UYehova Akayi Kubashiya Abanyanisekileyo Bakhe
“[UYehova] akayi kubashiya abanyanisekileyo bakhe. Ngokuqinisekileyo baya kulindwa ukusa kwixesha elingenammiselo”—INDU. 37:28.
1, 2. (a) Ziziphi iziganeko ezenzeka ngenkulungwane yeshumi ngaphambi kweXesha Eliqhelekileyo ezavavanya ukunyaniseka kwabakhonzi bakaThixo? (b) Kukweziphi iimeko ezintathu awathi uYehova wabakhusela ngazo abanyanisekileyo bakhe?
YINKULUNGWANE yeshumi ngaphambi kweXesha Eliqhelekileyo yaye kulixesha lokuba abakhonzi bakaYehova benze isigqibo. Basinde cebetshu kwimfazwe yamakhaya ngokunika izizwe ezisemantla zakwaSirayeli umlinganiselo othile wenkululeko. Ukumkani wabo osandul’ ukubekwa uYerobhoham, ukhawuleza omeleze ubukhosi bakhe ngokumisela unqulo olutsha lweLizwe. Ufuna abo balawulwa nguye bamthobele ngokupheleleyo. Baza kwenza ntoni abakhonzi bakaYehova abathembekileyo? Ngaba baya kuqhubeka bethembekile kuThixo wabo? Amawaka enjenjalo yaye uYehova uyawakhusela ngenxa yokugcina kwawo ingqibelelo.—1 Kum. 12:1-33; 2 Kron. 11:13, 14.
2 Ukunyaniseka kwabakhonzi bakaThixo kuyavavanywa nanamhlanje. IBhayibhile ilumkisa ngelithi: “Hlalani nithe qwa, nilindile. Utshaba lwenu, uMtyholi, luhambahamba njengengonyama egqumayo, efuna ubani engamqwengayo.” Ngaba singakwazi ‘ukuma nxamnye naye, siqinile elukholweni’? (1 Pet. 5:8, 9) Makhe sihlolisise iziganeko ezithile ezingqonge ukubekwa kukaKumkani uYerobhoham ngowama-997 B.C.E., size sibone ukuba singafunda ntoni kuzo. Ngaloo maxesha anzima, abantu bakaYehova abathembekileyo babecinezelekile. Babechanabeke kuwexuko ngoxa babesenza imisebenzi elucelomngeni. Kwimeko nganye kwezi, uYehova akazange abashiye abanyanisekileyo bakhe yaye akanakuze ayenze nanamhlanje loo nto.—INdu. 37:28.
Xa Becinezelwe
3. Kwakutheni ukuze ulawulo lukaKumkani uDavide lungacinezeli?
3 Makhe siqale sihlolisise iimeko awaba ngukumkani phantsi kwazo uYerobhoham. IMizekeliso 29:2 ithi: “Xa kulawula ongendawo, abantu bayancwina.” Xa kwakulawula uKumkani uDavide wakwaSirayeli mandulo, abantu abazange bancwine. Wayengafezekanga uDavide kodwa wayenyaniseke kuThixo yaye ethembele kuye. Ulawulo lukaDavide lwalungacinezeli. UYehova wenza umnqophiso noDavide esithi: “Nendlu yakho nobukumkani bakho ngokuqinisekileyo buya kuqina ukusa kwixesha elingenammiselo phambi kwakho; netrone yakho kanye iya kumiselwa ngokuqinileyo ukusa kwixesha elingenammiselo.”—2 Sam. 7:16.
4. Iintsikelelo ezazikho kulawulo lukaSolomon zazixhomekeke entwenini?
4 Kulawulo lonyana kaDavide uSolomon kwakukho uxolo yaye izinto ziluhambela kakuhle kangangokuba lwalulufanekisela kakuhle uLawulo Lweminyaka Eliwaka lukaKristu Yesu oluzayo. (INdu. 72:1, 17) Akukho nokuba sibe sinye kwizizwe ezili-12 zakwaSirayeli ngelo xesha esasinezizathu zokuvukela. Noko ke, iintsikelelo ezananditshwa nguSolomon nabalawulwa bakhe zazixhomekeke kwindlela ababeziphethe ngayo. UYehova wathi kuSolomon: “Ukuba uya kuhamba emimiselweni yam uze uyenze imigwebo yam yaye uyigcine yonke imiyalelo yam ngokuhamba kuyo, nam ngokuqinisekileyo ndiya kuliphumeza kuwe ilizwi lam endalithethayo kuDavide uyihlo; kwaye eneneni ndiya kuhlala phakathi koonyana bakaSirayeli, yaye andiyi kubashiya abantu bam amaSirayeli.”—1 Kum. 6:11-13.
