Londolozani “Intambo Entlu-ntathu” Emtshatweni
“Intambo entlu-ntathu ayinakuqhawuka kubini ngokukhawuleza.”—INTSHU. 4:12.
1. Ngubani owamanyanisa isibini sokuqala esingabantu ngomtshato?
EMVA kokudala izityalo nezilwanyana, uYehova uThixo wabumba umntu wokuqala, uAdam. Kamva uThixo wamlalisa ubuthongo obunzulu uAdam, waza wasebenzisa olunye ezimbanjeni zakhe wamenzela ngalo umncedi ofezekileyo. Esakubona loo mncedi wakhe uAdam wathi: “Ekugqibeleni eli ke lithambo lasemathanjeni am nenyama yasenyameni yam.” (Gen. 1:27; 2:18, 21-23) UYehova waneliseka koku kudala kwakhe lo mfazi, waza wamanyanisa esi sibini sokuqala singabantu ngomtshato wasisikelela.—Gen. 1:28; 2:24.
2. USathana waluvula njani uthanda phakathi kuka-Adam noEva?
2 Okubuhlungu kukuba, akuzange kube kudala elo lungiselelo likaThixo lomtshato lahlaselwa. Njani? Umoya ongendawo, owabizwa ngokuba nguSathana, wakhohlisela uEva ekubeni adle kwisiqhamo sokuphela komthi ababengavunyelwanga ukuba badle kuwo. Naye ke, uAdam wamthelela kwaza oko kwaphetha sele ikukuvukela ilungelo likaThixo lokulawula nokunikela ulwalathiso olufanelekileyo. (Gen. 3:1-7) Xa uYehova wabuza kweso sibini ngento esiyenzileyo, kwacaca mhlophe ukuba sele kuvuleke uthanda kulwalamano lwaso. UAdam wagxeka umfazi, esithi: “Umfazi owandinikayo ukuba abe nam, nguye ondinikileyo isiqhamo somthi ndaza ndadla.”—Gen. 3:11-13.
3. Yiyiphi imbono ephosakeleyo awaba nayo amanye amaYuda?
3 Ukutyhubel’ iinkulungwane ukususela ngoko, uSathana uye wasebenzisa amaqhinga ahlukahlukeneyo ukuze aphixanise amaqabane omtshato. Ngokomzekelo, maxa wambi uye wasebenzisa iinkokeli zonqulo ukukhuthaza iimbono ezingqubana nezibhalo ngomtshato. Ezinye iinkokeli zamaYuda zayigalela amanzi imilinganiselo kaThixo, zivumela abayeni ukuba baqhawule imitshato nabafazi babo ngezizathu ezingavakaliyo ezifana nokugalela ityuwa eninzi ekutyeni. Kodwa yena uYesu walikhupha latsola elokuba: “Nabani na oqhawula umtshato nomfazi wakhe, ngaphandle kwangesizathu sohenyuzo, aze atshate nomnye uyakrexeza.”—Mat. 19:9.
4. Lihlaselwa njani ilungiselelo lomtshato namhlanje?
4 USathana usaxakeke nangoku ezama ukuchitha umtshato. Ukwamkelwa kwento yokumanyanisa amafanasini, ukuhlala kunye kwabantu abangatshatanga nokufumaneka lula kwemvume yokuqhawula umtshato kungqina phandle ukuba uyaphumelela kweli phulo lakhe. (Funda amaHebhere 13:4.) NjengamaKristu, yintoni esinokuyenza ukuze siphephe ukuphenjelelwa yile mbono igqugqisileyo netenxileyo ngomtshato? Makhe siqwalasele ezinye izinto ezidla ngokubonisa xa konwatyiwe naxa izinto zihamba kakuhle emtshatweni.
UYehova Makahlale Ekho Emtshatweni
5. Litheth’ ukuthini ibinzana elithi “intambo entlu-ntathu” ngokuphathelele umtshato?
5 Ukuze izinto zihambe kakuhle emtshatweni, kufuneka uYehova abandakanyeke kuwo. ILizwi lakhe lithi: “Intambo entlu-ntathu ayinakuqhawuka kubini ngokukhawuleza.” (INtshu. 4:12) Ibinzana elithi “intambo entlu-ntathu” libinzana lokomfuziselo. Xa lisetyenziswa emtshatweni, liquka umyeni, umfazi wakhe, imisonto yokuqala emibini, ekuye kongezelelwa kuyo owesithathu nongundoqo, uYehova uThixo. Xa simanyene noThixo, isibini siyomelela ngokomoya size sikwazi ukujamelana neengxaki, ibe oko kungundoqo ukuze sikwazi ukonwaba emtshatweni.
