlanga nezizwe nezizwana neelwimi, simi phambi kwetrone naphambi kweMvana, sambethe imiwunduzo emhlophe; yaye kwakukho amasebe esundu ezandleni zaso.”—ISityhi. 7:9.
3, 4. Isihlwele esikhulu sinaliphi ilungelo elimangalisayo?
3 Amalungu eso sihlwele sikhulu ngabo uYesu wabachaza ngokuthi ‘zezinye izimvu.’ (Yoh. 10:16) Wona anethemba lokuphila ngonaphakade kumhlaba oyiparadesi. Aqinisekile ukuba uYesu ‘uya kuwakhokelela emithonjeni yamanzi obomi aze uThixo azisule zonke iinyembezi emehlweni awo.’ Ngenxa yelo themba, aye ‘ayihlamba imiwunduzo yawo ayenza mhlophe egazini leMvana.’ (ISityhi. 7:14, 17) Anokholo kwidini likaYesu, ngoko emehlweni kaThixo anxibe ‘imiwunduzo emhlophe.’ NjengoAbraham, nawo avakaliswa engamalungisa nabahlobo bakaThixo.
4 Ekubeni isihlwele esikhulu esandayo sezinye izimvu sijongwa njengamalungisa nguThixo, sinethemba lokusinda ekutshatyalalisweni kwale nkqubo yezinto kwimbandezelo enkulu. (Yak. 2:23-26) Sinokusondela kuYehova, yaye njengeqela sinethemba elimangalisayo lokusinda kwiArmagedon. (Yak. 4:8; ISityhi. 7:15) Asizimelanga geqe kodwa siyakuvuyela ukukhonza phantsi kokwalathiswa nguKumkani wasezulwini nabazalwana bakhe abathanjisiweyo abasesemhlabeni.
5. Isihlwele esikhulu sibaxhasa njani abazalwana bakaKristu abathanjisiweyo?
5 AmaKristu athanjisiweyo aye ahlangabezana nentshutshiso ekrakra yehlabathi likaSathana yaye asaqhubeka ehlangabezana nayo. Kodwa ke, athembele kwinkxaso yamaqabane awo asisihlwele esikhulu. Nangona sele embalwa amaKristu athanjisiweyo, isihlwele esikhulu sanda ngamakhulu amawaka minyaka le. Abathanjiswa abanakukwazi ukuvelela bandla ngalinye lamaKristu kulawo amalunga ne-100 000 ehlabathini lonke. Ngenxa yoko, enye indlela abaxhaswa ngayo abathanjiswa zezinye izimvu, bubukho bamadoda afanelekayo esihlwele esikhulu angabadala emabandleni. Aba badala bancedisa ekunyamekeleni izigidi ngezigidi zamaKristu eziphathiswe “ikhoboka elithembekileyo neliyingqondi.”
6. Sisiphi isiprofeto esiphathelele ukuxhaswa kwamaKristu athanjisiweyo ngamaqabane awo ezinye izimvu?
6 Le nkxaso yokuzithandela inikwa amaKristu athanjisiweyo ngamaqabane awo ezinye izimvu yachazwa ngumprofeti uIsaya. Wathi: “Utsho uYehova ukuthi: ‘Abasebenzi abangahlawulwayo baseYiputa nabarhwebi baseTiyopiya namaShebha, amadoda amade, baya kuza kuwe, babe ngabakho. Baya kuhamba emva kwakho.’” (Isa. 45:14) Ngokufuziselayo, namhlanje amaKristu anethemba lokuphila emhlabeni ahamba emva kodidi lwekhoboka elithanjisiweyo neQumrhu lalo Elilawulayo, ngokuthobela ukhokelo lwalo. ‘Njengabasebenzi abangahlawulwayo,’ ngokuzithandela ezinye izimvu zisebenzisa onke amandla nobuncwane bazo ekuxhaseni umsebenzi wokushumayela owenziwa ehlabathini lonke uKristu awawunika abalandeli bakhe abathanjisiweyo emhlabeni.—IZe. 1:8; ISityhi. 12:17.
