Iinyembezi Kwintsuba

ITYENDYANA lomfana lalibhadula entlango. Libuhlungu yaye lidimazekile, liyengezelis’ iinyembezi, lathandazela ububele nemfesane kaThixo walo uYehova, limbongoza lisithi: “Iinyembezi zam zifake kwintsuba yakho.” (INdumiso 56:8) Loo ndoda yayinguDavide, owaba ngukumkani wamaSirayeli. Kodwa yayiyintoni le ntsuba wayethetha ngayo, yaye uThixo unokuzifaka njani iinyembezi zethu kuyo?

UDavide wayeyazi le ntsuba. Yayisetyenziselwa ukugcina amanzi, ioli, iwayini kwanebhotolo. Oonothwal’ impahlana baseSahara, njengamaTuareg, basayisebenzisa intsuba eyenziwe ngesikhumba sebhokhwe okanye segusha. Ezi ntsuba zinokugcina amanzi amaninzi. Iintsuba zinokukwazi ukuwagcina amanzi ebanda, nakwilanga lasentlango eligqats’ ubhobhoyi. Kumaxesha amandulo, zazithwalwa ngeedonki okanye ngeenkamela. Kule mihla, ziyafumaneka nakwiimoto ezitsala ngaw’ omane!

Amazwi kaDavide achukumisayo athetha ngentsuba anokuba nentsingiselo nakuthi. Njani? IBhayibhile ithi uSathana uyalilawula eli hlabathi yaye ‘unomsindo omkhulu.’ Ngenxa yoko ihlabathi lizaliswe ngooyeha. (ISityhilelo 12:12) Ngoko ke, kukho abantu abaninzi ababandezeleke njengoDavide ngokweemvakalelo, engqondweni, nasemzimbeni—ngokukodwa abo bazama ukukholisa uThixo. Ngaba wena ungomnye wabo? Ngenkalipho, maxa wambi ‘belila,’ aba bantu bathembekileyo bahlala beyigcinile ingqibelelo yabo kuThixo. (INdumiso 126:6) Baqinisekile ukuba uYise osemazulwini akaboni nje izilingo abatyhubela kuzo kodwa ubona nendlela abavakalelwa ngayo. Uyayibona intlungu abakuyo abakhonzi bakhe, yaye uyazikhumbula iinyembezi nokubandezeleka kwabo, ngokungathi kunjalo, uzigcina kwintsuba yakhe.