Yonwaba Emtshatweni Wakho
“Indlu iya kwakhiwa ngobulumko, imiselwe ngokuqinileyo ngokuqonda.”—IMIZE. 24:3.
1. UThixo wabubonisa njani ubulumko bakhe emva kokudala umntu wokuqala?
UBAWO wethu wasezulwini nonobulumko uyakwazi okusifaneleyo. Ngokomzekelo, ukuze aphumeze injongo yakhe, uThixo waqonda ukuba “akulungile ukuba umntu aqhubeke eyedwa” kumyezo wase-Eden. Oyena ndoqo waloo njongo yayikukuba abantu batshate, bazale abantwana ukuze ‘bawuzalise umhlaba.’—Gen. 1:28; 2:18.
2. Liliphi ilungiselelo elenziwa nguYehova ukuze ancede abantu?
2 UYehova wathi: “Ndiza kumenzela umncedi oza kuba ngumphelelisi wakhe.” Wandula ke wawisa ubuthongo obunzulu kumntu wokuqala, waza kuloo mzimba wakhe ufezekileyo wathabatha ubambo. Ngolo bambo wenza umfazi. Xa wayenika uAdam loo mfazi ufezekileyo, uEva, uAdam wathi: “Ekugqibeleni eli ke lithambo lasemathanjeni am nenyama yasenyameni yam. Lo yena ukubizwa kothiwa nguMfazi, kuba uthatyathwe endodeni.” Ngokwenene uEva waba ngumphelelisi ka-Adam. Ngamnye kubo wayeza kuba neempawu zakhe ezikhethekileyo, ukanti bobabini babefezekile yaye benziwe ngomfanekiso kaThixo. Ngaloo ndlela uYehova wayesungula umtshato. UAdam noEva abazange babe nangxaki ngelo lungiselelo likaThixo elaliza kubenza bancedane.—Gen. 1:27; 2:21-23.
3. Abaninzi baye basiphatha njani isipho somtshato, ibe oko kuphakamisa yiphi imibuzo?
3 Okubuhlungu kukuba kwihlabathi lanamhlanje kugquba umoya wemvukelo. Iingxaki ezibangelwa ngulo moya azinakuthanani noThixo. Abaninzi bayasigculela esi sipho sikaThixo somtshato, besithi siphelelwe lixesha yaye singunobangela weengxabano. Sele kuyinto eqhelekileyo ukuqhawula umtshato. Abazali basenokungakwazi ukunika abantwana babo uthando kodwa basebenzise bona ukulwa amadabi omtshato wabo. Basenokungafuni kuyekelela ukuze kubekho uxolo nomanyano. (2 Tim. 3:3) Ngoko ke, lunokulondolozwa njani ulonwabo emtshatweni kula maxesha amanqam? Ukuyekelela kunokusinceda njani ukuze siphumelele ekuxhathiseni nawuphi na umoya wokuqhawula umtshato? Sinokufunda ntoni kwimizekelo yanamhlanje yabo baye baqhubeka bonwabile emitshatweni yabo?
Ukuthobela Ulwalathiso LukaYehova
4. (a) Luluphi ulwalathiso olwanikelwa nguPawulos ngokuphathelele umtshato? (b) AmaKristu athobelayo alulandela njani ulwalathiso lukaPawulos?
4 Umpostile uPawulos ongumKristu wanikela ulwalathiso oluphefumlelweyo lokuba xa abahlolokazi bekhetha ukuphinda batshate, bafanele benjenjalo “kuphela eNkosini.” (1 Kor. 7:39) Kwakungekho nto intsha ngala mazwi kumaKristu anemvelaphi yobuYuda. UMthetho kaThixo kumaSirayeli wayenza yacaca into yokuba ayengamele ‘endiselane’ naye nabani na ongoweentlanga ezaziwangqongile. UYehova wongezelela enye inkcazelo ebethelela ubungozi bokungawuphulaphuli lo myalelo wakhe. “Kuba [intombi engengomSirayeli] iya kumtyekisa unyana wakho ekundilandeleni, baze ngokuqinisekileyo bakhonze thixo bambi; uvuthe umsindo kaYehova kuni, aze ngokuqinisekileyo akubhubhise ngokukhawuleza.” (Dut. 7:3, 4) UYehova ulindele ukuba benze ntoni abakhonzi bakhe bale mihla ngokuphathelele lo mba? Lizicacele elokuba umkhonzi kaThixo ufanele atshate nomntu ‘oseNkosini,’ oko kukuthi, umkhonzi ozahluleleyo waza wabhaptizwa. Kububulumko ukuthobela ulwalathiso lukaYehova kulo mba.