7. Isihlwele esikhulu siqeqeshelwa ntoni?
7 Njengoko exhasa abazalwana bawo abathanjisiweyo, amalungu esihlwele esikhulu aqeqeshelwa ukuba sisiseko sebutho elitsha labantu abaza kuphila emva kweArmagedon. Eso siseko simele sibe luqilima, yaye amalungu aso amele akulungele aze akwazi ukuthobela ulwalathiso lweNkosi. MKristu ngamnye unikwa ithuba lokubonisa ukuba ukulungele ukusetyenziswa nguKumkani, uKristu Yesu. Ngokuba nokholo nokuthembeka ngoku, ubonisa ukuba uya kuluthobela ukhokelo lwalo Kumkani nakwihlabathi elitsha.
Isihlwele Esikhulu Sizingqina Sinokholo
8, 9. Abo besihlwele esikhulu balungqina njani ukholo lwabo?
8 Ezinye izimvu eziyinxalenye yebandla lamaKristu athanjisiweyo zizingqina zinokholo ngeendlela ezahlukahlukeneyo. Okokuqala, zincedisa abathanjiswa ekuvakaliseni iindaba ezilungileyo zoBukumkani bukaThixo. (Mat. 24:14; 28:19, 20) Okwesibini, ngokuzithandela zithobela ulwalathiso lweQumrhu Elilawulayo.—Heb. 13:17; funda uZekariya 8:23.
9 Okwesithathu, amalungu esihlwele esikhulu axhasa abazalwana bawo abathanjisiweyo ngokuphila ngemilinganiselo kaYehova yobulungisa. Azabalazela ukuba ‘nothando, uvuyo, uxolo, ukuzeka kade umsindo, ububele, ukulunga, ukholo, ubulali nokuzeyisa.’ (Gal. 5:22, 23) Namhlanje, abantu abanezo mpawu nabangayivelisiyo “imisebenzi yenyama” basenokungathandwa. Sekunjalo, amalungu esihlwele esikhulu azimisele ukuluphepha “uhenyuzo, ukungahlambuluki, ihambo evakalala, unqulo-zithixo, ukusebenzelana nemimoya, ubutshaba, iimbambano, amakhwele, ukugqajukelwa yimisindo, usukuzwano, izahlukano, amahlelo, oomona, iindywala, iziyunguma, nezinto ezinjengezi.”—Gal. 5:19-21.
10. Yintoni azimisele ukuyenza amalungu esihlwele esikhulu?
10 Ngenxa yokungafezeki, kunokuba nzima ukuvelisa isiqhamo somoya, ukuphepha imisebenzi yenyama size sixhathise ingcinezelo yehlabathi likaSathana. Sekunjalo, sizimisele ukuba singavumeli ubuthathaka bethu, iintsilelo, okanye ukungakwazi ukwenza izinto ebesinokuthanda ukuzenza kuchaphazele ukholo lwethu okanye kusenze siyeke ukumthanda uYehova. Siyazi ukuba uYehova uya kwenza ngokwesithembiso sakhe—asindise isihlwele esikhulu kwimbandezelo enkulu.
11. Ngawaphi amaqhinga aye wawasebenzisa uSathana ngelokuzama ukwenza buthathaka ukholo lwamaKristu?
11 Kwangaxeshanye, sihlala siphaphile kuba siyazi ukuba olona tshaba lwethu nguMtyholi yaye alunikezeli lula. (Funda eyoku-1 kaPetros 5:8.) Luye lwazama ukusebenzisa abawexuki nabanye abantu ukuba baseyisele ekubeni iimfundiso esizikholelwayo zibubuxoki. Kodwa elo qhinga belisoloko lisilela. Ngokufanayo, nangona maxa wambi intshutshiso iye yasithoba isantya somsebenzi wokushumayela, ixesha elininzi iye yalomeleza ukholo lwabo batshutshiswayo. Naye ke uSathana uya esithi chatha ekusebenziseni indlela avakalelwa kukuba iya kulwenza buthathaka ukholo lwethu. Usibetha ngokusenza sidimazeke. AmaKristu enkulungwane yokuqala alunyukiswa ngale ngozi xa axelelwa oku: “Mqwalaseleni ngokusondeleyo [uKristu] lowo uye wayinyamezela intetho enjalo yokuchasa yaboni ngokunxamnye nezilangazelelo zabo.” Ngoba? “Ukuze ningadinwa nize nityhafe emiphefumlweni yenu.”—Heb. 12:3.
