Kutheni Umele Ube Nombulelo?

“Raquel othandekayo,

Ndiyabulela kakhulu ngokundikhuthaza. Nangona usenokuba awuyazi loo nto, amazwi akho akhuthazayo aye andinceda gqitha.”—NguJennifer.

NGABA wakha wafumana isibhilivana esibulelayo? Ukuba kunjalo, ngokuqinisekileyo lo mazwi akukhuthaza. Ngapha koko, kungokwemvelo ukuziva uxatyiswa.—Mateyu 25:19-23.

Umbulelo udla ngokubomeleza ubuhlobo phakathi kwabantu. Ukongeza koko, umntu obonisa umbulelo ulandela emanyathelweni kaYesu Kristu, owayesoloko eyibona imisebenzi emihle yabanye abantu.—Marko 14:3-9; Luka 21:1-4.

Okulusizi kukuba, bathanda ukunqongophala abantu abanombulelo enokuba babulela ngamazwi okanye ngokubhala izibhilivana. IBhayibhile yalumkisa yathi “ngemihla yokugqibela,” abantu babengazukuba ‘nambulelo.’ (2 Timoti 3:1, 2) Ukuba asiphaphanga, umoya ogqubayo wokungabi nambulelo unokutshabalalisa uxabiso esinalo.

Yintoni abanokuyenza abazali ukuze bafundise abantwana babo ukuba nombulelo? Ngubani esimele simbulele? Kutheni simele sibe nombulelo, nkqu nokuba abantu esiphila phakathi kwabo abanambulelo?

Phakathi Kwentsapho

Abazali bayazibhokoxa ukuze bakwazi ukondla abantwana babo. Maxa wambi, abazali basenokuvakalelwa kukuba imigudu yabo ayixatyiswa. Yintoni abanokuyenza ukuze balungise le meko? Kufuneka izinto ezintathu.

(1) Umzekelo. Ekubeni kunjalo nakwezinye iinkalo xa kuqeqeshwa umntwana umzekelo ngowona ubalulekileyo. Ithetha ngomama wakwaSirayeli owayekhuthele iBhayibhile ithi: “Oonyana bakhe bayaphakama bambhengeze enoyolo.” Bakufunda phi abantwana ukuba noxabiso? Inxalenye elandelayo yale ndinyana isichazela isithi: “Nendoda yakhe ungayiva imncoma.” (IMizekeliso 31:28) Abazali abancomanayo babonisa abantwana babo ukuba ukuncoma kuzisa uyolo, kuze kuphucule ulwalamano lwentsapho yaye kubonisa ukuba intsapho iqolile.

UStephen uthi: “Ndiye ndazama ukubamisela umzekelo abantwana bam ngokubulela umfazi wam xa epheke isidlo sasemini.” Aye azala nkomo ni lo magqabaza? UStephen uthi: “Iintombi zam ezimbini ziye zayiqaphela loo nto, yaye oko kuye kwazinceda zanombulelo ngakumbi.” Ukuba utshatile, ngaba usoloko ulibulela iqabane lakho, nangemisetyenzana ebonakala ingabalulekanga? Ngaba uyababulela abantwana bakho, nokuba benza loo nto bafanele bayenze kakade?

(2) Uqeqesho. Amazwi ombulelo anjengeentyatyambo. Kufuneka zihlakulelwe ukuze zivelise iziqhamo ezihle. Banokubanceda njani abazali abantwana babo ukuze babe nombulelo? UKumkani uSolomon osisilumko wabalaselisa enye inkalo xa wabhala wathi: “Intliziyo yelungisa iyayicamngca impendulo.”—IMizekeliso 15:28.

Bazali, ngaba ninokubaqeqesha abantwana benu bacinge ngomgudu nesisa esihamba nezipho enibapha zona? Ukucamngca ngale ndlela kuya kuba luncedo kanye njengokuba iintyatyambo zikhula kakuhle kumhlaba ovundileyo. UMaria okhulise abantwana abathathu uthi: “Kufuna ixesha ukuhlala phantsi nabantwana uze ubachazele ukubaluleka kokuba nombulelo xa uphiwe isipho—loo mntu ukupha isipho uye wacinga ngawe waza wakuthengela isipho esiya kubonisa ukuba uyakuxabisa. Ndicinga ukuba uyafuneka loo mgudu.” Ukuncokola ngezinto ezilolo hlobo kunceda abantwana bangafundi nje kuphela into abamele bayithethe xa bebulela kodwa kwenesizathu sokuba bemele babe nombulelo.

Abazali abalumkileyo banceda abantwana babo bangabi nesimo sengqondo sokuba yonke into abayifumanayo banelungelo lokuyifumana.a Isilumkiso esikwiMizekeliso 29:21 esithetha ngabakhonzi sisebenza ngendlela efanayo nasebantwaneni: “Ukuba ubani umtefisa kwasebutsheni umkhonzi wakhe, kamva ekuphileni kwakhe uya kuba ngongenambulelo.”

Banokuncedwa njani abantwana babe nombulelo? ULinda, ongumama wabantwana abathathu uthi: “Mna nomyeni wam sikhuthaza abantwana bethu ukuba nabo babhale xa sityobela ixwebhu lokubulela ngokuzoba imizobo kwelo khadi okanye ngokutyobela amagama abo.” Ewe, umfanekiso usenokungachukumisi kangako nezinto abazibhalayo kusenokuba nzima ukuzifunda, kodwa izinto abazifundayo abantwana zibalulekile.

(3) Ukuzingisa. Sonke sinotyekelo lokuzingca, yaye olu tyekelo lunokusenza singabi nambulelo. (Genesis 8:21; Mateyu 15:19) IBhayibhile ibongoza abakhonzi bakaThixo isithi: “Mawahlaziyeke amandla engqondo yenu, nambathe ubuntu obutsha obadalwa ngokokuthanda kukaThixo.”—Efese 4:23, 24.

