Kungekudala—Umhlaba Uza Kuba YiParadisi!

“Bawo wethu osezulwini: Malaziwe lihlonelwe igama lakho, malongame ulawulo lwakho, makwenziwe ukuthanda kwakho emhlabeni njengasezulwini.”—Mateyu 6:9, 10, IBhayibhile YesiXhosa yowe-1996.

LO MTHANDAZO udumileyo, abanye abantu bawazi njengoBawo Wethu Osezulwini okanye umthandazo weNkosi, ubanika ithemba abantu. Ubanika njani?

Njengokuba uMthandazo weNkosi ubonisa, uBukumkani bukaThixo buza kubangela ukuba ukuthanda kukaThixo kwenziwe emhlabeni kanye njengokuba kusenziwa ezulwini. Kukuthanda kukaThixo ukuba kubuyiselwe iParadesi. (ISityhilelo 21:1-5) Buyintoni obu Bukumkani bukaThixo, buza kuwenza njani ube yiParadesi umhlaba?

URhulumente Wokwenene

UBukumkani bukaThixo ngurhulumente wokwenene. Ukuze namphi na urhulumente asebenze kakuhle kufuneka kubekho abantu abaza kulawula, imithetho nabantu aza kubalawula. Ngaba uBukumkani bukaThixo bunazo ezi mfanelo? Khawuve impendulo yeBhayibhile kule mibuzo mithathu:

Ngoobani abalawuli boBukumkani bukaThixo? (Isaya 33:22) UYehova uThixo umisele uNyana wakhe, uYesu Kristu, ukuba ongamele uBukumkani. (Mateyu 28:18) Esalathiswa nguYehova, uYesu uye wakhetha ibathwana labantu “kuzo zonke izizwe neelwimi nabantu neentlanga” abaza kulawula kunye naye “njengookumkani phezu komhlaba.”—ISityhilelo 5:9, 10.

Yiyiphi imithetho emele ithotyelwe ngabalawulwa bakhe? Eminye yale mithetho ishukumisela abantu esenzweni. UYesu wachaza owona mthetho ubalulekileyo kuloo mithetho esithi: “‘Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela.’ Lo ngowona myalelo mkhulu nowokuqala. Owesibini, njengawo, ngulo, ‘Uze umthande ummelwane wakho njengawe siqu.’”—Mateyu 22:37-39.

Eminye yale mithetho ifuna abalawulwa bangazenzi izinto ezithile. Ngokomzekelo, iBhayibhile inalo myalelo ungqalileyo uthi: “Musani ukulahlekiswa: Abarheletyi, nabakhonza izithixo, nabakrexezayo, nabafebayo, nabangamadoda alalanayo, nabangamasela, nababawayo, nabangamanxila, nabathukayo, nabazizikrelemnqa abanakuxhamla ubuncwane bokulawulwa nguThixo.”—1 Korinte 6:9, 10, IBhayibhile YesiXhosa Yowe-1996.

Ngoobani Abalawulwa BoBukumkani BukaThixo? UYesu wafanisa abalawulwa boBukumkani bukaThixo nezimvu. Wathi: “Ziya kuliphulaphula ilizwi lam, zize zibe mhlambi mnye, nomalusi abe mnye.” (Yohane 10:16) Ukuze ube ngumlawulwa woBukumkani bukaThixo, umntu akamele athi ungumlandeli woMalusi Olungileyo, uYesu, kodwa umele azenze izinto aziyalelayo. UYesu wathi: “Asingabo bonke abathi kum, ‘Nkosi, Nkosi,’ abaya kungena ebukumkanini bamazulu, kodwa ngulowo wenza ukuthanda kukaBawo osemazulwini oya kungena.”—Mateyu 7:21.

Abo bangabalawulwa boBukumkani bukaThixo basebenzisa igama likaThixo, elinguYehova, baze balizukise kanye njengokuba wenza uYesu. (Yohane 17:26) Bathobela umyalelo kaYesu wokuba bafundise abanye “iindaba ezilungileyo zobukumkani.” (Mateyu 24:14; 28:19, 20) Bayathandana.—Yohane 13:35.

Ukonakalisa “Abo Bonakalisa Umhlaba”

Imeko ezigqubayo ehlabathini ngoku zibonisa ukuba sele kumbovu ukuba bungenelele uBukumkani bukaThixo ukuze buguqule imeko okuyo lo mhlaba. Siyazi njani lo nto? Kwiminyaka engama-2 000 eyadlulayo, uYesu wathetha ngomqondiso oyintlangisela owawuza kubonisa ukuba “ubukumkani bukaThixo bukufuphi.” (Luka 21:31) Njengokuba bekuye kwaboniswa kwinqaku elandulela eli, iinkalo ezithile zalo mqondiso zibonakala nakuthathatha ngoku.