12. Isiluleko seBhayibhile sibomeleza njani abo baziva bedimazekile?
12 Ngaba ukhe uvakalelwe kukuba ufuna ukuyeka ukukhonza uYehova? Ayizange khe yenzeke into yokuziva ungenanto ukwazi ukuyenza? Ukuba kunjalo, musa ukuvumela uSathana ukuba asebenzise loo nto ukuze akuphazamise ekukhonzeni uYehova. Ukufundisisa iBhayibhile, ukuthandaza ngokuzingisileyo, ukuya rhoqo kwiintlanganiso nokunxulumana namanye amaKristu kuya kukomeleza ukuze ‘ungatyhafi emphefumlweni.’ UYehova uthembise ukuba uya kubanika amandla abo bamkhonzayo yaye siqinisekile ukuba uya kwenjenjalo. (Funda uIsaya 40:30, 31.) Gcina iliso lakho ekushumayeleni ngoBukumkani. Ziphephe izinto eziyinkcitha-xesha, uze uzimisele ukunceda abanye. Ukuba wenjenjalo uya kukwazi ukunyamezela nakuba uziva udimazekile.—Gal. 6:1, 2.
Baphuma Embandezelweni Bangene Kwihlabathi Elitsha
13. Nguwuphi umsebenzi oza kwenziwa ngabo basinde kwiArmagedon?
13 Emva kweArmagedon, kuya kubakho izihlwele zabo bangengomalungisa bavuswe emangcwabeni eziya kube zifuna ukufundiswa iindlela zikaYehova. (IZe. 24:15) Kuya kufuneka zifundiswe ngedini lentlawulelo likaYesu; ngaphezu koko, kuya kufuneka zifundiswe nokuba nokholo kwelo dini ukuze zifumane iingenelo zalo. Kuya kufuneka zilahle iingcamango ezazinazo zonqulo lobuxoki kwaneendlela ezaziphila ngazo ngaphambili. Zimele zifunde ukwambatha ubuntu obutsha obahlula amaKristu okwenyaniso. (Efe. 4:22-24; Kol. 3:9, 10) Abezinye izimvu abaya kube besindile ngelo xesha baya kuba nomsebenzi omkhulu ekufuneka bewenzile. Kuya kube kuvuyisa ngokwenene ukwenzela uYehova loo msebenzi, zingasekho iingcinezelo neziphazamiso zeli hlabathi lingendawo.
14, 15. Chaza izinto abaya kwabelana ngazo abo basinde kwimbandezelo enkulu namalungisa aya kube evusiwe.
14 Nabakhonzi bakaYehova abafa bethembekile ngaphambi kwexesha uYesu awayeshumayela ngalo emhlabeni baya kufunda izinto ezininzi ngelo xesha. Baya kufunda ngoMesiya othenjisiweyo, ababekhangele phambili kuye kodwa abakwazi ukumbona. Ngoxa babesadla amazimba, babonisa ukuba bakulungele ukufundiswa nguYehova. Cinga nje indlela ekuya kuba lilungelo ngayo ukubanceda—ngokomzekelo, njengaxa ucacisela uDaniyeli ngokuzaliseka kweziprofeto awazibhalayo kodwa engaziqondi!—Dan. 12:8, 9.
15 Ewe, nakuba abavusiweyo beya kufunda lukhulu kuthi, nathi siya kube sinemibuzo emininzi esiza kubabuza yona. Baya kusibalisela ngeziganeko ezingabhalwanga ngokweenkcukacha eBhayibhileni. Cinga nje ngendlela ekuya kubangel’ imincili ngayo ukuva ngeenkcukacha eziphathelele uYesu kumza wakhe uYohane uMbhaptizi. Akuthandabuzeki ukuba izinto esiya kuziva kuloo mangqina athembekileyo ziya kusenza silixabise nangakumbi iLizwi likaThixo kunokuba kunjalo ngoku. Abakhonzi bakaYehova abathembekileyo abafayo—kuquka abo besihlwele esikhulu abafe ngexesha lesiphelo—baya kufumana “uvuko olulunge ngakumbi.” Kaloku, baqalisa ukukhonza uYehova kwihlabathi elilawulwa nguSathana. Kuya kuba luvuyo olungathethekiyo kubo ukuqhubeka bekhonza kwiimeko ezintle zehlabathi elitsha.—Heb. 11:35; 1 Yoh. 5:19.