5. UYehova namaKristu atshatileyo bazijonga njani izifungo zomtshato?
5 Izifungo zomtshato zingcwele emehlweni kaThixo. Ethetha ngomtshato wokuqala, uNyana kaThixo uYesu wathi: “Oko uThixo akubophelele ngedyokhwe ndawonye makungahlukaniswa mntu.” (Mat. 19:6) Esikhumbuza ngokubaluleka kwezifungo, umdumisi uthi: “Nikelani imibulelo njengedini lenu kuThixo, nize nizifezekise kOyena Uphakamileyo izibhambathiso zenu.” (INdu. 50:14) Nangona isibini esitshatileyo sinokukhangela phambili kulonwabo lomtshato, izifungo ezenziwa ngemini yomtshato waso zibalulekile yaye zihamba nembopheleleko.—Dut. 23:21.
6. Yintoni esinokuyifunda kumzekelo kaYifeta?
6 Cinga ngoYifeta, owayengumgwebi wakwaSirayeli ngenkulungwane ye-12 B.C.E. Wenza esi sibhambathiso kuYehova: “Ukuba uyabanikela oonyana baka-Amoni esandleni sam, kuya kuthi lowo uphumayo, ophuma ngeengcango zendlu yam eze kundihlangabeza xa ndibuya koonyana baka-Amoni ndiseluxolweni, abe ngokaYehova, yaye lowo ndiya kumnikela njengomnikelo otshiswayo.” Ngaba uYifeta wafuna ukusaphula eso sibhambathiso xa kwaphuma intombi yakhe nekuphela komntwana awayenaye eyeza kumkhawulela ukubuyela kwakhe eMizpa? Akunjalo. Wathi: “Ndiwuvulile umlomo wam kuYehova, andikwazi ukujika.” (ABagwe. 11:30, 31, 35) UYifeta wasigcina isithembiso sakhe kuYehova, enoba loo nto yayithetha ukuba yena akazi kuba namzukulwana. Isifungo esenziwa nguYifeta sasingafani nezomtshato, kodwa ukusigcina kwakhe kumisela amadoda nabafazi abangamaKristu umzekelo wokubambelela kwizifungo zabo.
Yintoni Ebangela Ukuba Umtshato Uphumelele?
7. Luluphi uhlengahlengiso ekufuneka lwenziwe ngabantu abasandul’ ukutshata?
7 Izibini ezininzi ezitshatileyo zineenkumbulo ezimnandi ngexesha lokuthandana kwazo. Kwakumnandi ngokwenene ukwazi umntu oza kuba nguNdofanaye. Ixesha ababelichitha kunye lalibenza basondelelane ngakumbi. Kodwa enoba batshata emva kokuthandana okanye babonelwa, bathi bakuba yindoda nomfazi, kwafuneka benze uhlengahlengiso. Enye indoda ithi: “Eyona ngxaki sasinayo xa sasisandul’ ukutshata kukuyamkela into yokuba asisenakuziphatha njengabantu abangatshatanga. Kwakha kwanzima ukubeka izihlobo nezalamane kwindawo yazo.” Enye indoda, esele ineminyaka engama-30 itshatile, xa yayisandul’ ukutshata yafumanisa ukuba ukuze ilungelelane, kufuneka “icinge ngabantu ababini.” Ngaphambi kokuba yamkele isimemo okanye yenze isigqibo esithile, iqala ithethe nomfazi wayo ize yenze isigqibo, icinga ngeemfuno zabo. Ukuyekelela kwiimeko ezinjalo kuyanceda.—IMize. 13:10.
8, 9. (a) Kutheni ukunxibelelana kakuhle kubalulekile? (b) Ziziphi iinkalo ezifuna ukuba bhetyebhetye, yaye ngoba?
8 Maxa wambi umtshato umanyanisa abantu ababini abaneemvelaphi ezahlukahlukeneyo. Kwimeko enjalo, kuye kufuneke ngokukhethekileyo ukuba banxibelelane ngokukhululekileyo. Iindlela zokunxibelelana azifani. Ukujonga indlela iqabane lakho lomtshato elithetha ngayo nezalamane zalo kunokukunceda ulazi kakuhle. Maxa wambi iba yindlela umntu athetha ngayo, kungekhona loo nto ayithethayo etyhila ubuntu bakhe. Xa umntu ethetha unokuva nezinye izinto angakhange azithethe. (IMize. 16:24; Kol. 4:6) Ukuqonda kuyafuneka ukuze sonwabe.—Funda IMizekeliso 24:3.
9 Xa kukhethwa iindlela zokuzonwabisa, abaninzi baye bakubona kubalulekile ukuba bhetyebhetye. Kusenokwenzeka ukuba ngaphambi kokuba nitshate, iqabane lakho belichitha ixesha elininzi kwimidlalo okanye kwezinye iindlela zokuzihlaziya. Ngaba kufuneka lenze uhlengahlengiso oluthile? (1 Tim. 4:8) Kusenokufuneka okufanayo nakwixesha elilichitha nezalamane. Kuyaqondakala ukuba isibini esitshatileyo kufuneka sichithe ixesha kunye kwizinto zokomoya nezinye.—Mat. 6:33.