Abazali bayazi ukuba ukunceda abantwana ‘bambathe ubuntu obutsha’ akululanga. UStephen, ebesimkhankanye ngaphambili uthi, “ukufundisa abantwana bethu ukuba babulele singabakhumbuzanga kwathabatha ixesha elide ngaphambi kokuba bakuqhele.” Kodwa uStephen nomfazi wakhe abazange banikezele. UStephen uhlabela mgama esithi “ngenxa yokuzingisa iintombi zethu zade zafunda. Ngoku sinelunda ngendlela ezibabulela ngayo abanye.”

Kuthekani Ngabahlobo Nabamelwane?

Maxa wambi siyalibala ukubulela ngoxa simele sibulele. Ngaba kubalulekile ukuba umbulelo wethu ungapheleli kwiimvakalelo kodwa siwuvakalise? Ukuze uphendule loo mbuzo, khawuqwalasele isiganeko esasibandakanya uYesu nabantu ababeneqhenqa.

Ngoxa wayesiya eYerusalem, uYesu wadibana namadoda alishumi awayenesifo seqhenqa. IBhayibhile ithi: “Aphakamisa amazwi awo athi: ‘Yesu, Myaleli, yiba nenceba kuthi!’ Akuwabona wathi kuwo: ‘Hambani niye kuzibonakalisa kubabingeleli.’ Kwathi ke njengoko ayesiya ahlanjululwa. Enye yawo, xa yabonayo ukuba iphilisiwe, yabuya, izukisa uThixo ngelizwi elikhulu. Yawa ngobuso bayo ezinyaweni zikaYesu, imbulela; ngapha koko, yayingumSamariya.”—Luka 17:11-16.

Ngaba uYesu akazange abananze abo bangazange bambulele? Le ngxelo ihlabela mgama isithi: “Ekuphenduleni uYesu wathi: “Kuhlanjululwe balishumi, akunjalo? Baphi na ke abanye abasithoba? Akufunyanwanga namnye na ubuyileyo ukuza kunikela uzuko kuThixo ngaphandle kwalo mntu wolunye uhlanga?’”—Luka 17:17, 18.

Amanye amadoda alithoba ayengengobantu bangendawo. Ekuqaleni, babebonise ukholo kuYesu esidlangalaleni baze bayithobela nemiyalelo yakhe, eyayiquka ukuya eYerusalem baze bazibonise kubabingeleli. Nangona babebuxabisa ububele ababenzelwe nguYesu, kodwa abazange bambulele. Ukungabi nambulelo kwawo kwamdanisa uKristu. Kuthekani ngathi? Xa umntu othile esiphatha kakuhle, ngaba siyakhawuleza ukuthi enkosi, size sibhale nokuba sisibhilivana xa kufanelekile?

IBhayibhile ithi “uthando alugezi alufuni okukokwalo.” (1 Korinte 13:5 iBhayibhile yesiXhosa yowe-1996) Ngaloo ndlela amazwi anyanisekileyo okubulela awabonisi ukuba ngumntu ochubekileyo nje kuphela kodwa abonisa uthando. Kanye njengokuba isiganeko esasibandakanya la madoda ayeneqhenqa sisifundisa, abo bafuna ukukholisa uKristu bamele bathande baze babe nombulelo kubo bonke abantu, enokuba linjani ibala labo, uhlanga okanye unqulo lwabo.

Zibuze, ‘Ndagqibela nini ukubulela ummelwane wam, umntu endisebenza naye, umntu endifunda naye, umntu endisebenza naye esibhedlele, umntu othengisa evenkileni okanye omnye umntu oye wandinceda?’ Kutheni ungagcini ingxelo yosuku olunye okanye ezimbini uze uwabhale phantsi amaxesha oye wabulela ngawo? Ingxelo enjalo inokukunceda ubone apho unokuphucula khona.

Oyena mntu esimele simbulele kakhulu nguYehova uThixo. UnguMniki waso “sonke isipho esilungileyo naso sonke isipho esigqibeleleyo.” (Yakobi 1:17) Ugqibele nini ukumbulela ngokunyanisekileyo uThixo ngezinto ezithile aye wakwenzela zona?—1 Tesalonika 5:17, 18.

Kutheni Umele Ube Noxabiso Nakuba Abanye Abantu Bengenalo?

Abanye basenokungawuxabisi umbulelo wethu. Kutheni simele sibe nombulelo ngoxa abanye bengenawo? Khawucinge ngesi sizathu.

Ukuba sibenzela izinto ezintle abantu abangenaxabiso sakuba sixelisa uMdali wethu onobabalo, uYehova uThixo. Nangona abantu abaninzi bengaluxabisi uthando lukaYehova akayeki ukubenzela izinto ezintle. (Roma 5:8; 1 Yohane 4:9, 10) Wenza “ilanga lakhe liphume kubantu abangendawo nabalungileyo nemvula eyinisa kubantu abangamalungisa nabangengomalungisa.” Ukuba siyaqhubeka sinombulelo nangona siphila kwihlabathi elingenambulelo, siya kuzingqina ‘singoonyana boYihlo osemazulwini.’—Mateyu 5:45.

[Umbhalo osemazantsi]

[Amagama acatshulweyo akwiphepha 15]

Gcina ingxelo yosuku olunye okanye ezimbini uze uwabhale phantsi amaxesha oye wabulela ngawo

[Umfanekiso okwiphepha 15]

Nabantwana abaselula banokufundiswa ukuba noxabiso

[Umfanekiso okwiphepha 15]

Misela abantwana bakho umzekelo ngokuba noxabiso