16. Ngokuvisisana nesiprofeto, iya kuba njani iMini Yomgwebo?
16 NgeMini Yomgwebo kuya kubakho ixesha lokuvulwa kwemisongo. Kuya kusetyenziswa le misongo kunye neBhayibhile ukuze kubonwe enoba bonke abaphilayo bayakufanelekela kusini na ukufumana ubomi obungunaphakade. (Funda ISityhilelo 20:12, 13.) Xa kuphela iMini Yomgwebo, mntu ngamnye uya kuba efumene ithuba elaneleyo lokubonisa ukuma kwakhe kwimbambano yolongamo lwendalo yonke. Ngaba loo mntu uya kuzithoba kwilungiselelo loBukumkani aze avumele iMvana imkhokelele “emithonjeni yamanzi obomi”? Okanye ngaba uya kuxhathisa, esala ukuzithoba kuBukumkani bukaThixo? (ISityhi. 7:17; Isa. 65:20) Ngelo xesha, bonke abantu abaphila emhlabeni baya kube befumene ithuba lokuzenzela izigqibo, ngaphandle kokuphazanyiswa sisono esisizuz’ ilifa okanye inkqubo engendawo. Akukho mntu uya kukuthandabuza ukulunga kwemigwebo kaYehova yokugqibela. Kuphela ngabo baqaqadekileyo abaya kutshatyalaliswa ngonaphakade.—ISityhi. 20:14, 15.
17, 18. Ziziphi izinto amaKristu athanjisiweyo nezinye izimvu akhangele ngochulumanco kuzo ngeMini Yomgwebo?
17 Ekubeni ebalelwa njengafanelwe kukufumana uBukumkani, namhlanje amaKristu athanjisiweyo akhangele phambili ekulawuleni ngeMini Yomgwebo. Iya kuba lilungelo elibalasele ngokwenene elo! Elo themba libangela ukuba alandele esi siluleko uPetros awasinika abazalwana bawo benkulungwane yokuqala: “Yenzani unako-nako wokuqinisekisa ngobizo lwenu nokunyulwa kwenu; kuba ukuba niqhubeka nizenza ezi zinto anisayi kuze nisilele. Enyanisweni, ngaloo ndlela niya kubonelelwa ngokutyebileyo ngokungeniswa kubukumkani obungunaphakade beNkosi noMsindisi wethu uYesu Kristu.”—2 Pet. 1:10, 11.
18 Ezinye izimvu ziyavuyisana nabazalwana bazo abathanjisiweyo. Zizimisele ukubaxhasa. Njengabahlobo bakaThixo, zizimisele ukwenza unako-nako wokumkhonza. NgeMini Yomgwebo, ziya kukuvuyela ukuwaxhasa ngokunyanisekileyo amalungiselelo kaThixo njengoko uYesu ezikhokelela kwimithombo yamanzi obomi. Ekugqibeleni ziya kubalelwa ekubeni zikufanele ukuba ngabakhonzi bakaYehova basemhlabeni ngonaphakade.—Roma 8:20, 21; ISityhi. 21:1-7.
Uyakhumbula Na?
• Iquka ntoni impahla kaYesu?
• Abo besihlwele esikhulu babaxhasa njani abazalwana babo abathanjisiweyo?
• Ngawaphi amalungelo nethemba esinalo isihlwele esikhulu?
• Uyijonga njani iMini Yomgwebo?
[Umfanekiso okwiphepha 25]
Isihlwele esikhulu siye sayihlamba imiwunduzo yaso sayenza mhlophe egazini leMvana
[Umfanekiso okwiphepha 27]
Yintoni ofuna ukuyifunda kwabathembekileyo abavusiweyo?