Ngaba Abanye Ubajonga Ngendlela UYehova Abajonga Ngayo?
‘Makungabikho kwahlukana emzimbeni, ukuze amalungu awo anyamekelane.’—1 KOR. 12:25.
1. Wawuziva njani xa wawungena kwiparadesi yokomoya?
KUSENOKWENZEKA ukuba xa sasiphuma ehlabathini, sinxulumana nabantu bakaYehova, sasivuyiswa kukubona ukuthandana nokunyamekelana kwabo. Babohluke ngokupheleleyo kubantu abakrwada, abanentiyo nabangoophuma silwe beli hlabathi lilawulwa nguSathana. Sangena kwiparadesi yokomoya, apho kugquba uxolo nomanyano.—Isa. 48:17, 18; 60:18; 65:25.
2. (a) Yintoni enokuba nempembelelo kwindlela esibajonga ngayo abanye? (b) Yintoni ekusenokufuneka siyenze?
2 Noko ke, njengoko ixesha lihamba, kusenokwenzeka ukuba siye saqalisa ukunikel’ ingqalelo kwizenzo zokungafezeki kwabazalwana bethu. Ekubeni nathi singafezekanga, sinokuzibaxa iimpazamo zabo kunokuba sikhangele iimpawu zokomoya abanazo. Ngeliphandle, siyalibala ukubajonga ngendlela uYehova abajonga ngayo. Ukuba siwela kulo mgibe, eli lixesha lokuba sinikel’ ingqalelo kwindlela esizijonga ngayo izinto size sizijonge ngendlela kaYehova.—Eks. 33:13.
Indlela UYehova Abajonga Ngayo Abazalwana Bethu
3. IBhayibhile ilifanisa nantoni ibandla lamaKristu?
3 Kweyoku-1 yabaseKorinte 12:2-26, umpostile uPawulos wafanisa ibandla lamaKristu athanjisiweyo nomzimba ‘onamalungu amaninzi.’ Kanye njengokuba ilungu lomzimba lisahluka kwelinye, nawo amalungu ebandla aneempawu nezakhono ezahlukene ngokuphawulekayo. Sekunjalo, onke amkelekile kuYehova. Uwathanda onke yaye uxabisa ngalinye kuwo. NoPawulos ucebisa ukuba namalungu ebandla “anyamekelane.” Oku kusenokungabi lula kuba abanye banokuba nobuntu obahlukileyo kobethu.
4. Kutheni kusenokufuneka silungise indlela esibajonga ngayo abazalwana bethu?
4 Sisenokude singabi sakwazi ukubona nantoni na kubazalwana bethu ngaphandle kobuthathaka babo. Xa sisenjenjalo, sisenokufana nomntu osebenzisa ikhamera eneliso elibona indawo encinane kuphela. Noko ke, uYehova ujonga abazalwana bethu ngeliso elibanzi, elinokubona yonke into. Sisenokunikela ingqalelo kuphela kuloo nto singayithandiyo emntwini, ngoxa uYehova esazi konke ngaye, kuquka iimpawu zakhe ezintle. Okukhona sizabalazela ukufana noYehova, kokukhona siya kukhuthaza uthando nomanyano ebandleni.—Efe. 4:1-3; 5:1, 2.
5. Kutheni kungafanelekanga nje ukugweba abanye?
5 UYesu wayeqonda kakuhle ukuba abantu abangafezekanga bayathanda ukugxeka abanye. Wathi: “Musani ukugweba ukuze ningagwetywa.” (Mat. 7:1) Apha uYesu wayenqanda abafundi bakhe ukuba bayeke ukugweba. Kaloku wayesazi ukuba abaninzi kubaphulaphuli bakhe babethanda ukugxeka. Ngaba kunokwenzeka ukuba nathi sinjalo? Ukuba sinjalo, kufuneka sizabalazele ukuyeka ukugweba, ukuze singagwetywa nathi. Enyanisweni, besingoobani thina ukude sigwebe umntu omiselwe nguYehova okanye sithi ebengafanele kuba sebandleni? Umzalwana usenokuba nobuthathaka obuthile, kodwa ukuba usasetyenziswa nguYehova, ngaba bekuya kuba yinto efanelekileyo ukumgatya? (Yoh. 6:44) Ngaba siyikholelwa ngokwenene into yokuba uYehova uyayikhokela intlangano yakhe, kwanokuba xa kufuneka kulungiswe into ethile, uya kuyilungisa ngexesha elifanelekileyo?—Funda amaRoma 14:1-4.