10. Ukuba bhetyebhetye kuluqinisa njani ulwalamano lwabazali nabantwana babo abatshatileyo?
10 Xa indoda itshata, ishiya uyise nonina, yaye kunjalo nangebhinqa. (Funda iGenesis 2:24.) Sekunjalo, umyalelo kaThixo wokuba umntu ahlonele uyise nonina uhlala unjalo nasemva kokuba umntu etshatile. Ngoko ke, nasemva kokuba isibini sitshatile, kusenokufuneka sichithe ixesha elithile nabazali. Enye indoda eneminyaka engama-25 itshatile ithi: “Maxa wambi kuba nzima ukwanelisa iminqweno neemfuno zeqabane lakho, ezabazali benu, ezabantwana bakowenu nabakowabo. Ukuze ndihlangabezane nale ngxaki ndiye ndincedwe yeGenesis 2:24. Umntu kufuneka anyaniseke aze aphumeze imbopheleleko yakhe kumalungu entsapho yakowabo, kodwa le ndinyana iye yandibonisa ukuba eyona nto ibalulekileyo kukunyaniseka kwiqabane lam.” Ngokuvisisana noku, abazali abangamaKristu nababhetyebhetye baya kuyihlonela into yokuba abantwana babo batshatile yaye indoda yiyo enembopheleleko yokunyamekela loo ntsapho.
11, 12. Kutheni kubalulekile nje ukuba izibini ezitshatileyo ziqhube isifundo sentsapho zize zithandaze kunye?
11 Ibaluleke gqitha into yokuba intsapho ibe nesifundo esiqhutywa rhoqo. Iintsapho ezininzi zamaKristu ezenjenjalo ziyakungqina oko. Kusenokungabi lula ukuqhuba eso sifundo rhoqo. Enye intloko-ntsapho ithi: “Ekuphela kwento esizisola ngayo kukuba singazange sibe nocwangciso lwesifundo sentsapho zisuka nje emva kokuba sitshatile.” Yongezelela ngelithi: “Kuyavuyisa ukubona indlela onwaba ngayo umfazi wam xa efumene ingongoma ebangel’ umdla kwisifundo sentsapho.”
12 Eny’ into eluncedo kukuthandaza kunye. (Roma 12:12) Xa indoda nomfazi benqula kunye, ulwalamano abanalo noYehova lunokulomeleza iqhina labo lomtshato. (Yak. 4:8) Enye indoda engumKristu ithi: “Ukukhawuleza ucele uxolo xa wenze impazamo uze uyikhankanye xa nithandaza kunye kubonisa ukuzisola okunyanisekileyo nangezona mpazamo zincinane zicaphukisayo.”—Efe. 6:18.
Yiba Bhetyebhetye Emtshatweni
13. Liliphi icebiso elanikelwa nguPawulos ngokuphathelele iintlobano zesini emtshatweni?
13 AmaKristu atshatileyo amele aziphephe izinto ezisingela phantsi umtshato, njengezo zixhaphakileyo kweli hlabathi ligula kukuziphath’ okubi ngokwesini. Ethetha ngoku, uPawulos wathi: “Indoda mayimnike okumfaneleyo umfazi wayo; kodwa nomfazi makenze ngokunjalo endodeni yakhe. Umfazi akanagunya kowakhe umzimba, kodwa yindoda yakhe enalo; ngokunjalo, nayo, indoda ayinagunya kowayo umzimba, kodwa ngumfazi wayo onalo.” Wandula ke uPawulos anikele olu lwalathiso: “Musani ukubandezana, ngaphandle kokuba kungokuvumelana okwexesha elimisiweyo.” Ngoba? Uthi: “Ukuze ninikele ixesha emthandazweni nize nibe ndawonye kwakhona, ukuze uSathana anganihendi ngenxa yokuswela kwenu ukuzeyisa.” (1 Kor. 7:3-5) Ngokukhankanya umthandazo, uPawulos ubonisa ezona zinto zibalulekileyo kumKristu. Kodwa wacacisa nento yokuba umKristu ngamnye otshatileyo umele anyamekele iimfuno neemvakalelo zeqabane lakhe.
