Ngaba Isijikelezi-langa Esingumhlaba Siphelelwa Lixesha?
Yiyiphi impendulo echanileyo kule mibuzo ilandelayo?
Kwixesha elizayo, ngaba iimeko emhlabeni
(a) ziza kuphucuka?
(b) ziza kuhlala zinje?
(c) ziza kutsib’ ilitye likaPhungela?
NGABA uzama ukuba nesimo sengqondo esihle xa ucinga ngekamva? Kuhle ukuba wenjenjalo. Uphando luye lwatyhila ukuba abantu abanesimo sengqondo esihle baba sempilweni. Uhlolisiso olwenziweyo noluthabatha ixesha elide lubonisa ukuba abantu abanesimo sengqondo esihle abafane babe nesifo sentliziyo kunokuba kunjalo ngabantu abanembono emfiliba ngobomi. Olu hlolisiso luvumelana namazwi awabhalwa eBhayibhileni kwiinkulungwane ezadlulayo: “Umntu onentliziyo echwayitileyo uba nempilo; kanti ke wona umoya odakumbileyo uyimpehla emathanjeni.”—IMizekeliso 17:22, iBhayibhile YesiXhosa.
Ngenxa yoqikelelo lwezazinzulu ngekamva lesijikelezi-langa esinguMhlaba, abantu abaninzi badangele. Makhe sihlolisise ezinye zezinto eziqikelelwa zizazinzulu.
Isijikelezi-langa Sisengozini
Ngowama-2002, iStockholm Environment Institute yalumkisa isithi ukuphuhlisa uqoqosho “kusenokutshintsha imozulu konakalise nendalo.” Le ngxelo yalek’ umsundulu isithi ubuhlwempu obuthwaxa ihlabathi, ucalucalulo nokuxhatshazwa kwemeko-bume kusenokubangela ukuba “abantu bazive benganqabisekanga.”
Ngowama-2005, iZizwe Ezimanyeneyo zakhulula iMillennium Ecosystem Assessmant Synthesis Report uhlolisiso olungemeko-bume yoMhlaba oluye lwenziwa ehlabathini lonke kangangeminyaka emine. Olu hlolisiso luye lwenziwa ziingcali ezingaphezu kwezili-1 360 ezisuka kumazwe angama-95 yaye zazinesi silumkiso: “Izinto ezenziwa ngabantu ziyayichaphazela indlela uMhlaba osebenza ngayo nto leyo eya kubangela ukuba isijikelezi-langa sethu singabi namveliso kwizizukulwana ezizayo.” Le ngxelo ithi: “Ukuze kuthintelwe le ntlekele kufuneka kutshintshwe indlela ezenziwa ngayo izinto.”
UAnna Tibaijuka ingqwayingqwayi yeUnited Nations Human Settlements Programme, usithela thsuphe ngezinto ezixhalabisa abaphandi. Uthi: “Ukuba izinto zihlala zinje, kungekho nto yenziwayo ukuphucula imeko asizi kuba nekamva eliqaqambileyo.”
Isizathu Sokuba Nethemba
AmaNgqina kaYehova abapapashi beli phephancwadi nawo akholelwa ekubeni sele kumbovu ukuba kubekho utshintsho emhlabeni. Noko ke, kunokuba ezi ziganeko zizise intlekele, akholelwa ekubeni zitshayelela imeko bume engazange ibonwe ngaphambili. Kutheni wona enethemba? Kungenxa yokuba athembele kwizithembiso eziseLizwini likaThixo, iBhayibhile. Phawula esinye isithembiso: “Kusele ithutyana, angabikho ongendawo; uya kuyikhangela indawo yakhe, abe engekho. Kodwa abalulamileyo baya kuwudla ilifa umhlaba, baziyolise ngokugqibeleleyo ngobuninzi boxolo.”—INdumiso 37:10, 11.
Ngaba esi sithembiso liphupha? Ngaphambi kokuba siphendule lo mbuzo, makhe sihlolisise oku: Kwakude kudala, kangangeminyaka engamawaka, iBhayibhile yathetha ngeengxaki esizibonayo ngoku ezithwaxa umhlaba nabantu. Nceda ufunde izibhalo ezikweli nqaku lilandelayo uze uthelekise oko zikutshoyo noko ukubona kusenzeka emhlabeni. Njengokuba usenjenjalo, uya kuba nentembelo yokuba iBhayibhile ilixela kwangaphambili ikamva ngokuchanileyo.