Imibuzo Yabafundi
Ngaba UThixo Usohlwaya Ngeentlekele Zemvelo?
UThixo akasebenzisi iintlekele zemvelo ukohlwaya abantu abamsulwa. Akazange ohlwaye abantu ngeentlekele zemvelo yaye akasoze ayenze lo nto nanini na. Kutheni kunjalo nje? Ngenxa yokuba kweyoku-1 kaYohane 4:8 iBhayibhile ithi: “UThixo uluthando.”
Nantoni na uThixo ayenzayo uyenza ngenxa yothando. Uthando alushiyi intliziyo zabantu abamsulwa zilihlwili, kuba iBhayibhile ithi, “uthando alusebenzi bubi kummelwane kabani.” (Roma 13:10) KuYobhi 34:12 iBhayibhile ithi: “Enyanisweni, uThixo akenzi ngobungendawo.”
Yinyaniso engenakuphikwa into yokuba iBhayibhile yaxela kwangaphambili ukuba kwakuza kubakho iintlekele kwixesha esiphila kulo ‘njengeenyikima zomhlaba ezinkulu.’ (Luka 21:11) Kodwa uYehova asinakumbek’ ityala ngomonakalo obangelwa zizo njengokuba singenakusibek’ ityala nesanuse sezulu ngomonakalo obangelwa yinkanyamba ebesiyiqikelele. Ukuba ayingoThixo obangela ukuba abantu babandezeleke esebenzisa iintlekele zemvelo, ngubani ozibangelayo?
IBhayibhile ithi nguSathan’ uMtyholi kuba: “Ihlabathi liphela lisemandleni ongendawo.” (1 Yohane 5:19) Wayesisibulala-mntu ukususela kwasekuqaleni ukuza kuthi ga kumhla wethu. (Yohane 8:44) USathana akabuxabisanga yaye ubujonga njengobungabalulekanga ubomi babantu. Uyazingca kungenxa yalo nto ihlabathi lizingca. Ihlabathi lanamhlanje elizingcayo likhuthaza ukuxhatshazwa kwabantu abamsulwa kangangokuba abantu abangenabani bahlala kwiindawo eziyingozi. (Efese 2:2; 1 Yohane 2:16) Abantu ababawayo ngabo ababekek’ ityala ngezinye zeentlekele ezithwaxa abantu. (INtshumayeli 8:9) Kutheni kunjalo nje?
Iintlekele ezininzi zibangelwa ngabantu. Ngokomzekelo, cinga nje ngeengxaki ezachaphazela abantu abahlala kwindawo ethanda ukuba nenkanyamba iNew Orleans eUnited States okanye izindlu ezadudulwa ludaka oluphuphuma emilanjeni kwiintaba zaseVenezuela. Kwezo zihlandlo nangezinye, umoya nemvula uba yingozi ngenxa yokunganyanyekelwa kwemeko-bume, ukwakha ngezinto ezingekho mgangathweni, ukungacetywa kakuhle kwezinto, ukungathotyelwa kwesilumkiso neempazamo ezenziwa ngabasemagunyeni.
Cinga nje ngentlekele eyenzeka ngamaxesha eBhayibhile. Ngomhla kaYesu ukuwa kwenqaba kungalindelwanga kwabulala abantu abali-18. (Luka 13:4) Le ntlekele kusenokwenzeka ukuba yabangelwa yimpazamo eyenziwa ngumntu, “lixesha nasisihlo esingenakubonwa kwangaphambili,” okanye zombini—kodwa asiyondlela uThixo abohlwaya ngayo abantu.—INtshumayeli 9:11.
Ngaba kukho nayiphi na intlekele eyabangelwa nguThixo? Ewe zikho, kodwa ngokungafaniyo neentlekele zemvelo okanye ezibangelwa ngabantu iyakhetha ukuba ifuna ukutshabalalisa bani nokuba iza kusindisa bani, ibakho ngenjongo ethile yaye azifane zibekho iintlekele ezinjalo. Imizekelo emibini, uMkhukula owagubungela ihlabathi ngomhla kasolusapho uNowa nokutshatyalaliswa kwezixeko iSodom neGomora ebudeni bemihla kaLote. (Genesis 6:7-9, 13; 18:20-32; 19:24) Le migwebo kaThixo yatshabalalisa abantu abangendawo abangaguqukiyo yaza yasindisa abantu ababengamalungisa emehlweni kaThixo.
UYehova uThixo uyakwazi, uyakunqwenela yaye unamandla okuphelisa nakuphi na ukubandezeleka aze azise isiqabu kwimiphumo ebangelwa ziintlekele zemvelo. Ithetha ngoKumkani kaThixo omiselweyo, uYesu Kristu, iNdumiso 72:12 ithi: “Uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi.”