Qhubeka Unyanisekile Ngentliziyo Emanyeneyo

“Ndiya kuhamba enyanisweni yakho. Yenze imanyane intliziyo yam ukuba iloyike igama lakho.”—INDU. 86:11.

1, 2. (a) Ngokutsho kweNdumiso 86:2, 11, yintoni eya kusinceda sihlale sithembekile kuYehova naxa sijamelene neemvavanyo okanye izilingo? (b) Simele sikuhlakulele nini ukunyaniseka kokwenene?

YINTONI ebangela ukuba amaKristu aye athembeka iminyaka ngoxa esentolongweni okanye etshutshiswa, suke kamva anikezele ekuthandeni izinto eziphathekayo? Oko kuxhomekeka kwiintliziyo zethu zokomfuziselo—oko sikuko ngaphakathi. INdumiso yama-86 inxibelelanisa oko kunyaniseka nentliziyo emanyeneyo; okuthetha ukuthi intliziyo epheleleyo, leyo ingahlulelananga. Umdumisi uDavide wathandaza wathi: “Linda umphefumlo wam, ngokuba ndinyanisekile. UnguThixo wam—msindise umkhonzi wakho—okholose ngawe.” UDavide waphinda wathi: “Ndiyalele, Yehova, ngendlela yakho. Ndiya kuhamba enyanisweni yakho. Yenze imanyane intliziyo yam ukuba iloyike igama lakho.”—INdu. 86:2, 11.

² Ngaphandle kokuba sithembele kuYehova ngeentliziyo zethu zonke, eminye imiba nonxulumano inokukwenza buthathaka ukunyaniseka kwethu kuThixo wenyaniso. Iminqweno yokuzingca ifana nezigcayiseli ezifihlwe kwindlela esihamba kuyo. Kwanokuba siye saqhubeka sinyanisekile kuYehova naphantsi kweemeko ezilingayo sinokuba zizisulu zemigibe kaSathana. Kubalulekile ukuba sihlakulele ukunyaniseka ngokwenene kuYehova ngoku, ngaphambi kokuba sifikelwe ziimvavanyo nezilingo. IBhayibhile ithi: “Ngaphezu kwako konke okunye okumele kulondolozwe, londoloza intliziyo yakho.” (IMize. 4:23) Sinokufunda izifundo ezibalulekileyo kule nkalo, ngokuhlolisisa izinto ezehlela umprofeti wakwaYuda owathunywa nguYehova kuKumkani uYerobhoham wakwaSirayeli.

“Ndikuphe Nesipho”

3. UYerobhoham usabela njani kwisigidimi somgwebo esidluliselwa ngumprofeti kaThixo?

³ Cinga nje ngoku. Indoda yakwaThixo isandul’ ukudlulisela isigidimi esibuhlungu kuKumkani uYerobhoham, omisele unqulo lwethole kubukumkani basemantla bezizwe ezilishumi zakwaSirayeli. Lo kumkani uba lugcwabevu. Uyalela amadoda akhe ukuba abambe lo mthunywa. Kodwa uYehova uyamkhusela umkhonzi wakhe. Ngequbuliso, eso sandla alatha ngaso ngomsindo siyoma, nesibingelelo sonqulo lobuxoki sikrazuka kubini. Kuthi kusenjalo, uYerobhoham atshintshe. Ubongoza indoda yakwaThixo esithi: “Nceda, umbongoze uYehova uThixo wakho uze undithandazele ukuba isandla sam siphiliswe.” Lo mprofeti uyathandaza, size siphiliswe isandla sikakumkani.—1 Kum. 13:1-6.

4. (a) Kutheni isicelo sikakumkani sasikuvavanya ngokwenene ukunyaniseka komprofeti? (b) Waphendula wathini umprofeti?