6. UYehova ubajonga njani abakhonzi bakhe?
6 Eyona nto imangalisayo ngoYehova kukuba uyakwazi ukubona oko asenokuba kuko umKristu ngamnye emva kokuba efezekile kwihlabathi elitsha. Uyazi kakuhle nenkqubela yokomoya asele eyenzile. Ngoko, akuyomfuneko ukuba ade anikele ingqalelo kwisenzo ngasinye esibangelwa bubuthathaka benyama. KwiNdumiso 103:12 sifunda oku: “Njengokuba kude kwempumalanga entshonalanga, kunjalo ukukukhwelelisa kwakhe kude nathi ukunxaxha kwethu.” Oko kumele kusenze simbulele ngokungazenzisiyo uYehova.—INdu. 130:3.
7. Sifunda ntoni kwindlela uYehova awayemjonga ngayo uDavide?
7 IZibhalo zisibonisa ukuba uYehova uyakwazi ukubona izinto ezintle emntwini. UThixo wachaza uDavide ‘njengomkhonzi wakhe owayigcinayo imiyalelo yakhe nowamlandela ngentliziyo yakhe yonke ngokwenza kuphela oko kulungileyo emehlweni akhe.’ (1 Kum. 14:8) Kakade ke, siyazi ukuba zikho izinto eziphosakeleyo awazenzayo uDavide. Sekunjalo, uYehova wakhetha ukujonga iimpawu ezintle zikaDavide kuba wayesazi ukuba unentliziyo ethe tye.—1 Kron. 29:17.
Abazalwana Bakho Bajonge Ngendlela UYehova Abajonga Ngayo
8, 9. (a) Yiyiphi indlela esinokumxelisa ngayo uYehova? (b) Sinokukuzekelisa njani oku, ibe kusifundisa ntoni?
8 UYehova uyakwazi ukubona oko kusentliziyweni, kodwa thina asikwazi. Esi sisizathu sokuba singamele sigwebe abanye. Asizazi zonke izinto umntu azicingayo. Simele zabalazele ukuxelisa uYehova ukuze singanikeli ingqalelo kuphela kubuthathaka bomntu, obuya kuphela ekugqibeleni. Ngaba asifanele sizabalazele ukumxelisa kule nkalo? Xa sisenjenjalo, siya kufak’ isandla kuxolo lwabazalwana noodadewethu.—Efe. 4:23, 24.
9 Ngokomzekelo, khawucinge ngendlu ewohlokayo—iigatha ziyawa, iifestile zaphukile nesilingi yonakaliswe ngamanzi. Inkoliso yabantu inokubona loo ndlu ibe sele igqiba ekubeni ifanele idilizwe; imeko yayo imaxongo. Kodwa omnye umntu usenokuyibona ngeny’ indlela. Yena usenokubona ukuba loo ndlu isaphilile ngoko inokulungiswa. Uyayithenga, ayilungise ize ibe ntle. Emva koko, abadlula ngendlela bayayincoma. Ngaba asinakuzabalazela ukufana nalo mntu uye wenza umgudu wokulungisa le ndlu? Kunokuba sinikele ingqalelo kwiimpazamo zabazalwana bethu, ngaba sinokukhangela iimpawu zabo ezintle size siqonde ukuba banokwenza inkqubela engakumbi yokomoya? Ukuba senjenjalo, siya kutsho sibathande abazalwana bethu ngenxa yeempawu zabo ezintle, sixelisa uYehova.—Funda amaHebhere 6:10.
10. Icebiso elikwabaseFilipi 2:3, 4 linokusinceda njani?
10 Umpostile uPawulos wanikela icebiso elinokusinceda kulwalamano lwethu nabo bonke abasebandleni. Wawabongoza wathi amaKristu: “Ningenzi nanye into ngokusukuzana okanye ngokuzigwagwisa, kodwa ngokuthobeka kwengqondo, nibagqala abanye njengabongamileyo kunani, ninyamekela, kungekuphela nje izilangazelelo zobuqu, kodwa kwanezilangazelelo zabanye.” (Fil. 2:3, 4) Ukuthobeka kuya kusinceda sibajonge ngendlela efanelekileyo abanye. Ukuba nomdla kwabanye size sijonge izinto ezintle kubo kuya kusinceda sibajonge ngendlela abajonga ngayo uYehova.
11. Ziziphi iinguqu eziye zanefuthe kumabandla amaninzi?
11 Kutshanje, iinguqu ezenzeka ehlabathini ziye zabangela ukuba inkitha yabantu ifudukele kwamanye amazwe. Ngoku, kukho izixeko ezizaliswe ngabantu abavela kumazwe ahlukahlukeneyo. Abanye kwabo basandul’ ukufika kwizixeko zethu baye banomdla kwinyaniso yeBhayibhile, baza banqula uYehova kunye nathi. Aba bantu ‘baphuma kuzo zonke iintlanga nezizwe nezizwana neelwimi.’ (ISityhi. 7:9) Ngenxa yoko, amabandla ethu amaninzi abunjwa ngabantu bezizwe ngezizwe.