5, 6. Kwaphumela entwenini ukungathembeki kukaSolomon kuThixo?
5 Ebudaleni, uSolomon akazange athembeke kuYehova yaye wabandakanyeka kunqulo lobuxoki. (1 Kum. 11:4-6) Ngokuthe ngcembe uSolomon wayeka ukuthobela imithetho kaYehova waza wacinezela abantu ngendlela egqith’ emgceni. Ngendlela awabacinezela ngayo abantu, kwathi naxa wayesel’ efile, abantu bamkhalazela kunyana wakhe owangen’ ezihlangwini zakhe, uRehobhoham, becela ukuba noko yena aze asinyenyise isitrophu. (1 Kum. 12:4) Wathini uYehova akungathembeki uSolomon?
6 IBhayibhile isixelela oku: ‘UYehova waba nomsindo kuSolomon, ngenxa yokuba intliziyo yakhe yemka kuThixo kaSirayeli, lowo wayebonakele kabini kuye.’ UYehova wathi kuSolomon: “Ngenxa yokuba . . . ungawugcinanga umnqophiso wam nemimiselo yam endakuyalela yona, ndiya kubukrazula ubukumkani kuwe, ndibunike umkhonzi wakho.”—1 Kum. 11:9-11.
7. Nangona wagatywayo uSolomon, uYehova wabanyamekela njani abantu bakhe abathembekileyo?
7 Wandula ke uYehova wathumela umprofeti uAhiya ukuba athambise umkhululi. Loo mkhululi yayinguYerobhoham, indoda efanelekayo neyayisebenza kurhulumente kaSolomon. Nangona uYehova wabambelelayo kumnqophiso woBukumkani awawenza noDavide, wavumela ukwahlulwa koburhulumente phakathi kwezizwe ezili-12. Izizwe ezilishumi zanikwa uYerobhoham; zathi ke ezibini zasala nentsapho yomnombo kaDavide, eyayimelwa nguKumkani uRehobhoham. (1 Kum. 11:29-37; 12:16, 17, 21) UYehova wathi kuYerobhoham: “Ukuba uthobela konke oko ndiya kukuyalela kona, uze uhambe ezindleleni zam wenze oko kulungileyo emehlweni am ngokugcina imimiselo yam nemiyalelo yam, kanye njengoko uDavide umkhonzi wam wenzayo, nam ndiya kuba nawe, kwaye ndiya kukwakhela indlu ehlala ihleli, kanye njengoko ndamakhelayo uDavide, yaye ndiya kukunika uSirayeli.” (1 Kum. 11:38) UYehova wakhusela abantu bakhe waza wabapha isiqabu kwingcinezelo.
8. Ziziphi iimvavanyo ezicinezela abantu bakaThixo namhlanje?
8 Ingcinezelo nokungekho sikweni kuyagquba namhlanje. INtshumayeli 8:9 ithi: “Ngexesha athi umntu alawule umntu iba kukwenzakala kwakhe.” Abarhwebi ababawayo nabalawuli abonakeleyo banokubangela iimeko ezimandundu zoqoqosho. Abalawuli baseburhulumenteni, abezoshishino nabonqulo basoloko bemisela umzekelo ombi. Ngenxa yoko, kanye njengoLote olilungisa, abantu bakaThixo abathembekileyo namhlanje ‘babandezeleke kakhulu kukuzifica kwihambo evakalala kwabantu abadelela umthetho.’ (2 Pet. 2:7) Ngaphezu koko, njengoko sizama ukuphila ngokuvisisana nemilinganiselo kaThixo ngaphandle kokuphazamisana nabanye, sisoloko sizizisulu zokutshutshiswa ngabalawuli abakhohlakeleyo.—2 Tim. 3:1-5, 12.
9. (a) Yintoni asele eyenzile uYehova ukuze akhulule abantu bakhe? (b) Sinokuqiniseka njani ukuba uYesu uya kusoloko ethembekile kuThixo?