6, 7. (a) Yintoni enokwenziwa ngamaKristu ukuqinisekisa ukuba uThixo uyinxalenye yomtshato wawo? (b) Yintoni exatyiswa ngomnye udade kumyeni wakhe?
6 Kodwa yintoni enokwenziwa sisibini esitshatileyo ukuqinisekisa ukuba umtshato waso ufana nentambo entlu-ntathu? Umdumisi uDavide wathi: “Ukwenza ukuthanda kwakho, Thixo wam, kundiyolisile, nomthetho wakho ungaphakathi ezibilinini zam.” (INdu. 40:8) Nathi, ukumthanda kwethu uThixo kusenza simkhonze ngentliziyo epheleleyo. Ngoko ke, omabini amaqabane omtshato amele ahlakulele ukuba nolwalamano oluhle noYehova aze avuyiswe kukwenza ukuthanda kwakhe. Mntu ngamnye otshatileyo ufanele azabalazele ukuqinisekisa ukuba iqabane lakhe lihlala linolwalamano oluhle noThixo.—IMize. 27:17.
7 Ukuba umthetho kaThixo ungaphakathi ngokwenene kuthi, iimpawu ezifana nokholo, ithemba, nothando ziya kubonakala ibe ziya kulomeleza iqhina lomtshato. (1 Kor. 13:13) Omnye umKristu ogama linguSandra, osele eneminyaka engama-50 etshatile, uthi: “Eyona nto ndiyithanda gqitha kumyeni wam, kukukwazi kwakhe ukukhokela namacebiso akhe asekelwe eBhayibhileni nokuthanda kwakhe uYehova, okungaphaya kwendlela andithanda ngayo.” Madoda, ngaba kunokuthethwa into efanayo nangani?
8. Yintoni efunekayo ukuze kubekho ‘umvuzo’ emtshatweni?
8 Njengesibini esitshatileyo, ngaba nibeka izinto zokomoya nezilangazelelo zoBukumkani kwindawo yokuqala kubomi benu? Ukongezelela koko, ngaba iqabane lakho ulijonga njengomntu okuncedayo ekukhonzeni uYehova? (Gen. 2:24) UKumkani uSolomon osisilumko wathi: “Ababini balunge ngakumbi kunomnye, ngenxa yokuba banomvuzo ngomsebenzi wabo onzima.” (INtshu. 4:9) Eneneni, indoda nomfazi bamele basebenze nzima ukuze balondoloze ‘umvuzo’ ngokuba neqhina lothando nelihlala lihleli elisikelelwa nguThixo.
9. (a) Ziziphi iimbopheleleko anazo amadoda? (b) Ngokutsho kweyabaseKolose 3:19, indoda imele imphathe njani umfazi wayo?
9 Into ebonisayo ukuba uThixo ukho emtshatweni ngumgudu owenziwa yindoda nomfazi ukuqinisekisa ukuba baphila ngokuvumelana nemilinganiselo yakhe. Amadoda anembopheleleko enkulu yokunyamekela iintswelo zentsapho zokomoya nezezinto eziphathekayo. (1 Tim. 5:8) Akhuthazwa nokuba acingele indlela abavakalelwa ngayo abafazi bawo. KweyabaseKolose 3:19, kuthiwa: “Nina madoda, hlalani nibathanda abafazi benu, ningavuthi ngumsindo ngakubo.” Omnye umphengululi weBhayibhile ucacisa ukuba ibinzana elithi ‘ukuvutha ngumsindo’ libandakanya “ukubahlaba ngamazwi abuhlungu, okanye ukubabetha, nokungabaphathi ngothando, ukungabanyamekeli, ukungabalungiseleli, ukungabakhuseli nokungafuni ukubanceda.” Kucacile ukuba, impatho enjalo ayinakufaneleka kwintsapho yamaKristu. Indoda ebusebenzisa ngothando ubuntloko bayo yenza kube lula ukuthotyelwa ngumfazi wayo.