Kuza kulandela ntoni? UYesu waphendula wathi: “Kuba ngelo xesha kuya kubakho imbandezelo enkulu ekungazange kubekho injengayo ukususela ekuqaleni kwehlabathi de kube ngoku, nekungasayi kubakho injengayo kwakhona.” (Mateyu 24:21) Esi sihelegu asibangelwa ngabantu. Kunoku iza kube inguThixo ngokwakhe ‘esonakalisa abo bonakalisa umhlaba.’ (ISityhilelo 11:18) Abantu abangendawo, abaye bonakalisa umhlaba ngenxa yokuzingca, “baya kunqunyulwa emhlabeni.” Kodwa abo bangenasiphako, abakhonza uThixo ngendlela afuna ngayo, “baya kusala kuwo.”—IMizekeliso 2:21, 22.

UYehova uThixo unezizathu ezivakalayo zokuba athabathe loo manyathelo. Ngoba kutheni? Khawuqwalasele lo mzekelo ulandelayo: Masithi unesakhiwo oqashise ngaso. Abanye babantu abahlala kuso baziphethe kakuhle; bahlawula ngexesha elifanelekileyo yaye bayawanyamekela lo magumbi bawaqashileyo. Noko ke, abanye abantu bayasonakalisa yaye abafuni nokuhlawula. Nangona bemana betyityimbiselwa umnwe abaguquki. Ubuya kwenza ntoni? Ekubeni ungumnini wesi sakhiwo ubuya kubagxotha abo bantu.

Ngendlela efanayo, uYehova uThixo, njengoMdali womhlaba nazo zonke izinto ezikuwo, unelungelo lokugqiba ukuba ngubani aza kumvumela ahlale emhlabeni. (ISityhilelo 4:11) Injongo kaThixo kukususa abantu abangendawo emhlabeni abangakunanzanga ukuthanda kwakhe nabaphazamisana namalungelo abanye abantu.—INdumiso 37:9-11.

Ukubuyiselwa KweParadesi

Kungekudala, uBukumkani bukaThixo obulawulwa nguYesu Kristu buza kulawula umhlaba. Esi sihlandlo uYesu wasibiza ngokuba ‘kukudalwa okutsha.’ (Mateyu 19:28) Ziya kuba njani iimeko? Khawuve ezi zithembiso ziseBhayibhileni:

INdumiso 46:9. “Uphelisa iimfazwe kuse esiphelweni somhlaba.”

Isaya 35:1. “Iya kuba nemihlali intlango nommandla ongumqwebedu, nethafa eliyinkqantosi liya kuvuya lize lityatyambe njengesafroni.”

Isaya 65:21-23. “Nomsebenzi wezandla zabanyuliweyo bam baya kuwusebenzisa ngokupheleleyo. Abayi kubulalekela ilize, bengayi kuzalela ukuphazamiseka.”

Yohane 5:28, 29. “Liyeza ilixa ekuya kuthi ngalo bonke abo bakumangcwaba enkumbulo balive ilizwi [likaYesu] baze baphume.”

ISityhilelo 21:4. “[UThixo] uya kuzisula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu kwakhona.”

Izizathu Zokukholelwa

Ngaba uyazikholelwa izithembiso zeBhayibhile? IBhayibhile yaxela kwangaphambili ukuba abantu abaninzi babengayi kuzikholelwa. IBhayibhile ithi: “Ngemihla yokugqibela kuya kufika abagculeli . . . beqhubeka ngokweminqweno yabo baze bathi: “Buphi obu bukho bakhe buthenjisiweyo? Kuba ukususela ngomhla ookhokho bethu abalala ngawo ekufeni, zonke izinto zisaqhubeka kanye njengasekuqaleni kwendalo.’” (2 Petros 3:3, 4) Abo bagculeli baza kukha phantsi isitya sizele. Nazi izizathu ezine zokuba uzikholelwe izinto ezithethwa yiBhayibhile:

(1) UThixo wangenelela kwimicimbi yalapha emhlabeni kwixa elidluleyo. UMkhukula womhla kaNowa ngowona mzekelo ubalaseleyo.—2 Petros 3:5-7.

(2) ILizwi likaThixo lizichaza ngokuchanileyo iimeko ezikhoyo nezigqugqisileyo ehlabathini.

(3) Izinto azenzeki “njengasekuqaleni kwendalo.” Umhlaba esiphila kuwo uneengxaki ongazange ube nazo ngaphambili njengeengxaki zentlalo, imilinganiselo yokuziphatha nokonakaliswa kwemeko-bume.

(4) ‘Iindaba ezilungileyo zobukumkani’ zishunyayelwa emhlabeni wonke, nto leyo ebonisa ukuba “ukuphela” akufikanga kugalelekile.—Mateyu 24:14.

AmaNgqina kaYehova ayakumema ukuba ufunde iLizwi likaThixo, iBhayibhile, nawo ukuze ufunde okungakumbi ngethemba lobomi obungunaphakade ngaphantsi koBukumkani bukaThixo. (Yohane 17:3) Ewe, ikamva elihle lilindele uluntu. Kuseza amaxesha amyoli. Ngaba uya kuba yinxalenye yeli kamva?

[Amagama acatshulweyo akwiphepha 7]

Abagculeli abathi izinto zinjengokuba zazinjalo ekuqaleni bakhe phantsi isitya sizele

[Umfanekiso okwiphepha 8]

Ngaba uza kuba yinxalenye yelo kamva?