⁴ UYerobhoham uthi kwindoda yoThixo oyinyaniso: “Yiza ndihambe nawe siye endlwini sithabathe isixhaso, ndikuphe nesipho.” (1 Kum. 13:7) Uza kuthini ke ngoku lo mprofeti? Ngaba uza kubamkela ububele bokumkani emva kokuvakalisa isigidimi somgwebo kuye? (INdu. 119:113) Okanye ngaba uza kusikhaba isimemo sikakumkani nakuba ebonakala ezisola? Ngokuqinisekileyo uYerobhoham usisityebi kangangokuba angabanika izipho zemali eninzi abahlobo bakhe. Ukuba lo mprofeti kaThixo unayo indawana yokuthanda izinto eziphathekayo, kusenokwenzeka ukuba esi sicelo sikakumkani sibe sisilingo kakhulu kuye. Noko ke, uYehova uye wamyalela oku lo mprofeti: “Uze ungadli sonka okanye usele amanzi, yaye uze ungabuyi ngendlela obuhambe ngayo.” Ngoko engagungqi lo mprofeti uthi: “Nokuba ungandinika isiqingatha sendlu yakho andiyi kuhamba nawe ndidle isonka okanye ndisele amanzi kule ndawo.” Yaye lo mprofeti uyayishiya iBheteli ahambe ngenye indlela. (1 Kum. 13:8-10) Sifunda ntoni ngokunyaniseka kokwenene kwisigqibo salo mprofeti?—Roma 15:4.

“Masaneliswe”

5. Ukuthanda izinto eziphathekayo kukuvavanya njani nokunyaniseka?

⁵ Ukuthanda izinto eziphathekayo kungabonakala kungelovavanyo kangako ekunyanisekeni, kodwa kona kunjalo. Ngaba siyakholosa ngesithembiso sikaYehova sokuba uza kusinika oko sikuswele ngokwenene? (Mat. 6:33; Heb. 13:5) Ngaba sikulungele ukuphila ngaphandle kwezinto ezithile zempucuko kobu bomi ukuba asikakwazi ukuzifikelela, kunokuba sizifune ngamandla ethu onke? (Funda eyabaseFilipi 4:11-13.) Ngaba siziva sifuna ukuncama amalungelo enkonzo esinawo ukuze sifumane oko sikufuna ngoku? Ngaba inkonzo yokunyaniseka esiyinika uYehova iza kuqala ebomini bethu? Iimpendulo zethu kule mibuzo ziya kuxhomekeka ekubeni sizimisele ngokupheleleyo na kwinkonzo kaYehova okanye akunjalo. Umpostile uPawulos wathi: “Uzinikelo lobuthixo kunye nokwanela, kuyinzuzo enkulu. Asingenanga nanto ehlabathini, ngoko ke asinakuphuma nanto. Ukuba sinesixhaso nesambatho, masaneliswe zezo zinto.”—1 Tim. 6:6-8.

6. Ziziphi ‘izipho’ esinokuzinikwa, yaye yintoni eya kusinceda sibone enoba sinokuzamkela kusini na?

⁶ Ngokomzekelo, umqeshi usenokusithembisa uchatha kumvuzo wethu nangezinye izinto. Okanye mhlawumbi sifumanise ukuba singanemali ethe kratya ukuba sifuduka siye kusebenza kwelinye ilizwe okanye ummandla. Ekuqaleni, loo mathuba anokubonakala eyintsikelelo evela kuYehova. Kodwa ngaphambi kokwenza isigqibo, kutheni singaqali sihlole iintshukumisa zethu? Eyona nto sifanele siyixhalabele yile, “Isigqibo sam siya kuluchaphazela njani ulwalamano lwam noYehova?”