9 Noko ke, sinokuqiniseka ngesi sibakala: uYehova akasayi kuze abashiye abantu bakhe abathembekileyo! Cinga nje ngamanyathelo aye wawathabatha ukuze asuse abalawuli behlabathi abonakeleyo. UBukumkani bukaThixo obungoMesiya obulawulwa nguKristu Yesu sele bumiselwe. UYesu Kristu ebelawula ezulwini kangangethuba elisondele kwikhulu leminyaka. Kungekudala uya kuzisa isiqabu esipheleleyo kwabo baloyikayo igama likaThixo. (Funda ISityhilelo 11:15-18.) UYesu wazingqina ethembekile kuThixo de wafa. Akasayi kuze abadanise abalawulwa bakhe, kanye njengokuba wenzayo uSolomon.—Heb. 7:26; 1 Pet. 2:6.
10. (a) Sinokubonisa njani ukuba siyabuxabisa uBukumkani bukaThixo? (b) Yintoni esinokuqiniseka ngayo xa sihlangabezana neemvavanyo?
10 UBukumkani bukaThixo bungurhulumente wokwenene oya kuphelisa yonke ingcinezelo. Thina sixhasa uYehova uThixo neli lungiselelo lakhe. Njengoko sithembele ngokupheleleyo kobu Bukumkani, siyakuchasa ukungahloneli Thixo kwehlabathi yaye ngenzondelelo sisukela imisebenzi emihle. (Tito 2:12-14) Sizabalazela ukuhlala singenabala kweli hlabathi. (2 Pet. 3:14) Enoba sihlangabezana naziphi na izilingo ngoku, sinokuqiniseka ukuba uYehova uya kusikhusela xa ukholo lwethu lusengozini. (Funda INdumiso 97:10.) Ngaphezu koko, INdumiso 116:15 isiqinisekisa ngelithi: “Kuxabisekile emehlweni kaYehova ukufa kwabanyanisekileyo bakhe.” Abakhonzi bakaYehova baxabisekile kuye kangangokuba akanakuvuma ukuba batshayelwe njengeqela.
Xa Kukho Impembelelo Yabawexuki
11. UYerobhoham wakubonisa njani ukungathembeki?
11 Ulawulo lukaKumkani uYerobhoham lwalumele luzise isiqabu kubantu bakaThixo. Kodwa indlela awenza ngayo yavavanya ukuthembeka kwabo kuThixo. Enganelisekanga luzuko nelungelo awayesele elinikiwe, uYerobhoham waqalisa ukukhangela iindlela awayeza kusomeleza ngayo isikhundla sakhe. Waqiqa ngelithi: “Ukuba esi sizwana siyaqhubeka sisenyuka sisiya kwenza imibingelelo endlwini kaYehova eYerusalem, kuya kunyanzeleka ukuba intliziyo yesi sizwana ibuyele enkosini yaso, uRehobhoham ukumkani wakwaYuda; yaye siya kundibulala ngokuqinisekileyo size sibuyele kuRehobhoham ukumkani wakwaYuda.” Ngoko uYerobhoham wamisela unqulo olutsha olusekelwe kumathole amabini egolide. “Wabeka elinye eBheteli, waza elinye walibeka kwaDan. Yaye le nto yabenza bona, ibe abantu baqalisa ukuya phambi kwelo likwaDan. Waqalisa ukwenza indlu yeendawo eziphakamileyo nokwenza ababingeleli kubantu ngokubanzi, ababengengabo oonyana bakaLevi.” UYerobhoham waseka usuku lwakhe ‘lomthendeleko woonyana bakaSirayeli,’ yaye waqhubeka ‘esenza neminikelo esibingelelweni ukuze kuqhunyiswe umbingelelo.’—1 Kum. 12:26-33.
12. Benza ntoni abantu bakaThixo abathembekileyo ababekubukumkani basentla xa uYerobhoham wamisela unqulo lwethole kwaSirayeli?