10. Sisiphi isimo sengqondo abafanele babe naso abafazi abangamaKristu?
10 Abafazi bamaKristu abahlonela uYehova kumtshato wabo bamele baphile ngokuvisisana nemilinganiselo kaThixo. Umpostile uPawulos wathi: “Abafazi mabathobele amadoda abo njengakuyo iNkosi, ngenxa yokuba indoda iyintloko yomfazi wayo njengokuba noKristu eyintloko yebandla.” (Efe. 5:22, 23) USathana wakhohlisa uEva, wamxokisa ngelithi ukuzimela geqe kuThixo kwakuya kumzisela ulonwabo olungapheliyo. Ngoku, sele ubonakala phandle loo moya wokuzimela geqe kwimitshato emininzi. Kodwa, abafazi abahlonela uThixo bazithoba ngovuyo kwiintloko zabo ezinothando. Bayakhumbula ukuba uYehova wamisela uEva ukuba abe ‘ngumncedi’ wendoda yakhe, nto leyo kucacayo ukuba uThixo wayeyigqala njengelungelo elingathethekiyo. (Gen. 2:18) Umfazi womKristu ozimisele ukuthobela elo lungiselelo likaThixo “usisithsaba” sokwenene kwindoda yakhe.—IMize. 12:4.
11. Yintoni athi omnye umzalwana ibe luncedo kumtshato wakhe?
11 Enye into enokuba luncedo ekwenzeni uThixo abe yinxalenye yomtshato kukuba isibini esitshatileyo sifundisise iLizwi lakhe kunye. UGerald, ogqibe iminyaka engama-55 onwabile emtshatweni uthi, “Esona sinongo siphambili ekwenzeni umtshato uphumelele kukufundisisa kunye iBhayibhile.” Walek’ umsundulo athi, “Ukwenza izinto kunye, ngokukhethekileyo izinto zokomoya, kwenza amaqabane atshatileyo amanyane aze asondele nakuYehova.” Ukufundisisa kunye iBhayibhile kunceda intsapho igcine imilinganiselo kaYehova ithe thaa engqondweni, inolwalamano oluhle naye, ize yenze inkqubela.
12, 13. (a) Kutheni kubaluleke gqitha nje ukuthandaza kunye kwesibini esitshatileyo? (b) Ziziphi ezinye izinto ezenziwa ngamaKristu ezomeleza umtshato?
12 Izibini ezonwabileyo emtshatweni zithandaza kunye. Xa umyeni ‘ephalaza intliziyo yakhe’ ecela izinto ezingqalileyo ngokwemeko yesibini eso, nakanjani na oko kuyalomeleza iqhina lomtshato. (INdu. 62:8) Ngokomzekelo, bekuya kuba lula gqitha ukubekela bucala nakuphi na ukungaboni ngasonye neqabane lakho emva kokuba niye nacela kunye ukhokelo nolwalathiso lukaSomandla! (Mat. 6:14, 15) Ngokuvisisana naloo mthandazo, bekuya kuba kuhle gqitha ukuba qabane ngalinye lizimisele ukunceda elinye aze omabini ‘aqhubeke enyamezelana yaye exolelana ngesisa.’ (Kol. 3:13) Khumbula ukuba umthandazo ubonisa ukuba nithembele ngoThixo. UKumkani uDavide wathi: “Amehlo onke akhangela kuwe ngethemba.” (INdu. 145:15) Xa sikhangele ngethemba kuThixo ngomthandazo, siye sixhalatyiswe zizinto ezimbalwa, sisazi ukuba ‘usikhathalele.’—1 Pet. 5:7.
13 Enye into engundoqo ekugcineni uYehova emtshatweni kukubakho kwiintlanganiso zebandla nize nisebenze kunye kubulungiseleli. Kwiintlanganiso zethu izibini ezitshatileyo zifunda indlela yokulwa “namaqhinga” asetyenziswa nguSathana ukuqhekeza iintsapho. (Efe. 6:11) Indoda nomfazi abahlala besebenza kunye kubulungiseleli baye bafunde indlela yokuhlala ‘beqinile, bangabi nakushukuma.’—1 Kor. 15:58.