7. Kutheni kubalulekile ukukuncothula neengcambu ukuthanda izinto eziphathekayo?

⁷ Inkqubo kaSathana ikukhuthaza ngamandla ukuthanda izinto eziphathekayo. (Funda eyoku-1 kaYohane 2:15, 16.) Injongo kaSathana kukonakalisa iintliziyo zethu. Ngoko, simele sizimisele ukukuncothula neengcambu ukuthanda izinto eziphathekayo ezintliziyweni zethu. (ISityhi. 3:15-17) KuYesu akuzange kube nzima ukwala xa uSathana wayefuna ukumnika zonke izikumkani zehlabathi. (Mat. 4:8-10) Walumkisa ngelithi: “Gcinani amehlo enu evulekile nize nizilinde kulo lonke uhlobo lwenkanuko, kuba kwanaxa umntu enentabalala ubomi bakhe abuphumi kwizinto anazo.” (Luka 12:15) Ukunyaniseka kuya kusinceda sithembele kuYehova kunakwiziqu zethu.

Umprofeti Omdala “Wamkhohlisa”

8. Ukunyaniseka komprofeti kaThixo kwavavanywa njani?

⁸ Izinto ngezazimhambele kakuhle umprofeti kaThixo ukuba wayeqhubeke nohambo lwakhe olugodukayo. Noko ke, akuzange kube kudala wajamelana nolunye uvavanyo. IBhayibhile ithi: “Umprofeti othile omdala wayehlala eBheteli, yaye oonyana bakhe beza kuye baza bambalisela” konke okwakwenzeke ngaloo mini. Isakuva loo ngxelo, le ngwevu yabacela ukuba bayifakele isali kwiesile layo ukuze isukele lo mprofeti kaThixo. Akuzange kube kudala emva koko, yamfumana lo mprofeti ephumle ngaphantsi komthi omkhulu yaza yathi kuye: “Hamba nam siye endlwini uye kudla isonka.” Xa le ndoda yoThixo oyinyaniso isala isicelo salo, eli xhego lithi: “Nam ndingumprofeti njengawe, yaye ingelosi ithethile kum ngelizwi likaYehova, isithi, ‘Buya naye niye endlwini yakho ukuze adle isonka asele namanzi.’” Noko ke, iZibhalo zithi: “Wamkhohlisa.”—1 Kum. 13:11-18.

9. Zithini iZibhalo ngabantu abakhohlisayo, yaye badla ngokwenzakalisa bani?

⁹ Enoba wayenaziphi iintshukumisa umprofeti omdala, kodwa waxoka. Kusenokwenzeka ukuba umprofeti omdala wakha wangumprofeti othembekileyo kaYehova. Noko ke, ngesi sihlandlo wayekhohlisa. IZibhalo ziyikhalimela kabuhlungu loo nto. (Funda IMizekeliso 3:32.) Abantu abakhohlisayo abenzakalisi bona nje ngokomoya kodwa badla ngokwenzakalisa nabanye.

“Wajika” Nalo Ixhego

10. Umprofeti kaThixo wasabela njani kwisimemo sexhego, yaye oko kwaphumela entwenini?

¹⁰ Umprofeti ovela kwaYuda kwakumele ukuba ububonile ubuqhetseba balo mprofeti mdala. Wayemele azibuze oku, ‘Kutheni ngoku uYehova sel’ ethumela ingelosi komnye umntu nemiyalelo emitsha eza kum?’ Lo mprofeti ngewayecele uYehova ukuba alucacise olu lwalathiso, kodwa iZibhalo azibonisi ukuba wenza ngolo hlobo. Kodwa, ‘wajika [nexhego] ukuze adle isonka endlwini yalo asele namanzi.’ UYehova akazange ayithande loo nto. Lo mprofeti ukhohlisiweyo wathi xa sele egoduka ebuyela kwaYuda, wafunyanwa yingonyama yaza yambulala. Eso yaba sisiphelo esibi somsebenzi wakhe wobuprofeti!—1 Kum. 13:19-25.a

11. Nguwuphi umzekelo omhle owamiselwa nguAhiya?

¹¹ Kwelinye icala, umprofeti uAhiya, owathunyelwa ukuba athambise uYerobhoham abe ngukumkani wahlala ethembekile de wamdala. Xa uAhiya wayesele ekhulile yaye engaboni, uYerobhoham wathumela umfazi wakhe ukuba aye kubuza uAhiya ngempilo yonyana wabo owayegula. Ngenkalipho uAhiya waprofeta echaza ukuba unyana wabo wayeza kufa. (1 Kum. 14:1-18) Phakathi kweentsikelelo ezininzi uAhiya awazifumanayo lilungelo lokuba negalelo ekubhaleni iLizwi likaThixo eliphefumlelweyo. Waba negalelo njani? Kamva imibhalo yakhe yasetyenziswa ngumbingeleli uEzra njengomthombo wenkcazelo.—2 Kron. 9:29.