12. Yiyiphi indlela esimele sibajonge ngayo abanye, ibe kutheni oko kunokuba nzima nje maxa wambi?
12 Ebandleni lethu, kusenokufuneka siqinisekise ukuba sibajonga ngendlela efanelekileyo abanye. Oko kufuna sikhumbule isiluleko sikampostile uPetros ‘sokuba nomsa wobuzalwana ongenaluhanahaniso nokuthandana kakuhle ngokusuka entliziyweni.’ (1 Pet. 1:22) Ukuba nothando oluphuma entliziyweni nomsa onyanisekileyo kunokuba nzima kwibandla elineentlanga ezahlukahlukeneyo. Abazalwana bethu basenokuba nemvelaphi eyahluke ngokupheleleyo kweyethu, mhlawumbi bahlukile nangemfundo, kunye nezoqoqosho. Ngaba ukufumanisa kunzima ukuqonda indlela abanye abacinga nabazenza ngayo izinto? Kusenokwenzeka ukuba nabo bavakalelwa ngokufanayo ngawe. Phezu kwako nje oko, sonke siyalelwa oku: “Yibani nothando ngomanyano lwabazalwana luphela.”—1 Pet. 2:17.
13. Luluphi utshintsho ekusenokufuneka silwenze kwindlela esicinga ngayo?
13 Kusenokufuneka sitshintshe indlela esicinga ngayo ukuze sikwazi ukuba nothando oluphangaleleyo kubazalwana bethu. (Funda eyesi-2 kwabaseKorinte 6:12, 13.) Ngaba sakha saziva sele sisithi: “Andinabuhlanga kodwa, . . . ” emva koko sibe sele sichuba izinto esivakalelwa kukuba zenziwa ngabantu bohlanga oluthile? Ukuvakalelwa ngolo hlobo kunokubonisa ukuba kusafuneka sikhuphe nabuphi na ubuhlanga obendele ezintliziyweni zethu. Kusenokufuneka sizibuze oku, ‘Ngaba ikho imigudu endisoloko ndiyenza ukuze ndazi abantu bolunye uhlanga?’ Ukuzihlolisisa ngolo hlobo kuya kusinceda sikwazi ukubamkela nokubaxabisa abazalwana bethu abavela kwamanye amazwe.
14, 15. (a) Chaza imizekelo yabo bayitshintshayo indlela ababebajonga ngayo abanye? (b) Sinokubaxelisa njani?
14 IBhayibhile inemizekelo emihle yabantu abalwenzayo olo tshintsho, omnye wabo ngumpostile uPetros. Ekubeni wayengumYuda, uPetros wayengayi kungena kwimizi yabeeNtlanga. Cinga nje indlela amele ukuba wayevakalelwa ngayo xa kwathiwa makaye kumzi kaKorneli, umntu weeNtlanga owayengalukanga. UPetros watshintsha kwindlela awayecinga ngayo, evakalelwa kukuba kukuthanda kukaThixo ukuba abantu bazo zonke iintlanga babe yinxalenye yebandla lamaKristu. (IZe. 10:9-35) NoSawule, owaba ngumpostile uPawulos kamva, kwafuneka ayeke ukuba nobuhlanga. Wavuma ukuba amaKristu wayewathiye kangangokuba ‘walitshutshisa ngokugqithiseleyo ibandla likaThixo, waliphanzisa.’ Noko ke, xa iNkosi uYesu yamlungisayo uPawulos, wenza utshintsho olukhulu wada wamkela nolwalathiso lwabo wayekade ebatshutshisa.—Gal. 1:13-20.
15 Akuthandabuzeki ukuba ngoncedo lomoya kaYehova sinokusitshintsha isimo sengqondo esinaso. Ukuba sifumanisa ukuba kusekho into ebonisa ukuba sinobuhlanga, masenze unako-nako ukuze sibusiphule neengcambu size ‘sigcine ubunye bomoya kumxokelelwane omanyanisayo woxolo.’ (Efe. 4:3-6) IBhayibhile isikhuthaza ukuba ‘sambathe uthando, kuba lungumxokelelwane ogqibeleleyo womanyano.’—Kol. 3:14.
Ukuxelisa UYehova Kubulungiseleli Bethu
16. Kuyintoni ukuthanda kukaThixo ngokuphathelele abantu?
16 Umpostile uPawulos wabhala wathi: “Kuba akukho kukhetha buso kuThixo.” (Roma 2:11) Yinjongo kaYehova ukuhlanganisa ndawonye abantu bazo zonke iintlanga kunqulo lwakhe. (Funda eyoku-1 kuTimoti 2:3,4.) Ukuze afeze loo njongo, uye walungiselela ukuba ‘iindaba ezilungileyo ezingunaphakade zivakaliswe kuzo zonke iintlanga nezizwe neelwimi nabantu.’ (ISityhi. 14:6) UYesu wathi: “Intsimi lihlabathi.” (Mat. 13:38) Kubaluleke ngantoni oko kubantu bakowenu?
