Into Esiyifunda KuYesu

Ngethemba Labafi

UYesu wavusa abantu abathathu, nto leyo ebonisa ithemba ngabafileyo. (Luka 7:11-17; 8:49-56; Yohane 11:1-45) Ukuze siqonde ngethemba labafi, kufuneka siqale siqonde unobangela nemvelaphi yokufa.

Kutheni Sigula Yaye Sisifa?

Emva kokuba uYesu exolele izono zabantu, baphiliswa. Ngokomzekelo, xa kweza kuye indoda enesiphene, wathi: “‘Kukuphi okulula ngakumbi, ukuthi, Izono zakho zixolelwe, okanye ukuthi, Sukuma uhambe? Noko ke, ukuze nazi ukuba uNyana womntu unegunya emhlabeni lokuxolela izono—’ ngoko wathi kofe umzimba: ‘Sukuma, thabatha umandlalo wakho, uhambe ugoduke.’” (Mateyu 9:2-6) Ngoko ukugula nokufa zibangelwa sisono. Isono sasizuz’ ilifa kumntu wokuqala, uAdam.—Luka 3:38; Roma 5:12.

Kwakutheni Ukuze UYesu Afe?

UYesu akazange enze sono. Ngoko wayengafanele afe. Ngokusifela kwakhe wayehlawula ityala lethu lesono. Wathi igazi lakhe ‘laliza kuphalala ngenxa yabaninzi ukuze kuxolelwe izono.’—Mateyu 26:28.

Kwakhona uYesu wathi: “UNyana womntu weza, kungekhona ukuze alungiselelwe, kodwa ukuze alungiselele nokuze anikele ngomphefumlo wakhe ube yintlawulelo ngenxa yabaninzi.” (Mateyu 20:28) UYesu wabiza ixabiso alihlawuleyo ngokuthi ‘yintlawulelo’ kuba likhulula abanye ekufeni. Waphinda wathi: “Mna ndizele ukuba zibe nobomi yaye zibe nabo ngokuyintabalala.” (Yohane 10:10) Ukuze siliqonde ngokupheleleyo ithemba ngabafileyo, simele siyazi imeko abakuyo.

Kwenzeka Ntoni Ekufeni?

Xa kwafa umhlobo wakhe uLazaro, uYesu wachaza oko kwenzeka ekufeni. Wathi kubafundi bakhe: “‘ULazaro umhlobo wethu uye kuphumla, kodwa ndiyahamba ndiya apho [eBhethani] ukuze ndimvuse ebuthongweni.’ . . . Kodwa bona babecinga ukuba wayethetha ngokuphumla ebuthongweni. Ke ngoko, uYesu wathi kubo ngokuphandle: ‘ULazaro ufile.’” Ngoko uYesu wayenza yacaca into yokuba abafileyo balele, abakho zingqondweni.—Yohane 11:1-14.

Xa uYesu wavusa umhlobo wakhe uLazaro, wayesele eneentsuku ezine efile. IBhayibhile ayisichazeli ukuba uLazaro uthi kwakusenzeka ntoni ngoxa wayefile. Ngoxa wayefile uLazaro wayengekho zingqondweni engazi nto.—INtshumayeli 9:5, 10; Yohane 11:17-44.

Liyintoni Ithemba Ngabafi?

Abafileyo baya kubuyela ebomini ukuze baphile ngonaphakade. UYesu wathi: “Liyeza ilixa ekuya kuthi ngalo bonke abo bakumangcwaba enkumbulo balive ilizwi lakhe [uYesu] baze baphume.”—Yohane 5:28, 29.

Eli themba libonisa uthando analo uThixo. UYesu wathi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.”—Yohane 3:16; ISityhilelo 21:4, 5.

Ukuze ufumane inkcazelo engakumbi, funda isahluko 6 sencwadi ethi Yintoni Ngokwenene Efundiswa YiBhayibhile?a

[Umbhalo osemazantsi]