Xa Kuvela Iingxaki
14. Ziziphi izinto ezinokubangela uxinezeleko emtshatweni?
14 Kuyavunywa ukuba, la macebiso angasentla akakho matsha, kodwa kutheni ungaxubushi ngawo neqabane lakho ngokunyaniseka? Khangela ukuba akukho zinkalo zifuna niphucule kuzo kusini na kumtshato wenu. Noko ke, iBhayibhile iyavuma ukuba nabo babeka uThixo kumtshato wabo “baya kuba nembandezelo enyameni yabo.” (1 Kor. 7:28) Ngenxa yokungafezeki kwabantu, impembelelo embi yeli hlabathi lichas’ umthetho nemigibe kaMtyholi, nkqu nakwimitshato yabakhonzi abathembekileyo bakaThixo lunokubakho uxinezeleko. (2 Kor. 2:11) Kodwa uyasinceda sikwazi ukunyamezela olo xinezeleko. Ewe, singaphumelela. Indoda ethembekileyo uYobhi yaphulukana nemfuyo, abalindi nabantwana bayo. Sekunjalo iBhayibhile ithi: “Kuko konke oku uYobhi akonanga okanye abalele nantoni na engafanelekanga kuThixo.”—Yobhi 1:13-22.
15. Uxinezeleko lunokubangela abantu benze ntoni, ibe amaqabane atshatileyo anokuhlangabezana njani noko?
15 Kwelinye icala, umfazi kaYobhi wathi: “Ngaba usabambelele nkqi kwingqibelelo yakho? Mqalekise uThixo uze ufe!” (Yobhi 2:9) Eneneni, xa kufika iintlekele okanye ezinye iingxaki, ngenxa yobunzima eziza nabo, umntu unokuzibona sele esenza into angayicinganga. Indoda esisilumko ithi: “Kuba ingcinezelo nje isengasiphambanisa isilumko.” (INtshu. 7:7) Ukuba iqabane lakho likuphosa ngamazwi abuhlungu ngenxa nje yokuba lisiva ubunzima okanye “ingcinezelo,” zama ukuzola. Ukuphindisa ngamazwi afanayo kusenokubangela ukuba nithethe izinto eziya kuyenza ibe mandundu ngakumbi imeko. (Funda INdumiso 37:8.) Zama ukuwabetha ngoyaba nawaphi na amazwi ‘okubhuda’ asenokubangelwa kukuxinezeleka okanye ukudimazeka.—Yobhi 6:3.
16. (a) Amazwi kaYesu akuMateyu 7:1-5 asebenza njani emtshatweni? (b) Kutheni kubalulekile nje ukulungelelana?
16 Iqabane lomtshato limele lilindele izinto ezisengqiqweni kwelinye. Elinye lisenokuphawula imikhwa ethile kwelinye lize lizixelele oku, ‘Ndingakwazi ukumtshintsha koku.’ Ngothando nomonde, usenokukwazi ukunceda iqabane lakho lithi ngcembe liphucula. Kodwa ungalibali ukuba uYesu wafanisa umntu obona iziphoso ezincinane zomnye kunye nomntu obona “udiza” oluselisweni lomzalwana wakhe ngoxa engawuboni “umqadi” okwelakhe iliso. UYesu wathi: “Musani ukugweba ukuze ningagwetywa.” (Funda uMateyu 7:1-5.) Oku akuthethi kuthi izibini zimele zingalungisani kwiingxaki ezinzulu. URobert, owayemalunga neminyaka engama-40 etshatile wathi: “Ukuthetha phandle nokunyaniseka omnye komnye nize namkele ukulungiswa xa kufanelekile kusenokufuna nitshintshe isimo sengqondo senu.” Ngoko umele ulungelelane. Endaweni yokufuna iimpawu ezithile nelingenazo iqabane lakho, funda ukuxabisa yaye uvuyiswe zezo zintle linazo ngoku.—INtshu. 9:9.
17, 18. Sinokubalekela phi xa iingxaki zisanda?