17. Yintoni esinokuyenza ukuze sincede zonke iintlobo zabantu?
17 Asinguye wonke umntu onokukwazi ukuya kushumayela kwamanye amazwe. Kodwa sinokukwazi ukushumayela kubantu abavela kumazwe ngamazwe abakwindawo esihlala kuyo. Ngaba siyawasebenzisa amathuba okushumayela kuzo zonke iintlobo zabantu, kungekhona kwabo besishumayela kubo kangangeminyaka? Kutheni ungazibekeli usukelo lokushumayela kubantu abangekasifumani ngokupheleleyo isigidimi?—Roma 15:20, 21.
18. Yiyiphi inkxalabo eyaboniswa nguYesu ebantwini?
18 UYesu wayekufuna ngokwenene ukunceda bonke abantu. Akazange ashumayele kwindawo enye kuphela. Enye ingxelo yeBhayibhile isixelela ukuba ‘wakhenketha zonke izixeko needolophana.’ Emva koko, wathi “akubona izihlwele wazisizela” wabe sele echaza ukuba zifuna ukuncedwa.—Mat. 9:35-37.
19, 20. Ziziphi ezinye iindlela esinokubonisa ngazo inkxalabo efana nekaYehova noYesu kuzo zonke iintlobo zabantu?
19 Ziziphi ezinye iindlela onokubonisa ngazo ukuba ubaxhalabele abantu? Abanye baye benza konke okusemandleni ukuze bashumayele kwiindawo ezingafane zifikelelwe kwintsimi yabo. Ezi isenokuba ziindawo zamashishini, iipaki, izikhululo, okanye ngaphambi kwezo zakhiwo kungelula ukungena kuzo. Abanye baye bafunda ezinye iilwimi ukuze bakwazi ukushumayela kubantu bezinye iintlanga abahlala kwindawo yabo okanye kubantu ekungafane kushunyayelwe kubo. Ukufunda indlela ababulisana ngayo ngolwimi lwabo kunokubonisa umdla onawo kwimpilo-ntle yabo. Ukuba asinandlela yakufunda olunye ulwimi, ngaba sinokubakhuthaza abo balufundayo? Ngokuqinisekileyo asifuni kubadimaza okanye sithandabuze izizathu zokwenza kwabo imigudu yokushumayela kubantu bamanye amazwe. Bonke abantu baxabisekile emehlweni kaThixo, ibe nathi sifuna ukubaxabisa.—Kol. 3:10, 11.
20 Ukujonga abantu ngendlela uThixo abajonga ngayo kukwathetha ukushumayela kubo bonke, kungakhathaliseki ukuba iimeko zabo zinjani na. Abanye kusenokwenzeka ukuba abanamakhaya, bamdaka, okanye babonakala beziphethe kakubi. Ukuba kukho abantu abangasiphathi kakuhle, oko akumele kusenze singaluthandi lonke uhlanga lwabo. Nakubeni uPawulos wayephathwa kakubi ngabathile, oko akuzange kumenze angashumayeli kubo bonke abantu abanemvelaphi efanayo. (IZe. 14:5-7, 19-22) Wayenethemba lokuba abathile babeya kuzamkela iindaba ezilungileyo.
21. Ukuba nembono kaYehova kuya kukunceda njani?
21 Ngoku, kucace mhlophe ukuba sifanele sibe nembono kaYehova xa sisebenzisana nabazalwana bethu abasebandleni, abasuka kumazwe ngamazwe, nabantu esishumayela kubo. Okukhona sisiba nembono kaYehova, kokukhona siya kukhuthaza uxolo nomanyano. Siya kutsho sikwazi ukunceda abanye bathande uYehova, uThixo ‘ongenamkhethe,’ kodwa obathanda bonke abantu, ‘kuba bonke bangumsebenzi wezandla zakhe.’—Yobhi 34:19.
Unokuphendula Uthini?
• Yiyiphi indlela esimele siphephe ukubajonga ngayo abazalwana bethu?
• Sinokumxelisa njani uYehova kwindlela esibajonga ngayo abazalwana bethu?
• Ufunde siphi isifundo kwindlela esimele sibajonge ngayo abazalwana abavela kwamanye amazwe?
• Sinokumxelisa njani uYehova kwindlela esibajonga ngayo abantu esishumayela kubo?
[Umfanekiso okwiphepha 26]
Yintoni onokuyenza ukuze wazi abantu bezinye iintlanga?
[Imifanekiso ekwiphepha 28]
Ziziphi iindlela onokufikelela ngazo abantu abangakumbi ngeendaba ezilungileyo?