12 Babeza kwenza ntoni abakhonzi bakaThixo abathembekileyo ababephantsi kobukumkani basentla? Kanye njengooyisemkhulu abathembekileyo, abaLevi abahlala kwizixeko ababezinikiwe kummandla wobukumkani basentla abazange balibazise. (Eks. 32:26-28; Num. 35:6-8; Dut. 33:8, 9) Beshiya amafa abo ngasemva, basa iintsapho zabo emazantsi kwaYuda, apho baqhubekayo benqula uYehova ngaphandle kokuphazanyiswa. (2 Kron. 11:13, 14) Amanye amaSirayeli awayexhwarhe okwethutyana kwaYuda akhetha ukuhlala apho ngokusisigxina kunokuba agoduke. (2 Kron. 10:17) UYehova waqinisekisa ukuba indlela ebuyela kunqulo lokwenyaniso ihlala ivulekile ukuze nakwizizukulwana eziya kulandela nabanye abantu abasuka kubukumkani basentla bashiye unqulo lwethole baze baye kwaYuda.—2 Kron. 15:9-15.
13. Namhlanje, iimpembelelo zabawexuki zibavavanye njani abantu bakaThixo?
13 Abawexuki neempembelelo zabo basongela abantu bakaThixo namhlanje. Abanye abalawuli baye bazama ukumisela uhlobo lwabo lonqulo lweLizwe, benyanzela abalawulwa babo ukuba balwamkele. Abefundisi beNgqobhoko nabanye abantu abanekratshi baye bathi kubhekiselwa kubo xa kuthethwa ngababingeleli bokomoya. Noko ke, “ububingeleli basebukhosini” bufumaneka phakathi kwabathanjiswa bokwenene abangamaKristu okwenyaniso.—1 Pet. 2:9; ISityhi. 14:1-5.
14. Simele sizijonge njani iingcamango zabawexuki?
14 Kanye njengabaLevi abathembekileyo benkulungwane yeshumi ngaphambi kweXesha Eliqhelekileyo, abantu bakaThixo abathembekileyo namhlanje abaqhathwa ziimfundiso zabawexuki. Abathanjiswa kwakunye namaKristu angamaqabane abo bayakhawuleza ukuphepha nokugatya iingcamango zabawexuki. (Funda eyabaseRoma 16:17.) Ngoxa siwathobela ngovuyo amagunya aseburhulumenteni kwimiba ephathelele nawo size singathabathi cala kwiimbambano zehlabathi, thina sinyaniseke kuBukumkani bukaThixo. (Yoh. 18:36; Roma 13:1-8) Siyakugatya oko kuthethwa ngabo bathi bakhonza uThixo baze kwangaxeshanye babonise ukungamhloneli ngendlela abenza ngayo.—Tito 1:16.
15. Kutheni simele sinyaniseke ‘kwikhoboka elithembekileyo neliyingqondi?
15 Cinga nje ngesibakala sokuba uYehova enze indlela yokuba abantu abanyanisekileyo baphume kweli hlabathi lingendawo, aze ngokufuziselayo abafake kwiparadesi yokomoya abenzele yona. (2 Kor. 12:1-4) Sinoxabiso olungazenzisiyo, sisondela kangangoko kunokwenzeka ‘kwikhoboka elithembekileyo neliyingqondi ethe inkosi yalo yalimisela phezu kwempahla yendlu yayo, ukuze liyinike ukutya kwayo ngexesha elifanelekileyo.’ UKristu uye walimisela eli khoboka ‘phezu kwayo yonke impahla yakhe.’ (Mat. 24:45-47) Ngenxa yoko, enoba thina ngabanye asiliqondi inyathelo elithile elithatyathwa ludidi lwekhoboka, oko akumele kube sisizathu sokuligatya okanye sibuyele kwihlabathi likaSathana. Kunoko ukunyaniseka kuya kubangela ukuba sithobele size silindele kuYehova ukuba acacise imicimbi.
Ngoxa Siphumeza Izabelo Esizinikwe NguThixo
16. Wafumana siphi isabelo umprofeti ovela kwaYuda?
16 UYehova wamgweba uYerobhoham ngokuwexuka lwakhe. Wathumela umprofeti ovela kwaYuda owayeza kunyuka aye eBheteli aze abonane noYerobhoham ngoxa wayebingelela. Lo mprofeti wayeza kuvakalisa umgwebo obuhlungu kuYerobhoham. Ngokungathandabuzekiyo, eso yayisisabelo esinzima.—1 Kum. 13:1-3.