12-14. (a) Sinokufunda ntoni kwisiganeko esibandakanya umprofeti oselula? (b) Yenza umzekelo ngemfuneko yokuthandazela ukusisebenzisa kakuhle isiluleko esisekelwe eBhayibhileni esinikelwa ngabadala?

¹² IBhayibhile ayisichazi isizathu sokuba umprofeti oselula angabuzi uYehova ngaphambi kokuba ajike aye kutya aze asele nomprofeti olixhego. Akungebi bethu eli xhego lamxelela oko wayefuna ukukuva? Sifunda ntoni thina koku? Sifanele siqiniseke ngokupheleleyo ngokufaneleka kwemilinganiselo kaYehova. Yaye simele sizimisele ukuyilandela enoba sekumnyam’ entla.

¹³ Abanye beva oko bathanda ukukuva xa becetyiswa. Ngokomzekelo, umvakalisi unokufumana umsebenzi oza kunciphisa ixesha alichitha nentsapho yakhe nakwimisebenzi yokomoya. Usenokucela icebiso kumdala. Lo mdala unokutshayelela amagqabaza ngokuchazela lo mzalwana ukuba akazi kumxelela indlela amakayixhase ngayo intsapho yakhe. Emva koko unokuhlolisisa kunye nalo mzalwana iingozi zokomoya ezibandakanyekileyo ekwamkeleni lo msebenzi awunikwayo. Ngaba lo mzalwana uya kukhumbula kuphela intshayelelo yomdala, okanye uya kuhlolisisa nezinye izinto abaye bancokola ngazo kulo mba? Ngeliphandle lo mzalwana kuya kufuneka akhangele oko kuya kumnceda ngokomoya.

¹⁴ Cinga nje ngenye imeko. Udade othile usenokubuza umdala enoba ufanele ahlukane kusini na nomyeni wakhe ongakholwayo. Akuthandabuzeki ukuba, lo mdala uya kumchazela ukuba isigqibo sokwahlukana okanye ukungahlukani nomyeni wakhe sixhomekeke kuye. Umdala uya kwandula ahlolisise isiluleko seBhayibhile kulo mba. (1 Kor. 7:10-16) Ngaba lo dade uya kukuhlolisisa ngendlela efanelekileyo oko kuthethwa ngumdala? Okanye ngaba sele ezixelele ukuba uza kumshiya umyeni wakhe? Xa esenza isigqibo, kuya kuba kuhle ngalo dade ukuba athandazele ukusebenzisa isiluleko esisekelwe eBhayibhileni.

Thozama

15. Sifunda ntoni kwimpazamo yomprofeti kaThixo?

¹⁵ Yintoni enye esinokuyifunda kwimpazamo eyenziwa ngumprofeti wakwaYuda? IMizekeliso 3:5 ithi: “Kholosa ngoYehova ngayo yonke intliziyo yakho, ungayami ngokwakho ukuqonda.” Kunokuba aqhubeke ethembele kuYehova njengangaphambili, ngesi sihlandlo lo mprofeti uvela kwaYuda wazithemba. Impazamo yakhe yambulalisa yaye walahlekana negama elihle awayezenzele lona noThixo. Amava akhe akubethelela ngamandla ukubaluleka kokukhonza uYehova ngokuthozama nangokunyaniseka.

16, 17. Yintoni eya kusinceda siqhubeke sinyanisekile kuYehova?