17 Nisenokufumana iimvavanyo ezithile xa kutshintsha iimeko zobomi. Isibini sisenokujamelana neengxaki ezithile xa sinabantwana. Elinye iqabane lomtshato okanye umntwana usenokugula ngamandla. Abazali abalupheleyo basenokufuna ukunyanyekelwa. Abantwana abakhulileyo basenokulishiya ikhaya baye kuhlala kude. Ezinye iinguqu zisenokubangelwa kukunyamekela amalungelo neembopheleleko ezithile zebandla. Zonke ezi nguqu zinokubangela uxinezeleko namaxhala emtshatweni.
18 Yintoni onokuyenza ukuba uxinezeleko olusemtshatweni lukwenza uzive ungasenakuya phambili? (IMize. 24:10) Unganikezeli! Ayikho into efunwa nguSathana ngaphezu kokuba abakhonzi bakaThixo bashiye unqulo olunyulu. Beluya kude luthi chatha uvuyo lwakhe ukuba izibini ezitshatileyo zinokwenjenjalo. Ngoko, yenza konke okusemandleni ukuqinisekisa ukuba umtshato wakho uhlala uyintambo entlu-ntathu. IBhayibhile ineengxelo ezininzi zabantu abaye bahlala bethembekile nakuba babejamelene neemvavanyo. Ngokomzekelo, ngesinye isihlandlo uDavide waphalaza imbilini yakhe kuYehova wathi: “Ndibabale, Thixo, ngenxa yokuba umntu ofayo . . . uqhubeka endicinezela.” (INdu. 56:1) Ngaba wakha waziva ucinezelwe ngomnye ‘umntu’? Enoba uxinezeleko onalo lubangelwa ngumntu ongenanto ingako yakwenza naye okanye osondeleyo kuwe, khumbula ukuba: UDavide wawafumana amandla okunyamezela, ibe nawe ungawafumana. UDavide wathi: “Ndabuza kuYehova, waza wandiphendula, yaye wandihlangula kwizinto ezindothusayo.”—INdu. 34:4.
Iintsikelelo Ezingakumbi
19. Yiyiphi indlela esinokulwa ngayo neentlaselo zikaSathana?
19 Kweli xesha lesiphelo, amaqabane omtshato kufuneka ‘ahlale ethuthuzelana yaye esakhana.’ (1 Tes. 5:11) Ungalibali ukuba, uSathana akagungqi kwinto yokuba abantu bathembeka kuYehova kuphela xa izinto zibahambela kakuhle. Uya kusebenzisa nantoni na ephambi kwakhe, kuquka ukuchitha umtshato, ukuze nje aphule ingqibelelo yethu kuThixo. Ukuze silwe neentlaselo zikaSathana, kufuneka sithembele ngokupheleleyo kuYehova. (IMize. 3:5, 6) UPawulos wathi: “Ezintweni zonke ndinamandla ngenxa yalowo undomelezayo.”—Fil. 4:13.
20. Ziziphi iintsikelelo ezifumaneka ngokubakho kukaThixo emtshatweni?
20 Zininzi iintsikelelo ezibangelwa bubukho bukaThixo emtshatweni. Koko kanye okwenzekayo kuJoel nomfazi atshate naye iminyaka engama-51. Uthi: “Ndihlala ndimbulela uYehova ngenxa yomfazi wam nendlela esonwabe ngayo. Ebesoloko eliqabane elithandekayo kum.” Yintoni eyona mfihlelo yabo? “Besisoloko sizama ukuba nobubele, umonde nothando omnye komnye.” Akukho namnye kuthi onokwenjenjalo ngendlela egqibeleleyo kule nkqubo yezinto. Ukanti, simele sizame ngamandla ukusebenzisa imigaqo yeBhayibhile ukuze uYehova ahlale ekho kumtshato wethu. Ukuba senjenjalo, umtshato wethu uya kufana ‘nentambo entlu-ntathu engenakuqhawuka kubini ngokukhawuleza.’—INtshu. 4:12.
Uyakhumbula Na?
• Buthetha ukuthini ubukho bukaYehova emtshatweni?
• Yintoni emele yenziwe ngamaqabane omtshato xa kuvela iingxaki?
• Sazi njani xa uThixo ekho emtshatweni?
[Imifanekiso ekwiphepha 18]
Ukuthandaza kunye kunceda izibini ezitshatileyo zikwazi ukujamelana neengxaki