14. Imigaqo yeZibhalo isebenza njani ngokuphathelele iintlobano zesini emtshatweni?
14 Indoda nomfazi bafanele bangafihlelani nto yaye baqonde ukuba ukungabi nalwazelelelo kumba weentlobano zesini kunokukhokelela ezingxakini. (Funda eyabaseFilipu 2:3, 4; thelekisa uMateyu 7:12.) Oku kuye kwenzeka kwamanye amakhaya awahluleleneyo ngokonqulo. Enoba kukho ukungaboni ngasonye, umKristu unokuzenza zibe bhetele iimeko ngokuziphatha kakuhle, ukuba nobubele nentsebenziswano. (Funda eyoku-1 kaPetros 3:1, 2.) Ukuthanda uYehova neqabane lakho, kudibene nokuba bhetyebhetye kuya kuba luncedo kule nkalo yomtshato.
15. Ukuba nentlonelo kunayiphi indima kumtshato owonwabileyo?
15 Zikho nezinye iinkalo, apho indoda enothando iya kumphatha ngentlonelo umkayo. Ngokomzekelo, iya kuyicingela indlela avakalelwa ngayo kwanakwizinto ezingenamsebenzi. Enye indoda eneminyaka engama-47 itshatile ithi: “Ndisafunda ke kulo mba.” Abafazi abangamaKristu babongozwa ukuba bawahlonele ngokunzulu amadoda abo. (Efe. 5:33) Abanakuba bayawahlonela amadoda abo xa bethetha kakubi ngawo, bewagxeka phambi kwabanye. IMizekeliso 14:1 isikhumbuza oku: “Umfazi osisilumko ngokwenene uyayakha indlu yakhe, kodwa osisidenge uyayichitha ngezandla zakhe.”
Ningamvuleli Ithuba UMtyholi
16. Izibini ezitshatileyo zinokuyisebenzisa njani eyabase-Efese 4:26, 27 kwimitshato yazo?
16 “Qumbani, kodwa ningoni; malingatshoni ilanga nicaphukile, ningamvuleli indawo uMtyholi.” (Efe. 4:26, 27) Ukwenza ngokuvisisana nala mazwi kunokusinceda sicombulule okanye siphephe ukungavisisani emtshatweni. Kaloku omnye udade uthi: “Nanini na singaboni ngasonye nomyeni wam siyaqiniseka ukuba iyalungiswa loo nto enoba iza kuthath’ iiyure ezininzi.” Xa babesandul’ ukutshata, yena nomyeni wakhe bazixelela ukuba abanakuya kulala bengakulungisana nakuphi na ukungaboni ngasonye. “Sagqiba ekubeni enoba yintoni na ingxaki, siza kuxolelana, silibale size siluqale kakuhle usuku olulandelayo.” Ngokwenjenjalo ‘abamvuleli thuba uMtyholi.’
17. Yintoni enokunceda amaqabane omtshato kwanaxa kubonakala ngathi akafanelani?
17 Kodwa kuthekani xa uvakalelwa kukuba anifanelani neqabane lakho? Kusenokubonakala ngathi kumtshato wakho akukho luthando njengakweminye. Sekunjalo, kuya kukunceda ukukhumbula indlela uMdali alujonga ngayo ulwalamano lomtshato. Ephefumlelwe, uPawulos wathi kumaKristu: “Umtshato mawubekeke phakathi kwenu nonke, nesilili somtshato masingadyojwa, kuba uThixo uya kubagweba abahenyuzi nabakrexezi.” (Heb. 13:4) Nanga amanye amazwi omele uwakhumbule: “Intambo entlu-ntathu ayinakuqhawuka kubini ngokukhawuleza.” (INtshu. 4:12) Xa indoda nomfazi bekuxhalabele ngokwenene ukungcwaliswa kwegama likaYehova, bayamanyana baze basondelelane noThixo. Bazabalazela ukuba umtshato wabo uphumelele besazi ukuba oko kuya kwenza uYehova, uMsunguli womtshato azukiswe.—1 Pet. 3:11.
18. Yintoni onokuqiniseka ngayo ngokuphathelele umtshato?
18 Ngokuqinisekileyo amaKristu anokonwaba emtshatweni. Oku kufuna umgudu nokubonisa iimpawu zobuKristu, eziquka ukuba bhetyebhetye. Namhlanje, kumabandla amaNgqina kaYehova ehlabathini lonke, izibini ezininzi ezitshatileyo ziye zakungqina oku.
Ubunokuphendula Uthini?
• Kutheni ukonwaba emtshatweni kungelophupha nje?
• Yintoni enokwenza umtshato uphumelele?
• Ziziphi iimpawu ekufuneka azabalazele ukuba nazo amaqabane omtshato?
[Umfanekiso okwiphepha 9]
Ngobulumko izibini ezitshatileyo ziqale zithethathethane ngaphambi kokwamkela isimemo okanye ukwenza idinga
[Umfanekiso okwiphepha 10]
Zabalazela ukulungisa ukungavisisani ngoko nangoko, ‘ungamvuleli indawo uMtyholi’