17. UYehova wamkhusela njani umthunywa wakhe?
17 UYerobhoham wabhabhazela ngumsindo esakuva ngomgwebo kaYehova kuye. Wolulela isandla kulo mthunywa kaThixo, waza wakhwaza esithi kumadoda awayekufutshane: “Madoda, mbambeni!” Kodwa ngoko nangoko, ngaphambi kokuba nabani na athabathe inyathelo “soma isandla sakhe awayesolule nxamnye naye, yaye akazange akwazi ukusibuyisela kuye. Nesibingelelo sakrazuka kangangokuba uthuthu olunamafutha lwaphalala esibingelelweni.” Kwanyanzeleka ukuba uYerobhoham acele kwalo mprofeti ukuba abongoze uYehova aze athandazele ukuba isandla sakhe esomileyo siphiliswe. Wakwenza oko, yaye isandla sakhe saphiliswa. Ngenxa yoko, uYehova wamkhusela umthunywa wakhe ekwenzakaleni.—1 Kum. 13:4-6.
18. UYehova usilondoloza njani njengoko sinikela inkonzo engcwele kuye ngaphandle koloyiko?
18 Njengoko sishumayela ngoBukumkani size senze abafundi ngokunyaniseka, maxa wambi sidibana nabantu abangenabuhlobo nabangasiphathi kakuhle. (Mat. 24:14; 28:19, 20) Kodwa asimele sivumele ukoyika ukuchaswa kuthothise inzondelelo esinayo ngobulungiseleli bethu. Kanye njengomprofeti ongabizwanga ngagama womhla kaYerobhoham ‘sinelungelo lokunikela inkonzo engcwele ngokungenaloyiko [kuYehova] ngokunyaniseka.’a (Luka 1:74, 75) Nangona singalindelanga ukuba angenelele ngokungummangaliso namhlanje, uYehova usasilondoloza aze asikhusele njengamaNgqina akhe ngomoya wakhe oyingcwele nangeengelosi. (Funda uYohane 14:15-17; ISityhilelo 14:6.) UThixo akasoze abashiye abo bathi ngaphandle koloyiko baqhubeke belithetha ilizwi lakhe.—Fil. 1:14, 28.
UYehova Uya Kubalondoloza Abanyanisekileyo Bakhe
19, 20. (a) Sinokuqiniseka njani ukuba uYehova akanakuze asishiye? (b) Yiyiphi imibuzo eza kuxutyushwa kwinqaku elilandelayo?
19 UYehova nguThixo wethu onyanisekileyo. (ISityhi. 15:4; 16:5) “Unyanisekile kuyo yonke imisebenzi yakhe.” (INdu. 145:17) Yaye iBhayibhile isiqinisekisa ngoku: “Uya kuyigcina indlela yabanyanisekileyo bakhe.” (IMize. 2:8) Xa bejamelene neemvavanyo, iingcamango zabawexuki, okanye xa kufuneke benze isabelo esinzima, abanyanisekileyo bakaYehova uThixo banokuqiniseka ukuba uya kubalathisa aze abaxhase.
20 Nantsi into ekufuneka ngamnye kuthi acinge ngayo ngoku: Yintoni enokundinceda ndilondoloze ukuthembeka kwam kuYehova phezu kweemvavanyo okanye izilingo endinokujamelana nazo? Ngamany’ amazwi, ndinokukomeleza njani ukunyaniseka kwam kuThixo?
[Umbhalo osemazantsi]
a Enoba lo mprofeti uyaqhubeka ethobela uYehova okanye akunjalo, okwenzeka kuye kuza kuxutyushwa kwinqaku elilandelayo.
Ubuya Kuphendula Uthini?
• UYehova ubonise njani ukuba akabashiyi abanyanisekileyo bakhe xa becinezelwe?
• Sinokusabela njani kubawexuki neengcamango zabo?
• UYehova ubalondoloza njani abanyanisekileyo bakhe njengoko bekubulungiseleli bamaKristu?
[Imaphu/Umfanekiso okwiphepha 5]
(Ukuba ufuna inkcazelo ehlahlelwe kakuhle, yiya kwimpapasho)
UBUKUMKANI BASENTLA (UYerobhoham)
KwaDan
KWASHEKEM
EBheteli
UBUKUMKANI BASEZANTSI (URehobhoham)
IYERUSALEM
[Umfanekiso]
UYehova akazange abashiye abanyanisekileyo bakhe, xa uYerobhoham wamisela unqulo lwethole
[Umfanekiso okwiphepha 3]
Iintsikelelo ezazinanditshwa nguSolomon nabalawulwa bakhe zazixhomekeke kokuthile