Ngubani Onokulazi Ikamva?
“NdinguLowo Ungokobuthixo . . . , Lowo uxela ukuphela kwasekuqaleni, kwakudala izinto ebezingekenziwa.”—Isaya 46:9, 10.
KULA maxesha angazinzanga, abahlalutyi bezopolitiko, abezemali nabezentlalo bafunda imbali nezinto ezenzekayo ngoku kuba bezama ukwazi ngekamva. Ekubeni bekufuna ngamehlo abomvu ukwazi ikamva labo, abanye baye babhenela kubavumisi ngeenkwenkwezi okanye kubantu abasebenzelana nemimoya. Bonke aba bantu badla ngokubuya nemband’ esikhova. Ngaba kunzima ukwazi into eza kwenzeka kweli hlabathi, kwiintsapho zethu nakuthi? Ngaba ngokwenene ukho umntu onokulazi kwangaphambili ikamva?
Kumazwi omprofeti uIsaya acatshulwe ngasentla, uThixo uSomandla, uYehova, wazichaza njengalowo uxela ikamva kusengaphambili. Ngomprofeti uIsaya, uThixo waxela kwangaphambili ngokukhululwa kwamaSirayeli kubukhoboka baseBhabhiloni nokuze akhe iYerusalem netempile ngokutsha. Sasichane kangakanani esi siprofeto? Kusasele iminyaka emalunga nama-200, uIsaya wamchaza ngegama uKoreshi owayeza kubhukuqa iBhabhiloni. Ngaphezu koko, uIsaya wachaza icebo likaKoreshi lokuphambukisa uMlambo umEfrati, owawukhusela eso sixeko. Wade wathi uKoreshi wayeza kufika iingcango ezivulwa ngambini zesixeko zivuliwe, nto leyo eyayiza kumenza oyise lula.—Isaya 44:24–45:7.
Xa umntu ethelekiswa noThixo, akakwazi ukubona ikamva. UKumkani uSolomon osisilumko wabhala: “Musa ukuqhayisa ngemini elandelayo, kuba akukwazi okuya kuzalwa yiloo mini.” (IMizekeliso 27:1) Loo mazwi aseyinyaniso nanamhlanje. Umntu akazi kwanekamva eli lakhe. Wahluke ngantoni uThixo? Uzazi kakuhle zonke izinto azidalileyo, iimpawu zazo notyekelo lwabantu. UThixo unokubona izinto eziza kwenziwa ngabantu ngabanye kwaneentlanga, xa ekhetha ukwenjenjalo. Ukongezelela unamandla okulawula indlela eziza kwenzeka ngayo izinto. Xa exela izinto eziza kwenzeka ngabaprofeti bakhe, uba ‘nguLowo wenza ilizwi lomkhonzi wakhe libe yinyaniso, naLowo uphumeza ngokupheleleyo icebo labathunywa bakhe.’ (Isaya 44:26) NguYehova uThixo kuphela onokwenza oku.
UIsaya wayephila kwiminyaka engaphezu kwengama-700 ngaphambi kokuzalwa kukaYesu, onguMesiya. Sekunjalo waprofeta ngokuza kukaMesiya. Noko ke, ukususela ngenkulungwane ye-18 ukusa phambili, abahlalutyi beBhayibhile baye bathi incwadi kaIsaya ayichananga. Babemi ngelithi iziprofeto zikaIsaya zabhalwa sele zenzekile. Ngaba babechanile? Ngowe-1947 ezi zityholo zangqineka zibubuxoki xa kwafunyanwa umbhalo wencwadi kaIsaya kunye neminye imisongo yamandulo kumqolomba okufuphi noLwandle Olufileyo. Abaphengululi bathi lo mbhalo wabhalwa kwiminyaka engaphezu kwekhulu ngaphambi kokuzalwa kukaMesiya okanye uKristu ekwakuprofetwe ngaye. Ewe, iBhayibhile yalixela kwangaphambili ikamva.
UIsaya nabanye ababhali beBhayibhile babengenakuzazi iziganeko eziza kwenzeka kwikamva. Kunoko, “bathetha ngokuphuma kuThixo njengoko babeqhutywa ngumoya oyingcwele.” (2 Petros 1:21) Kumanqaku alandelayo, siza kuxubusha ngeziprofeto zikaIsaya eziphathelele ubomi bukaYesu. Emva koko, siza kuqwalasela iziganeko uYesu nabafundi bakhe abaprofeta ngazo ezenzeka kweli xesha lethu nezexa elizayo.