¹⁶ Ukuzingca okusentliziyweni yethu kudla ngokusilahlekisa. “Intliziyo inenkohliso kunayo nantoni na yaye iyatyhudisa.” (Yer. 17:9) Ukuze sihlale sinyanisekile kuYehova, simele siqhubeke sisebenza nzima ukuze silahle ubuntu obudala notyekelo lwabo lokukhukhumala nokuzithemba ngokugqithiseleyo. Yaye simele sambathe ubuntu obutsha, “obadalwa ngokokuthanda kukaThixo ngobulungisa bokwenyaniso nokunyaniseka.”—Funda eyabase-Efese 4:22-24.

¹⁷ IMizekeliso 11:2 ithi: “Bunabathozamileyo ubulumko.” Ukuthembela kuYehova ngokuthozama kusinceda siphephe ukwenza iimpazamo ezinzulu. Ngokomzekelo, ukudimazeka kunokuyigqwetha lula indlela esizibona ngayo izinto. (IMize. 24:10) Sinokudinwa kukuba nenxaxheba kwiinkalo ezithile zenkonzo engcwele size sivakalelwe kukuba senze ngokwaneleyo ukutyhubela iminyaka, sicinge ukuba sele kulithuba labanye ukuba bathathe apho siyeke khona. Okanye sisenokufuna ukuphila ubomi “obuqhelekileyo.” Noko ke, ‘ukuzibhokoxa ngamandla’ ‘nokusoloko sinokuninzi kokwenza emsebenzini weNkosi’ kuya kuzikhusela iintliziyo zethu.—Luka 13:24; 1 Kor. 15:58.

18. Yintoni esinokuyenza xa singaqinisekanga ngesigqibo esifanelekileyo?

¹⁸ Maxa wambi kusenokufuneka senze izigqibo ezinzima, sibe singayazi kakuhle eyona nto ifanelekileyo simele siyenze. Ngaba siya kutyekela ekufuneni ukuzicombululela ngokwethu loo mba? Nanini na singena kwiimeko ezinjalo, siya kuba silumkile ukuba sicela uncedo lukaYehova. UYakobi 1:5, uthi: “Ukuba kukho nabani na kuni oswele ubulumko, makaqhubeke ebucela kuThixo, kuba unika bonke ngesisa.” UBawo wethu osezulwini uya kusinika umoya oyingcwele oya kusinceda senze izigqibo ezifanelekileyo.—Funda uLuka 11:9, 13.

Zimisele Ukuhlala Unyanisekile

19, 20. Sifanele sizimisele ukwenza ntoni?

¹⁹ Iminyaka enzima eyalandela ukukreqa kukaSolomon kunqulo lokwenyaniso yakuvavanya ngokuqatha ukunyaniseka kwabakhonzi bakaThixo. Liyinyaniso elokuba abaninzi balalanisa ngeendlela ezahlukahlukeneyo. Noko ke, abanye baqhubeka benyanisekile kuYehova.

²⁰ Suku ngalunye sijamelana nokhetho nezigqibo ezivavanya ukunyaniseka kwethu. Nathi sinokuzingqina sithembekile. Masisoloko sinyanisekile kuYehova njengoko simanyanisa iintliziyo zethu, siqiniseke ngokupheleleyo ukuba uya kuqhubeka ebasikelela abantu bakhe abanyanisekileyo.—2 Sam. 22:26.

[Umbhalo osemazantsi]

Ubuya Kuphendula Uthini?

• Kutheni sifanele sizimisele ukukuncothula neengcambu ukuthanda izinto eziphathekayo ezintliziyweni zethu?

• Yintoni eya kusinceda sihlale sinyanisekile kuYehova?

• Ukuthozama kunokusinceda njani sihlale sinyanisekile kuThixo?

[Imifanekiso ekwiphepha 9]

Ngaba ukufumanisa kunzima ukunyamezela izilingo?

[Imifanekiso ekwiphepha 10]

Ngaba uyathandaza njengoko uhlolisisa isiluleko esisekelwe eBhayibhileni?